დაუძლურებული, მაგრამ ნაყოფიერი

¹ თუ იეჰოვას იმ მრავალ მოწმეს შორის ხარ, რომლებიც ფიზიკურად დაუძლურებული არიან, მაინც შეგიძლია ნაყოფიერად მსახურება. ფაქტობრივად, შენმა მდგომარეობამ შეიძლება განსაკუთრებული შესაძლებლობები მოგცეს საქადაგებლად და სხვების გასამხნევებლად.

² ქადაგება. ბევრი, ვისაც ფიზიკური სისუსტე აქვს, სრულად მონაწილეობს მსახურებაში. მაგალითად, ერთმა დამ, რომელსაც ოპერაციის შედეგად არ შეეძლო გადაადგილება და მეტყველების უნარი დაზიანებული ჰქონდა, გადაწყვიტა, რომ მონაწილეობას მიიღებდა ჟურნალების გავრცელებაში, თუკი მისი ქმარი მანქანას ხალხმრავალ ტროტუართან გააჩერებდა. ერთხელ ორი საათის განმავლობაში მან 80 ჟურნალი გაავრცელა! შენი განსაკუთრებული მდგომარეობის გამო შეიძლება ისეთ ხალხს შეხვდე, რომლებთანაც ურთიერთობის დამყარება სხვაგვარად შეუძლებელი იქნებოდა. თუ ასეა, მაშინ ეს განსაკუთრებულ სამქადაგებლო ტერიტორიად ჩათვალე.

³ შენი მსახურება შეიძლება ძალიან ეფექტური იყოს! შეიძლება სამეფოს შესახებ ცნობამ მიიზიდოს სხვები, როდესაც დაინახავენ შენს სიმტკიცესა და იმას, თუ რა კარგი გავლენა მოახდინა ბიბლიურმა ჭეშმარიტებამ შენს ცხოვრებაზე. უფრო მეტიც, როდესაც ხვდები ხალხს, რომლებიც იტანჯებიან ავადმყოფობის გამო, ცხოვრებისეული გამოცდილება დაგეხმარება, უკეთ ანუგეში ისინი ღვთის სიტყვით (2 კორ. 1:4).

⁴ გააძლიერე სხვები. განა გამამხნევებელი არ არის ლორელ ნიზბეტის შემთხვევა, რომელიც 37 წლის მანძილზე ხელოვნური სუნთქვის აპარატის საშუალებით ცოცხლობდა და ამ პერიოდის განმავლობაში 17 ადამიანს დაეხმარა ბიბლიური ჭეშმარიტების შეძენაში? ამის მსგავსად, შენი მაგალითიც დაეხმარება თანამორწმუნეებს, რომ ძალ–ღონე არ დაიშურონ იეჰოვას მსახურებისთვის (w15.09.01, გვ. 17, აბზ. 10).

⁵ მაშინაც კი, თუ მდგომარეობა არ გაძლევს საშუალებას, რომ იმდენი იმსახურო, რამდენიც გინდა, მაინც შეგიძლია სხვების გაძლიერება. ერთმა ძმამ თქვა: „მივხვდი, რომ ძალიან სუსტი ჯანმრთელობის მქონეებსაც შეუძლიათ სხვების დახმარება. მე და ჩემი მეუღლე ბევრისთვის კრებაში წარმოვადგენთ ერთგვარ ღუზას — ჩვენი მდგომარეობის წყალობით ყოველთვის ადგილზე ვართ, ჩვენი პოვნა ყოველთვის შეიძლება“. გასაგებია, რომ ფიზიკური სისუტის გამო ყოველთვის ვერ გააკთებ იმდენს, რამდენიც მთელი გულით გინდა. მიუხედავად ამისა, სხვების დახმარებით შეძლებ მსახურებაში აქტიურად მონაწილეობას. ამიტომ, თუ დახმარება გჭირდება, ნუ მოგერიდება მიმართო უხუცესებს ან კრების სხვა წევრებს, რომლებსაც შეუძლიათ დახმარების გაწევა.

⁶ იეჰოვა ხედავს ყველაფერს, რასაც მის მსახურებაში აკეთებ და ახარებს ის, რომ მთელი გულით ემსახურები მას (ფსალმ. 138:1—4). თუკი მას მიენდობი, ის გაგაძლიერებს, რომ ნაყოფიერი და აზრით აღსავსე იყოს შენი მსახურება (2 კორ. 12:7—10).