ოჯახის თავებო — ყოველთვის აქტიურები იყავით სულიერ საქმიანობაში
1 მიუხედავად იმისა, რომ დანიელი ათწლეულების განმავლობაში ბაბილონში — კერპთაყვანისმცემელ და მორალურად გარყვნილ ხალხს შორის — ცხოვრობდა, ყველამ იცოდა, რომ ის იეჰოვას ერთგული მსახური იყო (დან. 6:16, 20). რა ეხმარებოდა მას სულიერობის შენარჩუნებაში? ბიბლიაში მოთხრობილია, რომ იგი აქტიურ სულიერ ცხოვრებას ეწეოდა და ჭეშმარიტ თაყვანისმცემლობას უჭერდა მხარს. როგორც წესი, იგი დღეში სამჯერ ლოცულობდა „თავისი ქორედის სარკმლების წინ“ (დან. 6:11). დანიელი, ცხადია, მხოლოდ ლოცვით არ კმაყოფილდებოდა და რჯულსაც კითხულობდა. ამიტომ იყო, რომ მძიმე განსაცდელის წინაშე მდგარმა, იეჰოვასადმი ურყევი ერთგულება შეინარჩუნა და გადარჩა კიდეც სასწაულებრივად (დან. 6:4—22).
2 დანიელის მსგავსად, ჩვენც ყველანაირად უნდა ვეცადოთ, რომ ‘მუდამ ვიფხიზლოთ’ (ეფეს. 6:18). დღევანდელი წუთისოფელი „ბოროტებაში ძევს“ (1 იოან. 5:19). შეიძლება წინააღმდეგობებსა და განსაცდელებს მოულოდნელად წავაწყდეთ და რწმენის გამოცდის წინაშე დავდგეთ. დიდი გასაჭირის დროს გოგ მაგოგელი სრული ძალებით შეუტევს ღვთის მსახურებს, გასაქცევი კი შეიძლება არსად ჩანდეს. ასეთ განსაცდელებს რომ გავუძლოთ, იეჰოვაზე სრული მინდობა გვჭირდება (ეზეკ. 38:14—16).
3 „ამისათვის ერთ-ერთი უმთავრესი საშუალებაა, ოჯახთან ერთად ბიბლიის კითხვა, შესწავლის ჩატარება და მსჯელობა“. ასეთი სიტყვები ჰქონდა წამძღვარებული 1998 წლის საოლქო კონგრესზე დადგმულ დრამას „ოჯახებო — ყოველდღიურად იკითხეთ ბიბლია“. დრამის წინასიტყვაობაში გრძელდებოდა: „თუ ასეთ პროგრამას ოჯახის წევრები რეგულარულად მისდევენ და თანაც ისე, რომ აცოცხლებენ ბიბლიის ფურცლებს, ეს დიდ სარგებლობას მოუტანს მათ. ასეთი პროგრამა გვიღრმავებს ცოდნას . . . და გვიძლიერებს რწმენას, გვაცნობს ძველი დროის ერთგული, მისაბაძი მამაკაცებისა და ქალების ცხოვრებას; მათ მაგალითზე დაფიქრება კი აღგვძრავს, ფხიზლად ვიდგეთ ჭეშმარიტების სადარაჯოზე“. ქვემოთ ვისაუბრებთ სხვადასხვა საშუალებაზე, რომლებიც დაგვეხმარება, აქტიურები ვიყოთ სულიერ ცხოვრებაში. ოჯახისთავებს კი შეუძლიათ ყურადღება მიაქციონ იმას, თუ ქვემოთ განხილული რომელი გზებით შეძლებდნენ ოჯახის სულიერი საქმიანობის გაუმჯობესებას.
