ხელიდან არ ვუშვებთ ქადაგების შესაძლებლობას
1. რას ვსწავლობთ იესოსგან, რომელმაც წყაროსთან მისულ ქალს უქადაგა?
1 დიდ მანძილზე სიარულისგან იესო დაიღალა და მოსწყურდა. როცა მისი მოწაფები საკვების საყიდლად წავიდნენ, ის სამარიის ერთ-ერთი ქალაქის გარეთ დასასვენებლად წყაროსთან ჩამოჯდა. იესო სამარიაში საქადაგებლად არ მისულა, უბრალოდ ამ ქალაქის გავლით გალილეაში მიდიოდა, რომ ემსახურა. მიუხედავად ამისა, მან ხელიდან არ გაუშვა ქადაგების შესაძლებლობა და წყლის ამოსაღებად მისულ ქალს დაელაპარაკა (იოან. 4:5—14). იესო იმიტომ მოიქცა ასე, რომ ის ყოველთვის იეჰოვას „ერთგული და ჭეშმარიტი მოწმე“ იყო (გამოცხ. 3:14). ჩვენ იესოს მივბაძავთ, თუ ყოველთვის გამოვიყენებთ ქადაგების შესაძლებლობას (1 პეტ. 2:21).
2. რა შემთხვევაში ვიქნებით მზად არაფორმალურად ქადაგებისთვის?
2 მზად იყავი ქადაგებისთვის: არაფორმალური ქადაგებისთვის მზად ვიქნებით, თუ ლიტერატურა თან გვექნება. ბევრ მაუწყებელს ყოველთვის თან დააქვს ტრაქტატები და სთავაზობს გამყიდველებს, ბენზინ-გასამართი სადგურის მომსახურე პერსონალს და მათ, ვინც მთელი დღის განმავლობაში ხვდება (ეკლ. 11:6). ერთ დას, რომელსაც ხშირად უწევს მგზავრობა, ყოველთვის დააქვს ჩანთით პატარა ფორმატის ბიბლია და წიგნი „რას გვასწავლის ბიბლია?“. ის ყოველთვის ცდილობს გვერდით მჯდომთან საუბარი წამოიწყოს.
3. როგორ შეიძლება დავიწყოთ საუბარი?
3 საუბრის დაწყება: როდესაც არაფორმალურად ვქადაგებთ, საჭირო არ არის, თავიდანვე ბიბლიურ საკითხებზე დავიწყოთ საუბარი. სამარიელ ქალთან ქადაგებისას, იესოს საუბარი იმით არ დაუწყია, რომ მესია იყო. მან უბრალოდ სთხოვა ქალს წყალი დაელევინებინა, რითაც მისი ინტერესი აღძრა (იოან. 4:7—9). ერთ დას ძალიან ეხმარება მსგავსი მიდგომა საუბრის დაწყებაში, როცა ეკითხებიან რომელიმე დღესასწაულზე, თუ როგორ ჩაიარა. ნაცვლად იმისა, უპასუხოს, რომ იეჰოვას მოწმეა და ამიტომ ამ დღესასწაულს არ აღნიშნავს, ის ეუბნება: „გადავწყვიტე, არ ვიზეიმო ეს დღესასწაული“. ასეთი პასუხის შემდეგ ინტერესდებიან, რატომ მიიღო ასეთი გადაწყვეტილება. ეს დას ქადაგების შესაძლებლობას აძლევს.
4. რისკენ აღგვძრავს მათეს 28:18—20-ში ჩაწერილი სიტყვები?
4 მიუხედავად იმისა, რომ იესომ დედამიწაზე თავისი მსახურება დაასრულა, ის კვლავაც დაინტერესებულია მთელ მსოფლიოში მიმდინარე სამქადაგებლო საქმიანობით (მათ. 28:18—20). ამიტომ, იესოს მსგავსად არც ჩვენ ვუშვებთ ხელიდან ჩვენი რწმენის შესახებ სახალხოდ გაცხადების შესაძლებლობას (ებრ. 10:23).