მზად იყავი ბიბლიის შესწავლის შესათავაზებლად
1. რა იგულისხმება იესოს მიერ დაკისრებული დავალების შესრულებაში?
1 იესომ დაგვავალა, ‘მოწაფეები მოვამზადოთ და ვასწავლოთ მათ’ (მათ. 28:19, 20). ამიტომ გვინდა, რომ ბიბლიის შესწავლის შესათავაზებლად ყოველთვის მზად ვიყოთ და არა მხოლოდ იმ შაბათს ან კვირას, რომელიც კრებას შესწავლის შესათავაზებლად აქვს გამოყოფილი. ქვემოთ მოცემული რჩევები შეიძლება დამხმარე აღმოჩნდეს.
2. ვის შეგიძლია შესთავაზო ბიბლიის შესწავლა?
2 შესთავაზე შესწავლა: რაც უფრო ხშირად ვთავაზობთ ბიბლიის შესწავლას, მით მეტი შესაძლებლობა გვაქვს, რომ ის დავიწყოთ (ეკლ. 11:6). გიცდია შესწავლის პირდაპირ შეთავაზება? შეერთებულ შტატებში ერთი კრება შეთანხმდა, რომ მთელი თვის მანძილზე ხალხისთვის ბიბლიის შესწავლა შეეთავაზებინათ. წარმოიდგინეთ, მათ 42 ახალი შესწავლა დაიწყეს! საკმარისი არ არის, დაინტერესებულებმა იცოდნენ, რომ შენ ბიბლიის შესწავლის ჩატარება შეგიძლია. როცა მეორედ მიაკითხავ, შესთავაზე ბიბლიის შესწავლა. თუ უარს გეტყვიან, გულს ნუ გაიტეხ. კვლავაც შეეცადე, გააღვივო მათში ინტერესი. ჰკითხე მეზობლებს, ნათესავებს, თანამშრომლებსა და თანაკლასელებს, ხომ არ სურთ შენთან ერთად ბიბლიის შესწავლა. ასევე ჰკითხე ბიბლიის შემსწავლელებს, ხომ არ ჰყავთ ისეთი მეგობრები ან ნათესავები, ვისაც ბიბლიის შესწავლა ენდომებოდა.
3. რა დაგვეხმარება ბიბლიის შესწავლის დაწყებაში და როგორ შეგვიძლია მისი გამოყენება?
3 დამხმარე საშუალება: ბიბლიის შესწავლის დასაწყებად კარგი საშუალებაა ტრაქტატი „გინდათ იცოდეთ სიმართლე?“. შენ შეგიძლია შესთავაზო ის მობინადრეს მიუხედავად იმისა, იღებს თუ არა სხვა ლიტერატურას. ტრაქტატის გამოყენება შეგიძლია საქმიან უბანზე, ქუჩაში ქადაგებისას, განმეორებითი მონახულების დროს ან შეგიძლია მისი წერილში ჩადება. ის შეგიძლია დაუტოვო მათაც, ვინც სახლში არ გხვდება. კარგი იქნება, თუ ტრაქტატი თან გექნება საზოგადოებრივი ტრანსპორტით მგზავრობისას, საყიდლებზე სიარულისას ან სამსახურში. ტრაქტატის ბოლო გვერდზე მოკლედ არის ახსნილი, თუ როგორ ტარდება ბიბლიის შესწავლა და შეთავაზებულია წიგნი „რას გვასწავლის ბიბლია?“.
4. როგორ შეგვიძლია გამოვიყენოთ ბიბლიის შესწავლის დასაწყებად ტრაქტატი „სიმართლე“?
4 ტრაქტატის მიწოდების შემდეგ შეგიძლია ადამიანს ყურადღება გაუმახვილო პირველივე გვერდზე დასმულ კითხვებზე და ჰკითხო, ყველაზე მეტად რომელი კითხვა აინტერესებს. მასთან ერთად განიხილე ტრაქტატიდან ამ კითხვის პასუხი და შემდეგ წაუკითხე ან შენი სიტყვებით გადაეცი ბოლო გვერდზე მოცემული ინფორმაცია, სადაც ახსნილია, როგორ ტარდება ბიბლიის შესწავლა. ამ საკითხთან დაკავშირებით მეტი ინფორმაცია შეგიძლია უჩვენო წიგნში „რას გვასწავლის ბიბლია?“. შესთავაზე წიგნი, შეუთანხმდი განმეორებით მონახულებაზე და როცა მიაკითხავ, განაგრძე ამ საკითხზე მსჯელობა.
5. რატომ უნდა ვიყოთ ყოველთვის მზად ბიბლიის შესწავლის შესათავაზებლად?
5 ჩვენს უბნებზე კვლავაც არიან ადამიანები, ვისაც ძალიან სურს იმის გაგება, რასაც ბიბლია ასწავლის სინამდვილეში. თუ ყოველთვის მზად ვიქნებით ბიბლიის შესწავლის შესათავაზებლად, მეტი შესაძლებლობა გვექნება, სხვებს სიცოცხლის გზაზე სიარულში დავეხმაროთ (მათ. 7:13, 14).