როგორ მივიღოთ მეტი მონაწილეობა მსახურებაში

¹ ორმოცი წლის წინათ 1955 წლის 15 იანვრის „საგუშაგო კოშკში“ (ინგლ.) გამოჩნდა სტატია, სათაურით „აკეთებ საუკეთესოს?“. მასში სიყვარულით იყო მითითებული, როგორ შეუძლია იეჰოვას ხალხს გააუმჯობესოს მსახურება, რომ თითოეულმა უფრო მეტად მიიღოს მონაწილეობა სამეფოს საქმეებში. ეს კარგი რჩევა ჩვენც გვეხება, რადგან ვცდილობთ უფრო და უფრო გავუმჯობესდეთ.

² მსახურებაში ყველაფერი უნდა ვაკეთოთ უდიდეს მცნებაზე დაფუძნებით: „შეიყვარე უფალი, ღმერთი შენი, ყოვლითა გულითა შენით, და ყოვლითა სულითა შენითა და ყოვლითა გონებითა შენითა და ყოვლითა ძალითა შენითა“ (მარ. 12:30). იეჰოვა რომ ძალიან გვიყვარს, იმით ვამტკიცებთ, რომ მისი სამეფოს საქმის წინსვლისთვის ვიყენებთ ყველა შესაძლებლობას. განვიხილოთ შემდეგი საშუალებები, რომლებიც დაგვეხმარება მეტი მონაწილეობა მივიღოთ მსახურებაში.

³ იტვირთე პასუხისმგებლობა. მონათლულ ძმებს შეუძლიათ ისწრაფონ იმისკენ, რომ გახდნენ სამსახურებრივი თანაშემწეები, შემდეგ კი წინ წაიწიონ უხუცესობისკენ. სტატიებმა — „ისწრაფი სამსახურებრივი უპირატესობისკენ?“ და „შეესაბამები მოთხოვნებს მსახურებისთვის?“ — 1990 წლის 1 სექტემბრის „საგუშაგო კოშკში“ (რუს.) მრავალი ძმა აღძრა, რომ პასუხისმგებლობები ეკისრათ კრებაში. მიზნების დასახვასა და მოთხოვნების შესრულებასთან დაკავშირებით რჩევებისთვის მიმართე კრების უხუცესებს.

⁴ დაუქორწინებელ უხუცესებსა და სამსახურებრივ თანაშემწეებს მოუწოდებენ, სერიოზულად დაფიქრდნენ სამსახურებრივი დახელოვნების სკოლაში შესვლაზე. შეგიძლია გაეცნო ამ სკოლას, თუ წაიკითხავ 1998 წლის 8 სექტემბრის ჟურნალში „გამოიღვიძეთ!“ გამოქვეყნებულ სტატიას „სამსახურებრივი დახელოვნების სკოლის პირველი კლასი რუსეთში“. ხედავ, რომ შენ წინაშე „ღიაა ღვაწლის ფართე კარი“? (1 კორ. 16:9ა). მრავალ ძმას, რომლებმაც ამ სკოლაში შეაბიჯეს, ვერც კი წარმოედგინათ ყველა ის უპირატესობა, რომელიც სკოლის დამთავრებას მოჰყვებოდა. ახლა მათგან ზოგი მსახურობს ბეთელში, ზოგიც სპეციალურ პიონერად, მისიონერად ან სარაიონო ზედამხედველად.

⁵ ისწრაფე სრული დროით მსახურებისკენ. სკოლადამთავრებულმა ახალგაზრდობამ, დიასახლისებმა და პენსიაში გასულებმა სერიოზულად უნდა იფიქრონ პიონერულ მსახურებაზე. გადახედე 1998 წლის ივლისის „ჩვენი სამეფო მსახურების“ დანართს, შემდეგ გაესაუბრე პიონერებს, რომლებსაც შენნაირი მდგომარეობა ჰქონდათ. შეიძლება ამან აღგძრას მათ მსგავსად მეტი მონაწილეობა მიიღო მსახურებაში, როგორც პიონერმა (1 კორ. 11:1). რა არის საჭირო, რომ 70 საათამდე გაზარდო მსახურებაში შენი მონაწილეობა და იმსახურო პიონერად?

