ეცადე, უფრო მეტი გააკეთო მსახურებაში

¹ პავლე მოციქული ქრისტიანებს მოუწოდებდა, რომ ღვთის გზებით ევლოთ და ‘ეს უფრო სრულად ეკეთებინათ’ (1 თეს. 4:1). რას ნიშნავს ეს ჩვენთვის? ეს იმას ნიშნავს, რომ გამუდმებით ვეძებოთ საშუალებები, რათა უფრო მეტად ჩავებათ სულიერ საქმეებში და ‘ყოველმხრივ შევასრულოთ ჩვენი მსახურება’ (2 ტიმ. 4:5).

² მოტივი: მსახურებაში უფრო მეტის გაკეთება იმიტომ გვინდა, რომ გვსურს უფრო სრულად ვემსახუროთ ჩვენს შემოქმედს. ჩვენ გვინდა, რომ სულიერად გავიზარდოთ და ვეძებოთ საშუალებები, გავუმჯობესდეთ მსახურებაში. ამ მიზნის მიღწევაში დაგვეხმარება კარგი გეგმა და გულის სათანადო მოტივი (ფსალმ. 1:1, 2; ფილ. 4:6; ებრ. 10:24, 25).

³ მსახურების გაფართოებისთვის საჭიროა, ვიყოთ გამცემები და განვივითაროთ თავგანწირვის სული. ამაში კი დაგვეხმარება ლოცვა და იესოს შესანიშნავ მაგალითზე ფიქრი (მათ. 20:28). იესოს მთელი მსახურების განმავლობაში სიხარულს ანიჭებდა ის, რომ სხვებს ემსახურებოდა (საქ. 20:35). ჩვენ შეგვიძლია მივბაძოთ იესოს იმით, რომ ადამიანებისადმი პირადი ინტერესი გამოვავლინოთ და ვეძებოთ შესაძლებლობები, უფრო მეტი გავაკეთოთ მსახურებაში (ეს. 6:8).

⁴ მშობლების როლი: მშობლებს შეუძლიათ, შვილებს ადრეული ასაკიდანვე ჩაუნერგონ იმის სურვილი, რომ ემსახურონ სხვებს და გააფართოვონ მსახურება. ბავშვებს მხედველობიდან არ გამორჩებათ ოჯახის წევრების გულმოდგინება და მათი აქტიური მცდელობა, უფრო მეტი გააკეთონ მსახურებაში. ერთ ძმას მსახურების გაფართოებისკენ უბიძგა იმან, რომ ბავშვობაში პაპასთან ერთად მონაწილეობდა კრების საქმეებში. როდესაც ხედავდა პაპის გულმოდგინებასა და სიხარულს, ამან აღძრა ის, ეძებნა შესაძლებლობები, რომ ძმებს მომსახურებოდა. ახლა ეს ძმა კრებაში მომსახურეა.

⁵ ძმების საჭიროება: „თუ ვინმე  . . . მსახურებისკენ ისწრაფვის, კარგი საქმე ნდომებია“ (1 ტიმ. 3:1). ეს სიტყვები დამაფიქრებელია ძმებისთვის, რომ მათ უფრო მეტი აკეთონ მსახურებაში, რათა გაუმჯობესდნენ და იეჰოვას ორგანიზაციაში პასუხისმგებლობები მიიღონ. ამისათვის საჭირო არ არის რაღაც განსაკუთრებული უნარი, არამედ ის, რომ ძმა პირველ ადგილზე აყენებდეს სამეფოს ინტერესებს და გულმოდგინედ ქადაგებდეს (მათ. 6:33; 2 ტიმ. 4:5). ის კარგ მაგალითს უნდა აძლევდეს სხვებს.

⁶ მთელ მსოფლიოში: იეჰოვა აჩქარებს ჭეშმარიტ თაყვანისმცემელთა შეკრებას (ეს. 60:22). ეს გვიჩვენებს, თუ რამდენად მნიშვნელოვანია, რომ ყველამ, ვინც მიჰყვება იესოს მაგალითს, უფრო სრულად მიიღოს მონაწილეობა მსახურებაში. მსოფლიო ანგარიშიდან ვხედავთ, რომ 2006 სამსახურებრივ წელს მოინათლა 248 327 ადამიანი. ეს იმას ნიშნავს, რომ ყოველ დღე საშუალოდ 680-ზე მეტი ინათლებოდა. მოდი, კვლავაც ვეძებოთ შესაძლებლობები, რომ უფრო მეტი ვაკეთოთ მსახურებაში!