4 ყოველდღე განიხილე ღვთის სიტყვა. „როდესაც ღვთის სამეფოს მმართველობას ხელს არაფერი შეუშლის და ღვთის ნება დედამიწაზეც ისევე შესრულდება, როგორც ზეცაში, ვერც ერთი ბოროტი ადამიანი, და ცხოველიც კი, ‘ვერ იბოროტებს და ვერ იბილწებს’ (ეს. 11:9; მათ. 6:9, 10)“, — ნათქვამია 2001 წლის „საღვთო წერილის ყოველდღიური განხილვის“ 11 სექტემბრისთვის დათმობილ ტექსტში. მართლაც რომ, მანუგეშებელია ეს შეხსენება! როგორც ოჯახის თავი, ყოველდღე განიხილავ თუ არა ბიბლიურ მუხლსა და მასზე დართულ კომენტარს ოჯახთან ერთად? ეს დიდ სარგებლობას მოგიტანთ. თუ ვერ ახერხებთ დილაობით შეკრებას, მაშინ დღის განმავლობაში გამოყავით დრო საამისოდ. ერთმა მამამ შენიშნა: „ბიბლიური მუხლის განხილვა ვახშმობისას უფრო გვიხერხდება“.
5 კარგია, თუ უკვე შედგენილი გაქვს კარგი განრიგი ოჯახთან ერთად ბიბლიური მუხლის განსახილველად. ასეთ დროს იქნებ ბიბლიის რომელიმე მონაკვეთიც წაგეკითხა, რაც უფრო დიდი სარგებლობის მომტანი იქნება. ზოგი ბიბლიიდან რეგულარულად კითხულობს იმ თავს, საიდანაც დღიური მუხლია აღებული. ზოგი კი განაგრძობს ბიბლიის კითხვას პირადი გეგმის მიხედვით. ბიბლიის ყოველდღიური კითხვა ხელს შეუწყობს შენი ოჯახის წევრებს, განავითარონ ჯანსაღი შიში იმისა, რომ იეჰოვას არაფერი აწყენინონ, და მისი ნების შესრულების უფრო ძლიერი სურვილი გაუჩნდეთ (რჯლ. 17:18—20).
6 ბიბლიის კითხვის პროგრამის მიყოლა და ყოველდღიური მუხლის განხილვა კიდევ უფრო სასარგებლო იქნება, თუ რამდენიმე წუთს დაუთმობ წაკითხულის ცხოვრებაში გამოყენებაზე საუბარს. თეოკრატიული სამსახურის სკოლის სახელმძღვანელოში, მე-60 გვერდზე მოცემულია შემდეგი რჩევა: „ბიბლიის კითხვის ყოველკვირეული პროგრამიდან შეგიძლია შეარჩიო რამდენიმე მუხლი, განიხილო და შემდეგ დასვა შეკითხვები: რას ვსწავლობთ აქედან? როგორ შეგვიძლია ამ მუხლების მსახურებაში გამოყენება? რას ვიგებთ იეჰოვასა და მისი საქმეების შესახებ და როგორ გვინერგავს ეს მისადმი მადლიერებას?“. სულიერ თემაზე ასეთი საუბარი ოჯახის ყველა წევრს დაეხმარება, ‘შეიცნონ, რა არის ღვთის ნება’ (ეფეს. 5:17).
7 ოჯახური შესწავლა. ოჯახის თავებს შესანიშნავი შესაძლებლობა აქვთ, ყოველკვირეულად ჩაატარონ ოჯახური შესწავლა. ეს შვილებს აჩვენებს, რომ სულიერ საქმიანობას ცხოვრებაში პირველი ადგილი ენიჭება. ერთი ახალგაზრდა იხსენებს: „სამსახურიდან მამაჩემი ზოგჯერ ისეთი დაღლილი მოდიოდა, რომ ძილი ერეოდა, მაგრამ შესწავლას მაინც გვიტარებდა, რაც გვეხმარებოდა იმის დანახვაში, თუ რამდენად მნიშვნელოვანი იყო შესწავლა“. შესწავლის წარმატებით ჩატარებაში ბავშვებსაც შეუძლიათ თავიანთი წვლილის შეტანა. ერთი ცხრაშვილიანი ოჯახი შესწავლისთვის ყოველთვის დილის ხუთ საათზე დგებოდა, რადგან მათ მხოლოდ ეს დრო აწყობდათ.
