სულიერი ჩვევების განვითარებით უხვ კურთხევებს მოვიმკით
1. რატომ უნდა დაფიქრდე, დღესაც გაქვს თუ არა სულიერი ჩვევები?
1 ქრისტიანობამ შესაძლოა დიდი ძალისხმევის ფასად, მაგრამ მაინც განგავითარებინა ისეთი სულიერი ჩვევები როგორიცაა ბიბლიის შესწავლა, ქრისტიანულ შეხვედრებზე დასწრება, სამქადაგებლო საქმიანობაში მონაწილეობა და ლოცვა. იეჰოვამ აკურთხა შენი ძალისხმევა და შედეგად სულიერად გაიზარდე. შენი ნათლობის შემდეგ შესაძლოა გარკვეული ხანი გავიდა. დღესაც გაქვს ის კარგი სულიერი ჩვევები, რომლებიც თავდაპირველად განივითარე?
2. რით არის სასარგებლო ბიბლიის ყოველდღიური კითხვა?
2 დაფიქრდი, გაქვს თუ არა სულიერი ჩვევები. ჩვევად გაქვს ღვთის სიტყვის ყოველდღიურად კითხვა? ეს ჩვევა უხვ კურთხევას მოგიტანს (იესო. 1:8; ფსალმ. 1:2, 3). ძველ ისრაელში მეფეს „მთელი სიცოცხლე“ უნდა ეკითხა რჯულის წიგნი. რა სარგებლობას მოუტანდა ეს მას? მეფე მორჩილ გულს შეიძენდა და ისწავლიდა იეჰოვას შიშს, რომ არ დაერღვია მისი მცნებები (რჯ. 17:18—20). დღესაც, ბიბლიის ყოველდღიური კითხვა გვეხმარება, რომ ამ ბოროტ და გახრწნილ ქვეყნიერებაში უმწიკვლობა შევინარჩუნოთ. ის მსახურებისთვისაც ყოველმხრივ გვამზადებს (ფილ. 2:15; 2 ტიმ. 3:17).
3. რა კურთხევებს მოვიმკით კრების შეხვედრებზე რეგულარული დასწრებით?
3 იესოს ჩვევად ჰქონდა სინაგოგაში სიარული, სადაც წმინდა წერილებს განიხილავდნენ (ლუკ. 4:16). უეჭველია, ეს ძალას მატებდა მას მომავალი განსაცდელების გადასატანად. ჩვენც ვმტკიცდებით კრების შეხვედრებზე მიღებული სულიერი დამოძღვრითა და ერთმანეთის გამხნევებით (რომ. 1:12). კრების შეხვედრებზე ძმებთან ერთად ყოფნა დაგვეხმარება ამ ბოლო დღეების სირთულეების გადატანაში (ებრ. 10:24, 25). ისევ ჩვევად გაქვს კრების ყველა შეხვედრაზე დასწრება?
4. რით არის სასარგებლო ყოველკვირა სამქადაგებლო მსახურებაში მონაწილეობა?
4 ბიბლიიდან ვიგებთ, რომ მოციქულები „ტაძარში და კარდაკარ ყოველდღე“ ქადაგებდნენ სასიხარულო ცნობას (საქ. 5:42). თუ ყოველდღე არ შეგვიძლია მსახურება, ხომ არ შეიძლება, ჩვევად გავიხადოთ ყოველკვირა მივიღოთ მონაწილეობა მსახურების რომელიმე სფეროში? ამგვარად, ჩვენ უფრო გავიწაფებით ღვთის სიტყვის გამოყენებაში და სხვებისთვის ბიბლიური ჭეშმარიტების გაზიარებისას ბევრი სასიამოვნო შემთხვევის მოწმენი ვიქნებით.
5. რატომ არის მნიშვნელოვანი იეჰოვასადმი რეგულარული ლოცვა?
5 წინასწარმეტყველი დანიელი დიდად იყო კურთხეული, რადგან გამუდმებით, მთელი სიცოცხლე ემსახურებოდა იეჰოვას. მაგალითად, მას ჩვევად ჰქონდა იეჰოვასადმი რეგულარული ლოცვა (დან. 6:10, 16, 20). მსგავსადვე, ჩვენც თუ რეგულარულად მივმართავთ იეჰოვას მხურვალე ლოცვით, ის მოგვცემს თავის წმინდა სულს (ლუკ. 11:9—13). გარდა ამისა, იეჰოვა უფრო დაგვიახლოვდება და გავიხარებთ მასთან ახლო ურთიერთობით (ფსალმ. 24:14, აქ; იაკ. 4:8). ეს მართლაც დიდი კურთხევაა! ამიტომ, მოდი, ძალ-ღონე არ დავიშუროთ სულიერი ჩვევების შესანარჩუნებლად, იეჰოვასგან უხვი კურთხევები რომ მოვიმკათ.