შემთხვევები

◼ ავსტრალია. ერთი საკმაოდ განათლებული ადამიანი, სახელად ჯონი, ბავშვობიდან ეკლესიაში დადიოდა; თუმცა დროთა განმავლობაში „თავგამოდებული ათეისტი“ გახდა. ერთხელ ერთმა პიონერმა ჯონს დაუტოვა ჩვენი ბროშურა სახელწოდებით „თავისით გაჩნდა სიცოცხლე?“. განმეორებით მონახულებაზე პიონერმა მიუტანა სხვა ბროშურა „სიცოცხლის წარმოშობა“. ამ ძმას სისტემატურად მიჰქონდა ჯონთან ჩვენი ჟურნალების ბოლო ნომრები და ორი სიტყვით ესაუბრებოდა იმ თემებზე, რომლებიც შემოქმედებას და ბიბლიურ წინასწარმეტყველებებს ეხებოდა. როცა ძმამ ჩათვალა, რომ ჯონი უკვე მზად იყო, შესთავაზა წიგნი „ბიბლია — ღვთის სიტყვაა თუ ადამიანის?“. წიგნის წაკითხვის შემდეგ ჯონმა თავის თავზე დაასკვნა, რომ აგნოსტიკოსი იყო. შემდეგ ძმამ შესთავაზა წიგნი „რას გვასწავლის ბიბლია სინამდვილეში?“, წაუკითხა მე-20 გვერდზე მოცემული მე-8 აბზაცი და 23—24-ე გვერდებზე მოცემული მე-13—16 აბზაცები. ბიბლიური მუხლები, რომლებიც ამ აბზაცებში იყო ციტირებული, იმდენად მოეწონა ჯონს, რომ ძმას უთხრა: „ალბათ, ბიბლიას კიდევ ერთი შანსი უნდა მივცე“.

◼ მექსიკა. ერთმა მამაკაცმა მაუწყებელს ქადაგების დროს უთხრა, რომ ვერ იჯერებდა იმას, თუ როგორ შეიძლებოდა ბიბლია ღვთის დაწერილი ყოფილიყო. ჩვენმა ძმამ ჰკითხა, თუ სურდა, აჩვენებდა ამის დამამტკიცებელ არგუმენტებს. რამდენიმე საუბრის შემდეგ ამ ადამიანს უკვე სხვა შეხედულება გაუჩნდა ბიბლიაზე, ღვთის სიტყვიდან ამოკითხულმა აზრებმა იმოქმედა მის გულზე. განსაკუთრებით იმოქმედა იმის გაგებამ, თუ რა ნორმები და მოთხოვნები ჰქონდა ღმერთს. მან უთხრა ძმას: „თავიდან, როცა წამიკითხე ბიბლიიდან მუხლები, ვფიქრობდი, რომ ეს იყო რჩევები რომელიღაც ჩვეულებრივი წიგნიდან და ამას დიდი გავლენა არ მოუხდენია ჩემზე. მაგრამ ახლა, როცა ბიბლიას ვკითხულობთ, განსაკუთრებით მასში მოცემულ ზნეობასთან დაკავშირებულ რჩევებს, პირდაპირ გულზე მხვდება“.

◼ შეერთებული შტატები. ერთხელ ერთი წყვილი საზოგადოებრივ თავშეყრის ადგილას ქადაგებდა. უცბად მათ სტენდთან ერთი ტაივანელი ქალბატონი გაჩერდა. მას ღმერთი სწამდა, მაგრამ ბიბლია დასავლური წიგნი ეგონა. მიუხედავად იმისა, რომ ამ ქალბატონს არაფერი აკლდა ცხოვრებაში, თავი მაინც ამ ცხოვრებაში დაკარგულად მიაჩნდა. ის მიუახლოვდა ლიტერატურის სტენდს. იმედი ჰქონდა, რომ ბიბლია ცხოვრების აზრის პოვნაში დაეხმარებოდა. წყვილმა მასთან ბიბლიის შესწავლა დაიწყო წიგნით, „რას გვასწავლის ბიბლია?“ და ბროშურით „როგორ ვიპოვოთ ხანგრძლივი მშვიდობა და ბედნიერება?“. ნაცვლად იმისა, რომ წიგნის მე-2 თავიდან დაეწყოთ შესწავლა, მათ ბროშურის ერთ-ერთი ნაწილის განხილვით დაიწყეს, კერძოდ, „კაცობრიობისთვის კურთხევის მომტანი სახელმძღვანელო“. პირველი 6 აბზაცის განხილვის შემდეგ ქალმა აღფრთოვანება ვეღარ დამალა და თქვა, რომ ბიბლია ნამდვილად ყველაზე უნიკალური წიგნი იყო ყველა სხვა რელიგიურ ხელნაწერებს შორის. ხოლო მას შემდეგ, რაც იმ წინასწარმეტყველებებზე ისაუბრეს, რომლებიც უკვე ახდა, ქალბატონმა წამოიძახა: „არ არსებობს სხვა ამაზე ზუსტი და უტყუარი წიგნი“.

◼ იაპონია. ერთხელ ერთ ჩვენს ძმას კარდაკარ ქადაგებისას მობინადრემ უთხრა, რომ არ სწამდა ღმერთი. მიუხედავად ამისა, ის მაინც აკითხავდა ამ ადამიანს სახლში და ესაუბრებოდა იმ აზრებზე, რომლებიც მოცემული იყო ჟურნალში „გამოიღვიძეთ!“, კერძოდ, რუბრიკაში „ვინ შექმნა?“. დროთა განმავლობაში ამ მამაკაცმა შეიცვალა შეხედულება და ერთ მშვენიერ დღესაც გამოთქვა აზრი, რომ შესაძლოა შემოქმედი არსებობდესო. დღეს მას უკვე ღრმად სწამს, რომ ღმერთი არსებობს და ამ მაუწყებელთან სწავლობს ბიბლიას ბროშურით „სასიხარულო ცნობა ღვთისგან“.

◼ კანადა. ერთ ქალს ჩვენმა დამ ახალი ჟურნალი შესთავაზა. ამ დროს ის სახლიდან გამოდიოდა და თავისი მანქანისკენ მიდიოდა. როცა დამ განმეორებით მიაკითხა ქალბატონს, მან საკმაოდ მტკიცედ უთხრა, რომ არ სწამდა ღმერთი და არ სურდა ამ თემაზე საუბარი. და, ასე ვთქვათ, არ დანებდა; ის კვლავ მივიდა მასთან და მიუტანა ბროშურა „როგორ მივაღწიოთ კმაყოფილების მომგვრელ ცხოვრებას?“. დამ უთხრა, რომ მართალია, მას არ სწამდა ღმერთი, მაგრამ ის მაინც ფიქრობდა მასზე, რადგან იცოდა, რომ მარტოხელა მშობელი იყო. მან ქალბატონს აჩვენა ბროშურის მე-4 გვერდზე მოცემული მე-6 აბზაცი, რომელშიც საუბარია იმაზე, თუ სად შეიძლება კარგი რჩევების პოვნა. შემდეგ დამ სთხოვა მას, რომ წაეკითხა მეორე თავი, რომელიც ბავშვების აღზრდას ეხება. ქალმა სიხარულით აიღო ეს ბროშურა.