8 ოჯახური შესწავლა ნაყოფიერი რომ იყოს, ოჯახისთავი ‘ყოველთვის უნდა დაუკვირდეს იმას, თუ რას და როგორ ასწავლის’ (1 ტიმ. 4:16, აქ). თეოკრატიული სამსახურის სკოლის სახელმძღვანელოში, 32-ე გვერდზე აღნიშნულია: „შეიძლება ითქვას, რომ კარგი ოჯახური შესწავლა თავად ოჯახის შესწავლით იწყება. როგორ იზრდებიან სულიერად შენი ოჯახის წევრები?. . ქადაგებისას ხომ არ ეუხერხულებათ შვილებს თანატოლებთან იმის აღიარება, რომ იეჰოვას მოწმეები არიან? უყვართ თუ არა ოჯახთან ერთად ბიბლიის კითხვა და შესწავლა? ნამდვილად არის იეჰოვას გზა მათი ცხოვრების გზა? დაკვირვება დაგანახვებს, თუ შენ, როგორც ოჯახისთავმა, რა უნდა გააკეთო ოჯახის თითოეული წევრის სულიერობის განსამტკიცებლად“.
9 კრების შეხვედრები. კრების შეხვედრებისთვის მომზადება და მათზე დასწრება სულიერი საქმიანობის რეგულარული და მნიშვნელოვანი ნაწილი უნდა იყოს (ებრ. 10:24, 25). დროდადრო, ზოგიერთი შეხვედრისთვის, შეგიძლიათ მთელი ოჯახი ერთად მოემზადოთ. ემზადებით წინასწარ სათანადოდ, ნაცვალად იმისა, რომ ეს ბოლო წუთებში გააკეთოთ? თუ რეგულარული განრიგი გექნებათ, უკეთესად მოემზადებით და შეხვედრებიც უფრო მეტ სარგებლობას მოგიტანთ (იგავ. 21:5).
10 ხარისხიანობა და რეგულარულობა აქტიურ სულიერ ცხოვრებაზე მეტყველებს. მაგრამ როგორ მოვიქცეთ, თუ ცხოვრებისეული მდგომარეობა არ გვაძლევს ყველა შეხვედრისთვის მომზადების საშუალებას? თეოკრატიული სამსახურის სკოლის სახელმძღვანელოში, 31-ე გვერდზე მოცემულია შემდეგი რჩევა: „მოერიდე მოვალეობის მოხდის მიზნით მასალის სწრაფად გადაკითხვას. არც ის არის კარგი, რომ არაფერი წაიკითხო მხოლოდ იმის გამო, რომ ყველაფრის წაკითხვას ვერ ახერხებ. განსაზღვრე, რამდენის შესწავლა შეგიძლია და საფუძვლიანად შეისწავლე სწორედ იმდენი. ასე მოიქეცი ყოველკვირეულად. თანდათანობით უფრო მეტის შესწავლასა და კრების სხვა შეხვედრებისთვის მომზადებასაც შეეცადე“.
11 შეხვედრებზე ადრე მისვლა ოჯახებს იმაში ეხმარება, რომ იეჰოვას განსადიდებლად განეწყონ და მის მიერ მომზადებული პროგრამიდან უფრო მეტი სარგებლობა მიიღონ. რეგულარულად აკეთებს ამას შენი ოჯახი? ეს კარგ დაგეგმვასა და ოჯახის ყველა წევრის ერთმანეთთან თანამშრომლობას მოითხოვს. თუ ხშირად ამჩნევ, რომ შენი ოჯახის წევრები შეხვედრის დღეს, საღამოობით, ჩქარობენ და ამის გამო დაძაბული არიან, იქნებ გარკვეული ცვლილებები მოგეხდინა? ხომ არ შეიძლებოდა, ზოგიერთი რამ წინასწარ მოგეგვარებინა? თუ ოჯახის რომელიმე წევრი ზედმეტად არის გადატვირთული, იქნებ დანარჩენები მიეხმარონ? თუ შეხვედრაზე წასვლამდე რამდენიმე წუთით ადრე ყველა მზად იქნებოდა, ეს შეამცირებდა დაძაბულობას. კარგი დაგეგმვა ხელს შეუწყობს იმას, რომ სულიერმა სიმშვიდემ დაისადგუროს როგორც ოჯახში, ისე კრებაში (1 კორ. 14:33, 40).
