‘მომყევით’
1 ბევრისთვის ყველაზე მნიშვნელოვანი ის არის, რომ საკუთარ თავს ასიამოვნოს. მაგრამ ხშირად ასეთი ადამიანები არ არიან ბედნიერები. ნამდვილი ბედნიერება იესოს რჩევის გათვალისწინებას — უანგაროდ გაცემას — მოაქვს (საქ. 20:35). იესომ თქვა: „თუ ვინმეს უნდა, რომ მომყვეს, უარყოს საკუთარი თავი . . . და გამომყვეს“ (მარ. 8:34). ეს უფრო მეტს ნიშნავს, ვიდრე დროდადრო სიამოვნებებზე უარის თქმას. იესოს ეს სიტყვები იმას გულისხმობს, რომ ყოველდღიურად იფიქრო, როგორ ასიამოვნო იეჰოვას და არა საკუთარ თავს (რომ. 14:8; 15:3).
2 მოდი დავფიქრდეთ პავლე მოციქულის მაგალითზე. პავლემ „ქრისტე იესოს შესახებ უძვირფასესი ცოდნის გულისთვის“ უარი თქვა პირად სურვილებზე და პირველ ადგილზე სამეფოს ინტერესები დააყენა (ფილ. 3:7, 8). მან თქვა, რომ სხვებისთვის ‘უდიდესი სიამოვნებით გაიღებდა ყველაფერს და მთლიანად დაიხარჯებოდა’ (2 კორ. 12:15). გონივრულია, თითოეულმა ჩვენგანმა საკუთარ თავს ჰკითხოს: „როგორ ვიყენებ დროს, ენერგიას, შესაძლებლობებსა და სახსრებს? საკუთარი თავით უფრო მეტად ვარ დაინტერესებული თუ იმით, როგორ ვასიამოვნო იეჰოვას?“
3 გაცემის შესაძლებლობები: ყოველწლიურად ღვთის ხალხი მილიარდზე მეტ საათს უძღვნის სასიცოცხლოდ მნიშვნელოვან საქმიანობას — სამეფოს შესახებ ქადაგებას. იეჰოვას მოწმეთა კრებებში როგორც ახალგაზრდები, ისე ხანდაზმულები სხვების სასარგებლოდ სხვადასხვა დავალებებს ასრულებენ. გარდა ამისა, ბევრი რამ კეთდება იმისათვის, რომ ორგანიზება გაეწიოს კონგრესების ჩატარებას, სამშენებლო პროექტებს და უკვე არსებული შენობების დაცვას, რაც ჭეშმარიტი თაყვანისმცემლობის წინ წაწევას უწყობს ხელს. აგრეთვე დავფიქრდეთ, როგორი სიყვარულით გვეხმარებიან ძმები, რომლებიც საავადმყოფოებთან თანამშრომლობის კომიტეტებსა და ავადმყოფთა მომნახულებელ ჯგუფებში მსახურობენ. ასეთი თავდაუზოგავი შრომა დიდი ძღვენია ჩვენი ქრისტიანული საძმოსთვის! (ფსალმ. 109:3).
4 სხვადასხვა სახით გაცემის შესაძლებლობა მაშინ გვეძლევა, როდესაც უბედური შემთხვევა ან სტიქიური უბედურება ხდება. მაგრამ ხშირად თანაქრისტიანს შესაძლოა მხარში ამოდგომა ან გამხნევება ესაჭიროებოდეს (იგავ. 17:17). როცა მზადყოფნით ვეხმარებით სხვებს და სამეფოს ინტერესების წინ წაწევას ვუწყობთ ხელს, იესო ქრისტეს ნაკვალევს მივყვებით (ფილ. 2:5—8). მოდი კვლავაც გამოვავლინოთ ასეთი სულისკვეთება.