„ბედნიერია ის, ვინც განსაცდელს უძლებს“
1 ყველა ქრისტიანს უწევს განსაცდელებთან გამკლავება (2 ტიმ. 3:12). ქრისტიანი შეიძლება განსაცდელში ჩავარდეს სუსტი ჯანმრთელობის, ეკონომიკური სიდუხჭირის, ცდუნების, დევნისა თუ სხვა მრავალი რამის გამო. განსაცდელები, რომლებსაც სატანა გვიქმნის, იმისკენაა მიმართული, რომ მოვდუნდეთ, უგულებელვყოთ ან საერთოდ შევწყვიტოთ კიდეც ჩვენი ქრისტიანული მსახურება (იობ. 1:9—11). როგორ მოაქვს ბედნიერება იმას, რომ განსაცდელებს ვუძლებთ? (2 პეტ. 2:9).
2 მზად იყავით განსაცდელებისთვის: იეჰოვა გვაძლევს ჭეშმარიტების სიტყვას, რომელშიც სხვა ყველაფერთან ერთად მოთხრობილია იესოს ცხოვრებისა და სწავლებების შესახებ. იესოს სიტყვების მოსმენითა და მათი დაცვით მყარ საფუძველზე ვაგებთ ჩვენს რწმენას და ვემზადებით განსაცდელებისთვის (ლუკ. 6:47—49). ამასთანავე, ჩვენ გვაძლიერებს ქრისტიანული საძმო, ძალებს გვმატებს კრების შეხვედრები და ერთგული და გონიერი მონის კლასისგან მოწოდებული ბიბლიაზე დაფუძნებული პუბლიკაციები. აგრეთვე, ჩვენ გვაქვს ღვთისგან ბოძებული ძღვენი — შეგვიძლია თავისუფლად მივმართოთ მას ლოცვით (მათ. 6:13).
3 გარდა ამისა, იეჰოვა გვაძლევს იმედს. როდესაც რწმენას ვიძლიერებთ იეჰოვას დაპირებებისადმი, მაშინ ‘სანდო და მტკიცე იმედი ღუზასავით ხდება ჩვენი სულისთვის’ (ებრ. 6:19). ბიბლიურ დროში გემები არასოდეს გადიოდნენ ნავსადგურიდან ღუზის გარეშე, თუნდაც კარგ ამინდში. თუ მოულოდნელად ქარიშხალი ამოვარდებოდა, ღუზა დაიცავდა გემს, რომ კლდოვან ნაპირს არ მიხეთქებოდა. მსგავსად ამისა, თუკი ჩვენ ახლავე ვიძლიერებთ რწმენას ღვთის აღთქმებისადმი, ეს დაგვეხმარება, რომ წონასწორობა შევინარჩუნოთ განსაცდელების დროს. განსაცდელები შეიძლება მოულოდნელად დაგვატყდეს თავს. მიუხედავად იმისა, რომ ლისტრაში პავლესა და ბარნაბას ქადაგებას თავიდან კარგი გამოხმაურება მოჰყვა, მდგომარეობა სწრაფად შეიცვალა, როდესაც იქ იუდეველი მოწინააღმდეგეები ჩავიდნენ (საქ. 14:8—19).
4 მოთმინებას ბედნიერება მოაქვს: თუ წინააღმდეგობის მიუხედავად მტკიცედ განვაგრძობთ მსახურებას, ეს სულის სიმშვიდეს მოგვანიჭებს. ჩვენ ვხარობთ, როდესაც ქრისტეს გულისთვის შეურაცხყოფას გვაყენებენ (საქ. 5:40, 41). განსაცდელების ატანა გვეხმარება, რომ უფრო მეტად გამოვიმუშავოთ ისეთი თვისებები, როგორიცაა თავმდაბლობა, მორჩილება და მოთმინება (კან. 8:16; ებრ. 5:8; იაკ. 1:2, 3). ამ დროს ვსწავლობთ იმას, რომ მივენდოთ იეჰოვას, მისი აღთქმებისადმი რწმენა განვივითაროთ და მასთან ვეძებოთ თავშესაფარი (იგავ. 18:10).
5 ჩვენ ვიცით, რომ განსაცდელები დროებითია (2 კორ. 4:17, 18). ამ დროს გვეძლევა იმის შესაძლებლობა, რომ ვაჩვენოთ, რამდენად გვიყვარს იეჰოვა. განსაცდელების ატანით ჩვენ შეგვიძლია პასუხი გავცეთ სატანის ბრალდებებს. ამიტომაც სირთულეების დროს სულით არ ვეცემით! „ბედნიერია ის, ვინც განსაცდელს უძლებს, რადგან მოწონებას დაიმსახურებს და მიიღებს სიცოცხლის გვირგვინს“ (იაკ. 1:12).