12 სამქადაგებლო მსახურება. სულიერ საქმიანობაში აქტიურობის შენარჩუნების კიდევ ერთი ხელშემწყობი ფაქტორია კონკრეტული დროის დათქმა მსახურებაში მონაწილეობის მისაღებად. ერთი ახალგაზრდა, სახელად ჯეისონი, იხსენებს: „ჩვენი ოჯახი სამქადაგებლო მსახურებას ყოველ შაბათ დილას ვუთმობდით. ასეთი გეგმა საკმაოდ მეხმარებოდა. რაც უფრო მეტს ვქადაგებდი, მით უკეთეს შედეგებს ვაღწევდი და უფრო მეტ სიხარულს ვგრძნობდი“. ბევრმა, ვინც იეჰოვას მოწმეების ოჯახში აღიზარდა, შენიშნა, რომ საქადაგებლად კონკრეტული დროის გამოყოფა მათ, როგორც ქრისტიან მსახურებს, სულიერ წინსვლაში დაეხმარათ.
13 სულიერი აქტიურობის შენარჩუნება ოჯახს იმაშიც უწყობს ხელს, რომ სამქადაგებლო მსახურებისთვის წინასწარ განსაზღვრული დრო უფრო საინტერესოდ და ნაყოფიერად გამოიყენონ. რა არის ამისთვის საჭირო? 1999 წლის 1-ლი ივლისის „საგუშაგო კოშკში“, 21-ე გვერდზე შემდეგი რჩევაა მოცემული: „ოჯახური შესწავლებისას დროდადრო თუ უთმობთ დროს ოჯახის წევრების ყოველკვირეული სამქადაგებლო საქმიანობისთვის მომზადებაში დახმარებას? ასე მოქმედება შეიძლება ძალზე სასარგებლო აღმოჩნდეს (2 ტიმ. 2:15). ის ოჯახის თითოეული წევრის მსახურებას საინტერესოსა და ნაყოფიერს გახდის. ხანდახან შეიძლება მთელი შესწავლა ასეთი მომზადებისთვის დაგეთმოთ. უფრო ხშირად კი, ოჯახური შესწავლის დასრულებისას ან კვირის განმავლობაში სხვა რომელიმე დროს შეგეძლოთ მოკლედ გესაუბრათ სამქადაგებლო მსახურების სხვადასხვა მხარეზე“. ცდილობს ამას შენი ოჯახი?
14 ეცადე, უფრო წინ წაიწიო. ზემოთ განხილულ რომელ სფეროებში აღწევენ წარმატებას შენი ოჯახის წევრები? შეაქე ისინი და დაეხმარე, უფრო მეტს მიაღწიონ. თუ ხედავ, რომ ზოგიერთ სფეროში გაუმჯობესებაა საჭირო, ამოარჩიე იქიდან ერთი ან ორი და ჯერ მათზე იმუშავეთ; და როცა ისინი თქვენი სულიერი ცხოვრების ნაწილი გახდება, შემდეგ მომდევნოზე გადადით. შეინარჩუნეთ დადებითი განწყობილება და კეთილგონივრულად მოიქეცით (ფილ. 4:4, 5, აქ). მართალია, ადვილი არ არის ოჯახის წევრებისთვის სულიერი საქმიანობის შესასრულებლად კარგი განრიგის შედგენა, მაგრამ ეს ძალისხმევად ნამდვილად ღირს, რადგან იეჰოვა გვარწმუნებს: „ვინც სწორ გზას დაადგება, მას ვუჩვენებ შველას ღმერთისას“ (ფსალმ. 49:23).