რას ვსწავლობთ იაკობის წინასწარმეტყველებიდან (ნაწილი 2)

1. რას განვიხილავთ ამ სტატიაში?

ᲠᲝᲒᲝᲠᲪ წინა სტატიიდან გავიგეთ, სიკვდილის წინ იაკობმა თავისთან იხმო ვაჟები, რომ ეკურთხებინა. ის, რაც მან რეუბენს, სიმონს, ლევისა და იუდას უწინასწარმეტყველა, სავარაუდოდ, მოულოდნელი იყო ყველასთვის. მათ, ალბათ, ერთი სული ჰქონდათ, გაეგოთ, რას ეტყოდა დანარჩენებს. ამ სტატიაში განვიხილავთ, რისი სწავლა შეგვიძლია იქიდან, რაც იაკობმა თავის რვა ვაჟს – ზებულონს, ისაქარს, დანს, გადს, აშერს, ნაფთალს, იოსებსა და ბენიამინს – უთხრა.a

ᲖᲔᲑᲣᲚᲝᲜᲘ

2. რა უთხრა იაკობმა ზებულონს და როგორ შესრულდა მისი ნათქვამი? (დაბადება 49:13; იხილეთ აგრეთვე ჩარჩო).

² წაიკითხეთ დაბადების 49:13. იაკობის სიტყვებიდან გამოჩნდა, რომ ზებულონის შთამომავლები აღთქმული მიწის ჩრდილოეთ ნაწილში, ზღვასთან ახლოს დამკვიდრდებოდნენ. და მართლაც, დაახლოებით 200 წლის შემდეგ ზებულონის ტომს სამკვიდროდ ერგო ტერიტორია, რომელიც გალილეის ზღვასა და ხმელთაშუა ზღვას შორის მდებარეობდა. მართალია, მათი მიწა უშუალოდ ზღვას არ ესაზღვრებოდა, მაგრამ საწუწუნო არაფერი ჰქონდათ. ორივე ზღვა ადვილად მისადგომი იყო მათთვის, რაც სავაჭრო საქმიანობას უადვილებდათ. შესაძლოა მოსესაც ეს ჰქონდა მხედველობაში, როცა იწინასწარმეტყველა: „ზებულონ, იხარე გასვლისას!“ (კან. 33:18).

3. რა დაგვეხმარება, ვიყოთ კმაყოფილები?

³ რას ვსწავლობთ? ჩვენი ბედნიერება იმაზე არ არის დამოკიდებული, სად და რა პირობებში ვცხოვრობთ. მთავარია, კმაყოფილი ვიყოთ იმით, რაც გვაქვს (ფსალმ. 16:6; 24:5). მართალია, ზოგჯერ იმაზე უფრო ვამახვილებთ ყურადღებას, რაც არ გვაქვს, მაგრამ აჯობებს, პირიქით მოვიქცეთ და თავსაც უფრო ბედნიერად ვიგრძნობთ (გალ. 6:4).

ᲘᲡᲐᲥᲐᲠᲘ

4. რა უთხრა იაკობმა ისაქარს და როგორ შესრულდა მისი ნათქვამი? (დაბადება 49:14, 15; იხილეთ აგრეთვე ჩარჩო).

⁴ წაიკითხეთ დაბადების 49:14, 15. იაკობმა ისაქარი შრომისმოყვარეობისთვის შეაქო და მაგარძვლიან ვირს შეადარა, რომელსაც მძიმე ტვირთის ტარებაც კი არ უჭირს. იაკობმა უწინასწარმეტყველა, რომ სამკვიდროდ მშვენიერ მიწას მიიღებდა. ასეც მოხდა და ისაქარის ტომს მდინარე იორდანის გასწვრივ ნაყოფიერი მიწა ხვდა წილად (იეს. 19:22). მიწათმოქმედება შრომატევადი საქმე იყო. მაგრამ ისაქარის შთამომავლები გულმოდგინედ შრომობდნენ როგორც თავიანთი ტომის, ისე სხვების სასიკეთოდ (1 მეფ. 4:7, 17). ისინი არც ბრძოლისგან იხევდნენ უკან და მხარში ედგნენ თავიანთ მოძმეებს, მაგალითად, მსაჯულ ბარაკისა და წინასწარმეტყველ დებორას დროს (მსაჯ. 5:15).

5. რაში უნდა მივბაძოთ ისაქარის შთამომავლებს და რატომ?

⁵ რას ვსწავლობთ? იეჰოვა აფასებს ჩვენს გულმოდგინებას, რასაც მის საქმეში ვიჩენთ, როგორც თავის დროზე ისაქარის შთამომავლების გულმოდგინებას აფასებდა (ეკლ. 2:24). მაგალითად, უხუცესები ბევრს ირჯებიან კრებისთვის (1 ტიმ. 3:1). რაღაც გაგებით ისინიც იბრძვიან, რომ ღვთის ხალხი სულიერი ზიანისგან დაიცვან (1 კორ. 5:1, 5; იუდ. 17–23). ეს ძმები ბევრს შრომობენ, რომ თავიანთი მოხსენებებით და-ძმები გაამხნეონ და განამტკიცონ (1 ტიმ. 5:17).

