მიიტანეთ ჭეშმარიტება არარელიგიური ადამიანების გულამდე

1. რა ცვლილებები შეინიშნება ზოგ ქვეყანაში ბოლო ათწლეულების განმავლობაში?

საუკუნეების განმავლობაში ადამიანთა უმეტესობა თავს ამა თუ იმ რელიგიის მიმდევრად მიიჩნევდა, თუმცა ბოლო ათწლეულებია, მდგომარეობა საგრძნობლად შეიცვალა. დღეს უფრო და უფრო იზრდება არარელიგიური ადამიანების რიცხვი. ზოგ ქვეყანაში მოსახლეობის უმეტესობა თავს არცერთ რელიგიას არ მიაკუთვნებსb (მათ. 24:12).

2. რა მიზეზების გამო გახდა ბევრი არარელიგიური?

² რატომ იზრდება არარელიგიური ადამიანების რიცხვი?c ამის მიზეზი ისაა, რომ ზოგიერთი მათგანი ან სიამოვნებასაა გადაყოლილი, ან ცხოვრებისეულ საზრუნავს (ლუკ. 8:14). ზოგი ათეისტი გახდა, ზოგსაც სწამს ღმერთი, მაგრამ რელიგიას მოძველებულ, უსარგებლო და მეცნიერებასა თუ ლოგიკურ აზროვნებასთან შეუსაბამოდ მიიჩნევს. ისინი შეიძლება მეგობრების, მასწავლებლების ან მედიის წარმომადგენლების აზრს იზიარებენ, თითქოს სიცოცხლე ევოლუციის შედეგად გაჩნდა. ეს ადამიანები შეიძლება ღვთის არსებობის შესახებ დამაჯერებელ ფაქტებს არასოდეს გასცნობიან. არიან ისეთებიც, რომელთაც ფულსა თუ ძალაუფლებას დახარბებულმა სასულიერო პირებმა დააკარგვინეს რწმენა. ზოგიც ისეთ ქვეყანაში ცხოვრობს, სადაც რელიგიის თავისუფლებას მთავრობა ზღუდავს.

3. რა არის ამ სტატიის მიზანი?

³ იესო მოელის, რომ მოწაფეებად მოვამზადებთ „ხალხს ყველა ერიდან“ (მათ. 28:19). როგორ შეგვიძლია დავეხმაროთ არარელიგიურ ადამიანებს, რომ შეიყვარონ ღმერთი და გახდნენ ქრისტეს მოწაფეები? უნდა გავაცნობიეროთ, რომ სასიხარულო ცნობაზე ადამიანის რეაქცია შეიძლება იმაზე იყოს დამოკიდებული, თუ სად გაიზარდა. მაგალითად, ევროპელებს შეიძლება აზიელებისგან განსხვავებული რეაქცია ჰქონდეთ, რადგან ევროპაში ბევრს სმენია ბიბლიისა და შემოქმედის შესახებ. მაგრამ აზიაში ადამიანთა უმეტესობამ ძალიან ცოტა ან თითქმის არაფერი იცის ბიბლიის შესახებ. მათ შეიძლება შემოქმედის არსებობისაც კი არ სჯერათ. ამ სტატიის მიზანია, დაგვეხმაროს, რომ სხვადასხვა აზროვნებისა თუ წარმოშობის ადამიანთა გულამდე მივიტანოთ ჭეშმარიტება.

შეინარჩუნეთ დადებითი განწყობა

4. რატომ უნდა შევინარჩუნოთ დადებითი განწყობა?

⁴ გქონდეთ დადებითი განწყობა. ყოველ წელს იეჰოვას მოწმეთა რიგებს ისეთი ადამიანებიც უერთდებიან, რომლებიც ერთ დროს თავს არცერთ რელიგიას არ მიაკუთვნებდნენ. ბევრი მათგანი მაღალზნეობრივი ნორმებით ცხოვრობდა და ვერ იტანდა რელიგიურ თვალთმაქცობას. თუმცა იყვნენ ისეთებიც, რომლებიც ზნეობრიობით დიდად არ გამოირჩეოდნენ, ამიტომ ბევრ მათგანს ცუდი ჩვევების მიტოვება მოუწია. დარწმუნებული ვართ, რომ იეჰოვას დახმარებით აუცილებლად ვიპოვით მარადიული სიცოცხლისთვის განწყობილ ადამიანებს (საქ. 13:48; 1 ტიმ. 2:3, 4).

5. ძირითადად, რა განსაზღვრავს, გამოეხმაურება თუ არა ხალხი დადებითად სასიხარულო ცნობას?

