ამცნეთ იეჰოვას დიდება
1 ფსალმუნმომღერალმა თქვა: „უგალობეთ უფალს . . . მთელო ქვეყნიერებავ! . . . მოუთხრეთ წარმართებს მისი ღირსება, ყოველ ერს — მისი სასწაულები“. იმაზე დაფიქრება, თუ რა გაგვიკეთა იეჰოვამ, რას გვიკეთებს და რას გაგვიკეთებს ის მომავალში, აღგვძრავს, ყველას ვამცნოთ მისი დიდება (ფს. 95:1, 3).
2 მსახურებაში. იეჰოვას მოწმეებს აქვთ პატივი, ატარებდნენ ღვთის სახელს და მთელ დედამიწაზე განადიდებდნენ მას (მალ. 1:11). რა დიდი განსხვავებაა ქრისტიანულ სამღვდელოებასთან შედარებით, რომელმაც კადნიერად ამოიღო ღვთის სახელი ბიბლიის საკუთარი თარგმანებიდან! ღვთის სახელის ყველასთვის გაცხადების საქმე ძალიან სასწრაფოა, რადგან ხალხმა რწმენით უნდა მოუხმოს ღვთის სახელს, რათა მომავალ დიდ გასაჭირში გადარჩნენ (რომ. 10:13—15). გარდა ამისა, მთელ სამყაროში, და მათ შორის დედამიწის მკვიდრთა შორის, მშვიდობა ღვთის სახელის განწმენდაზეა დამოკიდებული. დიახ, ღვთის ყველა საქმე მის სახელთან არის დაკავშირებული.
3 „დიდია უფალი და ღირსსაქები მეტად“. ხალხმა რომ ‘უფალს მისი სახელის ქება შესწიროს’, საჭიროა მის შესახებ ჭეშმარიტება იცოდნენ (ფს. 95:4, 8). მაგრამ ზოგი უარყოფს ღვთის არსებობას (ფს. 13:1). სხვები ჩირქს სცხებენ ღმერთს იმის თქმით, რომ ის ძლიერი არ არის ან ადამიანებით არ არის დაინტერესებული. როდესაც გულწრფელ ადამიანებს ჩვენი შემოქმედის, მისი განზრახვებისა და მისი პიროვნების შესახებ საფუძვლიანი ცოდნის მიღებაში ვეხმარებით, იეჰოვას განვადიდებთ.
4 ჩვენი საქციელით. იეჰოვას სამართლიანი ნორმების თანახმად ცხოვრებით პატივს მივაგებთ მას. ჩვენი კარგი საქციელი სხვებისთვის შეუმჩნეველი არ რჩება (1 პეტ. 2:12). მაგალითად, თუ სუფთად, ფაქიზად გვაცვია და სასიამოვნოდ გამოვიყურებით, ამან შეიძლება სხვები აღძრას, რომ ჩვენზე დადებითად ილაპარაკონ; ეს კი იმის საშუალებას მოგვცემს, აღვნიშნოთ, თუ რა სარგებლობა მოაქვს ღვთის სიტყვაში მოცემული პრინციპების თანახმად ცხოვრებას (1 ტიმ. 2:9, 10). ძალიან გვსიამოვნებს, როდესაც სხვები ‘ხედავენ ჩვენს კარგ საქმეებს და განადიდებენ ჩვენს მამას, რომელიც ზეცაშია’! (მათ. 5:16).
5 მოდი ყოველდღიურად სიტყვითა და საქმით განვადიდოთ ჩვენი დიდებული ღმერთი და ამგვარად გამოვეხმაუროთ მოწოდებას: „უგალობეთ უფალს, ადიდეთ მისი სახელი, ახარეთ დღითი დღე ხსნა მის მიერი“ (ფს. 95:2).