დავეხმაროთ სხვებს იეჰოვას განდიდებაში

¹ მთელ დედამიწაზე გაისმის მეტად მნიშვნელოვანი ცნობა: „გეშინოდეთ ღვთისა და დიდება მიაგეთ მას, ვინაიდან დადგა მისი სამსჯავროს ჟამი. თაყვანი ეცით ცისა და მიწის, ზღვისა და წყალთა წყაროების შემქმნელს“ (გამოცხ. 14:6, 7). ჩვენ დიდებული პატივი გვხვდა წილად, რომ შეგვიძლია ამ ცნობის გაცხადების საქმეში მონაწილეობა. რის ცოდნაა აუცილებელი ხალხისთვის, რათა ეშინოდეთ და თაყვანი სცენ იეჰოვას?

² მისი სახელი. ადამიანებს უნდა შეეძლოთ ერთადერთი ჭეშმარიტი ღმერთის სახელის გარჩევა, უამრავი ცრუ ღმერთისგან, რომლებსაც დღეს სცემენ თაყვანს (რჯლ. 4:35, აქ; 1 კორ. 8:5, 6). აღსანიშნავია, რომ ბიბლიის დამწერები იეჰოვას დიდებულ სახელს 7000-ზე მეტჯერ იხსენიებენ. რა თქმა უნდა, ღვთის სახელის წარდგენისას გამჭრიახობა გვჭირდება, მაგრამ არასდროს არ უნდა დავმალოთ ის ან შეგვრცხვეს ამ სახელის გამოყენება. ღმერთს სურს, რომ მისი სახელი ყველამ გაიგოს (ფსალმ. 82:19).

³ მისი თვისებები. იეჰოვას განსადიდებლად, ადამიანებმა უნდა იცოდნენ, როგორი ღმერთია ის. ჩვენ მათ უნდა გავაცნოთ ღმერთი, რომელსაც ახასიათებს: ენით აღუწერელი სიყვარული, უბადლო სიბრძნე, სრულყოფილი სამართლიანობა, ყოვლისშემძლეობა; ამასთანავე აღსანიშნავია მისი გულმოწყალება, სიკეთე და სხვა ბრწყინვალე თვისებები (გამ. 34:6, 7). აგრეთვე, ადამიანებმა უნდა ისწავლონ ღვთის მიმართ ჯანსაღი შიშისა და პატივისცემის გამოვლენაც და უნდა გაიგონ, რომ მათი სიცოცხლე იეჰოვას კეთილგანწყობაზეა დამოკიდებული! (ფსალმ. 88:8).

⁴ ღმერთთან დაახლოება. ღვთის მოახლოებული განკითხვის დღე რომ გადაიტანონ, ადამიანებს იეჰოვას სახელის რწმენით მოხმობა მართებთ (რომ. 10:13, 14; 2 თეს. 1:8). ეს უფრო მეტს მოიცავს, ვიდრე მხოლოდ მისი სახელისა და თვისებების ცოდნაა. ჩვენ უნდა დავეხმაროთ სხვებს იეჰოვასთან ახლო, პირადი ურთიერთობის განვითარებასა და მისადმი მთელი გულით მინდობაში (იგავ. 3:5, 6). ნასწავლის ცხოვრებაში გამოყენება, ღვთისადმი გულწრფელად ლოცვა და თავიანთ ცხოვრებაში ღვთის ხელის კეთილისმყოფელი გავლენა გაზრდის მათ რწმენასა და დაეხმარება, უფრო დაუახლოვდნენ იეჰოვას (ფსალმ. 33:9).

⁵ მოდი გულმოდგინედ გავაცხადოთ ღვთის სახელი და დავეხმაროთ სხვებს, რომ სრულად მიენდონ მას და ეშინოდეთ მისი. შეიძლება ჯერ კიდევ შევძლოთ, დავეხმაროთ მრავალს, რომ გაიცნონ იეჰოვა და განადიდონ იგი, როგორც „ჩვენი ხსნის ღმერთი“ (ფსალმ. 24:5).