მიჰბაძე იესოს აზროვნებას
1. როგორ აზროვნებას ავლენდა იესო?
1 თუმცა არასოდეს გვინახავს ღვთის ძე, წერილობითი ჩანაწერებიდან ვიგებთ იესოს ცხოვრებისა და მისი მსახურების შესახებ. ამის შედეგად ჭეშმარიტი სიყვარული გვიჩნდება მის მიმართ (1 პეტ. 1:8). მამისადმი მორჩილების გამო მან დატოვა შესანიშნავი ზეციერი მდგომარეობა და მოვიდა დედამიწაზე. როგორც ადამიანი, ის თავდაუზოგავად ემსახურებოდა სხვებს, ბოლოს კი სიცოცხლე გაიღო კაცობრიობისთვის (მათ. 20:28). ღვთის სიტყვა მოგვიწოდებს: „ისეთივე აზროვნება გქონდეთ, როგორიც ქრისტე იესოს ჰქონდა“. როგორ შეგვიძლია მივბაძოთ იესოს თავგანწირვის სულის გამოვლენაში? (ფილ. 2:5—8, აქ).
2. რა პრობლემის წინაშე დგას ბევრი ქრისტიანი და რა დაეხმარება მათ ამის დაძლევაში?
2 როდესაც დაღლილობას გრძნობ. მიუხედავად იმისა, რომ იესო სრულყოფილი ადამიანი იყო, ისიც იღლებოდა. ერთხელ, როდესაც იესო „გზით დაქანცული“ იყო, მან სამარიელ ქალს უქადაგა (იოან. 4:6). დღეს ბევრი ქრისტიანი მსგავსი პრობლემის წინაშე დგას. დამქანცველი სამუშაო კვირის ბოლოს შეიძლება ძნელი იყოს ძალების მოკრება სამქადაგებლო მსახურებაში მონაწილეობისთვის. მაგრამ, თუ რეგულარულად მიიღებ მონაწილეობას, შეამჩნევ, რომ ქრისტიანული მსახურება სულიერად გამოგაცოცხლებს (იოან. 4:32—34).
3. როგორ შეგვიძლია იესოს მსგავსად გამოვავლინოთ მზადყოფნის სული, რომლითაც ის სხვებს ასწავლიდა?
3 სხვა დროს, იესო და მისი მოწაფეები განცალკევებულ ადგილას წავიდნენ, რათა ცოტა დაესვენათ. მაგრამ უამრავმა ხალხმა გაიგო ამის შესახებ და გაჰყვნენ მათ. ნაცვლად იმისა, რომ გაბრაზებულიყო, იესოს „შეებრალა ისინი“ და „დაუწყო მათ მრავალი რამის სწავლება“ (მარ. 6:30—34). ბიბლიის შესწავლების დასაწყებად და ჩასატარებლად მსგავსი დამოკიდებულებაა საჭირო. ეს მოითხოვს შეუპოვარ ძალისხმევას და ხალხისადმი გულწრფელ სიყვარულს. თუ ამჟამად არა გაქვს ბიბლიის შესწავლა, ნუ დანებდები; კვლავაც ეცადე, რომ შეძლო დაწყება.
4. როგორ გვივითარებს დამხმარე პიონერობა იესოს აზროვნებას?
4 პირველ ადგილზე სულიერი ინტერესები დააყენე. დამხმარე პიონერად მსახურება გვეხმარება, მეტი ყურადღება დავუთმოთ სულიერ საკითხებს. ერთმა ახალგაზრდა დამ დაწერა: „ერთხელ ჩემი მეგობრის დედამ წაგვახალისა ორივე, რომ მასთან ერთად გვემსახურა ერთი თვე დამხმარე პიონერად. ნამდვილად მიხარია, რომ შევუერთდით მას. ძალიან კმაყოფილი დავრჩი იმით, რომ უკეთ გავიცანი და-ძმები და მალე ისინი ჩემი ოჯახის წევრებივით გახდნენ. აგრეთვე, შესაძლებლობა მქონდა, სხვებთან უფრო მეტი მესაუბრა იეჰოვაზე და მესწავლებინა სამეფოს დიდებული ჭეშმარიტება. ყოველივე ამან უფრო დამაახლოვა იეჰოვასა და მის ორგანიზაციასთან“ (ფსალმ. 33:9).
5. რატომ არ უნდა შევწყვიტოთ იმის მცდელობა, რომ მივბაძოთ იესოს აზროვნებას?
5 თითოეულს გვიწევს ბრძოლა არასრულყოფილ სხეულთან, რადგან გვინდა იეჰოვას ვასიამოვნოთ (რომ. 7:21—23). წინააღმდეგობა უნდა გავუწიოთ ქვეყნიერების სულს, რომელიც იმისკენ გვიბიძგებს, რომ ზედმეტად არ შევიწუხოთ თავი (მათ. 16:22, 23). იეჰოვა დაგვეხმარება თავისი სულიწმიდით, რომ გავიმარჯვოთ (გალ. 5:16, 17). ჩვენ ყველა ველით ხსნას, რომ ვიცხოვროთ ღვთის სამართლიან ახალ ქვეყნიერებაში; მოდი მივბაძოთ იესოს აზროვნებას და სამეფოსა და სხვების ინტერესები საკუთარზე წინ დავაყენოთ (მათ. 6:33; რომ. 15:1—3).