წიგნი, რომელსაც ჩვენი მომავლის შეცვლა შეუძლია!

როგორც წინა სტატიებში ვისაუბრეთ, ადამიანები ფიქრობენ, რომ მათი მომავალი ბედ-იღბალზე, ფულზე, განათლებაზე ან კარგ თვისებებსა და სიკეთის კეთებაზეა დამოკიდებული. თუმცა, ამ შეხედულებებით ცხოვრება იგივეა, რომ დანიშნულების ადგილამდე მისასვლელად არასწორი რუკით ვიხელმძღვანელოთ. ნიშნავს ეს იმას, რომ ვერასდროს შევიქმნით კარგ მომავალს? რა თქმა უნდა, არა!

ᲕᲘᲜ ᲒᲐᲒᲕᲘᲬᲔᲕᲡ ᲡᲐᲣᲙᲔᲗᲔᲡᲝ ᲮᲔᲚᲛᲫᲦᲕᲐᲜᲔᲚᲝᲑᲐᲡ?

როგორც წესი, რჩევისთვის ჩვენზე უფროს და გამოცდილ ადამიანებს მივმართავთ ხოლმე. მსგავსად, არსებობს სამყაროში ყველაზე ბრძენი პიროვნება, რომელიც გვასწავლის, როგორ შევიქმნათ ბედნიერი მომავალი. მისი რჩევების მოძიება წმინდა წერილებში შეგვიძლია, რომლის წერაც დაახლოებით 3 500 წლის წინ დაიწყო. ეს წიგნი ბიბლიაა!

რატომ შეგვიძლია ვენდოთ ბიბლიას? იმიტომ, რომ მისი ავტორი სამყაროში ყველაზე ბრძენი და მარად არსებული ღმერთია. ბიბლიაში ნათქვამია, რომ ის არის, „ცის შემოქმედი, ჭეშმარიტი ღმერთი, დედამიწის შემქმნელი და შემოქმედი“ (ესაია 45:18; დანიელი 7:9; ფსალმუნი 90:2). როგორც ფსალმუნის 83:18-დან ვიგებთ, მისი სახელია იეჰოვა.

ბიბლია ერთი კულტურისა და რასის ადამიანებს მეორეზე მაღლა არ აყენებს, რადგან მისი ავტორი ყველა ცოცხალი არსების შემოქმედია. მასში ჩაწერილი რჩევები დღემდე ყველასთვის გამოსადეგია. სხვა არცერთი წიგნი არ არის იმდენ ენაზე ნათარგმნი და ისე გავრცელებული, როგორც ბიბლია.a ამიტომ მისით ხელმძღვანელობა დედამიწის ნებისმიერ კუთხეში მცხოვრებ ადამიანებს შეუძლიათ. ეს კიდევ ერთხელ ადასტურებს წმინდა წერილებში ჩაწერილი სიტყვების ჭეშმარიტებას:

„ღმერთი მიუკერძოებელია და ყოველ ხალხში მისი მოშიში და სიმართლის მქნელი მოსაწონია მისთვის“ (ᲡᲐᲥᲛᲔᲔᲑᲘ 10:34, 35).

მოსიყვარულე და მზრუნველი მშობლის მსგავსად ჩვენი ზეციერი მამა, იეჰოვა, თავისი სიტყვის, ბიბლიის მეშვეობით გვეხმარება (2 ტიმოთე 3:16). ასე რომ, შეგვიძლია ვენდოთ მის სიტყვას, რადგან მან საუკეთესოდ იცის, რა გვჭირდება ბედნიერებისთვის.

ᲑᲘᲑᲚᲘᲐ ᲡᲐᲜᲓᲝ ᲬᲘᲒᲜᲘᲐ

ღვთის სიტყვისადმი ნდობას ისიც გვიმყარებს, რომ მასში ჩაწერილი წინასწარმეტყველებები ზედმიწევნით სრულდება. მაგალითად, 2 000 წლის წინ ნაწინასწარმეტყველები იყო, რა მოვლენები განვითარდებოდა ჩვენს დროში და როგორ თვისებებს გამოავლენდა ხალხი.

ᲛᲝᲕᲚᲔᲜᲔᲑᲘ:

„ერი ერის წინააღმდეგ აღდგება და სამეფო სამეფოს წინააღმდეგ, იქნება დიდი მიწისძვრები, ეპიდემიები და საკვების უკმარისობა ხან ერთ და ხან მეორე ადგილას“ (ᲚᲣᲙᲐ 21:10, 11).

ᲗᲕᲘᲡᲔᲑᲔᲑᲘ:

„ბოლო დღეებში მძიმე და ძნელად ასატანი დრო დადგება. ადამიანები იქნებიან საკუთარი თავის მოყვარულები, ფულის მოყვარულები, მოტრაბახეები, ამპარტავნები, ღვთისმგმობელები, მშობლების ურჩები, უმადურები, ორგულები, გულცივები, ჯიუტები, ცილისმწამებლები, თავშეუკავებლები, სასტიკები, კარგის მოძულეები, გამცემები, თავნებები, გაყოყოჩებულები, სიამოვნებათა მოყვარულები და არა ღვთისა“ (2 ᲢᲘᲛᲝᲗᲔ 3:1—4).