⁵ იყავით კეთილი და ტაქტიანი. ყურადღება მხოლოდ იმაზე კი არ უნდა გავამახვილოთ, თუ რას ვამბობთ, არამედ იმაზეც, თუ როგორ ვამბობთ, რადგან ხშირად სწორედ ეს განსაზღვრავს, გამოეხმაურება თუ არა ხალხი დადებითად სასიხარულო ცნობას. ადამიანებს ძალიან სიამოვნებთ, როდესაც მათ მიმართ სიკეთეს, ტაქტიანობას და გულწრფელ ინტერესს ვავლენთ. ჩვენ არ ვცდილობთ, სხვებს საკუთარი აზრი მოვახვიოთ თავს, პირიქით გვინდა, გავიგოთ, რატომ ჩამოუყალიბდათ რელიგიაზე ასეთი შეხედულება. მაგალითად, ზოგს არ სიამოვნებს რელიგიურ თემებზე უცნობებთან საუბარი. ზოგისთვის ღმერთის შესახებ კითხვის დასმა უტაქტობად ითვლება. ზოგიც თავს უხერხულად გრძნობს, როცა სხვების დასანახავად ბიბლიას კითხულობს, განსაკუთრებით თუ ამ დროს მასთან იეჰოვას მოწმეები არიან. რაც არ უნდა იყოს მიზეზი, ვცდილობთ, გავითვალისწინოთ მათი გრძნობები (2 ტიმ. 2:24).

6. როგორ ცხადყო მოციქულმა პავლემ, რომ ერგებოდა სიტუაციას და როგორ შეგვიძლია მივბაძოთ მას?

⁶ როგორ უნდა მოვიქცეთ, თუ ვატყობთ, რომ ადამიანს უხერხულობას უქმნის, როცა საუბარში ვიყენებთ სიტყვებს: ბიბლია, შემოქმედება, ღმერთი და რელიგია? შეგვიძლია პავლე მოციქულის მსგავსად შევცვალოთ მიდგომა. მაგალითად, იუდეველებთან საუბრის დროს ის წმინდა წერილების საფუძველზე მსჯელობდა, თუმცა არეოპაგში ბერძენ ფილოსოფოსებთან ქადაგებისას არ უთქვამს, რომ წმინდა წერილებიდან ციტირებდა (საქ. 17:2, 3, 22—31). როგორ შეგვიძლია მივბაძოთ პავლეს? თუ ისეთ ადამიანს შეხვდებით, ვინც ბიბლიას ავტორიტეტად არ მიიჩნევს, უმჯობესი იქნება, თუ პირდაპირ არ ეტყვით, რომ ესა თუ ის აზრი ბიბლიაზეა დაფუძნებული. თუ ატყობთ, რომ ადამიანი უხერხულად გრძნობს თავს, როცა ბიბლიას უკითხავთ, შეეცადეთ, ეს ისე გააკეთოთ, რომ სხვების ყურადღება ნაკლებად მიიქციოთ. მაგალითად, შეგიძლიათ ელექტრონული მოწყობილობა გამოიყენოთ.

7. პირველი კორინთელების 9:20—23-ის თანახმად, როგორ შეგვიძლია მივბაძოთ პავლე მოციქულს?

⁷ გაგებით მოეკიდეთ და ყურადღებით მოუსმინეთ. უნდა შევეცადოთ, გავიგოთ, რამ ჩამოუყალიბა ხალხს ესა თუ ის შეხედულება (იგავ. 20:5). კიდევ ერთხელ დავფიქრდეთ პავლეს მაგალითზე. ის ებრაელებს შორის გაიზარდა, ამიტომ უცხოტომელებთან ქადაგების დროს, რომლებმაც ძალიან ცოტა ან საერთოდ არაფერი იცოდნენ იეჰოვასა და წმინდა წერილების შესახებ, მიდგომების შეცვლა მოუწია. შეგვიძლია გარკვეული ინფორმაცია მოვიძიოთ ან კრებაში გამოცდილ ქრისტიანს ვკითხოთ აზრი ჩვენს ტერიტორიაზე მცხოვრები ხალხის შესახებ. ეს დაგვეხმარება, უკეთ გავუგოთ და თანავუგრძნოთ მათ (წაიკითხეთ 1 კორინთელების 9:20—23).

8. რომელია ერთ-ერთი საშუალება ბიბლიურ თემებზე საუბრის წამოსაწყებად?

