რა მაგალითი დაგვიტოვა მკვდრეთით აღმდგარმა იესომ ზეცად ამაღლებამდე?

1, 2. როგორ განვითარდა მოვლენები ემაუსისკენ მიმავალ გზაზე?

ᲓᲒᲐᲡ ახ. წ. 33 წლის 16 ნისანი. იესოს ორი მოწაფე იერუსალიმიდან დაახლოებით 11 კილომეტრის მოშორებით მდებარე სოფლისკენ, ემაუსისკენ, მიმავალ გზას ადგება. სხვა მოწაფეების მსგავსად ისინიც დამწუხრებული და თავზარდაცემული არიან იესოს სიკვდილის გამო. ყველა იმედი, რომ იუდეველებს მესია დაიხსნიდა, თითქოს სადღაც უკვალოდ გაქრა. თუმცა მათ წარმოდგენაც კი არ აქვთ, წინ რა სასიამოვნო რამ ელით.

² მოწაფეებს გზად ერთი უცნობი კაცი ხვდება. ისინი უყვებიან მას, რაც იესოს დაემართა. ამის შემდეგ მოწაფეები ისეთ რამეს ისმენენ, რაც არასდროს დაავიწყდებათ. ეს მამაკაცი ყველა წინასწარმეტყველის წიგნიდან უმარტავს მათ, რომ მესია უნდა დატანჯულიყო და მომკვდარიყო. ემაუსში მისვლისას კი ის მათ უმჟღავნებს, რომ მკვდრეთით აღმდგარი იესოა. წარმოიდგინეთ, როგორ გაახარებდათ მოწაფეებს იმის გაგება, რომ მესია ცოცხალია! (ლუკ. 24:13–35).

3, 4. ა) რა გააკეთა იესომ თავისი მოწაფეებისთვის ზეცად ამაღლებამდე? ბ) რას განვიხილავთ ამ სტატიაში? (საქმეები 1:3).

³ დედამიწაზე ყოფნის ბოლო 40 დღის მანძილზე იესო არაერთხელ გამოეცხადა თავის მოწაფეებს (წაიკითხეთ საქმეების 1:3). ამ დროის განმავლობაში ის დაეხმარა მათ, სიხარული დაებრუნებინათ და გაბედულად შესდგომოდნენ სამეფოს ცნობის გაცხადებასა და სხვებისთვის სწავლებას.a

⁴ ჩვენ ბევრი რამის სწავლა შეგვიძლია იქიდან, რასაც იესო დედამიწაზე ცხოვრების ბოლო 40 დღის განმავლობაში აკეთებდა. ამ სტატიიდან დავინახავთ, 1) როგორ ამხნევებდა ის მოწაფეებს, 2) როგორ ეხმარებოდა, უფრო ღრმად ჩამწვდარიყვნენ წმინდა წერილებს და 3) როგორ ამზადებდა მათ მეტი პასუხისმგებლობებისთვის. იმაზეც ვიმსჯელებთ, ჩვენ როგორ შეგვიძლია მისი მიბაძვა.

ᲒᲐᲐᲛᲮᲜᲔᲕᲔᲗ ᲗᲐᲜᲐᲛᲝᲠᲬᲛᲣᲜᲔᲔᲑᲘ

5. რატომ სჭირდებოდათ მოწაფეებს გამხნევება?

⁵ ფაქტია, იესოს მოწაფეებს გამხნევება დასჭირდებოდათ. რა იყო ამის მიზეზი? როგორც ვიცით, ყოველთვის იესოს გვერდით რომ ყოფილიყვნენ, ზოგ მის მოწაფეს სახლიდან წამოსვლა და საყვარელი საქმის დატოვება მოუწია (მათ. 19:27). ზოგიც საზოგადოებისგან იყო გარიყული (იოან. 9:22). თუმცა ისინი მზადყოფნით წავიდნენ ასეთ მსხვერპლზე, რადგან სჯეროდათ, რომ იესო აღთქმული მესია იყო (მათ. 16:16). წარმოიდგინეთ, ამ ყველაფრის ფონზე, როგორი იმედგაცრუებული და სასოწარკვეთილი იქნებოდნენ, როცა იესო აწამეს და მოკლეს.

