უფრო მეტი ყურადღება ბიბლიისკენ!
1. ძირითადად, ვისთვის გამოიცემოდა თავიდან „საგუშაგო კოშკი“ და ვისთვის — „ოქროს ხანა“?
1 1919 წლის 1 ოქტომბერს გამოვიდა ჟურნალ „ოქროს ხანის“ პირველი ნომერი. ეს ჟურნალი სამქადაგებლო საქმიანობისთვის ძალიან ეფექტური აღმოჩნდა. რატომ? ის მკითხველთა ფართო წრისთვის გამოიცემოდა. „ოქროს ხანისგან“ განსხვავებით, „საგუშაგო კოშკი“ მრავალი წლის მანძილზე, უმთავრესად, „მცირე სამწყსოსთვის“ განკუთვნილ ჟურნალად ითვლებოდა (ლუკ. 12:32). სამეფოს მაუწყებლები „ოქროს ხანის“ გამოცემას ენთუზიაზმით გამოეხმაურნენ და მრავალი წლის განმავლობაში ის გაცილებით დიდი რაოდენობით ვრცელდებოდა, ვიდრე „საგუშაგო კოშკი“.
2. რა ეწოდება დღეს „ოქროს ხანას“ და რა მიზნით გამოიცა ის?
2 ჟურნალ „ოქროს ხანის“ გამოცემის მიზანი ხალხისთვის იმის ჩვენება იყო, რომ ადამიანთა პრობლემები მხოლოდ ქრისტეს ათასწლიანი მეფობისას მოგვარდება და ეს პერიოდი კაცობრიობისთვის მართლაც ოქროს ხანა იქნება. დროის სვლასთან ერთად საჭიროებები იცვლებოდა. ამის გამო, მომდევნო ათწლეულების განმავლობაში ჟურნალმა „ოქროს ხანამ“ არაერთი ცვლილება განიცადა. 1937 წელს ის გამოვიდა ახალი სათაურით — „ნუგეში“; 1946 წლიდან კი „გამოიღვიძეთ!“-ის სახელწოდებით გამოიცემა და ჩვენ სწორედ ამ სათაურით ვიცნობთ მას.
3. რომელი წინასწარმეტყველების შესრულებაში შეიტანა განსაკუთრებული წვლილი ჟურნალმა „გამოიღვიძეთ!“?
3 გამოცემის პირველი დღიდანვე ამ ჟურნალს განსაკუთრებული წვლილი შეაქვს დამოწმების იმ უდიდეს საქმეში, რომელიც 1919 წლიდან მიმდინარეობს (მათ. 24:14). დღეს ის დროა, როცა საჭიროა გადაუდებლად მოქმედება. აქედან გამომდინარე, ვფიქრობთ, რომ „გამოიღვიძეთ!“-თან დაკავშირებით შემდგომი ცვლილებების დრო დადგა.
4. ა) რა არის საჭირო იმისათვის, რომ ადამიანი გადარჩეს ‘იეჰოვას რისხვის დღეს’? ბ) გამოცხადების 14:6, 7-ის თანახმად, რის გაკეთებისკენ მოუწოდებს ყველას ‘ანგელოზი, რომელიც ცაში დაფრინავს’?
4 მილიონობით ადამიანი სიამოვნებით კითხულობს „გამოიღვიძეთ!“-ს, რადგან მის გამოცემებში არის საინტერესო სტატიები, რომლებიც სხვადასხვა არარელიგიურ თემას ეხება. უეჭველია, რომ ყოველწლიურად გახსენების საღამოზე დამსწრეთა უმრავლესობა „გამოიღვიძეთ!“-ის რეგულარული მკითხველია. და მაინც, თუ ვინმეს სურს გადარჩეს ‘იეჰოვას რისხვის დღეს’, საკმარისი არ არის ჩვენი პუბლიკაციების რეგულარულად კითხვა; ასეთ ადამიანს დასჭირდება დახმარება, რომ უფრო მეტი გააკეთოს (სოფ. 2:3; გამოცხ. 14:6, 7).
5. ა) რაზე გაამახვილებს უფრო დიდ ყურადღებას ჟურნალი „გამოიღვიძეთ!“ 2006 წლის იანვრიდან? ბ) რისკენ შეიძლება აღიძრას ბევრი და რომელი წინასწარმეტყველება შესრულდება ამით?