⁶ მთელ მსოფლიოში დღესდღეობით ფილიალებსა და ბეთელის სახლებში 17 000-ზე მეტი და-ძმა მსახურობს. ბეთელში მსახურების შესახებ მეტი ინფორმაციის წაკითხვა შეგიძლია 1997 წლის 1 აგვისტოს „საგუშაგო კოშკში“, გვერდი 9, და წიგნში „ჩვენი მსახურება“ (რუს.), გვერდები 116, 117. ყოველწლიურად საოლქო კონგრესზე ტარდება შეხვედრა ბეთელში მსახურების მსურველებთან. რატომ არ დაელაპარაკებოდი შენს სარაიონო ზედამხედველს, რომ გენახა, იქნებ შეესაბამები მოთხოვნებს ბეთელში მსახურების განსაკუთრებული უპირატესობისთვის?

⁷ იმსახურე იქ, სადაც მეტი საჭიროებაა. ცხოვრობ ისეთ ტერიტორიაზე, რომელსაც საკმაოდ ხშირად ამუშავებენ ან იქ, სადაც მრავალი და-ძმა მსახურობს? გიფიქრია იმაზე, რომ გადასულიყავი იქ, სადაც მეტი საჭიროებაა, და ასე მიგეღო მეტი მონაწილეობა მსახურებაში? შეიძლება გადასვლა მოხერხდეს ახლომდებარე სოფლებში, სადაც მეტი მუშაკია საჭიროა (მათ. 9:37, 38). მაგრამ ეს ნაჩქარევად არ უნდა გააკეთო. ეს საკითხი ფიქრსა და ლოცვას მოითხოვს (ლუკ. 14:28–30). ესაუბრე შენს მდგომარეობაზე უხუცესებსა და სარაიონო ზედამხედველს. ისინი იმსჯელებენ შენთან ერთად, ახლავე გადახვიდე თუ შეემზადო და მომავალში გადახვიდე. თუ გსურს საზოგადოებას მისწერო, რომ გირჩიოს, სად გადახვიდე, შენს წერილს უნდა ახლდეს კრების სამსახურებრივი კომიტეტის მიერ ხელმოწერილი წერილი.

⁸ გააუმჯობესე მსახურების ხარისხი. ალბათ, ყველა ჩვენგანი შეძლებს მეტ მონაწილეობას მსახურებაში ქადაგების ხარისხის გაუმჯობესებით. ამ საქმის ყველა სფეროში მონაწილეობ, მაგალითად კარდაკარ და არაფორმალურად ქადაგებაში, აგრეთვე განმეორებითი მონახულებებისა და ბიბლიის შესწავლის საქმეში? თუ შესწავლას ატარებ, შეგიძლია გააუმჯობესო სწავლების უნარი? კარგი იქნება, თუ გადახედავ 1996 წლის ივნისის „ჩვენი სამეფო მსახურების“ დანართს რჩევებისთვის, რომელთა გამოყენებითაც აღძრავ შემსწავლელს მიძღვნისა და მონათვლისკენ.

⁹ უფრო ვრცლად მსახურების გაუმჯობესება და მეტი მონაწილეობა ირჩევა წიგნში „ორგანიზებული ვართ ჩვენი მსახურების შესასრულებლად“ (მე-9 თავი). რა თქმა უნდა, ყველა ჩვენგანს უნდა სურდეს, რაც შეიძლება მეტი აკეთოს ღვთის მსახურებაში. რატომ არ დაფიქრებულიყავი სერიოზულად სულიერ მიზნებზე? მოიქეცი ისე, როგორც 1 ტიმოთეს 4:15-შია ნათქვამი: „ამაზე იზრუნე და ამაზე იდექი, რათა ყველასათვის ცხადი იყოს შენი წარმატება“.