დაეხმარე სიცოცხლემდე მიმყვანი შემეცნების შეძენაში

¹ მოციქულმა პავლემ აგვიხსნა: ღმერთს „ნებავს, რომ ყველა ადამიანი გადარჩეს და მიაღწიოს ჭეშმარიტების შემეცნებას“ (1 ტიმ. 2:4). როგორ შეგვიძლია, დავეხმაროთ სხვებს ამ შემეცნების მიღებაში? ერთ-ერთი საშუალებაა იმ პიროვნებების განმეორებით მონახულება, რომლებიც დაინტერესდნენ წიგნით „მარადიულ სიცოცხლემდე მიმყვანი შემეცნება“. ეს პუბლიკაცია გვთავაზობს ბიბლიურ ჭეშმარიტებას ნათელი, უბრალო და კარგად შერჩეული სიტყვებით. ამ წიგნის შესწავლით ყველა ადამიანმა შეიძლება დაიმკვიდროს სიცოცხლე. რა შეგვიძლია ვთქვათ, რაც წაახალისებს სხვებს, რომ დაიწყონ ბიბლიის შესწავლა?

² ვინც ინტერესი გამოავლინა ბიბლიისადმი, როგორც პრაქტიკული რჩევის წყაროსადმი, შეგიძლია განმეორებით მოინახულო, რათა შესთავაზო შესწავლა შემდეგი სიტყვებით:

◼ „ამას წინათ თქვენთან რომ ვიყავი, ვსაუბრობდით, თუ რატომ შეგვიძლია, ვენდოთ ბიბლიას, როგორც პრაქტიკული რჩევის წყაროს. რადგანაც ბიბლია ღვთის მიერ არის შთაგონებული, უეჭველია, ის იმედისა და ნუგეშის წყაროც არის, როგორც ქრისტეს მოციქულმა თქვა (წაუკითხე რომაელთა 15:4). ჩვენს წინა შეხვედრაზე საუბრისას წამოიჭრა კითხვა, როგორ მივიღებთ პირად სარგებლობას ბიბლიური შემეცნებიდან?“ წაიკითხე მე-18 აბზაცი მე-11 გვერდზე წიგნში „შემეცნება“. აღნიშნე, რომ იეჰოვას მოწმეები დაახლოებით ხუთ მილიონ ბიბლიის შესწავლას ატარებენ მთელ მსოფლიოში და ამით ეხმარებიან ადამიანებს ყველგან, მარადიულ სიცოცხლემდე მიმყვანი შემეცნების მიღებაში. პირველი თავის პირველი 5 აბზაცის გამოყენებით მოკლედ აჩვენე, როგორ ტარდება შესწავლა.

³ თუ პირველი შეხვედრისას ლოცვის შესახებ დაიწყე საუბარი ვინმესთან, შესწავლის დაწყების მიზნით, შეგიძლია სცადო შემდეგი მიდგომა:

◼ «ვიმედოვნებ, გაგახარათ ლოცვის შესახებ ინფორმაციამ, რომელიც განვიხილეთ წიგნიდან „მარადიულ სიცოცხლემდე მიმყვანი შემეცნება“. მე დაგპირდით, რომ ისევ მოვიდოდი და ერთად განვიხილავდით, თუ როგორ შეუძლიათ ღვთის მოსმენა მათ, რომლებიც ლოცულობენ მისადმი. ყურადღება მიაქციე 158-ე გვერდზე მოცემულ ინფორმაციას (წაუკითხე მე-18 აბზაცი). ასე რომ, ბიბლიის პირადი შესწავლით ჩვენ ვისმენთ იმას, რასაც ღმერთი გვეუბნება. ამით ვუახლოვდებით ღმერთს და ის გვეხმარება დღევანდელი პრობლემების გამკლავებაში, რის შესახებაც ვლოცულობთ. სიამოვნებით შეგასწავლიდით ბიბლიას“. თუ პიროვნებას სურს, დაიწყე „შემეცნების“ პირველი თავიდან.

⁴ თუ პირდაპირ შესთავაზე ბიბლიის შესწავლა, შეგიძლია შემდეგი სიტყვებით გააგრძელო საუბარი:

◼ «განსაკუთრებით მოვინდომე, კვლავ მომენახულებინეთ, რადგან უფრო მეტის თქმა მსურდა ბიბლიის უსასყიდლო შესწავლის პროგრამის შესახებ. მე დაგიტოვეთ წიგნი „მარადიულ სიცოცხლემდე მიმყვანი შემეცნება“, რომელსაც შესწავლისთვის დამხმარე საშუალებად ვიყენებთ. შენიშნე, როგორ გვამხნევებს ღვთის სიტყვის განხილვა (წაიკითხე 22-ე გვერდზე 23-ე აბზაცი). თუ ისურვებთ, მოიტანეთ ამ წიგნის თქვენი ეგზემპლარი და იქიდან გავაგრძელოთ შესწავლა, სადაც წინა შეხვედრაზე შევჩერდით». თუ შესწავლა არ იყო დაწყებული პირველი მიკითხვისას, შეგიძლია უთხრა: „ალბათ, ეს საუკეთესო დროა ჩემთვის გაჩვენოთ, როგორ ვასწავლით ბიბლიას“. რამდენიმე აბზაცის განხილვის შემდეგ დაუთქვი ზუსტი დრო განმეორებითი მონახულებისას მომდევნო შესწავლისთვის.

⁵ „შემეცნების“ წიგნის ეფექტურად გამოყენება უნარიანს გაგვხდის, გავავრცელოთ ზუსტი შემეცნება სხვების კურთხევისთვის (იგავ. 15:7). ასეთი შემეცნება სიამოვნებას მოჰგვრის მართალი გულის ადამიანებს და მათ ძლიერი გულისწადილი ექნებათ, იეჰოვას სამართლიანობასთან შეთანხმებულად იცხოვრონ, რაც საბოლოოდ მიიყვანს მარადიულ სიცოცხლემდე.