6. როგორ მოიქცა იესო მკვდრეთით აღდგომის შემდეგ?

⁶ იესოს კარგად ესმოდა, რომ მოწაფეების წუხილი ბუნებრივი რეაქცია იყო და არა სუსტი რწმენის მაჩვენებელი. ამიტომ აღდგომის დღესვე შეუდგა მათ გამხნევებას. თავიდან ის მარიამ მაგდალელს გამოეცხადა, რომელიც მის სამარხთან ტიროდა, შემდეგ კი იმ ორ მოწაფეს, დასაწყისში რომ მოვიხსენიეთ (იოან. 20:11, 16). როგორც ბიბლიიდან ვიგებთ, ის მოციქულ პეტრესაც ეჩვენა (ლუკ. 24:34). მოდი უფრო დეტალურად განვიხილოთ მარიამ მაგდალელთან იესოს შეხვედრა და ვნახოთ, რას ვსწავლობთ მისგან.

7. რა შენიშნა იესომ და როგორ მოიქცა? (იოანე 20:11–16; იხილეთ აგრეთვე სურათი).

⁷ წაიკითხეთ იოანეს 20:11–16. 16 ნისანს დილაადრიან რამდენიმე ქალი იესოს სამარხთან მივიდა (ლუკ. 24:1, 10). მათ შორის ერთ-ერთი მარიამ მაგდალელი იყო. მარიამს სამარხი ცარიელი დახვდა. ამიტომ პეტრესთან და იოანესთან გაიქცა, რის შემდეგაც ისინი ერთად დაბრუნდნენ უკან. როცა პეტრე და იოანე დარწმუნდნენ, რომ მარიამმა სიმართლე უთხრა, ისინი სახლში გაბრუნდნენ. თუმცა მარიამი სამარხთან დარჩა და ტიროდა. რას წარმოიდგენდა ეს ქალი, რომ ამ სცენას იესო აკვირდებოდა. მისმა ცრემლებმა იესოზე ძალიან იმოქმედა. ამიტომ გამოეცხადა მას, ანუგეშა და თან მნიშვნელოვანი დავალება მისცა – მარიამი უნდა წასულიყო და ქრისტეს ძმებისთვის მისი აღდგომის შესახებ ეუწყებინა (იოან. 20:17, 18).

8. როგორ მივბაძოთ იესოს?

⁸ როგორ მივბაძოთ იესოს? იესოს მსგავსად ჩვენც შეგვიძლია და-ძმებს იეჰოვას მსახურების გაგრძელების ძალა შევმატოთ. მოვიყვანოთ ერთი დის, ჯოსლინის, მაგალითი, რომლის დაც უბედურ შემთხვევას ემსხვერპლა. ის კარგა ხანს მდგომარეობიდან ვერ გამოდიოდა. თუმცა შემდეგ ის ერთმა ცოლ-ქმარმა სახლში დაპატიჟა, ყურადღებით მოუსმინა და დაარწმუნა, როგორ აფასებდა მას იეჰოვა. ჯოსლინი აღნიშნავს: „ისეთი განცდა მქონდა, რომ აბობოქრებული ზღვიდან იეჰოვამ მაშველ ნავზე ამიყვანა. ეს წყვილი დამეხმარა, იეჰოვას მსახურების სურვილი კვლავ დამებრუნებინა“. ჩვენც მზად უნდა ვიყოთ, ყურადღებით მოვუსმინოთ სხვებს და თანავუგრძნოთ. ამგვარად შევძლებთ გავამხნეოთ ისინი და იეჰოვას მსახურების ძალა შევმატოთ (რომ. 12:15).

ᲘᲛᲡᲯᲔᲚᲔᲗ ᲦᲕᲗᲘᲡ ᲡᲘᲢᲧᲕᲘᲡ ᲡᲐᲤᲣᲫᲕᲔᲚᲖᲔ

9. კიდევ რა სირთულეს შეხვდნენ მოწაფეები და როგორ დაეხმარა მათ იესო?

