ყველასთვის ცნობილი გახადე ღვთის სახელი
1. რა გავლენა შეიძლება მოახდინოს ადამიანზე ღვთის სახელის გაგებამ?
1 რა რეაქცია გქონდა, როდესაც პირველად გაიგე ღვთის სახელი? ერთი მანდილოსნის სიტყვები ბევრის გრძნობებს გამოხატავს: „როდესაც ღვთის სახელი პირველად ვნახე ბიბლიაში, ავქვითინდი. ჩემზე ძალიან იმოქმედა, რომ შემეძლო მცოდნოდა და გამომეყენებინა ღვთის პირადი სახელი“. მისთვის ღვთის სახელის გაგება მნიშვნელოვანი ნაბიჯი იყო იმისათვის, რომ იეჰოვა გაეცნო, როგორც პიროვნება და მასთან ახლო ურთიერთობა განევითარებინა.
2. რატომ უნდა ვასწავლოთ სხვებს გადაუდებლად ღვთის სახელის შესახებ?
2 რატომ უნდა გავხადოთ ცნობილი? ღვთის სახელი დაკავშირებულია მის თვისებებთან, განზრახვებთან და მოქმედებებთან. ის აგრეთვე ხსნასთან არის დაკავშირებული. „ყოველი, ვინც უფლის სახელს მოუხმობს, გადარჩება“, — დაწერა პავლე მოციქულმა. მაგრამ „როგორ მოუხმონ მას“, თუკი ადამიანი არ ისწავლის იეჰოვას შესახებ და არ გამოავლენს მისდამი რწმენას? მაშასადამე, ქრისტიანებმა გადაუდებლად უნდა ამცნონ სხვებს ღვთის სახელი და ყველაფერი, რაც მის სახელთან არის დაკავშირებული (რომ. 10:13, 14). არსებობს კიდევ ერთი მიზეზი, თუ რატომ უნდა გავხადოთ ღვთის სახელი ცნობილი.
3. რა არის ქადაგების უმთავრესი მიზეზი?
3 ღვთის ხალხმა 1920-იან წლებში წმინდა წერილების საფუძველზე დაინახა, რომ წამოჭრილია საყოველთაო საკამათო საკითხი ღვთის უზენაესობის გამართლებასა და მისი სახელის განწმენდასთან დაკავშირებით. სანამ იეჰოვა გაანადგურებს ბოროტებას, რომ ჩამორეცხოს ჩირქი, რომელიც მის სახელს მოსცხეს, ჭეშმარიტება მის შესახებ ყველამ უნდა გაიგოს (ეს. 12:4, 5; ეზეკ. 38:23). ამიტომ ქადაგების ყველაზე მნიშვნელოვანი მიზეზი ის არის, რომ საჯაროდ განვადიდოთ იეჰოვა და მთელი კაცობრიობის წინაშე წმინდადვყოთ მისი სახელი (ებრ. 13:15). ღვთისა და მოყვასის სიყვარული აღგვძრავს, რომ სრულად მივიღოთ მონაწილეობა ღვთის მიერ დაკისრებულ საქმეში.
4. როგორ უკავშირებენ იეჰოვას მოწმეებს ღვთის სახელს?
4 „ხალხი თავისი სახელისათვის“. 1931 წელს ჩვენ მივიღეთ სახელწოდება იეჰოვას მოწმეები (ეს. 43:10). მას შემდეგ ღვთის ხალხმა იმდენად ცნობილი გახადა ღვთის სახელი, რომ წიგნში „მაუწყებლები“ (ინგლ.), 124-ე გვერდზე ნათქვამია: „თუ ვინმე საუბარში იყენებს სახელს იეჰოვა, მაშინვე ხვდებიან, რომ ის იეჰოვას მოწმეა, და ეს ასეა მთელ მსოფლიოში“. შენც გიცნობენ ასე? იეჰოვას სიკეთისთვის მადლიერება აღგვძრავს, ‘ვადიდოთ მისი სახელი’, ვილაპარაკოთ მის შესახებ ნებისმიერ შესაფერის დროს (ფსალმ. 19:8; 144:1, 2, 7).
5. რა კავშირი აქვს ჩვენს საქციელს იმასთან, რომ ღვთის სახელს ვატარებთ?
5 როგორც „ხალხი თავისი სახელისათვის“, ჩვენ მისი ნორმებით უნდა ვიცხოვროთ (საქ. 15:14; 2 ტიმ. 2:19). ხშირად ხალხი იეჰოვას მოწმეებზე საუბრისას სწორედ მათ კარგ საქმეებზე ამახვილებს ყურადღებას (1 პეტ. 2:12). არასოდეს დავუშვათ, რომ მისი სახელი შეილახოს ჩვენი საქციელით — მისი პრინციპების უგულებელყოფით ან ცხოვრებაში მისდამი თაყვანისცემის მეორეხარისხოვან ადგილზე დაყენებით (ლევ. 22:31, 32; მალ. 1:6—8, 12—14). მოდი ჩვენი ცხოვრებით ვაჩვენოთ, რომ ვაფასებთ ღვთის სახელის ტარების უდიდეს პატივს.
6. რა დიდი პატივი შეგვიძლია გვქონდეს ახლა და მარადიულად?
6 დღესდღეობით ვხედავთ, როგორ სრულდება ღვთის სიტყვა: „რადგან დიდი იქნება ჩემი სახელი ხალხებში მზის აღმოსავალიდან დასავალამდე“ (მალ. 1:11). კვლავაც ყველასთვის ცნობილი გავხადოთ ჭეშმარიტება იეჰოვას შესახებ და ‘ვაქოთ მისი წმიდა სახელი უკუნითი უკუნისამდე’ (ფსალმ. 144:21).