დაეხმარე შვილებს, რომ მსახურებაში წარმატებას მიაღწიონ
1 ქრისტიან მშობლებს სერიოზული პასუხისმგებლობა აკისრიათ იმასთან დაკავშირებით, რომ შვილებს პატარაობიდანვე ასწავლონ მსახურება. ამის მიღწევა მათ რამდენიმე საშუალებით შეუძლიათ. ზოგჯერ მშობლები ზეპირად ასწავლიან შვილებს ბიბლიურ მუხლებს, მიუხედავად იმისა, რომ მათ წერა-კითხვა ჯერ არ იციან. ამან შეიძლება შთაბეჭდილება მოახდინოს მსმენელზე. ბავშვები რაც უფრო იზრდებიან, მით უფრო მეტის გაკეთება შეუძლიათ მსახურებაში. მშობლებო, როგორ შეგიძლიათ დაეხმაროთ შვილებს ქადაგებაში? შესაძლოა ქვემოთ მოცემული რჩევები დაგეხმაროთ.
2 მისალმების შემდეგ, შეგიძლია მობინადრეს უთხრა:
◼ „ჩემს შვილს [მოიხსენიე ბავშვის სახელი] სურს, ერთი მნიშვნელოვანი ბიბლიური მუხლი გითხრათ“. ბავშვს შეუძლია თქვას: „ბიბლიიდან ვისწავლე, თუ რა ჰქვია ღმერთს [ბავშვი წაიკითხავს ან ზეპირად იტყვის რომაელების 10:13-ს]. ამ ჟურნალებში წერია, თუ რას გააკეთებს იეჰოვა ჩვენთვის. გთხოვთ წაიკითხოთ?“ საუბრის ბოლოს შეგიძლიათ განუმარტოთ მსმენელს, რომ ეს ჟურნალები, რომლებიც მთელ მსოფლიოში ვრცელდება, ნებაყოფლობითი შესაწირავებით გამოიცემა.
3 ან შეგიძლია ასეთი შეთავაზება გამოიყენო:
◼ „გამარჯობათ. ჩემს გოგონას [მოიხსენიე მისი სახელი] ვასწავლი, რომ სხვებისადმი სიყვარული და მზრუნველობა გამოავლინოს. მას სურს, მოკლედ გაგიზიაროთ ბიბლიური ცნობა“. გოგონას შეუძლია თქვას: „ადამიანებს იმით ვეხმარები, რომ მათ იმ იმედის შესახებ ვუყვები, რასაც ღმერთი გვპირდება [ბავშვი წაიკითხავს ან ზეპირად იტყვის გამოცხადების 21:4-ს]. ამ ჟურნალებში ახსნილია, თუ კიდევ რას გააკეთებს ღვთის სამეფო ჩვენთვის. ვფიქრობ, ეს ჟურნალები ძალიან მოგეწონებათ“.
4 მარტივი შეთავაზებების სწავლით ბავშვები უფრო მეტად დარწმუნდებიან, რომ შეუძლიათ სხვებს სამეფოს შესახებ ცნობა გაუზიარონ. ასეთი წინასწარი მომზადება, როდესაც ყურადღება ექცევა იმას, თუ როგორ ილაპარაკონ გასაგებად და სათანადო ხმით, ბავშვებს შესაძლებლობას მისცემს სხვადასხვა ვითარებაში იქადაგონ. კარგი წინასწარი მომზადება და გულწრფელი შექება ბავშვს აღძრავს, თავისი მრწამსის შესახებ სხვებს ესაუბროს.
5 ასეთი წახალისებით ბევრი მოზარდი, როგორც მოუნათლავი მაუწყებელი, გამოცდილი ხდება. რა სასიხარულოა იმის დანახვა, რომ ჩვენი შვილები სულიერად წინ მიიწევენ ქრისტიანულ მსახურებაში (ფსალმ. 148:12, 13).