ხუთი რჩევა ბიბლიის შესწავლის დასაწყებად

1. თუ ჩვენს ტერიტორიაზე რთულია ბიბლიის შესწავლის დაწყება, რა უნდა გავაკეთოთ და რატომ?

¹ ვერ პოულობ ისეთ ადამიანს, ვისთანაც ბიბლიის შესწავლას დაიწყებ? არ შეწყვიტო ძებნა. იეჰოვა აკურთხებს მათ, ვინც კვლავაც ასრულებს მის ნებას (გალ. 6:9). ქვემოთ მოცემულია ხუთი რჩევა, რომლებიც ბიბლიის შესწავლის დაწყებაში დაგეხმარება.

2. როგორ გამოვიყენოთ პირდაპირი შეთავაზება ბიბლიის შესწავლის დასაწყებად?

² პირდაპირ შესთავაზე შესწავლა. ბევრმა იცის, რომ ადამიანებს ვთავაზობთ ჟურნალებს, იქნება ეს „საგუშაგო კოშკი“ თუ „გამოიღვიძეთ!“, მაგრამ მათ შეიძლება არ იციან, რომ ჩვენ ბიბლიის შესწავლებსაც ვთავაზობთ. თქვენც ხომ არ მოსინჯავდით ბიბლიის შესწავლის პირდაპირ შეთავაზებას კარდაკარ მსახურებისას? ბიბლიის შესწავლა შეგიძლია ასევე შესთავაზო მათ, ვისაც განმეორებით ინახულებ. თუ შესწავლაზე არ დაგთანხმდებიან, შეგიძლია კვლავ განაგრძო ლიტერატურის დატოვება და ინტერესის გაღვივება. ერთი ძმა ინახულებდა ერთ წყვილს წლების მანძილზე და ჟურნალებს უტოვებდა. ერთხელ როცა ახალი ჟურნალები მიუტანა, უკვე წამოსვლას აპირებდა, მაგრამ უცბად მიუბრუნდა მათ და ჰკითხა: „გინდათ ბიბლიის შესწავლა?“. მისდა გასაკვირად, ისინი დასთანხმდნენ. ახლა ეს წყვილი მონათლულია.

3. უნდა ვიფიქროთ, რომ ვინც კრების შეხვედრებს ესწრება, ყველა სწავლობს ბიბლიას? ახსენით.

³ შესთავაზე ბიბლიის შესწავლა მათ, ვინც კრების შეხვედრებს ესწრება. ნუ გგონია, რომ ყველა დაინტერესებული, ვინც კრების შეხვედრებს ესწრება, უკვე სწავლობს ბიბლიას. ერთი ძმა ამბობს: „შესწავლების ნახევარზე მეტი მათთან დავიწყე, ვინც კრების შეხვედრებს ესწრებოდა“. ერთმა დამ გადაწყვიტა, შესწავლა შეეთავაზებინა ერთი მორიდებული ქალისთვის, რომლის ქალიშვილებიც კრების მონათლული წევრები იყვნენ. ქალი კრების შეხვედრებს დაახლოებით 15 წელი ესწრებოდა და შეხვედრებზე ყოველთვის ზუსტად დაწყების წინ მოდიოდა და დამთავრებისთანავე მიდიოდა. როცა დამ მას ბიბლიის შესწავლა შესთავაზა, ის დასთანხმდა და საბოლოოდ, მოინათლა. და ამბობს: „ვნანობ, რომ 15 წლის მანძილზე ერთხელაც არ შემითავაზებია ბიბლიის შესწავლა“.

4. როგორ შეგიძლია სხვების დახმარებით დაიწყო ბიბლიის შესწავლა?

⁴ ჰკითხე სხვებს, ხომ არ იციან ვინმე, ვინც ისურვებდა შესწავლას. ერთი და სხვებს დაჰყვება ბიბლიის შესწავლებზე. შესწავლის ბოლოს ჩამტარებლის ნებართვით ის ეკითხება შემსწავლელს, ხომ არ იცნობს ვინმეს, ვისაც სურს ბიბლიის შესწავლის დაწყება. როცა წიგნს „რას გვასწავლის ბიბლია?“ აძლევ მას, ვისაც განმეორებით ინახულებ, ჰკითხე, ხომ არ იცნობს ვინმეს, ვისაც ენდომებოდა ეს წიგნი. ხანდახან მაუწყებლებსა და პიონერებს მდგომარეობა არ რთავს ნებას, ბიბლიის შესწავლა ჩაუტარონ მათ, ვისაც უბნებზე ხვდებიან. გააგებინე სხვებს, რომ შენ გინდა ბიბლიის შესწავლის დაწყება.

5. რატომ უნდა შევთავაზოთ ბიბლიის შესწავლა ჩვენი და-ძმების მეუღლეებს?

⁵ შესთავაზე შესწავლა ჩვენი და-ძმების მეუღლეებს. არიან შენს კრებაში ისეთი და-ძმები, რომელთა მეუღლეებიც არ არიან იეჰოვას მოწმეები? ზოგს არ სურს, ბიბლიაზე ქრისტიან მეუღლესთან ისაუბროს, მაგრამ შეიძლება სხვას დათანხმდეს ბიბლიის შესწავლაზე. ბიბლიის შესწავლის შეთავაზებამდე კარგია, თუ ჯერ მათ მონათლულ მეუღლეებს გაესაუბრებოდი, რათა გაგეგო, როგორი მიდგომა იქნებოდა საუკეთესო.

6. რატომ არის ლოცვა მნიშვნელოვანი, როცა ბიბლიის შესწავლის დაწყება გინდა?

⁶ ილოცე. არასდროს შეგეპაროს ლოცვის ძალაში ეჭვი (იაკ. 5:16). იეჰოვა გვპირდება, რომ მოისმენს ჩვენს სათხოვარს, როცა მისი ნების თანახმად ვმოქმედებთ (1 იოან. 5:14). ერთი ძმა დაკავებული გრაფიკის მიუხედავად, ღმერთს ბიბლიის შესწავლის დაწყებას სთხოვდა. მისი ცოლი განიცდიდა, შეძლებდა თუ არა თავისი მეუღლე დროის გამოყოფას შემსწავლელისთვის, განსაკუთრებით თუ შემსწავლელს ბევრი პრობლემა ექნებოდა. ცოლი ღმერთს ამ განცდებსაც უზიარებდა, როცა იეჰოვას სთხოვდა, რომ მის ქმარს ვინმესთან ბიბლიის შესწავლა დაეწყო. მათ თავიანთ ლოცვებზე პასუხი დაახლოებით ორი კვირის შემდეგ მიიღეს, როდესაც ერთმა პიონერმა იპოვა მამაკაცი, ვისაც ბიბლიის შესწავლა სურდა და ეს შესწავლა ამ ძმას გადასცა. ამ ძმის ცოლი წერს: „თუ ვინმე ფიქრობს, რომ ბიბლიის შესწავლის ჩატარება მის ძალებს აღემატება, მე ვეტყოდი, რომ ელოცა ამის შესახებ კონკრეტულად და არ შეეწყვიტა ლოცვა. ჩვენ იმაზე მეტი სიხარული განვიცადეთ, ვიდრე წარმოგვედგინა“. თუ ძალ-ღონეს არ დაიშურებ, შენც შეძლებ ბიბლიის შესწავლის დაწყებას და განიცდი სიხარულს, რომელიც ადამიანის „სიცოცხლემდე მიმყვან“ გზაზე დაყენებას მოაქვს (მათ. 7:13, 14).