იმედი ჩაუსახე ღარიბებს
1 იესო განსაკუთრებულ ყურადღებას ავლენდა ღარიბების მიმართ. იყო შემთხვევები, როდესაც მან სასწაულებრივად დააპურა და განკურნა ისინი, მაგრამ იესოს მთავარი მიზანი ის იყო, რომ „სასიხარულო ცნობა“ ეუწყებინა მათთვის (მათ. 11:5). ქრისტიანულ მსახურებას დღესაც მოაქვს სარგებლობა ღარიბებისთვის, ისევე როგორც სხვებისთვის (მათ. 24:14; 28:19, 20).
2 ნამდვილი იმედი: ქრისტიანული სამყაროს წარმომადგენლები ხშირად პირდებიან ღარიბებს, რომ ხელი მოემართებათ, თუ უხვ შესაწირავს გაიღებენ ეკლესიისთვის. მაგრამ ბიბლია გვასწავლის, რომ მხოლოდ ღვთის სამეფო მოუღებს ბოლოს სიღარიბეს და გადაჭრის ადამიანთა ყველა პრობლემას (ფსალმ. 9:18; 145:16; ეს. 65:21—23). როდესაც ღარიბებს ვუჩვენებთ, თუ რას ასწავლის ბიბლია სინამდვილეში, ამით იმედს ვუსახავთ და ვეხმარებით მათ, რომ დაიკმაყოფილონ თავიანთი სულიერი მოთხოვნილებები (მათ. 5:3).
3 იესოს დროს მცხოვრები ფარისევლები ზემოდან დაჰყურებდნენ ღარიბებს და ზიზღით მათ „ამ-ჰაარეცს“, ანუ „მიწის ხალხს“ უწოდებდნენ. მაგრამ იესოსთვის ღარიბების „სისხლი“, ანუ სიცოცხლე „ძვირფასი“ იყო (ფსალმ. 72:13, 14). ჩვენ შეგვიძლია მივბაძოთ იესოს და ღარიბებს წყალობა ვუყოთ — სიკეთე და თანაგრძნობა გამოვავლინოთ მათ მიმართ (იგავ. 14:31). ჩვენ არასდროს არ უნდა ვილაპარაკოთ მათ შესახებ დამამცირებლად და არ უნდა მოვერიდოთ მათთან ქადაგებას. მრავალი, ვინც სამეფოს შესახებ ცნობას დადებითად ეხმაურება, სწორედ რომ ღარიბია.
4 დაეხმარე ღარიბებს: როდესაც ჩვენს უბანზე მცხოვრებ ღარიბებს ბიბლიურ პრინციპებს ვასწავლით, იმ მხრივაც ვეხმარებით მათ, რომ ახლავე შეუმსუბუქდეთ მდგომარეობა. მაგალითად, ბიბლია განსჯის ლოთობას, აზარტულ თამაშებს, სიზარმაცეს, სიგარეტის მოწევას და სხვა ისეთ ჩვევებს, რასაც სიღარიბემდე მიჰყავს ადამიანი (იგავ. 6:10, 11; 23:21; 2 კორ. 7:1; ეფეს. 5:5). ბიბლია მოგვიწოდებს, რომ ვიყოთ პატიოსნები და ვშრომობდეთ „სულითა და გულით“, რასაც ძალიან აფასებენ დამსაქმებლები (კოლ. 3:22, 23; ებრ. 13:18). ფაქტობრივად, როგორც ერთმა გამოკვლევამ უჩვენა, როცა საქმე ეხება მუშების არჩევას, დამსაქმებლების უმრავლესობა უპირატესობას ანიჭებს პატიოსან და ერთგულ მუშახელს.
5 იეჰოვა გულგრილად არ უყურებს ღარიბთა ტანჯვას. იესო ქრისტე მალე „დაიხსნის ღარიბს, შველას რომ ითხოვს“ (ფსალმ. 72:12). ამ დროის დადგომამდე კი ჩვენ გვაქვს შესანიშნავი შესაძლებლობა, რომ იმედის მომცემი ბიბლიური ცნობით ვანუგეშოთ ყველა, მათ შორის ღარიბები.