გულმოდგინედ განაგრძეთ ღვთის სიტყვის კვლევა!

იეჰოვას ყველა მსახურს სურს, ღვთისმოსაწონი იყოს. ამიტომაც არ იშურებენ ძალ-ღონეს იმისათვის, რომ რწმენა განიმტკიცონ და გულმოდგინედ იმსახურონ. მოციქული პავლე ყურადღებას ამახვილებდა ერთ საშიშროებაზე, რომელსაც მისი თანამედროვე ზოგი იუდეველი ვერსად გაექცა. ის წერდა: „მათ . . . ღვთისთვის მოშურნეობა აქვთ, მაგრამ არა საფუძვლიანი ცოდნით“ (რომ. 10:2). ცხადია, რომ ჩვენი რწმენა და იეჰოვას თაყვანისცემა მხოლოდ ემოციებზე არ უნდა იყოს დაფუძნებული. საჭიროა, საფუძვლიანი ცოდნა გვქონდეს იეჰოვას შესახებ და საფუძვლიანად ვიცოდეთ მისი ნება.

სხვა წერილში პავლემ ღვთის მოსაწონი მოქმედება ცოდნის შეძენას დაუკავშირა. ის ლოცულობდა, რომ ქრისტეს მიმდევრები „[ღვთის] ნების საფუძვლიანი ცოდნით“ აღვსილიყვნენ, „რათა იეჰოვას ღირსად“ ევლოთ და „ღვთის შესახებ საფუძვლიანი ცოდნის“ გაღრმავებით ყველაფერში ესიამოვნებინათ მისთვის (კოლ. 1:9, 10). რატომ არის საფუძვლიანი ცოდნა ასე მნიშვნელოვანი? რატომ უნდა ვიღრმავებდეთ ამ ცოდნას?

რწმენის საფუძველი

ჩვენი რწმენის საფუძველი ბიბლიური ცოდნაა ღვთის და მისი ნების შესახებ. ასეთი საფუძვლიანი ცოდნის გარეშე იეჰოვას მიმართ ჩვენი რწმენა ხუხულასავით დაინგრეოდა. პავლე მოგვიწოდებს გააზრებულად შევასრულოთ წმინდა მსახურება და განვიახლოთ გონება (რომ. 12:1, 2). ამაში ბიბლიის რეგულარული შესწავლა დაგვეხმარება.

ერთი პოლონელი და, სახელად ევა, რომელიც პიონერად მსახურობს, ამბობს: „ღვთის სიტყვა რეგულარულად რომ არ მესწავლა, იეჰოვას შესახებ საფუძვლიან ცოდნას ვერ გავიღრმავებდი; ქრისტიანულ სახეს მალევე დავკარგავდი და ღვთის მიმართ რწმენა შემისუსტდებოდა, ანუ სულიერად გავღარიბდებოდი“. ნურასოდეს დავუშვებთ, რომ სულიერად გავღარიბდეთ! განვიხილოთ ერთი ღვთისმოშიში კაცის მაგალითი, რომელიც იეჰოვას შესახებ საფუძვლიან ცოდნას სულ იღრმავებდა და შედეგად ღვთის მოწონებით სარგებლობდა.

„როგორ მიყვარს შენი კანონი!“

ჩვენს ბიბლიებში 119-ე ფსალმუნში ჩაწერილი სიტყვები გვიჩვენებს, რა დამოკიდებულება ჰქონდა ფსალმუნმომღერალს იეჰოვას კანონების, შეხსენებების, ბრძანებებისა და წესების მიმართ. ფსალმუნმომღერალი წერდა: „შევიყვარებ შენს წესებს . . . მიყვარს შენი შეხსენებები“. მან ისიც დაწერა: „როგორ მიყვარს შენი კანონი! მასზე ვფიქრობ მთელი დღე“ (ფსალმ. 119:16, 24, 47, 48, 77, 97).

გამოთქმები „მიყვარს“ და „ვფიქრობ“ იმაზე მიუთითებს, რომ დავითს სიამოვნებას ჰგვრიდა ღვთის სიტყვაზე ფიქრი. აქედან ნათლად ჩანს, რომ ფსალმუნმომღერალს უყვარდა ღვთის კანონი. ეს სიყვარული მხოლოდ ემოციაზე არ იყო დაფუძნებული. ფსალმუნმომღერალს მთელი გულით სურდა, ეფიქრა ღვთის კანონზე, რომ ჩასწვდომოდა იეჰოვას სიტყვებს. როგორც ვხედავთ, მას სურდა, რაც შეიძლება კარგად, გასცნობოდა ღმერთს და სცოდნოდა მისი ნება.