⁸ ჩვენი მიზანი ღირსეულების მოძებნაა (მათ. 10:11). ამ მიზანს რომ მივაღწიოთ, ხალხს აზრის გამოთქმის საშუალება უნდა მივცეთ და ყურადღებით მოვუსმინოთ. ინგლისში მცხოვრები ძმა მსახურების დროს ცდილობს, გაიგოს ხალხის აზრი ისეთ თემებზე, როგორიცაა: ბედნიერი ქორწინება, შვილების აღზრდა და უსამართლობასთან გამკლავება. ყურადღებით მოსმენის შემდეგ ის უსვამს კითხვას: „რას ფიქრობთ დაახლოებით 2 000 წლის წინ დაწერილ ამ რჩევაზე?“. შემდეგ კი ისე, რომ სიტყვა „ბიბლიას“ არ ახსენებს, წინასწარ შერჩეულ მუხლებს უკითხავს ტელეფონიდან.

ხალხის გულამდე მიიტანეთ ბიბლიური ჭეშმარიტება

9. როგორ შეგვიძლია დავეხმაროთ მათ, ვინც ჩვეულებრივ თავს არიდებს ღმერთზე საუბარს?

⁹ თუ ხალხისთვის საინტერესო საკითხებზე წამოვიწყებთ საუბარს, მათ გულამდეც მივიტანთ ბიბლიურ ჭეშმარიტებას, ვინც ჩვეულებრივ თავს არიდებს ღმერთზე საუბარს. მაგალითად, ბევრს აღაფრთოვანებს ჩვენი სამყარო. ამიტომ შეგვიძლია საუბარი ასე დავიწყოთ: „ალბათ, იცით, რომ მეცნიერები რაღაც ახლის შესაქმნელად ბუნებიდან სესხულობენ იდეებს. მაგალითად, მიკროფონი მათ მწერის ყურზე დაკვირვებით შექმნეს, ხოლო კამერა თვალზე დაკვირვებით. თქვენი აზრით, სინამდვილეში ვისგან სწავლობენ მეცნიერები, როცა ყურისა თუ თვალის აგებულებას იკვლევენ?“. ყურადღებით მოსმენის შემდეგ შეგიძლიათ უთხრათ: «ძალიან მომეწონა ძველად მცხოვრები ერთი პოეტის სიტყვები: „განა ვერ მოისმენს ყურის შემქმნელი?! თვალის შემქმნელი განა ვერ დაინახავს?! . . . [ის არის] ადამიანებისთვის ცოდნის მიმცემი“» (ფსალმ. 94:9, 10). შემდეგ შეგიძლიათ აჩვენოთ ჩვენს ვებგვერდზე jw.org^® განთავსებული ვიდეო რუბრიკიდან „შეხედულებები სიცოცხლის წარმოშობაზე“ (იხილეთ პუბლიკაციები / ვიდეოები / ინტერვიუები და შემთხვევები). აგრეთვე შეგიძლიათ შესთავაზოთ ბროშურა „თავისით გაჩნდა სიცოცხლე?“ ან „სიცოცხლის წარმოშობა — ხუთი კითხვა, რომელზეც ღირს დაფიქრება“.

10. როგორ შეგვიძლია წამოვიწყოთ მათთან საუბარი, ვისაც არ სურს ღმერთზე ლაპარაკი?

¹⁰ ადამიანთა უმეტესობა უკეთეს მომავალზე ოცნებობს. თუმცა ბევრს აშინებს, რომ დედამიწა განადგურდება ან გაუკაცრიელდება. ნორვეგიაში მცხოვრები მიმომსვლელი ზედამხედველი აღნიშნავს, რომ ისინი, ვისაც ღმერთზე ლაპარაკი არ სურს, ხშირად სიამოვნებით გამოთქვამენ თავიანთ აზრს მსოფლიო მდგომარეობასთან დაკავშირებით. მისალმების შემდეგ ის ხალხს ეკითხება: „თქვენი აზრით, უნდა გვქონდეს უკეთესი მომავლის მოლოდინი? ვისზე უნდა დავამყაროთ იმედი: პოლიტიკოსებზე, მეცნიერებზე თუ სხვა ვინმეზე?“. ყურადღებით მოსმენის შემდეგ ის კითხულობს ან ციტირებს ბიბლიურ მუხლს, რომელიც ჩვენს ბედნიერ მომავალს ეხება. ზოგს ინტერესს აღუძრავს ბიბლიის დანაპირები, რომლის თანახმადაც დედამიწა არასდროს განადგურდება და კარგი ადამიანები მარადიულად იცხოვრებენ მასზე (ფსალმ. 37:29; ეკლ. 1:4).

11. რატომ უნდა მოვსინჯოთ სხვადასხვა მიდგომა და რომაელების 1:14—16-დან გამომდინარე, როგორ შეგვიძლია მივბაძოთ პავლეს?

