დავიხვეწოთ ქადაგებაში — ჩავუყაროთ საფუძველი განმეორებით მონახულებას

რატომ არის მნიშვნელოვანი. როდესაც მსახურებაში ვხვდებით ადამიანს, რომელიც სასიხარულო ცნობით ინტერესდება, ჩვენი დიდი სურვილია, მოვინახულოთ იგი, რათა მოვრწყათ ჭეშმარიტების თესლი (1 კორ. 3:6). ამიტომ, ვიდრე მობინადრისგან წამოხვალ, გაარკვიე, როდის იქნება სახლში და უთხარი, რომ მის მონახულებას აპირებ. ამას გარდა, უპრიანი იქნება, თუ მობინადრესთან ღიად დატოვებ კითხვას, რომელზეც მასთან შემდგომი ვიზიტის დროს იმსჯელებ. ამგვარად, მობინადრე უფრო მეტი ინტერესით დაგელოდება; თუ მას ისეთ პუბლიკაციასაც დაუტოვებ, რომელიც ღიად დატოვებულ შეკითხვას პასუხობს, დიდია იმის ალბათობა, რომ იგი გაეცნობა მას. განმეორებითი მონახულებისთვის საფუძვლის ჩაყრა გაგიადვილებს მობინადრის მონახულებას, ვინაიდან ასეთ დროს სასაუბრო თემა უკვე განსაზღვრულია და მობინადრემაც იცის, რაზე უნდა ესაუბრო. როდესაც მობინადრეს მიაკითხავ, შეგეძლება იმის თქმა, რომ იმ კითხვაზე პასუხის გასაცემად მიხვედი, რომელიც წინა შეხვედრაზე უპასუხოდ დატოვე.

როგორ მოვიქცეთ:

როდესაც კარდაკარ მსახურებისთვის შეთავაზებას მოამზადებ, ის კითხვაც მოამზადე, რომლითაც განმეორებით მონახულებას ჩაუყრი საფუძველს. ღიად დასატოვებელი კითხვა შეგიძლია მოიშველიო ან იმ დღეს შესათავაზებელი პუბლიკაციიდან, ან ბიბლიის შესწავლაში დამხმარე ერთ-ერთი სახელმძღვანელოდან, რომლის შეთავაზებასაც მომდევნო შეხვედრისთვის აპირებ.
მობინადრეს, რომელიც ინტერესს იჩენს, საუბრის დასასრულს, უთხარი, რომ სხვა დროსაც დიდი სიამოვნებით გააგრძელებ მასთან საუბარს. ამის შემდეგ დაუსვი კითხვა, რომელიც მორიგი შეხვედრის დროს მასთან საუბრის წამოსაწყებად გამოგადგება. ზოგან ხალხი მეტად დაკავებულია და მათ შესაძლოა უარი განაცხადონ ჩვენთან ხელმეორედ შეხვედრაზე. ასეთ დროს მობინადრეს შეგიძლია ჰკითხო: „ამ დროს სახლში ხართ ხოლმე? [დაელოდე, გიპასუხოს.] შემდეგ კვირაში შემოგივლით, რომ ამ კითხვაზე გაგცეთ პასუხი . . . თუ არ გეცლებათ შემდეგ კვირაში, შეგიძლიათ ახლავე მითხრათ“.
თუ მობინადრეს შეჰპირდები, რომ კონკრეტულ დროს მიაკითხავ, ნუღარ გადახვალ სიტყვას (მათ. 5:37). განმეორებითი მონახულების ბოლოს საფუძველი ჩაუყარე მორიგ შეხვედრას.

კარგი იქნება, თუ ამ თვეში ასე მოიქცევი:

როდესაც შეთავაზებას მოამზადებ, ის კითხვაც მოამზადე, რომლითაც განმეორებით მონახულებას ჩაუყრი საფუძველს. შენს პარტნიორსაც გაუზიარე კითხვა, რომლის ღიად დატოვებასაც გეგმავ.