აშკარაა, რომ ღვთის სიტყვის მიმართ ფსალმუნმომღერლის სიყვარული გულის სიღრმიდან მომდინარეობდა. შეგვიძლია საკუთარ თავს ვკითხოთ: ჩემზეც შეიძლება იმავეს თქმა? მსიამოვნებს ყოველდღე ბიბლიის კითხვა და წაკითხულის გაანალიზება? ლოცვით ვიწყებ ბიბლიის კითხვას და გულდასმით ვკითხულობ? ამ კითხვების პასუხებიდან დავინახავთ, რამდენად ვიღრმავებთ „ღვთის შესახებ საფუძვლიან ცოდნას“.

ევა ამბობს: «ვცდილობ, უკეთესი პირადი შესწავლა მქონდეს. მას შემდეგ, რაც ბროშურა „ეწვიეთ მადლიან ქვეყანას“ მივიღეთ, თითქმის ყოველ შესწავლაზე ვიყენებ მას. უფრო და უფრო ხშირად ვეძებ საჭირო მასალას, „წმინდა წერილების საკვლევ ცნობარსა“ და სხვა პუბლიკაციებში».

განვიხილოთ ვოიჩეკისა და მალგორზატას მაგალითიც, რომლებსაც ოჯახში ბევრი პასუხისმგებლობა აკისრიათ. როგორ გეგმავენ ისინი ბიბლიის პირად შესწავლას? „ღვთის სიტყვას თითოეული ჩვენგანი პირადად და შეძლებისდაგვარად ვიკვლევთ. შემდეგ ოჯახური შესწავლის დროს ან ყოველდღიური საუბრებისას ერთმანეთს ვუზიარებთ საინტერესო და მოქმედებისკენ აღმძვრელ საკითხებს“. გულმოდგინე პირად შესწავლას მათთვის დიდი სიხარული მოაქვს და ბიბლიური ცოდნის გაღრმავებაშიც ეხმარება.

გულმოდგინედ სწავლა

ქრისტიანებს გვჯერა, რომ ღვთის ნებაა, „ყველანაირი ადამიანი გადარჩეს და ჭეშმარიტების საფუძვლიანი ცოდნა მიიღოს“ (1 ტიმ. 2:3, 4). აქედან ნათლად ჩანს, რამდენად მნიშვნელოვანია ბიბლიის კითხვა და „ნათქვამის აზრში“ წვდომა (მათ. 15:10). ამაში გულმოდგინედ სწავლა დაგვეხმარება. შესწავლისადმი მსგავსი დამოკიდებულება გამოავლინეს ძველ დროში მცხოვრებმა ბერეელებმა, როდესაც პავლემ სასიხარულო ცნობა გაუზიარა: „[მათ] უდიდესი გულმოდგინებით მიიღეს სიტყვა და ყოველდღე გულდასმით იკვლევდნენ წმინდა წერილებს, ნამდვილად ასე თუ არისო“ (საქ. 17:11).

ჰბაძავთ ბერეელებს? სწავლობთ ბიბლიას გულმოდგინედ და შესწავლის დროს ხართ კონცენტრირებული? ქრისტიანს შეუძლია მიჰბაძოს ბერეელებს მაშინაც კი, თუ სწავლა ადრე დიდ სიამოვნებას არ ანიჭებდა. გარდა ამისა, ზოგ ასაკოვანს რაც უფრო ემატება წლები, მით უფრო ნაკლებად კითხულობს და სწავლობს; მაგრამ ქრისტიანები ასე არ უნდა იქცეოდნენ. ასაკის მიუხედავად, ყველას შეუძლია შეეცადოს, შესწავლისას გონება არ გაეფანტოს. კითხვისას ყურადღება მიაქციეთ საკითხებს, რომელთა შესახებაც სხვებს მოუთხრობდით. მაგალითად, პირადი შესწავლის დროს მიღებული ინფორმაცია შეგიძლიათ მეუღლეს ან ქრისტიან მეგობარს გაუზიაროთ. ეს თქვენ გულისყურით კითხვაში დაგეხმარებათ, სხვებზე კი დადებითად იმოქმედებს.

