„თქვენ შეცვალეთ ჩემი წარმოდგენა იეჰოვას მოწმეებზე“
ასე გამოეხმაურა პოლონეთის ციხის ერთ-ერთი მომსახურე 1998 წლის 15 ოქტომბრის „საგუშაგო კოშკის“ სტატიას, რომელიც იეჰოვას მოწმეების საქმიანობას ეხებოდა. სტატიაში, სახელწოდებით „როდესაც გაქვავებული გული გამოხმაურებას იწყებს“, მოთხრობილი იყო პოლონეთის ქალაქ ვოლუვის ციხის პატიმრებთან იეჰოვას მოწმეთა წარმატებით ჩატარებული ღონისძიების შესახებ.
ზემოხსენებული ჟურნალის, „საგუშაგო კოშკი“, გამოქვეყნებამდე, 1998 წლის 13 სექტემბერს ვოლუვის ციხეში პატიმრებისთვის ამ ჟურნალის გაცნობის მიზნით სპეციალური შეხვედრა გაიმართა. ადგილობრივი მოწმეების გარდა, მოწვეულ დამსწრეთა შორის იყვნენ მონათლული და სხვა დაინტერესებული პატიმრები, აგრეთვე ციხის ზოგიერთი მომსახურე. ქვემოთ მოყვანილია დამსწრეთა შენიშვნები.
იერჟიმ, ერთ-ერთმა იეჰოვას მოწმემ, რომელიც დაახლოებით ხუთი წლის წინათ ციხეში მოინათლა, თქვა: „მე ძალიან ბედნიერი ვარ, რომ დღეს შემიძლია წავიკითხო, რამდენად დიდ ძალისხმევას იჩენდნენ ადგილობრივი კრებების ძმები ჩვენს დასახმარებლად“. მან დასძინა: „ვცდილობ საკუთარი თავის გაუმჯობესებას და ვხედავ კიდეც, როგორ მაყალიბებს იეჰოვა“.
სხვა პატიმარმა, სახელად ზძიშვავმა, ციხეში ქადაგების თაობაზე თქვა: „ამჟამად ოთხი მსჯავრდადებული მზადაა მოსანათლად, ხოლო ახლად დაინტერესებული პირები აგრძელებენ ჩვენს დარბაზში შეხვედრებზე დასწრებას. ეს სტატია ჩვენთვის მეტად აღმძვრელია იმისთვის, რომ ამ მხრივ შემდგომშიც ვიაქტიუროთ“. რა დადებითი განწყობილებაა, თუ გავითვალისწინებთ, რომ ზძიშვავს კიდევ 19 წელი აქვს ციხეში გასატარებელი!
ვოლუვის ციხის შესახებ სტატიის წაკითხვის შემდეგ ერთმა ციხის მომსახურემ თქვა: „ჩვენ განსაკუთრებული პატივი დაგვდეს. ვერასოდეს წარმოვიდგენდი, რომ ეს ციხე ასეთ დადებით შეფასებას მიიღებდა და მის შესახებ მსოფლიოში 130 ენაზე გამომავალი ჟურნალიდან გაიგებდნენ. მე მომწონხართ და ვაფასებ თქვენს ძალისხმევას, რომელსაც პატიმრებისთვის იჩენთ“. სხვამ დასძინა: „თქვენ შეცვალეთ ჩემი წარმოდგენა იეჰოვას მოწმეებზე. ადრე მე რელიგიურ ფანატიკოსებად გთვლიდით. ახლა კი ვხედავ, რომ პრინციპების დამცველი ადამიანები ხართ“.
ვოლუვის ციხის ზედამხედველმა, მარეკ გაიოსმა, გაიღიმა და თქვა: „თავიდან ვფიქრობდით, რომ ძალიან ცოტას თუ მიაღწევდით. ვთვლიდით, რომ თქვენი რელიგია, უბრალოდ, პატიმრების ბიბლიით გამოსწორებას ცდილობდა. როდესაც თქვენს მიერ წამოწყებული საქმიანობის შედეგები ვიხილეთ, გადავწყვიტეთ, რომ თქვენთან მჭიდროდ გვეთანამშრომლა. აგერ უკვე ცხრა წელია, დაუღალავად მოდიხართ აქ და მე ძალიან ვაფასებ იმას, რაც უკვე გააკეთეთ“.
მაგრამ როგორ მიიღეს ეს სტატია ვოლუვის ციხის ძირითადმა მობინადრეებმა? პატიმრებს შორის ინტერესი იმდენად დიდი იყო, რომ მოწმეებს ამ ჟურნალის თავიანთი მარაგი ციხეში ამოეწურათ. ციხის პერსონალმაც ინტერესი გამოამჟღავნა და 40 დამატებითი ჟურნალი მოითხოვა. მზარდი მოთხოვნილების დასაკმაყოფილებლად, ადგილობრივმა კრებებმა ძმებს ციხეში 100 დამატებითი ჟურნალის გამოყოფით აღმოუჩინა დახმარება. ამავე დროს, ციხეში შეხვედრებზე დამსწრეთა რიცხვიც გაიზარდა.
ციხის ერთ-ერთმა მომსახურემ, პიოტრ ჰოდუენმა, რომელიც მჭიდროდ თანამშრომლობდა იეჰოვას მოწმეებთან, თქვა: „გადავწყვიტეთ, ეს სტატია თვალსაჩინოებისთვის ციხის ყველა სტენდზე გაგვეკრა. ვიმედოვნებთ, რომ ყველა პატიმარი, რომელიც ჯერ კიდევ არ სწავლობს თქვენთან ბიბლიას, ჟურნალს წაიკითხავს“.
მოწმეების კარგ მაგალითს და მათს გადაწყვეტილებას, ქადაგებას ყოველი ღონე მოახმარონ, კვლავ კარგი შედეგები მოაქვს. გარდა 15 პატიმრისა, რომლებიც მოინათლნენ, ციხეში მომუშავეებიდანაც ორმა მიუძღვნა თავი იეჰოვას და კიდევ ერთმა მოისურვა ბიბლიის შესწავლა. რა თქმა უნდა, ძმები, რომლებიც ვოლუვის ციხეში ქადაგებენ, თავიანთი წარმატებისთვის მთელ პატივს იეჰოვას მიაგებენ (შეადარეთ 1 კორინთელთა 3:6, 7).
[სურათი 28 გვერდზე]
იეჰოვას სამი მოწმე და პატიმარი ჟურნალის წარდგენისას ციხის დარბაზში.