¹¹ მსახურებაში სხვადასხვა მიდგომა უნდა მოვსინჯოთ, რადგან ადამიანები განსხვავდებიან ერთმანეთისგან. რაც ერთისთვის საინტერესოა, შეიძლება მეორესთვის უინტერესო იყოს. ზოგთან შეგვიძლია პირდაპირ ღმერთზე და ბიბლიაზე დავიწყოთ საუბარი, ზოგთან კი უმჯობესია, ჯერ სხვა საკითხზე ვიმსჯელოთ. ნებისმიერ შემთხვევაში, ხელიდან არ უნდა გავუშვათ შესაძლებლობა, რომ ყველანაირ ადამიანთან ვიქადაგოთ (წაიკითხეთ რომაელების 1:14—16). თუმცა არ უნდა დაგვავიწყდეს, რომ სიმართლის მოყვარული ადამიანის გულში ჭეშმარიტების თესლს იეჰოვა ზრდის (1 კორ. 3:6, 7).

როგორ ვუქადაგოთ აზიელ ხალხს?

12. როგორ შეგვიძლია აზიელ ხალხთან ქადაგება, რომლებიც სერიოზულად არც კი დაფიქრებულან შემოქმედის არსებობაზე?

¹² მთელ მსოფლიოში ბევრი მაუწყებელი ხვდება აზიელ ხალხს. მათ შორის არიან ისეთები, რომელთა ქვეყნებშიც მთავრობები ზღუდავენ რელიგიურ საქმიანობას. აზიურ ქვეყნებში ბევრი სერიოზულად არც კი დაფიქრებულა შემოქმედის არსებობაზე. ზოგი მათგანი ცნობისმოყვარეა და მაშინვე იწყებს ბიბლიის შესწავლას, ზოგი კი თავიდან განსხვავებული აზრის მიმართ დიდ ინტერესს არ იჩენს. როგორ დავეხმაროთ მათ? არაერთმა გამოცდილმა მაუწყებელმა შენიშნა, რამდენად კარგი შედეგი მოჰყვება, როცა ხალხთან მეგობრულად იწყებენ საუბარს, ინტერესს ავლენენ მათ მიმართ და შესაფერის დროს უხსნიან, როგორ შეცვალა კონკრეტული ბიბლიური პრინციპის გამოყენებამ მათი ცხოვრება.

13. რამ შეიძლება გაუჩინოს ადამიანს ბიბლიისადმი ინტერესი? (იხილეთ სურათი გარეკანზე).

¹³ ბევრ ადამიანს ხიბლავს ბიბლიაში ჩაწერილი პრაქტიკული სიბრძნე (ეკლ. 7:12). ერთი და, რომელიც ნიუ-იორკში ჩინურენოვან ხალხთან ქადაგებს, ამბობს: „ვცდილობ, ინტერესი გამოვავლინო ადამიანების მიმართ და მოვუსმინო მათ. როცა ვიგებ, რომ ისინი ახალი იმიგრანტები არიან, ვეკითხები, როგორ მოეწყვნენ, იპოვეს თუ არა სამუშაო ან როგორ ექცევა მათ ადგილობრივი ხალხი“. ასეთი მიდგომა მას ზოგჯერ ბიბლიურ თემებზე საუბრის შესაძლებლობას აძლევს. შესაფერის დროს ის ეკითხება მათ: «თქვენი აზრით, რა არის საჭირო, რომ სხვებთან საერთო ენა გამოვნახოთ? თუ წინააღმდეგი არ იქნებით, ერთ აზრს გაგიზიარებთ ბიბლიიდან: „დავის დასაწყისი წყლის გაშვებას ჰგავს; სანამ დავა იფეთქებდეს, გაეცალე იქაურობას“». შემდეგ ასეთ კითხვას უსვამს: „როგორ ფიქრობთ, დაგვეხმარება ეს რჩევა, კარგი ურთიერთობა გვქონდეს სხვებთან?“ (იგავ. 17:14). ამგვარი მსჯელობა დაგვანახვებს, სურს თუ არა ადამიანს ბიბლიიდან მეტის გაგება.

14. როგორ ეხმარება აღმოსავლეთ აზიაში ერთი ძმა მათ, ვისაც არ სწამს ღმერთი?