⁹ მოწაფეებმა ირწმუნეს ღვთის სიტყვა და ყველანაირად ცდილობდნენ ცხოვრებაში მის გამოყენებას (იოან. 17:6). თუმცა ისინი შეიძლება დაებნია იმას, რომ იესო, როგორც ბოროტმოქმედი, ისე მოკლეს. იესო ხედავდა, რომ მათ რწმენა კი არ აკლდათ, უბრალოდ უფრო ღრმად უნდა ჩამწვდარიყვნენ ღვთის სიტყვას (ლუკ. 9:44, 45; იოან. 20:9). ამიტომ მის საფუძველზე იმსჯელა მათთან. მოდი ვნახოთ, როგორ მოიქცა ის, როცა ემაუსისკენ მიმავალ გზაზე თავის ორ მოწაფეს დაემგზავრა.

10. როგორ დაარწმუნა იესომ თავისი მოწაფეები, რომ ნამდვილად მესია იყო? (ლუკა 24:18–27).

¹⁰ წაიკითხეთ ლუკას 24:18–27. შენიშნეთ, რომ იესოს მაშინვე არ გაუმხელია მოწაფეებისთვის თავისი ვინაობა? მან ჯერ კითხვები დაუსვა, რომ გაეგო, რას ფიქრობდნენ. ისინიც მოუყვნენ, რომ იმედი ჰქონდათ, იესო რომაელთა ბატონობიდან დაიხსნიდა ისრაელს. იესომ ბოლომდე ყურადღებით მოუსმინა მათ, შემდეგ კი წმინდა წერილების საფუძველზე აუხსნა, რომ ყველაფერი წინასწარმეტყველებისამებრ მოხდა.b იმავე საღამოს იესომ სხვა მოწაფეებსაც აუხსნა იგივე (ლუკ. 24:33–48). ჩვენ რას ვსწავლობთ აქედან?

11, 12. ა) რას ვსწავლობთ იესოსგან? (იხილეთ აგრეთვე სურათები). ბ) როგორ დაეხმარა ნორტის ბიბლიის მასწავლებელი?

¹¹ როგორ მივბაძოთ იესოს? პირველი, ტაქტიანი შეკითხვების მეშვეობით ეცადეთ, ჩასწვდეთ შემსწავლელის გულს (იგავ. 20:5). ამის შემდეგ კი ასწავლეთ, როგორ იპოვოს შესაბამისი ბიბლიური მუხლები. პირდაპირ ნუ ეტყვით, რა როგორ გააკეთოს. ჯობს, მასთან ერთად იმსჯელოთ ბიბლიურ მუხლებზე და ასწავლოთ, როგორ იპოვოს სახელმძღვანელო პრინციპები. ვნახოთ, რა გადახდა თავს განაში მცხოვრებ ერთ ძმას, სახელად ნორტის.

¹² ნორტი 16 წლის იყო, როცა ბიბლიის შესწავლა დაიწყო. რაღაც ეტაპზე ბიბლიის მასწავლებელმა მას მათეს მე-10 თავის დახმარებით აუხსნა, რომ ყველა ნამდვილი ქრისტიანი დევნილი იქნებოდა. მალევე ეს ასეც მოხდა და ნორტი ოჯახის მხრიდან წინააღმდეგობას შეხვდა. თუმცა რაკი წინასწარ იყო მომზადებული, არ გაუჭირდა სიმტკიცის შენარჩუნება. აი რას ამბობს ნორტი: „როცა დევნას შევხვდი, კიდევ ერთხელ დავრწმუნდი, რომ სწორ გზაზე ვიყავი“. მასწავლებელმა მასთან ერთად მათეს 10:16-ზე იმსჯელა და დაანახვა, რომ ოჯახში რელიგიურ თემებზე საუბრის დროს ფრთხილიც უნდა ყოფილიყო და პატივისცემაც გამოეჩინა. ნათლობის შემდეგ ნორტიმ პიონერად მსახურება გადაწყვიტა, მაგრამ მამას ეს ამბავი არ მოეწონა, რადგან უნდოდა, რომ მას უნივერსიტეტში გაეგრძელებინა სწავლა. ნაცვლად იმისა, რომ მასწავლებელს კონკრეტულად ეთქვა, რა გაეკეთებინა ნორტის, მან კითხვები დაუსვა და დაეხმარა, ბიბლიური პრინციპების საფუძველზე თავად მისულიყო სწორ დასკვნამდე. საბოლოოდ ნორტიმ გადაწყვიტა, სრული დროით მსახურება დაეწყო, რის გამოც მამამ სახლიდან გააგდო. ნორტი ამბობს: „ოდნავადაც არ მეპარება იმაში ეჭვი, რომ სწორი გადაწყვეტილება მივიღე“. თუ ჩვენც დავეხმარებით სხვებს, ბიბლიური მუხლების საფუძველზე მსჯელობა ისწავლონ, ისინი კარგ ქრისტიანებად ჩამოყალიბდებიან (ეფეს. 3:16–19).

