„ეს აკეთეთ“ — გახსენების საღამო ჩატარდება 5 აპრილს
1. რატომ არის მნიშვნელოვანი გახსენების საღამოს აღნიშვნა?
1 „ეს აკეთეთ ჩემ გასახსენებლად“ (ლუკ. 22:19). ამ სიტყვებით დაავალა იესომ თავის მოწაფეებს მისი სიკვდილის აღნიშვნა. ვინაიდან იესომ ასეთი მსხვერპლი გაიღო, ქრისტიანებისთვის გახსენების საღამოზე მნიშვნელოვანი და ძვირფასი დღე არ არსებობს. წელს გახსენების საღამო 5 აპრილს ჩატარდება. როგორ შეგვიძლია იეჰოვასადმი მადლიერების გამოვლენა? (კოლ. 3:15).
2. როგორ შეგვიძლია მადლიერების გამოვლენა გახსენების საღამოსთვის პირადი შესწავლითა და ფიქრით?
2 მომზადება. როგორც წესი, რასაც მნიშვნელოვნად ვთვლით, იმისთვის ვემზადებით. ჩვენ განვეწყობით გახსენების საღამოსთვის, თუ ოჯახთან ერთად თაყვანისცემის საღამოზე განვიხილავთ იესოს ცხოვრების ბოლო დღეებს და ვიფიქრებთ ამაზე (ეზრ. 7:10). კალენდარში და ბროშურაში „წმინდა წერილების ყოველდღიური განხილვა“ მოცემულია ამ დღეებში წასაკითხი ბიბლიური მუხლები. ხოლო 2011 წლის 1 თებერვლის „საგუშაგო კოშკის“ 23-ე და 24-ე გვერდებზე ბიბლიურ მუხლებთან ერთად მოცემულია შესაბამისი მონაკვეთები წიგნიდან „დიდებული ადამიანი“.
3. როგორ შეგვიძლია მსახურებაში უფრო აქტიური მონაწილეობით მადლიერება გამოვავლინოთ გახსენების საღამოსთვის?
3 ქადაგება. ჩვენ მადლიერებას გამოვავლენთ, თუ აქტიურად მივიღებთ მონაწილეობას მსახურებაში (ლუკ. 6:45). შაბათს, 17 მარტს, მსოფლიო მასშტაბით დაიწყება გახსენების საღამოზე მოწვევის კამპანია. შეგიძლია ისე დაგეგმო საქმეები, რომ უფრო მეტი დრო დაუთმო მსახურებას, მაგალითად, იმსახურო დამხმარე პიონერად? კარგი იქნება, თუ ოჯახთან ერთად თაყვანისცემის საღამოზე განიხილავთ ამ საკითხს.
4. რით იქნება ჩვენთვის სასარგებლო გახსენების საღამოზე დასწრება?
4 ყოველწლიურად გახსენების საღამოზე დასწრებას ჩვენთვის დიდი სარგებლობა მოაქვს. ჩვენი სიხარული და ღვთისადმი სიყვარული უფრო იზრდება, როცა ვფიქრობთ იმ უძვირფასეს მსხვერპლზე, რომელიც იეჰოვამ თავისი მხოლოდშობილი ძის შეწირვით გაიღო (იოან. 3:16; 1 იოან. 4:9, 10). ეს აღგვძრავს, აღარ ვიცხოვროთ საკუთარი თავისთვის (2 კორ. 5:14, 15). გახსენების საღამოზე დასწრება ასევე ძალებს გვმატებს, საჯაროდ განვადიდოთ იეჰოვას სახელი (ფსალმ. 102:19—21). მართლაც, იეჰოვას მადლიერი მსახურები მოუთმენლად ელიან 5 აპრილს დაგეგმილ გახსენების საღამოზე დასწრებას, რათა „უფლის სიკვდილი აუწყონ“ (1 კორ. 11:26).