მთელი ყურადღება მოწაფეების მომზადებისკენ მიმართე

1. რა უნდა გავაკეთოთ ადამიანთა სახსნელად?

¹ გასული 2014 სამსახურებრივი წლის ანგარიშიდან გამოჩნდა, თუ რაოდენ გულმოდგინედ და ენთუზიაზმით ქადაგებს ღვთის ხალხი სასიხარულო ცნობას სამეფოს შესახებ (მათ. 24:14). მართლაც, კარდაკარ მსახურების, ბუკლეტებისა თუ მოსაწვევების სპეციალური კამპანიებისა და საზოგადოებრივ თავშეყრის ადგილებში ქადაგების წყალობით, ახლა უფრო მეტ ადამიანს ვაწვდენთ ხმას, ვიდრე ოდესმე. მაგრამ, თუ გვსურს, რომ ადამიანები იესოს მოწაფეები გახდნენ და გადარჩნენ, მათ ბიბლია უნდა ვასწავლოთ (1 ტიმ. 2:4).

2. რომელი კითხვები უნდა დავუსვათ საკუთარ თავს, თუ გვსურს, რომ ყოველთვის მზად ვიყოთ ბიბლიის შესწავლის დასაწყებად?

² ყოველთვის მზად იყავი ბიბლიის შესწავლის დასაწყებად. როდესაც ვინმე ჭეშმარიტებისადმი ინტერესს იჩენს, ცდილობ, გამოართვა მას საკონტაქტო ინფორმაცია და შემდეგ სწრაფადვე მოინახულო, რათა მასთან ბიბლიის შესწავლა დაიწყო? ბოლოს როდის შეეცადე, რომ პირველივე მისვლისას გეჩვენებინა მობინადრისთვის, თუ როგორ ტარდება ბიბლიის შესწავლა? უკანასკნელად როდის შესთავაზე ბიბლიის შესწავლა მას, ვისთანაც რეგულარულად მიგაქვს ჟურნალები? გიჩვენებია ვიდეორგოლები, „რატომ ვსწავლობთ ბიბლიას?“ და „როგორ ტარდება ბიბლიის შესწავლა?“, თანამშრომლებისთვის, თანაკლასელებისთვის, მეზობლებისთვის, ნათესავებისა და ნაცნობებისთვის? როცა სტენდთან დგახარ და გამვლელი ბიბლიის შესწავლაში დამხმარე სახელმძღვანელოს იღებს, ეუბნები, რომ ამ სახელმძღვანელოს მეშვეობით მას იეჰოვას მოწმეებთან ბიბლიის უსასყიდლოდ შესწავლა შეუძლია?

3. რა არის საჭირო იმისათვის, რომ ხალხს სწორად გადავცეთ ჭეშმარიტების სიტყვები?

³ ამ საქმეში იეჰოვა და იესო გვიდგანან მხარში. იესომ თავისი მითითება, „მოწაფეებად მოამზადეთ ხალხი“, დაიწყო სიტყვით: „წადით“; ამით მან ხაზი გაუსვა იმას, რომ ჩვენ ამ საქმეს ძალისხმევისა და ინიციატივის გარეშე ვერ გავართმევდით თავს. თუმცა მას ჩვენი ძალის იმედად არ დავუტოვებივართ და მხარდაჭერა აღგვითქვა (მათ. 28:19, 20). ამასთანავე, იეჰოვამ მოგვცა თავისი წმინდა სული, აგრეთვე შესწავლაში დამხმარე საშუალებები და ისიც გვასწავლა, თუ როგორ გადაგვეცა ჭეშმარიტების სიტყვები ხალხისთვის (ზაქ. 4:6; 2 კორ. 4:7). ჩვენ შეგვიძლია ღმერთს ვთხოვოთ, რომ ამ მნიშვნელოვანი საქმის შესასრულებლად სურვილიც აღგვიძრას და ვიმოქმედოთ კიდეც (ფილ. 2:13).

4. რატომ უნდა მივმართოთ მთელი ყურადღება მოწაფეების მომზადების საქმისკენ?

⁴ სასიხარულო ცნობის ქადაგება დიდ სიხარულს გვგვრის. თუმცა სიხარული გვიორკეცდება, როდესაც ვინმეს ჭეშმარიტებას ვასწავლით და ხელს ვუწყობთ, ჩვენთან ერთად დაადგეს გზას, „რომელსაც სიცოცხლემდე მიჰყავს“ (მათ. 7:14; 1 თეს. 2:19, 20). და, რაც უფრო მნიშვნელოვანია, როცა მთელი ყურადღება მოწაფეების მომზადების საქმისკენ გვაქვს მიმართული, გულს ვუხარებთ იეჰოვას, რომელსაც „არ სურს, რომ ვინმე დაიღუპოს, არამედ სურს, რომ ყველამ მოინანიოს“ (2 პეტ. 3:9).