ᲛᲝᲐᲛᲖᲐᲓᲔᲗ ᲫᲛᲔᲑᲘ

13. რა გააკეთა იესომ, რომ სამქადაგებლო საქმე არ შეჩერებულიყო? (ეფესოელები 4:8)

¹³ დედამიწაზე ყოფნის დროს იესო შესანიშნავად ასრულებდა მამისგან მიღებულ დავალებას (იოან. 17:4). თუმცა ის არ ფიქრობდა, რომ მის გარდა ამ საქმეს სხვა ვერავინ გააკეთებდა. ამიტომ სამწელიწად-ნახევრის განმავლობაში სხვებსაც ამზადებდა ამ საქმის შესასრულებლად. და როცა მისი ზეცად ამაღლების დრო დადგა, სწორედ მათ დაავალა როგორც ქადაგებისა და სწავლების საქმის ხელმძღვანელობა, ისე ღვთის ხალხზე ზრუნვა. აღსანიშნავია ისიც, რომ იმ დროს ზოგი მისი მოწაფე 30 წელსაც არ იყო მიღწეული (წაიკითხეთ ეფესოელების 4:8). თუმცა იესოს მათი მომზადება არც ბოლო 40 დღის განმავლობაში შეუწყვეტია. პირიქით, უფრო ინტენსიურად ამზადებდა მათ. მოდი ვნახოთ, როგორ.

14. რა რჩევები მისცა იესომ მოციქულებს? (იხილეთ აგრეთვე სურათი).

¹⁴ ბოლო 40 დღის განმავლობაში იესო თავის მოწაფეებს საკმაოდ პირდაპირ რჩევებს აძლევდა, თუმცა ამას რბილად აკეთებდა. მაგალითად, როცა შენიშნა, რომ ზოგს ეჭვები ღრღნიდა, დაეხმარა მათ მოშორებაში (ლუკ. 24:25–27; იოან. 20:27). მან ისიც ურჩია მოწაფეებს, რომ მატერიალურ კეთილდღეობაზე წინ იეჰოვას ხალხზე ზრუნვა დაეყენებინათ და შეახსენა, რომ ღვთის მსახურებაში საკუთარი თავი სხვებისთვის არ შეედარებინათ (იოან. 21:15, 20–22). მოწაფეებს ღვთის სამეფოსთან დაკავშირებითაც არარეალისტური მოლოდინები ჰქონდათ, იესომ კი შეუსწორა მათ თვალსაზრისი და დაეხმარა, მთელი ყურადღება სასიხარულო ცნობის ქადაგებაზე გადაეტანათ (საქ. 1:6–8). რისი სწავლა შეუძლიათ უხუცესებს იესოსგან?

15, 16. ა) როგორ შეუძლიათ უხუცესებს იესოს მიბაძვა? ბ) როგორ წაადგა პატრიკს მიღებული რჩევა?

