რატომ სძულთ ასე ძლიერ ადამიანებს ერთმანეთი?

რა არის სიძულვილი?

სიძულვილი არის ძლიერი ანტიპათია ან მტრული დამოკიდებულება კონკრეტული ადამიანისა თუ ჯგუფის მიმართ. ის გაცილებით მეტს მოიაზრებს, ვიდრე მომენტალურად გაბრაზებას ან რისხვის გადმონთხევას.

ᲠᲐ ᲨᲔᲘᲫᲚᲔᲑᲐ ᲒᲐᲮᲓᲔᲡ ᲡᲘᲫᲣᲚᲕᲘᲚᲘᲡ ᲛᲘᲖᲔᲖᲘ?

ბევრი რამ. მაგალითად, ზოგი მტრულად იმიტომ კი არაა განწყობილი სხვების მიმართ, რომ რამე დაუშავეს, არამედ იმიტომ, რომ განსხვავებული შეხედულებები და წარმომავლობა აქვთ. მათი აზრით, ასეთი ადამიანები სათანადო პატივისცემას არ იმსახურებენ, რადგან საზოგადოებისთვის საფრთხეს წარმოადგენენ და მხოლოდ პრობლემებს ქმნიან. ზოგსაც იმიტომ გაუჩნდა სხვების მიმართ მტრული დამოკიდებულება, რომ ერთ დროს თავად გახდა უსამართლობის ან ძალადობის მსხვერპლი.

ᲠᲝᲒᲝᲠ ᲘᲓᲒᲐᲛᲡ ᲡᲘᲫᲣᲚᲕᲘᲚᲘ ᲤᲔᲡᲕᲡ ᲐᲓᲐᲛᲘᲐᲜᲗᲐ ᲒᲣᲚᲔᲑᲨᲘ?

ზოგს სიძულვილის გრძნობა მათ მიმართ უჩნდება, ვინც თვალითაც კი არ უნახავს. ამ ადამიანების აზროვნებაზე გავლენას შეიძლება მეგობრები ან ოჯახის წევრები ახდენდნენ. როგორც წესი, თუ ჩვენს გარემოცვაში ვინმეს მტრული დამოკიდებულება აქვს კონკრეტული ადამიანისა თუ ჯგუფის მიმართ, დროთა განმავლობაში ჩვენც მსგავსი შეხედულებები გვიყალიბდება.

ზემოხსენებული ფაქტორების გათვალისწინებით, აღარ გვიკვირს, რატომ არის მსოფლიო სიძულვილით სავსე. თუმცა თუ გვსურს, გავთავისუფლდეთ სიძულვილისგან, პრობლემის სათავე უნდა ვეძებოთ. ბიბლიიდან ვიგებთ, საიდან იღებს დასაბამს სიძულვილი.

ᲡᲐᲘᲓᲐᲜ ᲘᲦᲔᲑᲡ ᲓᲐᲡᲐᲑᲐᲛᲡ ᲡᲘᲫᲣᲚᲕᲘᲚᲘ?

ᲡᲘᲫᲣᲚᲕᲘᲚᲘᲡ ᲛᲘᲖᲔᲖᲘ ᲐᲓᲐᲛᲘᲐᲜᲘ ᲐᲠ ᲒᲐᲛᲮᲓᲐᲠᲐ. ამ მანკიერ თვისებას დასაბამი ბოროტმა ანგელოზმა, სატანა ეშმაკმა მისცა, რომელიც ღმერთს დაუპირისპირდა. ბიბლია ამბობს, რომ „ის თავიდანვე კაცისმკვლელი იყო“. სატანა სიცრუის მამაა, რომელიც ადამიანთა გულებში სიძულვილს აღვივებს (იოანე 8:44; 1 იოანე 3:11, 12). ბიბლია მას ბოროტ და სასტიკ სულიერ ქმნილებად ახასიათებს (იობი 2:7; გამოცხადება 12:9, 12, 17).

ᲐᲠᲐᲡᲠᲣᲚᲧᲝᲤᲘᲚᲘ ᲐᲓᲐᲛᲘᲐᲜᲘᲡ ᲒᲣᲚᲨᲘ ᲡᲘᲫᲣᲚᲕᲘᲚᲘ ᲐᲓᲕᲘᲚᲐᲓ ᲘᲓᲒᲐᲛᲡ ᲤᲔᲡᲕᲡ. სამწუხაროდ, პირველი ადამიანი, ადამი სატანის კვალს მიჰყვა. შედეგად, კაცობრიობამ ცოდვა და არასრულყოფილება იმემკვიდრა (რომაელები 5:12). ადამის პირველმა შვილმა, კაენმა, შეიძულა თავისი ძმა, აბელი და სასიკვდილოდაც კი გაიმეტა (1 იოანე 3:12). მართალია, დღეს ბევრი ავლენს სიყვარულსა და თანაგრძნობას, მაგრამ ცოდვილი ბუნების გამო ადამიანთა უმრავლესობა სიამაყისა და ეგოიზმისკენ არის მიდრეკილი, რაც სიძულვილს კიდევ უფრო აღვივებს (2 ტიმოთე 3:1—5).

ᲨᲔᲣᲬᲧᲜᲐᲠᲔᲑᲚᲝᲑᲐᲡ ᲡᲘᲫᲣᲚᲕᲘᲚᲐᲛᲓᲔ ᲛᲘᲕᲧᲐᲕᲐᲠᲗ. ხალხი ერთმანეთის მიმართ გულგრილი და ულმობელი გახდა. მათთვის ჩვეულ რამედ იქცა ძალადობა, ვანდალიზმი, ჩაგვრა და შეურაცხყოფა. ეს არცაა გასაკვირი, რადგან „მთელი ქვეყნიერება ბოროტის [სატანა ეშმაკის] ხელშია“ (1 იოანე 5:19).

ბიბლია მხოლოდ იმას კი არ გვიმხელს, საიდან იღებს სიძულვილი სათავეს, არამედ გამოსავალსაც გვთავაზობს.