მიჰბაძეთ ღვთის ძველი დროის მსახურის, ეზრას მაგალითს, რომელიც „იეჰოვას კანონში რჩევის საძებნელად“ განაწყობდა გულს (ეზრ. 7:10). როგორ შეგიძლიათ ამის გაკეთება? შესასწავლად მყუდრო გარემოს შექმნითა და შესწავლის დაწყებამდე ლოცვაში იეჰოვასთვის ხელმძღვანელობისა და სიბრძნის თხოვნით (იაკ. 1:5). საკუთარ თავს ჰკითხეთ: რა მინდა გავიგო ამ შესწავლიდან? კითხვისას ყურადღება მიაქციეთ მთავარ აზრებს. კარგი იქნებოდა მოგენიშნათ მთავარი აზრები ან ის მონაკვეთები, რომელთა დამახსოვრებაც გსურთ. იფიქრეთ იმაზე, როგორ გამოიყენებდით წაკითხულს თანაქრისტიანთა გასამხნევებლად, ქადაგებისას ან გადაწყვეტილებების მიღებისას. შესწავლის ბოლოს მოკლედ გადაიმეორეთ მასალა. ეს ნასწავლის დამახსოვრებაში დაგეხმარებათ.

ევა მოგვითხრობს: «ბიბლიის კითხვისას ვპოულობ პარალელურ მუხლებს, ვიყენებ „საგუშაგო კოშკის პუბლიკაციების საძიებელსა“ და „საგუშაგო კოშკის“ ბიბლიოთეკას კომპაქტ-დისკზე; ვაკეთებ ჩანაწერებს, რომლებსაც შემდეგ მსახურებისას ვიყენებ».

ზოგი მრავალი წელია, რაც დიდი სიამოვნებით იკვლევს ღვთის სიტყვას და ითავისებს მასში ჩაწერილ აზრებს (იგავ. 2:1—5); მიუხედავად იმისა, რომ ბევრი პასუხისმგებლობა აკისრიათ და მათთვის არც ისე ადვილია პირადი შესწავლისთვის დროის გამონახვა. თუ გიჭირთ პირადი შესწავლისთვის დროის გამოყოფა, რა ცვლილებების შეტანა შეგიძლიათ თქვენს გეგმებში?

როგორ გამოვნახო დრო?

ალბათ, ეთანხმებით იმ აზრს, რომ ადვილია იმ საქმისთვის დროის მოძებნა, რის კეთებაც გსიამოვნებთ. მრავალმა რეალური მიზანი დაისახა, მაგალითად, ბიბლიის თავიდან ბოლომდე წაკითხვა, და ამიტომ დღეს უკეთესი პირადი შესწავლა აქვს. ცხადია, რთულია გენეალოგიების, უძველესი ტაძრის დეტალური აღწერილობის ან ისეთი რთული წინასწარმეტყველებების კითხვა, რომლებიც ყოველდღიურ ცხოვრებას არ ეხება. ეცადეთ, მიზნის მისაღწევად გადადგათ პრაქტიკული ნაბიჯები. მაგალითად, ერთი შეხედვით რთული ბიბლიური მონაკვეთის გამოკვლევამდე, გაეცანით იქ აღწერილი მოვლენების ისტორიულ ფონს ან წაიკითხეთ, როგორ შეიძლება ამ ბიბლიური ცნობის გამოყენება. ასეთი ინფორმაციის ნახვა შესაძლებელია წიგნში „მთელი წმინდა წერილი ღვთისგან არის შთაგონებული და სასარგებლოა“, რომელიც დაახლოებით 50 ენაზეა გამოცემული.

კარგია, ბიბლიის კითხვისას წაკითხულის წარმოდგენას თუ შევეცდებით. ეს ბიბლიური პერსონაჟების თვისებებს გაგვაცნობს და აღწერილი მოვლენების წარმოდგენაში დაგვეხმარება. ამ რამდენიმე რჩევის გამოყენებაც კი უფრო სასიამოვნოსა და სასარგებლოს გახდის ბიბლიის შესწავლას. შესაბამისად, ბიბლიის წასაკითხად დროის გამონახვის სურვილი უფრო გაგვიძლიერდება და ბიბლიის ყოველდღიური კითხვა ჩვევად გვექცევა.

