საუკეთესოდ გამოიყენე წიგნის, „რას გვასწავლის ბიბლია?“, თავისებურებანი

შემსწავლელი როცა ბიბლიურ ჭეშმარიტებას გაიგებს და ნასწავლს ცხოვრებაში გამოიყენებს, სულიერადაც გაიზრდება და ნაყოფსაც გამოიღებს (ფსალმ. 1:1—3). თუ საუკეთესოდ გამოიყენებ წიგნის, „რას გვასწავლის ბიბლია?“, თავისებურებებს, შემსწავლელს სულიერ ზრდაში შეუწყობ ხელს.

შესავალი კითხვები. თითოეული თავის დასაწყისში მოცემულია კითხვები, რომლებსაც ამ თავში ეცემა პასუხი. განსახილველი მასალისადმი ინტერესის გასაღვივებლად შეგიძლია შემსწავლელს ყურადღება ამ კითხვებზე გაუმახვილო. ან შეგიძლია მას ამ კითხვების ირგვლივ მოკლედ გამოათქმევინო საკუთარი აზრი. თუ მის მიერ გამოთქმული აზრი ბიბლიასთან არ იქნება შეთანხმებული, კარგი იქნება, თუ ამ ეტაპზე არ შეუსწორებ თვალსაზრისს. მისი პასუხები იმის განსაზღვრაში დაგეხმარება, თუ რაზე გმართებს ყურადღების გამახვილება (იგავ. 16:23; 18:13).

დანართი. იმ შემთხვევაში, თუ ბიბლიის შემსწავლელი იგებს და ეთანხმება განხილულ მასალას, შეგიძლია უთხრა, რომ მოცემულ საკითხთან დაკავშირებულ დანართს თავად გადახედოს. მომდევნო შეხვედრაზე შეგიძლია რამდენიმე წუთი გამოყო იმისათვის, რომ გაიგო, რამდენად ჩასწვდა იგი დანართში მოცემულ მასალას. თუმცა ზოგი შემსწავლელისთვის შეიძლება უფრო სასარგებლო აღმოჩნდეს დანართის თავიდან ბოლომდე, აბზაც-აბზაც წაკითხვა და წინასწარ მომზადებული კითხვების დასმა ან ამგვარად დანართის მხოლოდ ნაწილის განხილვა.

გასამეორებელი ჩარჩო. თითოეული თავის ბოლოში ვხვდებით ჩარჩოს, რომელშიც პასუხები ეცემა ამავე თავის დასაწყისში მოცემულ კითხვებს. ამ ჩარჩოს დახმარებით გაიგებ, რამდენად ჩასწვდა შემსწავლელი განხილულ მასალას და შეუძლია თუ არა მას საკუთარი სიტყვებით გადმოსცეს ძირითადი აზრები. ხმამაღლა წაიკითხე თითოეული წინადადება და თანდართული ბიბლიური მუხლები. შემდეგ სთხოვე შემსწავლელს, ჩარჩოში მოცემული ბიბლიური მუხლის ან მუხლების დახმარებით ახსნას, რატომ შეესაბამება ჭეშმარიტებას ესა თუ ის წინადადება (საქ. 17:2, 3).