¹⁴ რის თქმა შეიძლება მათზე, ვინც გვეუბნება, რომ არ სწამს ღმერთი? ერთი ძმა, რომელსაც აღმოსავლეთ აზიაში არარელიგიურ ხალხთან ქადაგების დიდი გამოცდილება აქვს, ამბობს: «ჩვეულებრივ, როცა აქ ადამიანი ამბობს, რომ არ სწამს ღმერთი, გულისხმობს, რომ არ ეთაყვანება იმ ღმერთებს, რომელთაც ადგილობრივები სცემენ თაყვანს. როგორც წესი, ვეთანხმები, რომ ეს ღვთაებები ადამიანთა ხელით არის შექმნილი და სინამდვილეში არ არსებობენ. ხშირად ვუკითხავ იერემიას 16:20-ს: „განა შეუძლია ადამიანს თავისთვის ღმერთების შექმნა, როცა ისინი ღმერთები არ არიან?!“. შემდეგ ვეკითხები: „როგორ განვასხვავოთ ჭეშმარიტი ღმერთი ადამიანთა შექმნილი ღვთაებებისგან?“. ყურადღებით ვუსმენ და შემდეგ ვუკითხავ ესაიას 41:23-ს: „გვითხარით, რა მოხდება შემდეგ, რათა ვიცოდეთ, რომ ღმერთები ხართ“. ბოლოს იეჰოვას მიერ წარმოთქმულ იმ წინასწარმეტყველებებს ვაჩვენებ, რომლებიც უკვე შესრულდა».

15. რის სწავლა შეგვიძლია ძმისგან, რომელიც აღმოსავლეთ აზიაში მსახურობს?

¹⁵ კიდევ ერთი ძმა, რომელიც აღმოსავლეთ აზიაში მსახურობს, გვიხსნის, როგორ მიდგომას იყენებს განმეორებითი მონახულების დროს: „მათ ბიბლიიდან ვაჩვენებ პრაქტიკული სიბრძნის მაგალითებს, შესრულებულ წინასწარმეტყველებებს და კანონებს, რომლითაც სამყარო იმართება. შემდეგ ვუხსნი, როგორ მოწმობს ეს ყველაფერი გონიერი შემოქმედის არსებობაზე. მას შემდეგ, რაც მსმენელი დაუშვებს იმ აზრს, რომ შეიძლება შემოქმედი არსებობდეს, ვაჩვენებ, რას ამბობს ბიბლია იეჰოვაზე“.

16. ებრაელების 11:6-ში ჩაწერილი სიტყვების თანახმად, რატომ უნდა ჰქონდეთ შემსწავლელებს ღვთისა და ბიბლიისადმი რწმენა და ჩვენ როგორ შეგვიძლია მათი დახმარება?

¹⁶ როცა ბიბლიას არარელიგიურ ადამიანს ვასწავლით, გამუდმებით უნდა დავარწმუნოთ ის ღვთის არსებობაში (წაიკითხეთ ებრაელების 11:6). ამასთანავე უნდა ვეცადოთ, რომ მას ბიბლიისადმი რწმენა ჩავუნერგოთ. ამიტომ შეიძლება ზოგიერთი საკითხის გამეორება არაერთხელ მოგვიწიოს. ყოველი შესწავლის დროს შეიძლება მტკიცებულებების მოყვანა დაგვჭირდეს, რომ ბიბლია ღვთის სიტყვაა. ამ დროს შეგვიძლია ვიმსჯელოთ შესრულებულ წინასწარმეტყველებებზე, ბიბლიის პრაქტიკულ სიბრძნესა თუ მეცნიერულ და ისტორიულ სიზუსტეზე.

17. როგორ იმოქმედებს ხალხზე, თუ მათდამი სიყვარულს გამოვავლენთ?

¹⁷ როცა რელიგიური შეხედულებების მიუხედავად, ხალხის მიმართ სიყვარულს ვავლენთ, ვეხმარებით მათ, რომ ქრისტეს მოწაფეები გახდნენ (1 კორ. 13:1). ჩვენი მიზანია, შემსწავლელები ღვთის სიყვარულში დავარწმუნოთ და დავანახვოთ, რომ ის ჩვენგანაც იმავეს მოელის. ყოველ წელს ღვთის სიყვარული ათასობით ადამიანს უბიძგებს, თავი მიუძღვნას იეჰოვას. არადა იყო დრო, როცა მათ რელიგიური საკითხები თითქმის არ აინტერესებდათ. ასე რომ, შეინარჩუნეთ დადებითი განწყობა. სიყვარული და ინტერესი გამოავლინეთ ყველანაირი ადამიანის მიმართ. ყურადღებით მოუსმინეთ მათ; ეცადეთ, გაუგოთ და საკუთარი მაგალითით აღძრათ, რომ ისინიც გახდნენ ქრისტეს მოწაფეები.