როგორ დავეხმაროთ მათ, ვისაც კითხვა უჭირს

1. რა სირთულე იქმნება, როცა ბიბლიას ვასწავლით მას, ვისაც კითხვა უჭირს?

¹ ვისაც კითხვა უჭირს, შესაძლოა სულიერი საკითხებისადმი ინტერესს ავლენს, მაგრამ ბიბლიისა და ბიბლიაზე დაფუძნებული წიგნების კითხვა აფრთხობს. ასეთ ადამიანთან თავიდანვე წიგნის „რას გვასწავლის ბიბლია?“ შეთავაზებამ შეიძლება სასურველი შედეგი არ მოიტანოს. მაშ, როგორ დავეხმაროთ ამ კატეგორიის ადამიანებს სულიერად? ამ საკითხთან დაკავშირებით 20 სხვადასხვა ქვეყანაში მცხოვრებ მაუწყებლებს გავესაუბრეთ. ქვემოთ გაეცნობით, რას გვირჩევენ ისინი.

2. რა დამხმარე საშუალებები არსებობს მათთვის, ვინც რაღაც დონეზე მაინც ახერხებს კითხვას?

² თუ ბიბლიის შემსწავლელს კითხვა უჭირს ან წერა-კითხვა საერთოდ არ იცის, მასთან შესწავლა შეგიძლია დაიწყო ამ ორი ბროშურიდან ერთ-ერთით: „მოუსმინეთ ღმერთს“ ან „მოუსმინეთ ღმერთს და იცხოვრეთ მარადიულად“. მაგალითად, შეერთებულ შტატებში მცხოვრები ერთი პიონერი დაინტერესებულს ორივე ბროშურას აჩვენებს და ეკითხება, რომელი ბროშურით ისურვებდა შესწავლის დაწყებას. კენიის ფილიალის მონაცემების თანახმად, ეს ბროშურები აფრიკულ ქვეყნებში საკმაოდ წარმატებულია, ვინაიდან ადგილობრივთათვის რაიმეს კითხვა-პასუხებით განხილვა უცხო ხილია და როგორც წესი, ისინი ბევრ რამეს ზეპირსიტყვიერი გადმოცემებით სწავლობენ. განათლებული ადამიანი შეიძლება ადვილად დაგვთანხმდეს რაიმეს კითხვა-პასუხებით განხილვაზე, თუმცა განხილვის ასეთმა მეთოდმა შესაძლოა უხერხულობა შეუქმნას მას, ვისაც მწირი განათლება აქვს. თუ დაინტერესებული რაღაც დონეზე მაინც ახერხებს კითხვას, ასეთ შემსწავლელთან ბევრი მაუწყებელი განიხილავს ბროშურებს „სასიხარულო ცნობა ღვთისგან“, „შენ შეგიძლია იყო ღვთის მეგობარი“ ან წიგნს „ბიბლიური მოთხრობები“.

3. რა უნდა გავაკეთოთ საუკეთესო შედეგის მისაღწევად მათთან, ვინც კითხვა არ იცის?

³ შეაქე. ვინც კითხვა არ იცის, შესაძლოა თავს უხერხულად გრძნობდეს და დაბალი თვითშეფასების გამო საკუთარი თავის რწმენა აკლდეს. თუ გსურს, რომ ასეთ ადამიანს ჭეშმარიტება ასწავლო, უპირველესად მას თავი თავისუფლად უნდა აგრძნობინო. ბევრს, ვინც კითხვა არ იცის, სწავლის უნარიც აქვს და საკმაოდ ჭკვიანიცაა. პატივი ეცი მათ და ღირსეულად მოეპყარი (1 პეტ. 3:15). ამ ადამიანებს შესწავლის გაგრძელების სტიმული მიეცემათ, თუ დაინახავენ, რომ ფუჭი არ არის მათი შრომა და ნამდვილად იზრდებიან სულიერად. ასე რომ, ნუ დაინანებ მათთვის საქებარ სიტყვებს.

4. როგორ წავახალისოთ ისინი, ვისაც კითხვა უჭირს, რომ შესწავლისთვის მოემზადონ?

