ჩაატარე ბიბლიის ნაყოფიერი შესწავლები
1 მოწაფეების მოსამზადებლად ბიბლიის ნაყოფიერი შესწავლების ჩატარება წინდახედულებასა და კარგ დაგეგმვას მოითხოვს. შესწავლები უნდა დავიწყოთ და ჩავატაროთ ერთი მთავარი მიზნით — დავეხმაროთ შემსწავლელებს, გახდნენ იესო ქრისტეს აქტიური მოწაფეები (მათ. 13:23). ასე რომ, ასწავლე მათ იესოს ყველა მითითების დაცვა (მათ. 28:19, 20). დაეხმარე შემსწავლელებს იმის გაგებაში, რომ ღვთის სიტყვის ძირითადი სწავლებების ასათვისებლად შესწავლები ყოველკვირეულად უნდა ჩატარდეს. ასევე, გულთბილად აუხსენი, რომ პროგრესის მისაღწევად მნიშვნელოვანია ნასწავლის დაუყოვნებლივ გამოყენება ცხოვრებაში (იგავ. 22:17; ფილ. 3:16, სსგ). მაგრამ რომელ სფეროებში უნდა შეინიშნებოდეს წინსვლა?
2 დროდადრო მაუწყებელი უნდა დაფიქრდეს ბიბლიის შემსწავლელის სულიერ წინსვლაზე. ჰკითხე საკუთარ თავს: ამზადებს შემსწავლელი გაკვეთილს წინასწარ? ნახულობს მოყვანილ ბიბლიურ მუხლებს, რომლებიც ციტირებული არ არის? (საქ. 17:11; 1 თეს. 2:13). თავისი სიტყვებით პასუხობს და ავლენს გულწრფელ მადლიერებას ახლად შესწავლილი ბიბლიური სწავლებებისადმი? (იგავ. 2:1—6). მართებული იქნებოდა თუ არა, წაგეხალისებინა, დამატებით ეკითხა ღვთის სიტყვა და საზოგადოების პუბლიკაციები? წაიწია სულიერად იმდენად წინ, რომ უკვე დროული იქნებოდა ყოველდღიური მუხლის განხილვაზე ლაპარაკი?
3 ცხადყოფს მისი მეტყველება, აზროვნება და საქციელი იმას, რომ ითვისებს ზნეობის ბიბლიურ ნორმებს? (1 კორ. 6:9, 10). იცვლება თუ არა თვითონ? (ეფეს. 4:22—24). აღძრავს მას ბიბლიური ჭეშმარიტებისადმი მადლიერება, რომ ესაუბროს ნათესავებს, თანამშრომლებსა თუ მეზობლებს იმის შესახებ, რაც ისწავლა? (ლუკ. 6:45). თუ ფიზიკური ჯანმრთელობა და მდგომარეობა უწყობს ხელს, გაიხადა ჩვევად კრების შეხვედრებზე დასწრება? (ებრ. 10:23—25). შემსწავლელის სულიერი წინსვლის ამ სფეროებზე მსჯელობა დაგვეხმარება განვსაზღვროთ, რამდენად ‘მიიღო მასში ჩანერგილი სიტყვა’ (იაკ. 1:21).
4 შეწყვიტე უნაყოფო შესწავლები. თუ გარკვეული დროის განმავლობაში, თქვენი მცდელობის მიუხედავად, რომ დახმარებოდით, შემსწავლელს კარგი ნაყოფი არ გამოაქვს, უკეთესი იქნებოდა, თუ ამ შესწავლისთვის განკუთვნილ დროს ღირსეულთა ძებნისთვის გამოიყენებდი (მათ. 10:11—13). ამ დროს საჭიროა მდგომარეობის მხედველობაში მიღება. ზოგჯერ შეიძლება გონივრული იყოს, შესწავლის შეწყვეტა. გულწრფელად შეაქე მობინადრე მიღწეული წინსვლისთვის. მაგრამ აღნიშნე, რომ მნიშვნელოვანია ამ ბიბლიური სწავლებების ცხოვრებაში გამოყენება. გამოიყენე იესოს იგავი მთესველზე, განიხილე ოთხივე სახის ნიადაგი და შემდეგ, ამ მაგალითის მეშვეობით, ხაზი გაუსვი სამეფოს შესახებ ცნობაზე დადებითად რეაგირების აუცილებლობას. ეს შეიძლება შემსწავლელს დაეხმაროს, გააანალიზოს, რა უშლის ხელს შესწავლისას სულიერ წინსვლაში, შენ კი შეიძლება საშუალება მოგეცეს, დაინახო ამ შესწავლის შედეგები. იყავი გულითადი, მაგრამ, ამავე დროს, პირდაპირი და კონკრეტული (1 კორ. 14:8, 9). უთხარი, რომ შესწავლა განახლდება, თუ ის აუცილებელ ცვლილებებს მოახდენს. ამასობაში შეგიძლია, დროდადრო ტელეფონით შეეხმიანო და გაამხნევო.
5 თუ შენს უბანზე ცხოვრობენ ადამიანები, რომლებიც ადრე სწავლობდნენ ბიბლიას, გონივრული იქნებოდა, დაინტერესებულიყავი, რამდენი ხნის წინ და ვისთან სწავლობდნენ ისინი. რატომ შეწყვიტეს შესწავლა? თუ ცნობილია, ვინ ატარებდა შესწავლას, განახლებამდე კარგი იქნებოდა, თუ კრების სამსახურებრივი კომიტეტის რომელიმე უხუცესი გაესაუბრებოდა ამ მაუწყებელს აღნიშნული შესწავლის შესახებ. ალბათ, არის ისეთი საკითხები, რომლებიც შენთვის უცნობია. ზოგი წლების განმავლობაში სწავლობს ბიბლიას სხვადასხვა მაუწყებელთან და არანაირ რეალურ ნაყოფს არ იღებს. მნიშვნელოვანია, რომ დრო დავხარჯოთ მათთვის, ვინც ჭეშმარიტებისადმი ნამდვილ ინტერესს ავლენს.
6 ბიბლიის შესწავლის შეწყვეტისას, ან უკვე შეწყვეტილის განახლებისას შეიძლება გსურდეს, მობინადრესთან იმ ბრწყინვალე მასალის განხილვა, რომელიც მოცემულია შემდეგ სტატიებში: „რატომ ემსახურებით ღმერთს?“, 2000 წლის 15 დეკემბერი; ან „მოიქეცით ჩემკენ და მეც მოვიქცევი თქვენკენ“, 1992 წლის 1 აგვისტოს „საგუშაგო კოშკი“ (რუს.). თუ ბიბლიის ნაყოფიერი შესწავლების ჩატარებაში დავხელოვნდებით, მრავალს დავეხმარებით ჭეშმარიტების შესწავლაში, გათავისებასა და ცხოვრებაში გამოყენებაში. ამის წყალობით კი ისინი იეჰოვა ღმერთის მოწონებას და, საბოლოოდ, მარადიულ სიცოცხლეს მიიღებენ (ფილ. 4:9; იოან. 17:3).