გეგმა ოჯახისთვის — ოჯახთან ერთად ქადაგება
1 იეჰოვას უხარია, როცა ახალგაზრდები მის სახელს განადიდებენ (ფსალმ. 148:12, 13). იესოს დღეებში ‘ჩვილები და ძუძუთა ბავშვებიც კი აქებდნენ’ ღმერთს (მათ. 21:15, 16). მსგავსი სიტუაციაა დღესაც. მშობლებო, როგორ შეგიძლიათ დაეხმაროთ შვილებს, გახდნენ იეჰოვას ენთუზიაზმით აღსავსე განმადიდებლები? როგორც წინა სტატიაში კრების შეხვედრებთან დაკავშირებითაც იყო აღნიშნული, უმთავრესად მშობლებმა თავად უნდა მისცენ მაგალითი. ერთი მამა, რომელიც მრავალი მშობლის აზრს იზიარებს, ამბობს: „შვილები ისე კი არ იქცევიან, რასაც თქვენ ამბობთ, არამედ ისე, როგორც თქვენ იქცევით!“.
2 ერთი და, რომელიც ღვთისმოშიშმა მშობლებმა აღზარდეს, იხსენებს: „არასდროს გვიკითხავს მშობლებისთვის, წავიდოდით თუ არა შაბათ დილით მსახურებაში. ჩვენ ვიცოდით, რომ ეს ასე იქნებოდა“. მსგავსად ამისა, შენც შეგიძლია დაანახვო შვილებს, თუ რამდენად მნიშვნელოვანია ქადაგება და ჩვევად გაიხადო ოჯახთან ერთად ყოველკვირეულად სამქადაგებლო მსახურებაში სიარული. ბავშვებს არა მხოლოდ იმის შესაძლებლობა მიეცემათ, რომ შენგან ისწავლონ, არამედ თავადაც შეძლებ დაინახო, როგორ იქცევიან ისინი და რა განწყობა და უნარი აქვთ მათ.
3 წარმატებული სწავლება. ბავშვებმა რომ სიხარული ჰპოვონ მსახურებაში, მათ ესაჭიროებათ მომზადება, რათა ეფექტურად დაამოწმონ. დამ, რომლის სიტყვებიც ზემოთ მოვიყვანეთ, თქვა: „ჩვენ უბრალოდ კი არ დავყვებოდით მშობლებს, როცა ისინი საქადაგოდ მიდიოდნენ, არამედ ვიცოდით, რომ მონაწილეობა უნდა მიგვეღო, იქნებოდა ეს კარზე ზარის დარეკვა თუ მოსაწვევი ბარათის დატოვება. ყოველკვირა მსახურებისთვის გულმოდგინე მომზადების წყალობით ვიცოდით, რაც უნდა გვეთქვა“. შენც შეგიძლია ასწავლო შვილებს, თუ ყოველკვირა რამდენიმე წუთს გამოყოფ, რომ ოჯახური შესწავლის პერიოდში ან სხვა დროს მსახურებისთვის მოამზადო ისინი.
4 ოჯახთან ერთად ქადაგება იმის დამატებით შესაძლებლობას გაძლევს, რომ შვილებს ჭეშმარიტება ჩაუნერგო. ერთ ქრისტიან მამას თავისი ქალიშვილი თან დაჰყავდა 10 კილომეტრით დაშორებულ ახლომდებარე სოფელში, რომ იქ მცხოვრებთათვის ტრაქტატები მიეტანა. მისი ქალიშვილი სიამოვნებით იხსენებს: „სწორედ იმ დროს ჩამინერგა მამამ გულში ჭეშმარიტება“ (რჯლ. 6:7). შეიძლება შენც მიაღწიო წარმატებას, რომ ქადაგება ოჯახის ყოველკვირეული გეგმის ნაწილი გახდეს.