მკითხველთა შეკითხვები

რა სიმაღლის იყო სოლომონის ტაძრის წინკარი?

წინკარი ტაძრის წმინდაში შესასვლელი იყო. ბიბლიის „ახალი ქვეყნიერების თარგმანის“ წინა გამოცემაში ეწერა: „წინკარი, სახლის სიგრძის გაგრძელებაზე, სიგანით ოცი წყრთა იყო სახლის სიგანის შესაბამისად, სიმაღლით კი – ას ოცი წყრთა“ (2 მატ. 3:4). ბიბლიის სხვა თარგმანებშიც ნათქვამია, რომ წინკარი სიმაღლით 120 წყრთა ანუ 53 მეტრი იყო.

თუმცა „ახალი ქვეყნიერების თარგმანის“ გადამუშავებულ გამოცემაში ვკითხულობთ: „წინკარის სიგრძე ტაძრის სიგანის მსგავსად 20 წყრთა იყო, სიმაღლე კი – 20“ ანუ დაახლოებით 9 მეტრი.a ვნახოთ, რამ განაპირობა ეს ცვლილება.

1 მეფეების 6:3-ში წინკარის სიმაღლე მოხსენიებული არაა. ამ მუხლში იერემია ტაძრის წინკარის სიგრძესა და სიგანეს აკონკრეტებს, შემდეგ თავში კი დეტალურად აღწერს ტაძარს და მოიხსენიებს სპილენძის დიდ აუზს, ათ საზიდარს და სპილენძის ორ სვეტს, რომლებიც წინკარის წინ იდგა (1 მეფ. 7:15–37). ჩნდება კითხვა: რამდენად ლოგიკურია, იერემიას არ მოეხსენიებინა წინკარის სიმაღლე, თუ ის მართლა აღემატებოდა 50 მეტრს და მთელ ტაძარზე მაღალი იყო?! ებრაელმა მემატიანეებმა საუკუნეების გასვლის შემდეგ დაწერეს, რომ წინკარი სოლომონის ტაძარზე მაღალი არ ყოფილა.

მკვლევრები ფიქრობენ, რომ ტაძრის კედლები ვერ დაიჭერდა 120-წყრთიან წინკარს. ძველად ობელისკები (ქვის სვეტები) და აგურის ნაგებობები, მაგალითად ტაძრის კარიბჭეები ეგვიპტეში, ქვემოთ განიერი იყო, ზემოთ კი ვიწროვდებოდა. თუმცა სოლომონის ტაძარი სხვაგვარად იყო აგებული. მკვლევრები ფიქრობენ, რომ მისი კედლის სისქე 6 წყრთაზე ანუ 2,7 მეტრზე მეტი არ იქნებოდა. აი რა დასკვნამდე მივიდა არქიტექტურის ისტორიკოსი თეოდორ ბუსინკი: „თუ გავითვალისწინებთ [ტაძრის შესასვლელის] კედლის სისქეს, შეუძლებელია, წინკარი [სიმაღლეში] 120 წყრთა ყოფილიყო“.

2 მატიანის 3:4-ის გადაწერისას შეიძლება შეცდომა მოხდა. მართალია, ზოგ ძველ ხელნაწერში ამ მუხლში ვხვდებით ციფრს „120“, მაგრამ სხვა ავტორიტეტულ ხელნაწერებში, მაგალითად მეხუთე საუკუნით დათარიღებულ ალექსანდრიის კოდექსსა და მეექვსე საუკუნით დათარიღებულ ამბროზიანას კოდექსში ვხვდებით ციფრს „20“. რატომ შეიძლება გადამწერს შეცდომით „120“ დაეწერა? ებრაულში სიტყვები „ასი“ და „წყრთა“ ერთმანეთის მსგავსია. ამიტომ დასაშვებია, რომ გადამწერს „წყრთის“ ნაცვლად „ასი“ დაეწერა.

მართალია, ჩვენ გვაინტერესებს სოლომონის ტაძართან დაკავშირებული დეტალები და გვინდა, ზუსტად ავსახოთ ის, მაგრამ განსაკუთრებულ ყურადღებას დიდებული სულიერი ტაძარი იმსახურებს ანუ ის, რასაც სოლომონის ტაძარი განასახიერებდა. უზომოდ მადლიერი ვართ, რომ იეჰოვამ თითოეულ მის მსახურს დაგვდო პატივი, მის დიდებულ სულიერ ტაძარში ვცეთ მას თაყვანი (ებრ. 9:11–14; გამოცხ. 3:12; 7:9–17).