ᲓᲐᲜᲘ

6. რა დავალება მიიღო დანის ტომმა? (დაბადება 49:17, 18; იხილეთ აგრეთვე ჩარჩო).

⁶ წაიკითხეთ დაბადების 49:17, 18. იაკობმა დანი გველს შეადარა, რომელიც არ უშინდება მასზე დიდსა და ძლიერს, მაგალითად, ცხენსა და მხედარს. მისი სიტყვები იმას ნიშნავდა, რომ დანი ისრაელის მტრებს არ შეუშინდებოდა და წინააღმდეგობას გაუწევდა. აღთქმული მიწისკენ მიმავალ გზაზე დანის ტომი ზურგს უმაგრებდა ისრაელს (რიცხ. 10:25). ფაქტია, ბევრი ვერც კი ხედავდა, რასაც ისინი აკეთებდნენ, მაგრამ ეს მათ დავალებას არ აუბრალოებდა.

7. რა უნდა გვახსოვდეს ნებისმიერი დავალების შესრულებისას?

⁷ რას ვსწავლობთ? ზოგჯერ შეიძლება ისე მოხდეს, რომ თქვენი გაკეთებული საქმე სხვებმა ვერ შენიშნონ, მაგალითად, როცა დარბაზის დასუფთავებასა თუ შეკეთებაში მონაწილეობთ, კონგრესებზე მოხალისედ მსახურობთ ან სხვა დავალებას ასრულებთ. თქვენი მონდომებისთვის ნამდვილად იმსახურებთ შექებას! გახსოვდეთ, რომ იეჰოვა ამჩნევს და აფასებს ყველაფერს, რასაც მისთვის აკეთებთ, მით უმეტეს, თუ ამას სხვების დასანახად კი არა, მისი სიყვარულის გამო აკეთებთ (მათ. 6:1–4).

ᲒᲐᲓᲘ

8. რატომ იყო გადის ტომი დაუცველი? (დაბადება 49:19; იხილეთ აგრეთვე ჩარჩო).

⁸ წაიკითხეთ დაბადების 49:19. იაკობმა იწინასწარმეტყველა, რომ გადს მოთარეშე რაზმი დაესხმებოდა თავს. დაახლოებით ორი საუკუნის შემდეგ გადის ტომმა სამკვიდრო მდინარე იორდანის აღმოსავლეთით მიიღო. მათი მიწა მტრულად განწყობილი ერების საზღვართან აღმოჩნდა, რის გამოც დაუცველები ჩანდნენ. მაგრამ ამის გამო გადელებს უკან არ დაუხევიათ, რადგან ამ მიწაზე მათი საქონლისთვის კარგი საძოვრები იყო (რიცხ. 32:1, 5). აშკარაა, გადელები გაბედულები იყვნენ. გარდა ამისა, იეჰოვას იმედიც ჰქონდათ, რომ რახან ეს მიწა უბოძა, დაიცავდა კიდეც მოთარეშეებისგან. წლების მანძილზე გადელი მეომრები სხვა ტომებსაც ეხმარებოდნენ იორდანის დასავლეთით აღთქმული მიწის დაპყრობაში (რიცხ. 32:16–19). მათ ეჭვი არ ეპარებოდათ, რომ იეჰოვა დაიცავდა მათ ცოლ-შვილს, სანამ ისინი ბრძოლაში იყვნენ ჩაბმულნი. იეჰოვამაც აკურთხა ისინი გაბედულებისა და თავდადებისთვის (იეს. 22:1–4).

9. საიდან ჩანს, რომ ვენდობით იეჰოვას?

⁹ რას ვსწავლობთ? იეჰოვას უნდა ვენდობოდეთ, სირთულეების დროსაც რომ არ შევწყვიტოთ მსახურება (ფსალმ. 37:3). დღეს ბევრი ქრისტიანი მიდის მსხვერპლზე, რომ მონაწილეობა მიიღოს თეოკრატიულ სამშენებლო პროექტებში, იმსახუროს იქ, სადაც მქადაგებლებზე დიდი საჭიროებაა ან ორგანიზაციაში სხვა დავალებები შეასრულოს. მათ ასეთი მზადყოფნა იმიტომ აქვთ, რომ ენდობიან იეჰოვას და სჯერათ, ის აუცილებლად იზრუნებს მათზე (ფსალმ. 23:1).

ᲐᲨᲔᲠᲘ

10. რა შეცდომები დაუშვა აშერის ტომმა? (დაბადება 49:20; იხილეთ აგრეთვე ჩარჩო).

