რა მიიღწევა ჩვენი მსახურების შედეგად

¹ ღვთის სიტყვა ქრისტიანებს აღწერს, როგორც საზეიმო სვლით მავალთ; ისინი გამარჯვებულთა მსგავსად მიაბიჯებენ იეჰოვას მსახურებაში (2 კორ. 2:14—16). რადგან ღვთის შესახებ შემეცნება გვაქვს მიღებული, ჩვენი ბაგეთა ნაყოფი იეჰოვასთვის სასიამოვნო საკმევლის მსგავსია. ზოგს სასიხარულო ცნობა ტკბილ სურნელებასავით იზიდავს, სხვები კი უარყოფენ მას. მაგრამ უმრავლესობის მხრიდან არასასურველი გამოხმაურება არ ნიშნავს იმას, რომ ჩვენი საქმიანობა წარუმატებელია. დავფიქრდეთ, რა მიიღწევა ჩვენი მსახურების შედეგად.

² იეჰოვას განდიდება. სატანა ამტკიცებს, რომ ადამიანები იეჰოვას ეგოისტური სურვილების გამო ემსახურებიან (იობ. 1:9—11). ქრისტიანული მსახურება იმის დამტკიცების შესაძლებლობას გვაძლევს, რომ ღვთისადმი ერთგულებას მთელი გულით ვავლენთ. ბევრი მაუწყებელი ერთგულად ასრულებს ღვთის დავალებას და პირადი პრობლემებისა თუ ადამიანთა გულგრილობის მიუხედავად, განაგრძობს ქადაგებასა და მოწაფეების მომზადებას. ასეთი ერთგულება გულს უხარებს იეჰოვას! (იგავ. 27:11).

³ ამავე დროს, ჩვენი მსახურებით ღვთის განზრახვა სრულდება. სატანის ქვეყნიერების მოახლოებული განადგურების შესახებ იეჰოვა ამბობს: „გაიგებენ ხალხები, რომ მე ვარ იეჰოვა“ (ეზეკ. 39:7, აქ). ეს უნდა გაიგონ ერებმა, ამიტომ უაღრესად მნიშვნელოვანია, რომ ღვთის მსახურებმა განაგრძონ იეჰოვას სახელისა და მისი განზრახვის „ყოველი ერისთვის, ტომისთვის, ენისა და ხალხისთვის“ გაცხადება (გამოცხ. 14:6, 7).

⁴ საფუძველი გასამართლებისთვის. სასიხარულო ცნობის ქადაგების შედეგად ადამიანები აგრეთვე გასამართლდებიან. მოციქულმა პავლემ განაცხადა, რომ იესო ქრისტე შურს იძიებს „მათზე, რომლებიც არ იცნობენ ღმერთს, და მათზე, რომლებიც არ ემორჩილებიან სასიხარულო ცნობას ჩვენი უფლის იესოს შესახებ“ (2 თეს. 1:8, 9). ადამიანები გასამართლდებიან იმის მიხედვით, თუ როგორ გამოეხმაურებიან სასიხარულო ცნობას. მართლაც, რა სერიოზული პასუხისმგებლობა აკისრიათ ღვთის მსახურებს! თუ გვინდა რომ სისხლისღვრაში არ გავხდეთ დამნაშავენი, თავი არ უნდა შევიკავოთ სასიცოცხლოდ მნიშვნელოვანი სამეფოს შესახებ ცნობის გაცხადებისგან (საქ. 20:26, 27).

⁵ იეჰოვას გულმოწყალების მაჩვენებელია, როდესაც მუდმივად ვახმართ ძალისხმევას სხვებისთვის დახმარებას, რათა ღვთის კეთილგანწყობა მათაც მოიპოვონ (1 ტიმ. 2:3, 4). ვიცით რა, რომ ადამიანთა მდგომარეობა გამუდმებით იცვლება, კვლავაც ვაკითხავთ მათ და სანამ ჯერ კიდევ დრო არის, იეჰოვას ძიებისკენ აღვძრავთ. ამგვარად ჩვენ ვირეკლავთ „ღვთის უდიდეს თანაგრძნობას“, ღვთისა, რომელსაც „არ სურს, რომ ვინმე დაიღუპოს, არამედ სურს, რომ ყველამ მოინანიოს“ (ლუკ. 1:78; 2 პეტ. 3:9).

⁶ სასარგებლო ჩვენთვის. იეჰოვას მსახურებაში მონაწილეობა დამცავია. მსახურება გვეხმარება, ‘ყოველთვის გვახსოვდეს ის დრო, როცა დადგება იეჰოვას დღე’, რათა თავი ავარიდოთ დღევანდელი ბოროტი წუთისოფლის ჭაობში მოხვედრას (2 პეტ. 3:11—14; ტიტ. 2:11, 12). ამიტომ, დაე ვიყოთ ‘მტკიცენი, ურყევნი, ყოველთვის ბევრი ვიშრომოთ უფლის საქმეში’, რადგან ვიცით, რომ ქრისტიანულ მსახურებაში ჩვენ მიერ გამოვლენილი ძალისხმევა ფუჭი არ არის (1 კორ. 15:58).

[სასწავლო კითხვები]

1. როგორ უყურებს იეჰოვა ჩვენს მსახურებას და როგორ გვეხმაურებიან ადამიანები?

2. რისი დამტკიცების შესაძლებლობას გვაძლევს ქრისტიანული მსახურება?

3. რატომ არის ჩვენთვის ძალიან მნიშვნელოვანი, განვაგრძოთ ღვთის სახელისა და მისი განზრახვის გაცხადება?

4. როგორ გასამართლდებიან ადამიანები სასიხარულო ცნობის ქადაგების შედეგად?

5. როგორ ვირეკლავთ ღვთის თანაგრძნობას ჩვენი მსახურებით?

6. რა სარგებლობა მოაქვს პირადად ჩვენთვის იეჰოვას მსახურებაში მონაწილეობას?