გამოვავლინოთ მადლიერება! — გახსენების საღამო ჩატარდება 17 აპრილს
1. ფსალმუნმომღერლის მსგავსად, რა გრძნობა უნდა გამოვავლინოთ გახსენების საღამოს წინა პერიოდში?
1 იეჰოვას კეთილი საქმეებისა და ხსნის შემყურე, მადლიერებით აღძრულმა ფსალმუნმომღერალმა იკითხა: „რით გადავუხდი იეჰოვას ყოველივე კარგისთვის, რაც ჩემთვის გაუკეთებია?“ (ფსალმ. 116:12). დღეს ღვთის მსახურებს მადლიერების უფრო მეტი მიზეზი გვაქვს. ღვთის შთაგონებით ამ სიტყვების ჩაწერიდან საუკუნეების შემდეგ იეჰოვამ კაცობრიობას უდიდესი ძღვენი, გამოსასყიდი, უბოძა. ჩვენ მართლაც გვაქვს საფუძვლიანი მიზეზი, მადლიერებით აღძრულები მოვემზადოთ ქრისტეს სიკვდილის გახსენების საღამოსთვის, რომელიც წელს 17 აპრილს ჩატარდება (კოლ. 3:15).
2. გამოსასყიდისთვის მადლიერების რა მიზეზები გვაქვს?
2 რა კურთხევები მოაქვს გამოსასყიდს: გამოსასყიდის საფუძველზე ღმერთი გვპატიობს ცოდვებს (კოლ. 1:13, 14). ეს საშუალებას გვაძლევს, სუფთა სინდისით ვცეთ თაყვანი იეჰოვას (ებრ. 9:13, 14). ამასთანავე, გვაქვს სიტყვაში სითამამე, როცა იეჰოვას ლოცვით ვუახლოვდებით (ებრ. 4:14—16). მათ, ვინც გამოსასყიდისადმი რწმენას ავლენს, მარადიულად ცხოვრების დიდებული პერსპექტივა აქვთ! (იოან. 3:16).
3. როგორ შეგვიძლია იეჰოვას მიმართ მადლიერების გამოვლენა გამოსასყიდისთვის?
3 გამოავლინეთ მადლიერება: მადლიერების გამოვლენის ერთ-ერთი საშუალებაა გახსენების საღამოსთვის განკუთვნილი ბიბლიური მონაკვეთების ყოველდღიურად წაკითხვა და წაკითხულზე ფიქრი. სპეციალურად ამ მიზნით დაიბეჭდა 2011 წლის 1 თებერვლის „საგუშაგო კოშკში“ სტატია: „მზად ხართ წლის ყველაზე მნიშვნელოვანი დღისთვის?“. აგრეთვე ჩვენს გულწრფელ ლოცვებში შეგვიძლია ვუთხრათ იეჰოვას, რომ ძალიან ვაფასებთ გამოსასყიდს (1 თეს. 5:17, 18). მადლიერებას გამოვავლენთ იმათაც, რომ დავემორჩილებით იესოს მითითებას და დავესწრებით გახსენების საღამოს (1 კორ. 11:24, 25). გარდა ამისა, შეგვიძლია მივბაძოთ იეჰოვას უსაზღვრო სიყვარულს და რაც შეიძლება მეტი ადამიანი დავპატიჟოთ ამ შეხვედრაზე (ეს. 55:1—3).
4. როგორი განწყობა უნდა გვქონდეს?
4 იეჰოვას მადლიერი მსახური გახსენების საღამოს ერთ-ერთ, რიგით შეხვედრად არ მიიჩნევს. ეს არის წლის ყველაზე მნიშვნელოვანი შეხვედრა! რაც უფრო გვიახლოვდება გახსენების საღამო, მოდი უფრო მეტად განვეწყოთ ფსალმუნმომღერალივით, რომელმაც დაწერა: „აკურთხე იეჰოვა, ჩემო სულო, და მის საქმეებს ნუ დაივიწყებ!“ (ფსალმ. 103:2).