⁴ მოუწოდე ბიბლიის შემსწავლელს, შესწავლისთვის მოემზადოს მაშინაც კი, თუ კითხვა უჭირს. მაგალითად, სამხრეთ აფრიკის რესპუბლიკაში ზოგი მაუწყებელი ასეთ მეთოდს მიმართავს: ისინი თავიანთ ბიბლიის შემსწავლელებს ეუბნებიან, რომ დახმარებისთვის მიმართონ ოჯახის წევრებს ან მეგობრებს, რომლებიც კარგად კითხულობენ. ხოლო ბრიტანეთში მცხოვრები ერთი მაუწყებელი თავის დაინტერესებულებს შესწავლისთვის მოსამზადებლად ასე აღძრავს: შესწავლის დროს თავის დამუშავებულ წიგნს შემსწავლელს აძლევს და რამდენიმე აბზაცს ასეთი სახით განიხილავენ. ამგვარად შემსწავლელი ხედავს, რომ პასუხის პოვნა უფრო ადვილია, როცა ის წინასწარ არის გახაზული. ერთი ინდოელი ძმა კი შემდეგ მეთოდს მიმართავს: ის შემსწავლელს მომდევნო კვირის განსახილველ მასალაში მოცემულ სურათებზე მიუთითებს და ეუბნება, რომ კვირის განმავლობაში იფიქროს ამ ილუსტრაციებზე.

5. როგორ გამოვავლინოთ მოთმინება ბიბლიის შესწავლის დროს?

⁵ გამოავლინე მოთმინება. რა პუბლიკაციითაც არ უნდა ასწავლიდე ბიბლიას დაინტერესებულს, ყურადღება გაუმახვილე მთავარ აზრებზე და დაეხმარე, რომ ჩასწვდეს მათ. თავიდან უკეთესი იქნება, თუ მასთან 10—15 წუთი იმსჯელებ. ნუ ეცდები, რომ ერთ ჯერზე ძალიან ბევრი ინფორმაცია განიხილო; მხოლოდ რამდენიმე აბზაცი მიმოიხილე. გამოავლინე მოთმინება, თუ შემსწავლელი ძალიან ნელა კითხულობს. თუ ის იეჰოვასადმი მადლიერებას განივითარებს, სავარაუდოდ, გაუჩნდება სურვილი, რომ გამართულად კითხვა ისწავლოს. თუ მას თავიდანვე დაპატიჟებ კრების შეხვედრებზე, ამით კარგ სამსახურს გაუწევ.

6. როგორ უნდა დავეხმაროთ მათ, ვინც კითხვა არ იცის?

⁶ თუ ბიბლიის შემსწავლელები კითხვას ისწავლიან, ისინი სულიერად უფრო სწრაფად გაიზრდებიან (ფსალმ. 1:1—3). ზოგი მაუწყებელი ბიბლიის შემსწავლელს ყოველი შესწავლის შემდეგ რამდენიმე წუთს უთმობს, რომ კითხვაში ამეცადინოს. თუ შემსწავლელს გული უტყდება, შესაძლოა მას თვითრწმენა შემატოს იმაზე ყურადღების გამახვილებამ, რის სწავლაც უკვე შეძლო. უთხარი, რომ იეჰოვა მას შრომას არასოდეს დაუკარგავს; აგრეთვე მოუწოდე, რომ დახმარების მისაღებად ღმერთს ლოცვით მიმართოს (იგავ. 16:3; 1 იოან. 5:14, 15). ბრიტანეთში ზოგი მაუწყებელი ბიბლიის შემსწავლელს ურჩევს, დაისახოს ისეთი რეალური მიზნები, როგორიცაა: საწყის ეტაპზე ანბანის შესწავლა, შემდეგ პუბლიკაციაში მოცემული მუხლების მოძიება და წაკითხვა; დაბოლოს, გამარტივებული ბიბლიური პუბლიკაციების კითხვა. როცა ვინმეს კითხვის სწავლაში ეხმარები, ხშირ შემთხვევაში უმთავრესი ისაა, რომ მას კითხვის სწავლის სურვილი გაუღვივო და არა ის, რომ უბრალოდ კითხვა ასწავლო.

7. რატომ არ უნდა შევიკავოთ თავი და რატომ უნდა გავაგებინოთ ჭეშმარიტება მათ, ვისაც კითხვა უჭირს?

⁷ იეჰოვასთვის ყველა ადამიანი თანაბრად ძვირფასია, იმისდა მიუხედავად, თუ რამდენად განათლებულია (იობ. 34:19). მისთვის მთავარი ადამიანის გულია, რადგან ის გულებს იკვლევს (1 მატ. 28:9). ასე რომ, თავს ნუ შეიკავებ და გააგებინე ჭეშმარიტება მას, ვისაც კითხვა უჭირს. არსებობს უამრავი პუბლიკაცია, რითაც შეგიძლია ასეთ ადამიანს ბიბლიის შესწავლა დააწყებინო. მოგვიანებით თავისუფლად შეძლებ, რომ მასთან შესწავლა განაგრძო წიგნით „რას გვასწავლის ბიბლია?“; შედეგად ის უფრო ღრმად ჩასწვდება საღვთო წერილს.