განა გასაოცარი არ არის ის ფაქტი, რომ ბიბლიაში დიდი ხნის წინათ ჩაწერილი წინასწარმეტყველებები ასე ზედმიწევნით სრულდება?! ალბათ, თქვენც გაიზიარებთ ჰონკონგში მცხოვრები ლოენის სიტყვებს: „შეუძლებელია, ადამიანმა ასე ზუსტად აღწეროს შორეულ მომავალში მოსახდენი მოვლენები. ყველაფერი იმაზე მიანიშნებს, რომ მისი ავტორი ადამიანზე გაცილებით ბრძენი პიროვნებაა“.

ბიბლიაში ჩაწერილი ასობით წინასწარმეტყველება უკვე შესრულდა.b ეს კიდევ ერთხელ ამტკიცებს, რომ ამ წიგნის ავტორი იეჰოვაა, რომელმაც თქვა: „მე ვარ ღმერთი და არავინაა ჩემი მსგავსი. დასაწყისიდანვე ვაცხადებ დასასრულს“ (ესაია 46:9, 10). მართლაც, არაერთი მიზეზი გვაქვს, ვენდოთ ღვთის სიტყვას.

ᲑᲘᲑᲚᲘᲣᲠᲘ ᲠᲩᲔᲕᲔᲑᲘ ᲓᲦᲔᲡᲐᲪ ᲬᲐᲒᲐᲓᲒᲔᲑᲐᲗ ᲓᲐ ᲛᲝᲛᲐᲕᲐᲚᲨᲘᲪ

ბიბლიური რჩევების გამოყენება სასიკეთოდ აისახება თქვენს ცხოვრებაზე. განვიხილოთ რამდენიმე პრაქტიკული მხარე:

ᲒᲐᲬᲝᲜᲐᲡᲬᲝᲠᲔᲑᲣᲚᲘ ᲨᲔᲮᲔᲓᲣᲚᲔᲑᲐ ᲤᲣᲚᲡᲐ ᲓᲐ ᲡᲐᲛᲡᲐᲮᲣᲠᲖᲔ

„ერთი მუჭა დასვენება სჯობია ორ მუჭა გარჯასა და ქარის დევნას“ (ᲔᲙᲚᲔᲡᲘᲐᲡᲢᲔ 4:6).

ᲝᲯᲐᲮᲘ

„თითოეულ თქვენგანს ისე უნდა უყვარდეს თავისი ცოლი, როგორც საკუთარი თავი, ცოლი კი დიდ პატივს უნდა სცემდეს ქმარს“ (ᲔᲤᲔᲡᲝᲔᲚᲔᲑᲘ 5:33).

ᲣᲠᲗᲘᲔᲠᲗᲝᲑᲔᲑᲘ

„მოეშვი რისხვას და ნუღარ ბრაზობ, გული ნუ მოგივა და ნუ ჩაიდენ ბოროტებას“ (ᲤᲡᲐᲚᲛᲣᲜᲘ 37:8).

ბიბლიური რჩევები დაგეხმარებათ, დღესვე აზრიანად იცხოვროთ და ბედნიერი მომავალი შეიქმნათ. აი, რას გვპირდება ღმერთი:

ᲮᲐᲚᲮᲘ ᲛᲨᲕᲘᲓᲐᲓ ᲓᲐ ᲣᲡᲐᲤᲠᲗᲮᲝᲓ ᲘᲪᲮᲝᲕᲠᲔᲑᲡ

„თვინიერნი დაიმკვიდრებენ დედამიწას და გაიხარებენ დიდი მშვიდობით“ (ᲤᲡᲐᲚᲛᲣᲜᲘ 37:11).

ᲧᲕᲔᲚᲐᲡ ᲔᲥᲜᲔᲑᲐ ᲡᲐᲮᲚᲘ ᲓᲐ ᲡᲐᲙᲕᲔᲑᲘ

„ააშენებენ სახლებს და იცხოვრებენ მათში, ჩაყრიან ვაზს და შეჭამენ მის ნაყოფს“ (ᲔᲡᲐᲘᲐ 65:21).

ᲐᲦᲐᲠ ᲘᲥᲜᲔᲑᲐ ᲐᲕᲐᲓᲛᲧᲝᲤᲝᲑᲐ ᲓᲐ ᲡᲘᲙᲕᲓᲘᲚᲘ

„აღარ იქნება სიკვდილი, აღარც გლოვა, გოდება და ტკივილი“ (ᲒᲐᲛᲝᲪᲮᲐᲓᲔᲑᲐ 21:4).

რა უნდა გააკეთოთ, რომ თქვენც გქონდეთ ასეთი მომავალი? გაეცანით მომდევნო სტატიას.

a ბიბლიის თარგმნასა და გავრცელებასთან დაკავშირებით მეტი ინფორმაციის მისაღებად ეწვიეთ ვებგვერდს www.pr2711.com და იხილეთ ᲑᲘᲑᲚᲘᲣᲠᲘ ᲡᲬᲐᲕᲚᲔᲑᲔᲑᲘ / ᲘᲡᲢᲝᲠᲘᲣᲚᲘ ᲤᲐᲥᲢᲔᲑᲘ ᲓᲐ ᲑᲘᲑᲚᲘᲐ.

b მეტი ინფორმაციის მისაღებად იხილეთ იეჰოვას მოწმეების მიერ გამოცემული წიგნის „ბიბლია — ღვთის სიტყვაა თუ ადამიანის?“ მე-9 თავი. ინგლისურ ენაზე ის ხელმისაწვდომია ვებგვერდზე www.pr2711.com. იხილეთ ᲑᲘᲑᲚᲘᲝᲗᲔᲙᲐ / ᲬᲘᲒᲜᲔᲑᲘ ᲓᲐ ᲑᲠᲝᲨᲣᲠᲔᲑᲘ.