5 ამ მიზეზის გამო, 2006 წლის იანვრიდან ჟურნალი „გამოიღვიძეთ!“ უფრო დიდ ყურადღებას გაამახვილებს ღვთის სამეფოზე. ის უფრო მეტი პირდაპირობით შეეცდება დაანახვოს მკითხველებს, რომ პრობლემებთან გასამკლავებლად ბიბლიას უნდა მიმართონ; მასში უფრო მეტი ყურადღება დაეთმობა იმას, თუ რას ამბობს ბიბლია დღევანდელ მოვლენებთან დაკავშირებით. ამგვარად, მკითხველები უკეთესად დაინახავენ მიმდინარე მოვლენების მნიშვნელობას. წაკითხულმა მათ შეიძლება იეჰოვას შესახებ უფრო მეტის გაგების სურვილი აღუძრას (ზაქ. 8:23).
6, 7. ა) რა შეიცვლება „გამოიღვიძეთ!“–ში, რათა დაეხმაროს ხალხს 1 თესალონიკელების 2:13–ში ჩაწერილი სიტყვების შესაბამისად მოქმედებაში? ბ) რა სიხშირით მოხდება „გამოიღვიძეთ!“–ის გამოცემა და რამდენ ენას შეეხება ეს ცვლილება?
6 „გამოიღვიძეთ!“-ში კვლავაც გამოქვეყნდება მკითხველთა ფართო წრისთვის საინტერესო სტატიები, მაგრამ უფრო მეტი ყურადღება ბიბლიისკენ იქნება მიმართული (1 თეს. 2:13). ვინაიდან „საგუშაგო კოშკში“ ღრმა ბიბლიური ინფორმაცია იბეჭდება და „გამოიღვიძეთ!“-ის მასალაც უფრო მეტად იქნება ბიბლიაზე დაფუძნებული, როგორც ჩანს, აღარაა იმის აუცილებლობა, რომ ჟურნალი „გამოიღვიძეთ!“ თვეში ორჯერ გამოიცეს. ამიტომ 2006 წლის იანვრიდან ჟურნალი „გამოიღვიძეთ!“ თვეში ერთხელ გამოვა. ეს საგრძნობლად გაამარტივებს ჩვენი ლიტერატურის მომზადების, თარგმნისა და ტრანსპორტირების პროცესს.
7 ეს ცვლილება შეეხება დაახლოებით 40 ენას, რომლებზეც გამოიცემა „გამოიღვიძეთ!“ ენების უმრავლესობაზე ეს გამოცემა აქამდეც ყოველთვიური ან კვარტალური იყო. „საგუშაგო კოშკთან“ დაკავშირებით არავითარი ცვლილება არ მოხდება.
8. როგორ შეეძლებათ მაუწყებლებს „გამოიღვიძეთ!“–ის გავრცელება „საგუშაგო კოშკთან“ ერთად?
8 ამ ცვლილების შემდეგ მაუწყებლებს „გამოიღვიძეთ!“ შეუძლიათ შესთავაზონ შესაბამისი თვის „საგუშაგო კოშკის“ ნებისმიერ ნომერთან ერთად. ისინი მთელი თვის განმავლობაში „გამოიღვიძეთ!“-ის ერთ ნომერს გაავრცელებენ და საჭირო აღარ იქნება ორი შეთავაზება, როგორც ეს ამჟამად ბევრ ენაზე კეთდება.
9. რა მიზანს მოემსახურება ჟურნალი „გამოიღვიძეთ!“ მომავალშიც?
9 1919 წელს პირველი ნომრის გამოცემიდან დღემდე, ჟურნალმა — რომელსაც ჯერ „ოქროს ხანა“ ეწოდებოდა, შემდეგ „ნუგეში“, ახლა კი „გამოიღვიძეთ!“ ჰქვია — უდიდესი როლი ითამაშა სამქადაგებლო საქმის წარმატებაში. ვლოცულობთ, რომ იეჰოვამ კვლავაც აკურთხოს ამ ჟურნალის სახეშეცვლილი გამოცემის გავრცელება და მისი დახმარებით „ყველა ერიდან და ტომიდან, ხალხიდან და ენიდან“ კიდევ მრავალმა ადამიანმა დაამყაროს იმედი ღვთის სამეფოზე (გამოცხ. 7:9).