ისწავლეთ ღვთის სიტყვიდან

როგორ განვსაზღვროთ, რომელ თაყვანისცემას იწონებს ღმერთი?

ამ სტატიაში დასმულია კითხვები, რომლებზეც შესაძლოა არაერთხელ გიფიქრიათ, და მითითებულია ის ბიბლიური მუხლები, რომლებიც ამ კითხვებს სცემს პასუხს. იეჰოვას მოწმეები დიდი სიამოვნებით იმსჯელებენ თქვენთან ერთად ამ ბიბლიურ მუხლებზე.

1. მხოლოდ ერთი რელიგიაა ჭეშმარიტი?

იესო თავის მიმდევრებს ასწავლიდა, რომ არსებობდა ერთადერთი ჭეშმარიტი რელიგია. ის სიცოცხლისკენ მიმავალი გზაა. ამ გზის შესახებ იესომ თქვა: „ცოტანი პოვებენ მას“ (მათე 7:14). ღმერთი ისეთ თაყვანისმცემლობის ფორმას იწონებს, რომელიც მხოლოდ მის სიტყვაზეა დაფუძნებული. ყველა ჭეშმარიტ თაყვანისმცემელს ერთი რწმენა უნდა აერთიანებდეს (წაიკითხეთ იოანეს 4:23, 24; 14:6; ეფესოელების 4:4, 5).

2. რატომ აქვს ამდენ რელიგიას პრეტენზია ქრისტიანობაზე?

ცრუწინასწარმეტყველებმა გახრწნეს ქრისტიანობა და პირადი მიზნებისთვის გამოიყენეს. როგორც იესო წინასწარმეტყველებდა, ისინი თავს ცხვრებად გაასაღებდნენ, სინამდვილეში კი მტაცებელი მგლები იქნებოდნენ (მათე 7:13—15, 21, 23). ცრუ ქრისტიანები განსაკუთრებით იესოს მოციქულების სიკვდილის შემდეგ გამოჩნდნენ (წაიკითხეთ საქმეების 20:29, 30).

3. რით განსხვავდება ჭეშმარიტი თაყვანისმცემლობა სხვა რელიგიებისგან?

ჭეშმარიტი რელიგიის მიმდევრები აფასებენ ბიბლიას, ღვთის სიტყვას. ისინი ცდილობენ ბიბლიური პრინციპების თანახმად იცხოვრონ. სწორედ ამით განსხვავდება ჭეშმარიტი თაყვანისმცემლობა სხვა რელიგიებისგან, რომლებიც ადამიანთა სწავლებებზეა დაფუძნებული (მათე 15:7—9). ჭეშმარიტი რელიგიის მიმდევრები რასაც ქადაგებენ, იმის თანახმად იქცევიან (წაიკითხეთ იოანეს 17:17; 2 ტიმოთეს 3:16, 17).

ჭეშმარიტი რელიგიის მიმდევრები განადიდებენ ღვთის სახელს, იეჰოვას. იესო ადამიანებს ღვთის სახელს ამცნობდა. ის ეხმარებოდა ხალხს ღვთის გაცნობაში და ასწავლიდა მათ, რომ ელოცათ ღვთის სახელის განწმენდაზე (მათე 6:9). რომელი რელიგია მიაგებს პატივს ღვთის სახელს თქვენს ქვეყანაში? (წაიკითხეთ იოანეს 17:26; რომაელების 10:13, 14).

4. როგორ ამოვიცნოთ ჭეშმარიტი რელიგიის მიმდევრები?

ჭეშმარიტი ქრისტიანები ღვთის სამეფოს შესახებ ქადაგებენ. ღმერთმა იესო დედამიწაზე იმისათვის გამოგზავნა, რომ ღვთის სამეფოს შესახებ ექადაგა. ღვთის სამეფო არის ერთადერთი იმედი კაცობრიობისთვის. იესო სიკვდილის ბოლო წუთამდე ამ სამეფოს შესახებ საუბრობდა (ლუკა 4:43; 8:1; 23:42, 43). ის თავის მიმდევრებსაც იმავესკენ მოუწოდა. თუ ვინმე თქვენთან ღვთის სამეფოს შესახებ იწყებს საუბარს, როგორ ფიქრობთ, რომელი რელიგიის მიმდევარია? (წაიკითხეთ მათეს 10:7; 24:14).

იესოს მიმდევრები ამ ბოროტი ქვეყნიერების ნაწილი არ არიან. ისინი არც პოლიტიკაში ერევიან და არც ეთნიკურ კონფლიქტებში იღებენ მონაწილეობას (იოანე 17:16). გარდა ამისა, ღვთის ჭეშმარიტი თაყვანისმცემლები არ ირეკლავენ ამ ქვეყნიერებაში გაბატონებულ სულს (წაიკითხეთ იაკობის 1:27; 4:4).

5. რა არის ჭეშმარიტი ქრისტიანების მთავარი ამოსაცნობი ნიშანი?

ნამდვილ ქრისტიანებს განსაკუთრებულად უყვართ ერთმანეთი. ღვთის სიტყვიდან ისინი სწავლობენ, რომ ყველა ეროვნების ადამიანს სცენ პატივი. ცრუ რელიგია ხშირად აქტიურად უჭერს მხარს ერებს შორის გაჩაღებულ ომს, ჭეშმარიტი რელიგიის მიმდევრები კი არ ერევიან ომებში (მიქა 4:1—4). ნამდვილი ქრისტიანები უანგაროდ იყენებენ თავიანთ დროსა და სახსრებს სხვების დასახმარებლად თუ გასამხნევებლად (წაიკითხეთ იოანეს 13:34, 35; 1 იოანეს 4:20, 21).

იეჰოვას მოწმეები თავიანთ სწავლებებს მთლიანად ბიბლიაზე აფუძნებენ. ისინი განადიდებენ ღვთის სახელს და აცხადებენ, რომ კაცობრიობის ერთადერთი იმედი ღვთის სამეფოა. მოწმეები ერთმანეთის მიმართ ნამდვილ სიყვარულს ავლენენ და უარს ამბობენ ომში მონაწილეობაზე (1 იოანე 3:10—12).

დამატებითი ინფორმაციისთვის იხილეთ წიგნის „რას გვასწავლის ბიბლია სინამდვილეში?“ მე-15 თავი. გამოცემულია იეჰოვას მოწმეების მიერ.

[სურათი 16 გვერდზე]

„ისინი ყველას წინაშე აღიარებენ, რომ იცნობენ ღმერთს, მაგრამ საქმეებით უარყოფენ მას“ (ტიტე 1:16)