სარგებლობ წიგნით „მსჯელობა“?
1. როგორ ასწავლიდნენ პავლე და იესო?
1 პავლე მოციქული ცდილობდა, სხვებთან ‘წმინდა წერილების საფუძველზე ემსჯელა’ (საქ. 17:2, 3; 18:19). ამგვარად, ის ჰბაძავდა იესოს, რომელიც ხშირად ციტირებდა წმინდა წერილებიდან და მოჰყავდა მაგალითები, რომ მსმენელებს ღვთის ნება-სურვილი გაეგოთ (მათ. 12:1—12). ჩვენც იგივე მიზანი გვაქვს და ამ მიზნის მიღწევაში დაგვეხმარება წიგნი „მსჯელობა წმინდა წერილების საფუძველზე“.
2. როგორ გამოვიყენოთ წიგნი „მსჯელობა“ ეფექტური შეთავაზებების მოსამზადებლად?
2 მოამზადე კარგი შეთავაზებები: წიგნში „მსჯელობა წმინდა წერილების საფუძველზე“ მე-9—15 გვერდებზე მოცემულია ინტერესის აღმძვრელი შეთავაზებები. სხვადასხვა შეთავაზების დამახსოვრება და გამოყენება — განსაკუთრებით მაშინ, თუ თქვენი ტერიტორია ხშირად მუშავდება — შენს მსახურებას უფრო მრავალფეროვანს გახდის და საუბრის ეფექტურად წამოწყებაში დაგეხმარება. ტელეფონით ქადაგებისას ან როცა მობინადრეს „დამაფონით“ ელაპარაკები, შეგიძლია შეთავაზება პირდაპირ წიგნიდან ამოიკითხო.
3. რა რჩევებია მოცემული წიგნში „მსჯელობა“, გვერდები მე-15—24?
3 საუბრის გაგრძელება მასთან, ვინც სიტყვას გვაწყვეტინებს: ქადაგების დაწყებამდე გადახედე მე-15—20 გვერდებზე მოცემულ ინფორმაციას, რაც დაგეხმარება, საუბარი გააგრძელო მასთან, ვინც სიტყვას შეგაწყვეტინებს. თუ შენს უბანზე შეიძლება ბუდისტებს, ინდუსებს, ებრაელებს ან მუსლიმანებს შეხვდე, მაშინ მე-20—24 გვერდებზე მოცემული რჩევები გამოგადგება.
4. როგორ შეგვიძლია გამოვიყენოთ წიგნი „მსჯელობა“ მაშინ, როცა კითხვას დაგვისვამენ ან საკამათო საკითხს წამოჭრიან?
4 კითხვებზე პასუხების გაცემა: წიგნი „მსჯელობა“ დაგვეხმარება მაშინაც, როცა ვინმე კითხვას დაგვისვამს ან რაიმე საკამათო საკითხს წამოჭრის. შეგიძლია მოსაუბრეს უთხრა, რომ ხელთ გაქვს პუბლიკაცია, რომელიც სწორედ აღნიშნულ საკითხს უკავშირდება, და ამოიღო წიგნი „მსჯელობა“. ამ წიგნში განსახილველი საკითხები ანბანის მიხედვითაა ჩამოწერილი. მოძებნე ის თემა, სადაც შენთვის სასურველი საკითხი განიხილება, და თვალი გადაავლე მსხვილი შრიფტით დაწერილ კითხვებს. თუ სწრაფად ვერ იპოვი, მაშინ ის ბოლო გვერდებზე მოცემულ საძიებელში მოძებნე. როგორც კი იპოვი, ის პირდაპირ წიგნიდან წაიკითხე. კონკრეტულ მუხლის განმარტების მოძებნაში შეიძლება 445-ე გვერდზე მოცემული ცხრილი დაგეხმაროს („მუხლები, რომლებსაც ხშირად არასწორად განმარტავენ“).
5. კიდევ რაში დაგეხმარება წიგნი „მსჯელობა“?
5 სხვა შემთხვევებში: ზოგს ეს წიგნი სამსახურში ან სკოლაში მიაქვს, რომ უპასუხონ მათ, ვისაც აინტერესებს, რატომ არ აღნიშნავენ იეჰოვას მოწმეები დღესასწაულებს. ამ წიგნში მოცემული მასალა ევოლუციასა და შემოქმედებაზე არაერთ მოსწავლეს დახმარებია თავისუფალი თემების მომზადებაში. თუ ავადმყოფის ან მგლოვიარის მონახულებას აპირებ, მათ სანუგეშებლად გამოიყენე თემა „გამხნევება“. წიგნი „მსჯელობა“ აგრეთვე დაგეხმარება მოხსენებების მომზადებასა და სამქადაგებლო მსახურების შეხვედრის ჩატარებაში.
6. რა მიზანი გვაქვს ქადაგებისას?
6 ქადაგებისას ჩვენი მიზანი მობინადრისთვის ჩვენი სიმართლის დამტკიცება არ არის; არც მხოლოდ ინფორმაციის გადაცემა გვინდა. ჩვენ გვსურს, დამაჯერებლად ვიმსჯელოთ წმინდა წერილების საფუძველზე. თუ ეფექტურად ვიყენებთ წიგნს „მსჯელობა“, ესე იგი ვუკვირდებით, რას და როგორ ვასწავლით (1 ტიმ. 4:16).