ჩაატარე ნაყოფიერი ბიბლიის შესწავლები
ნაწილი 5. როგორ განვსაზღვროთ, რა რაოდენობის მასალა უნდა განვიხილოთ?
1 როდესაც იესო მოწაფეებს ასწავლიდა, მათ შესაძლებლობებს ითვალისწინებდა; ელაპარაკებოდა იმდენს „რამდენის მოსმენაც შეეძლოთ“ (მარ. 4:33; იოან. 16:12). მსგავსად ამისა, საჭიროა ღვთის სიტყვის მასწავლებლებმა დღესაც განსაზღვრონ, თუ რა რაოდენობის მასალა უნდა განიხილონ ბიბლიის შესწავლაზე. ეს დამოკიდებული იქნება როგორც შემსწავლელის, ასევე მასწავლებლის უნარსა და მდგომარეობაზე.
2 ჩაუნერგე მტკიცე რწმენა. მასალის აღსაქმელად ზოგ შემსწავლელს შესაძლოა ორი ან სამი შეხვედრა დასჭირდეს, მაშინ როცა სხვა შემსწავლელისთვის შეიძლება ერთი შეხვედრაც საკმარისი აღმოჩნდეს. უფრო მეტად მნიშვნელოვანი ის არის, რომ შემსწავლელმა სწორად გაიგოს ბიბლიური ჭეშმარიტება და არა ის, რომ რაც შეიძლება მოკლე დროში გავიაროთ მასალა. ბიბლიის თითოეულ შემსწავლელს ღვთის სიტყვისადმი რწმენის განსავითარებლად მტკიცე საფუძველი უნდა ჩავუყაროთ (იგავ. 4:7; რომ. 12:2).
3 თითოეული თავის შესწავლას იმდენი დრო დაუთმე, რამდენიც საჭიროა იმისათვის, რომ შემსწავლელმა გაიგოს და გაითავისოს ღვთის სიტყვიდან ნასწავლი. მოერიდე მასალის სწრაფად გავლას, რაც ხელს შეუშლის დაინტერესებულს, დაინახოს ჭეშმარიტების სიღრმეები. გამოყავი საკმარისი დრო ძირითადი აზრებისა და ძირითადი ბიბლიური მუხლების განსახილველად, რომლებზეც ბიბლიური სწავლებებია დაფუძნებული (2 ტიმ. 3:16, 17).
4 არ გააჭიანურო შესწავლა. მართალია ვცდილობთ, არ ვიჩქაროთ, მაგრამ არც თემიდან უნდა გადავუხვიოთ. თუ შემსწავლელს ჩვევად აქვს პირად საკითხებზე დიდხანს ლაპარაკი, უკეთესია ასეთ თემებზე შესწავლის შემდეგ ვისაუბროთ (ეკლ. 3:1).
5 მეორე მხრივ, ჭეშმარიტებასთან დაკავშირებულმა ენთუზიაზმმა შეიძლება ის განაპირობოს, რომ თავად ვილაპარაკოთ ბევრი შესწავლის დროს (ფსალმ. 144:6, 7). დროდადრო სხვადასხვა აზრის გამოთქმითა და შემთხვევების მოყოლით შესწავლა შეიძლება უფრო საინტერესოც კი გახდეს. თუმცა ამან არ უნდა წაიღოს ბევრი დრო, რაც შემსწავლელს ხელს შეუშლის — მიიღოს ძირითადი ბიბლიური სწავლებების შესახებ საფუძვლიანი ცოდნა.
6 თუ გონივრულად განვსაზღვრავთ თითოეულ შესწავლაზე განსახილველი მასალის რაოდენობას, ბიბლიის შემსწავლელს დავეხმარებით, იაროს უფლის ნათელში (ეს. 2:5).