გაქვს თავგანწირვის სულისკვეთება?
1 მადლიერებამ იმის გამო, რაც იესო ქრისტემ კაცობრიობისთვის უანგაროდ გააკეთა, უნდა აღგვძრას, რომ თავგანწირვის სულისკვეთებით გამოვიყენოთ ჩვენი უნარი, ენერგია და ძალები. საღვთო წერილში შემდეგი თხოვნაა ჩაწერილი: „შესწირეთ თქვენი სხეული ცოცხალ, წმიდა, ღვთის სასურველ მსხვერპლად — თქვენი. . . მსახურება“ (რომ. 12:1). ამ მხრივ საკუთარი თავის დროდადრო შემოწმება დაგეხმარება იმის დანახვაში, სავსებით ავლენ თუ არა ამგვარ სულისკვეთებას იმდენად, რამდენადაც შენი პირადი მდგომარეობა გაძლევს ამის საშუალებას.
2 ბიბლიური შემეცნების შეძენაში. დაგეგმილი გაქვს რეგულარული დრო ბიბლიის პირადი კითხვისა და შესწავლისთვის? მიჰყვები ამ გეგმას? ჩვეულებრივ რამეს წარმოადგენს შენთვის კრების შეხვედრებისთვის გულდასმით მომზადება? თუ ოჯახის მეთაური ხარ, ატარებ რეგულარულად ბიბლიის შესწავლას ოჯახთან ერთად? ყოველივე ამან შეიძლება მოითხოვოს ჩვენგან, მსხვერპლად გავიღოთ დრო, რომელსაც ტელევიზორს, კომპიუტერსა თუ სხვა საქმეებს ვუთმობთ. მაგრამ ასეთი მსხვერპლი ძალიან მცირე ჩანს, როცა იცი, რომ ღვთის სიტყვის კითხვასა და შესწავლაში გატარებული დრო მარადიული სიცოცხლის მიღწევაში დაგეხმარება (იოან. 17:3).
3 შვილების აღზრდაში. ბავშვობა საუკეთესო დროს წარმოადგენს თავგანწირვის სულისკვეთების სწავლის დასაწყებად. ასწავლე შვილებს, რომ, თუმცა თამაშს თავისი დრო აქვს, მუშაობასა და თეოკრატიულ საქმეებსაც უნდა გამოეყოს დრო (ეფეს. 6:4). დაავალე მათ რამე სასარგებლო ოჯახური საქმის შესრულება. შეადგინე მათთან ერთად მსახურებაში რეგულარული მონაწილეობის გეგმა. შენ მიერ მათი დასწავლება კარგი პირადი მაგალითით განამტკიცე.
4 კრების საქმეებში. კრება უმჯობესდება, როცა თითოეული მისი წევრი მზადყოფნით მიდის მსხვერპლზე, რათა საერთო საქმეს შეეწყოს ხელი (ებრ. 13:16). შეგიძლია თუ არა მეტი დროის დათმობა სამეფოს შესახებ ქადაგებისა და მოწაფეების მომზადებისთვის? შეგიძლია დაეხმარო ავადმყოფებს ან ხანდაზმულებს, მაგალითად, მათი შეხვედრებზე მოყვანით?
5 იესომ, სანამ ადამიანური სიცოცხლის უდიდეს მსხვერპლს გაიღებდა, თავის მოწაფეებს ურჩია, რომ მთელი ყურადღება სამეფოს ინტერესებზე გადაეტანათ, ხოლო სხვა საქმეები მეორე ადგილზე დაეყენებინათ (მათ. 6:33). ასეთი თავგანწირვის სულისკვეთების გამოვლენა უფრო დიდ ბედნიერებას მოგვიტანს იეჰოვასადმი მსახურების სიხარულით გაგრძელებისას.