ახალგაზრდები, რომლებიც ანათებენ, როგორც მნათობები

¹ იესომ თავის მოწაფეებს უთხრა: „თქვენ ხართ ქვეყნიერების სინათლე“ (მათ. 5:14, 16). ისინი მთის წვერზე მდებარე ქალაქის მსგავსად შესამჩნევები უნდა ყოფილიყვნენ. დღეს ბევრი ახალგაზრდა პატიოსანი ქცევითა და გულმოდგინე ქადაგებით ‘ანათებს, როგორც მნათობი ქვეყნიერებაში’ (ფილ. 2:15; მალ. 3:18).

² სკოლაში. როგორ შეგიძლია დაამოწმო სკოლაში? ზოგიერთები ხელიდან არ უშვებენ ქადაგების შესაძლებლობას, როცა კლასში ისეთ თემებს განიხილავენ, როგორიცაა ნარკოტიკები, ევოლუცია, მომავალი და ა.შ. ერთ დას ტერორიზმზე თემის დაწერა დაავალეს. მან გამოიყენა ეს შესაძლებლობა და თემაში მოიხსენია, რომ კაცობრიობისთვის რეალური იმედი ღვთის სამეფოა. კარგად გაანალიზებულმა საკითხმა მასწავლებელზე შთაბეჭდილება მოახდინა. ამან გოგონას შესაძლებლობა მისცა, მასწავლებელთან კვლავ დაემოწმებინა.

³ კიდევ ერთი საშუალება, რომ ანათო, როგორც მნათობმა, ეს შენი ქცევა, მოკრძალებული ჩაცმულობა და გარეგნობაა (1 კორ. 4:9; 1 ტიმ. 2:9). როდესაც კლასელები და მასწავლებლები ხედავენ, რომ შენ სხვებისგან განსხვავებულად იქცევი, შესაძლოა ამან ზოგიერთი ჭეშმარიტების გაცნობისკენ აღძრას; ეს შესაძლებლობას მოგცემს, მათ ბიბლიური ჭეშმარიტება გაუზიარო (1 პეტ. 2:12; 3:1, 2). ღვთისთვის მოსაწონი თვისებების გამოვლენა შესაძლოა არ არის ადვილი, მაგრამ ასე მოქცევას იეჰოვას კურთხევები მოჰყვება (1 პეტ. 3:16, 17; 4:14). სხვებს სასიხარულო ცნობის მიმართ ინტერესი რომ აღუძრა, შეგიძლია ბიბლიური ლიტერატურა შესვენების დროს წაიკითხო ან ის თვალში მოსახვედრ ადგილას დადო.

⁴ სკოლაში თუ სინათლესავით ანათებ, რწმენა გაგიძლიერდება და იმით იამაყებ, რომ ღვთის მსახური ხარ (იერ. 9:24). ასეთი სახით კი დაცული იქნები. ერთმა დამ თქვა: „რადგან კლასელებთან რწმენის შესახებ ვსაუბრობ, ისინი აღარ ცდილობენ გამაკეთებინონ ის, რაც ბიბლიას ეწინააღმდეგება“.

⁵ მსახურების გაფართოება. კიდევ ერთი საშუალება, რითაც ახალგაზრდები ანათებენ, როგორც მნათობები, ეს მსახურების გაფართოებაა. სკოლის დამთავრების შემდეგ ერთი ძმა მსახურების მიზნით იქ გადავიდა, სადაც სამეფოს მაუწყებლებზე დიდი მოთხოვნილება იყო. ის დადიოდა კრებაში, რომელიც ცოტა მაუწყებლებისგან შედგებოდა და რომელსაც მხოლოდ ერთი უხუცესი ჰყავდა. ამ ძმამ თავის მეგობარს მისწერა: „ყველაფერი კარგად მიდის. აქ მსახურება დიდი სიამოვნებაა. ყოველ კართან დაახლოებით 20 წუთის განმავლობაში ვსაუბრობთ, რადგან ხალხი მზად არის მოსასმენად. ვინატრებდი, რომ ყველა ახალგაზრდამ იგივე ნაბიჯი გადადგას და ის შეიგრძნოს, რასაც მე ვგრძნობ. არაფერია იმაზე უკეთესი, ვიდრე იეჰოვასადმი მთელი არსებით მსახურება“.

⁶ ახალგაზრდებო, ჩვენ ვამაყობთ თქვენით, რადგან თქვენ ანათებთ ქვეყნიერებაში, როგორც მნათობები! (1 თეს. 2:20). იეჰოვას თუ მთელი გულით, მთელი სულით, მთელი გონებითა და მთელი ძალით ემსახურებით, თქვენ მიიღებთ ‘ასმაგად ახლავე, მომავალ სისტემაში კი — მარადიულ სიცოცხლეს’ (მარ. 10:29, 30; 12:30).

[სასწავლო კითხვები]

1. როგორ აჩვენებს ბიბლია, რომ ქრისტიანები შესამჩნევები იქნებოდნენ და როგორ სრულდება ეს ქრისტიან ახალგაზრდებზე დღეს?

2. როგორ შეგიძლია დაამოწმო მასწავლებლებთან და კლასელებთან?

3. როგორ შეგიძლია სინათლესავით ანათებდე სკოლაში?

4. რა სარგებლობა მოაქვს სკოლაში დამოწმებას?

5. ა) როგორ აფართოებს ზოგი ახალგაზრდა მსახურებას? ბ) რა სულიერი მიზნები გაქვს დასახული პირადად შენ?

6. რატომ აფასებთ კრებაში ახალგაზრდებს?