ზემოთ მოყვანილი რჩევები, მართალია, თითოეული ჩვენგანისთვის სასარგებლოა, მაგრამ რა შეიძლება ითქვას იმ ოჯახებზე, რომლებსაც დატვირთული გრაფიკი აქვთ? კარგი იქნებოდა, მთელი ოჯახი შეკრებილიყო და ოჯახური შესწავლის სასარგებლო მხარეებზე ემსჯელა. ასეთი მსჯელობისას ოჯახი შეიძლება იმ დასკვნამდე მისულიყო, რომ რომელიმე ბიბლიური მონაკვეთის განსახილველად ყოველ დღეს ან კვირაში რამდენიმე დღეს ცოტა ადრე ამდგარიყვნენ. შესაძლებელია, ოჯახს გადაეწყვიტა, რომ გეგმაში გარკვეულ ცვლილებებს შეიტანდნენ. მაგალითად, ზოგი ოჯახი საკუთარი გამოცდილებით დარწმუნდა, რომ პრაქტიკული იყო ყოველდღიური მუხლის ან ბიბლიის გარკვეული მონაკვეთის საუზმის, სადილის ან ვახშმის შემდეგ წაკითხვა. სანამ ოჯახის რომელიმე წევრი მაგიდის ალაგებას ან წასვლას დააპირებდა, ოჯახი 10-15 წუთის განმავლობაში მსჯელობდა ყოველდღიურ მუხლზე ან გეგმით გათვალისწინებულ ბიბლიურ მონაკვეთს კითხულობდა. თავიდან ოჯახს შეიძლება ამის გაკეთება გაუჭირდეს, მაგრამ მალე ეს მათთვის ყოველდღიური ცხოვრების ნაწილად და ძალიან სასიამოვნო საქმედ იქცევა.

ვოიჩეკი და მალგორზატა ყვებიან, რა დაეხმარა მათ ოჯახს: „ადრე უმნიშვნელო საქმეებს ბევრი დრო მიჰქონდა. გადავწყვიტეთ, რომ ელექტრონული ფოსტით (e-mail) წერილების გაგზავნისთვის ნაკლები დრო დაგვეთმო, შევამცირეთ გართობისთვის განკუთვნილი დროც და გამოვყავით კონკრეტული დღე და საათი, როცა საფუძვლიან პირად შესწავლას ჩავატარებდით“. ეს ოჯახი ნამდვილად არ ნანობს, რომ ასე მოიქცა; თქვენს შემთხვევაშიც ასე იქნება.

ნამდვილად ღირს ბიბლიური ცოდნის გაღრმავება!

ღვთის სიტყვის გულმოდგინედ შესწავლას „ყოველ კარგ საქმეში ნაყოფი“ გამოაქვს (კოლ. 1:10). შედეგად ყველასთვის ცხადი გახდება თქვენი წარმატება. იქნებით სულიერად მოწიფული ადამიანი, რომელსაც კარგად ესმის ბიბლიური ჭეშმარიტება. მიიღებთ უფრო გონივრულ გადაწყვეტილებებს და უკეთესად დაეხმარებით სხვებსაც ისე, რომ არ ჩავარდებით უკიდურესობებში, რაც მოწიფულობის მაჩვენებელი არ არის. და რაც ყველაზე მთავარია, იეჰოვას უფრო დაუახლოვდებით. უკეთ ჩასწვდებით ღვთის თვისებებს და ეს ცოდნა სხვებთან ღმერთზე საუბრისას გამოჩნდება (1 ტიმ. 4:15; იაკ. 4:8).

ასაკისა თუ გამოცდილების მიუხედავად, ყველაფერი გააკეთეთ იმისათვის, რომ სიამოვნება მოგანიჭოთ ღვთის სიტყვის შესწავლამ და მისი სიღრმის გულმოდგინედ კვლევამ. შეგიძლიათ დარწმუნებული იყოთ, რომ იეჰოვა არ დაივიწყებს თქვენს შრომას (ებრ. 6:10). ის უხვად გაკურთხებთ.

[ჩარჩო 13 გვერდზე]

როცა ბიბლიურ ცოდნას ვიღრმავებთ:

ღვთის რწმენას ვიმტკიცებთ და იეჰოვას ღირსად დავდივართ (კოლ. 1:9, 10).

წვდომის უნარს ვიძენთ, რაც უფრო გამჭრიახს გვხდის და გონივრული გადაწყვეტილებების მიღებაში გვეხმარება (ფსალმ. 119:99).

უფრო დიდი სიამოვნებით ვეხმარებით სხვებს, დაუახლოვდნენ იეჰოვას (მათ. 28:19, 20).

[სურათები 14 გვერდზე]

შეიძლება ბიბლიის შესასწავლად შესაფერისი ადგილის გამონახვა არც ისე ადვილი იყოს, მაგრამ სასურველია გამონახოთ

[სურათი 15 გვერდზე]

ზოგი ოჯახი ბიბლიის გარკვეულ მონაკვეთს საუზმის, სადილის ან ვახშმის შემდეგ კითხულობს