¹⁵ როგორ შეუძლიათ უხუცესებს იესოს მიბაძვა? იესოს მსგავსად მეტი პასუხისმგებლობებისთვის უხუცესებმაც უნდა მოამზადონ ძმები, მათ შორის ახალგაზრდები.c მათ უნდა ესმოდეთ, რომ ამ ძმებს შეიძლება ბევრი რამის სწავლა სჭირდებოდეთ და მზად უნდა იყვნენ, რბილად მისცენ რჩევები. ამგვარად ისინი საჭირო გამოცდილებას შეიძენენ და თავმდაბალი, ერთგული ქრისტიანები გახდებიან, რომლებიც მზად იქნებიან სხვების მოსამსახურებლად (1 ტიმ. 3:1; 2 ტიმ. 2:2; 1 პეტ. 5:5).

¹⁶ ვნახოთ, როგორ გამოადგა მიცემული რჩევა ერთ ახალგაზრდა ძმას, სახელად პატრიკს. ის უხეშად ესაუბრებოდა და ექცეოდა თანაქრისტიანებს, მათ შორის დებს. ერთმა უხუცესმა შენიშნა ეს და საკმაოდ პირდაპირი რჩევა მისცა, თუმცა ეს რბილად გააკეთა. აი რას ამბობს პატრიკი: „ძალიან ბედნიერი ვარ, რომ ამ უხუცესმა დამანახა, რაზე მქონდა სამუშაო. გულს მიტეხდა იმის დანახვა, რომ სხვები იღებდნენ პასუხისმგებლობებს, მე კი – არა. თუმცა მისი რჩევა ზუსტად იმაში დამეხმარა, რომ პასუხისმგებლობებზე კი არ გამეკეთებინა აქცენტი, არამედ მთელი ყურადღება და-ძმების მომსახურებაზე გადამეტანა“. პატრიკმა გაითვალისწინა მიღებული რჩევა და 23 წლის ასაკში უხუცესად დაინიშნა (იგავ. 27:9).

17. როგორ ცხადყო იესომ, რომ ენდობოდა თავის მოწაფეებს?

¹⁷ იესომ თავის მიმდევრებს ქადაგებასთან ერთად მოწაფეების მომზადებაც დაავალა (მათ. 28:20).d მათ შეიძლება ეფიქრათ, რომ ამ საქმეს თავს ვერ გაართმევდნენ. მაგრამ იესოს მათში ეჭვი არ ეპარებოდა და ისინიც დაარწმუნა ამაში. აი რა უთხრა მათ: „როგორც მე გამომგზავნა მამამ, მეც ისე გგზავნით თქვენ!“ (იოან. 20:21).

18. როგორ შეუძლიათ უხუცესებს იესოს მიბაძვა?

¹⁸ როგორ შეუძლიათ უხუცესებს იესოს მიბაძვა? უხუცესები მზად არიან, თავიანთი ცოდნა სხვებსაც გადასცენ, შემდეგ კი მიანდონ მათ საქმე იმაში დარწმუნებულებმა, რომ ისინი ამას მშვენივრად გაართმევენ თავს (ფილ. 2:19–22). მაგალითად, მათ შეუძლიათ დაიხმარონ ახალგაზრდა ძმები დარბაზის დასუფთავებასა და შეკეთებაში. ერთი ახალგაზრდა უხუცესი, მეთიუ, ძალიან მადლიერია, რომ გამოცდილმა უხუცესებმა ჯერ საფუძვლიანად ასწავლეს საქმე, შემდეგ კი ბოლომდე ენდნენ. ის აღნიშნავს: „ჩემს დაშვებულ შეცდომებს ისინი სწავლის პროცესის ნაწილად აღიქვამდნენ და მეხმარებოდნენ, გავუმჯობესებულიყავი“.e

19. რისი გაკეთება უნდა გვქონდეს გადაწყვეტილი?

¹⁹ დედამიწაზე ყოფნის ბოლო 40 დღე იესომ მაქსიმალურად გამოიყენა იმისთვის, რომ გაემხნევებინა, ესწავლებინა და მოემზადებინა მოწაფეები. მოდი ჩვენც ყველანაირად ვეცადოთ, მივყვეთ მის მაგალითს (1 პეტ. 2:21). ეჭვი არ შეგეპაროთ, რომ ის თავად დაგვეხმარება ამაში. ის ხომ დაგვპირდა: „ყოველდღე თქვენთან ვიქნები ქვეყნიერების აღსასრულამდე!“ (მათ. 28:20).