ახალი სარაიონო კონგრესის პროგრამა

ერთ-ერთი განმარტების თანახმად, შიში არის „ღრმა პატივისცემა და მოწიწება, განსაკუთრებით კი ღმერთის მიმართ“. ამით აღწერილია ჯანსაღი შიში, რომელიც საღვთო წერილში ‘სიბრძნის დასაბამად’ არის მოხსენიებული (ფსალმ. 110:10). ამისგან განსხვავებით, სხვაგვარი შიში ჩვენს გარშემო სატანის წუთისოფელშია გამეფებული. როგორ შეგვიძლია თავი ავარიდოთ ამ საზიანო გრძნობას, მაშინ როცა იეჰოვასადმი მოკრძალებულ შიშს ვავითარებთ? 2002 წლის სამსახურებრივი წლის სარაიონო კონგრესის პროგრამა ამ კითხვას ეხება. მისი თემა იქნება „გეშინოდეთ ღვთისა და დიდება მიაგეთ მას“ (გამოცხ. 14:7). ჩვენ გავიგებთ, თუ რამდენად სასარგებლოა იეჰოვასადმი შიში როგორც პირადად ჩვენთვის, ისე ორგანიზაციისთვის.

თუმცა შიში შეიძლება წუხილს ან გაუბედაობას და რთულ სიტუაციებთან შესახვედრად მზადყოფნის უქონლობას გულისხმობს, ბიბლია აცხადებს: „ნეტარია ყოველი, რომელსაც ეშინია უფლისა“ (ფსალმ. 127:1). ამ კონგრესის პროგრამა დაგვანახვებს, თუ როგორ შეიძლება წარმატებით გავუმკლავდეთ სირთულეებს, რომელიც ჭეშმარიტ თაყვანისმცემლობას მოჰყვება. გავიგებთ, როგორ შეგვიძლია დავეხმაროთ ახლებს ღვთისადმი ამ ჯანსაღი შიშის განვითარებაში, რაც სინამდვილეში მათში აღძრავს იმის სურვილს, რომ მთელი გულით, სულით, გონებითა და ძალით ემსახურონ მას (მარ. 12:30). პირველი დღე დასრულდება საოლქო ზედამხედველის მოხსენებით „დაუახლოვდით მათ, ვინც გიყვართ“. ის ახსნის, თუ როგორ შეგვიძლია სიფხიზლე შევინარჩუნოთ, რათა არ გავხდეთ ეშმაკის ხრიკების მსხვერპლი, რომლებითაც ის ცდილობს ჩვენი, ჩვენი ოჯახისა და ქრისტიანი და-ძმების იეჰოვასგან ჩამოშორებას.

„იეჰოვასი გეშინოდეთ და არა ადამიანის“, — ეს არის მეორე დღის ოთხნაწილიანი მოხსენებათა სერიის თემა. მასში ახსნილი იქნება, რატომ და როგორ უნდა დავძლიოთ შიში, რომელიც მსახურებაში ან სკოლასა თუ სამსახურში უმწიკვლობისა და კეთილი სინდისის შენარჩუნებაში ხელს გვიშლის. საჯარო მოხსენებაში „ღვთისა გეშინოდეს და დაიცავი მცნებები მისი“ გამოცხადების მე-14 თავში აღწერილი თანმიმდევრული მოვლენები იქნება ახსნილი. სარაიონო კონგრესი დასრულდება გამამხნევებელი მოხსენებით „იარეთ იეჰოვას მოშიშებით“.

თეოკრატიული სამსახურის სკოლა, სანიმუშო სამსახურებრივი შეხვედრა, მოხსენება მონათვლის მსურველთათვის და „საგუშაგო კოშკის“ მოკლე მიმოხილვა პროგრამის სხვა მნიშვნელოვანი პუნქტებია, რომელთა გამოტოვების სურვილი არ გექნება. მოიწვიე ბიბლიის შემსწავლელები, რომ შენთან ერთად დაესწრონ კონგრესს. მონათვლის მსურველებმა რაც შეიძლება მალე უნდა აცნობონ თავჯდომარე ზედამხედველს, რომ მონათვლა სურთ. ყოველ ჩვენგანს სურს იეჰოვასადმი ჯანსაღი შიშის გამოვლენა და ამ განსაკუთრებული პროგრამის ყველა ნაწილზე დასწრებით მისი განდიდება!