¹⁰ წაიკითხეთ დაბადების 49:20. იაკობის წინასწარმეტყველებისამებრ აშერის ტომი უნდა გამდიდრებულიყო და ეს ასეც მოხდა. მთელ ისრაელში ამ ტომს ყველაზე ნაყოფიერი მიწა ერგო (კან. 33:24). აშერელთა სამკვიდროს ერთ მხარეს ხმელთაშუა ზღვა ესაზღვრებოდა; მათ ტერიტორიაზე მდიდარი ფინიკიური საპორტო ქალაქი სიდონიც მდებარეობდა. მაგრამ, სამწუხაროდ, აშერელებმა იმ მიწიდან არ განდევნეს ქანაანელები (მსაჯ. 1:31, 32). შესაძლოა სწორედ ქანაანელთა გავლენამ და მატერიალურმა კეთილდღეობამ განაპირობა ის, რომ აშერელებს დიდად არ ანაღვლებდათ, როგორ შესრულდებოდა იეჰოვას ნება. ისინი არ გამოხმაურებიან მსაჯულ ბარაკს, რომელმაც ქანაანელთა წინააღმდეგ საბრძოლველად მოუხმო. შესაბამისად, ისინი ვერ გახდნენ იმ საოცარი გამარჯვების მომსწრენი, რომელიც ისრაელმა იეჰოვას დახმარებით „მეგიდოს წყლებთან“ მოიპოვა (მსაჯ. 5:19–21). აშერელებს, ალბათ, შერცხვებოდათ, როცა მოისმენდნენ ბარაკისა და დებორას გამარჯვების სიმღერაში გაჟღერებულ სიტყვებს: „უქმად დამჯდარა ზღვის პირას აშერი“ (მსაჯ. 5:17).

11. რატომ უნდა შევინარჩუნოთ ფულისადმი სწორი დამოკიდებულება?

¹¹ რას ვსწავლობთ? გვინდა, საუკეთესო გავიღოთ იეჰოვასთვის. ამას მხოლოდ იმ შემთხვევაში შევძლებთ, თუ არ მოვექცევით იმ აზრის გავლენაში, რომ ფულით ყველაფრის ყიდვა შეიძლება (იგავ. 18:11). ამიტომ ვცდილობთ, ფულის მიმართ სწორი დამოკიდებულება გვქონდეს (ეკლ. 7:12; ებრ. 13:5). გვესმის, რომ არ ღირს, არასაჭირო ნივთების შეძენას შევწიროთ ღვთის მსახურება. გვჯერა, რომ თუ იეჰოვასთვის არ დავიშურებთ დროსა და ენერგიას, ეს აუცილებლად დაგვიფასდება და მომავალში არაფერი მოგვაკლდება (ფსალმ. 4:8).

ᲜᲐᲤᲗᲐᲚᲘ

12. სავარაუდოდ, როგორ შესრულდა ნაფთალზე წარმოთქმული კურთხევა? (დაბადება 49:21; იხილეთ აგრეთვე ჩარჩო).

¹² წაიკითხეთ დაბადების 49:21. იაკობმა იწინასწარმეტყველა, რომ ნაფთალი „მოხდენილ სიტყვებს“ წარმოთქვამდა. შესაძლოა ეს წინასწარმეტყველება დიდებულ მასწავლებელზე, იესოზე, შესრულდა. საინტერესოა, რომ იესო სწორედ ნაფთალის ტერიტორიაზე მდებარე ქალაქ კაპერნაუმში დასახლდა (მათ. 4:13; 9:1; იოან. 7:46). ესაიას ნაწინასწარმეტყველები ჰქონდა, რომ ის ზებულონისა და ნაფთალის მიწაზე მცხოვრები ხალხისთვის დიდი სინათლესავით იქნებოდა (ეს. 9:1, 2). თუ გავითვალისწინებთ იმას, რა გასაოცარ რამეს ასწავლიდა იესო ხალხს, მას ტყუილუბრალოდ არ ეწოდება „ჭეშმარიტი სინათლე, რომელიც ყველანაირ ადამიანს უნათებს“ (იოან. 1:9).

13. რა შემთხვევაში იქნება ჩვენი საუბარი ღვთისთვის მოსაწონი?

¹³ რას ვსწავლობთ? იეჰოვასთვის დიდი მნიშვნელობა აქვს, რას და როგორ ვამბობთ. რა შემთხვევაში ჩათვლის იეჰოვა ჩვენს სიტყვებს მოხდენილად? იმ შემთხვევაში, თუ ყოველთვის სიმართლეს ვილაპარაკებთ (ფსალმ. 15:1, 2); თუ გავამხნევებთ და შევაქებთ სხვებს და მოვერიდებით კრიტიკულ და უკმაყოფილების გამომხატველ საუბარს (ეფეს. 4:29); თუ ვეცდებით, უფრო დავხელოვნდეთ საუბრის წამოწყებაში მათთან, ვისაც გვინდა, სასიხარულო ცნობა გავუზიაროთ.

ᲘᲝᲡᲔᲑᲘ

14. როგორ გამართლდა იოსებზე მამის წინასწარმეტყველება? (დაბადება 49:22, 26; იხილეთ აგრეთვე ჩარჩო).

¹⁴ წაიკითხეთ დაბადების 49:22, 26. იაკობი ძალიან ამაყობდა იოსებით, რომელიც „თავისი ძმებისგან გამორჩეული“ იყო. იაკობმა მას „ნაყოფიერი ხის ამონაყარი“ უწოდა. „ხეში“ მან საკუთარი თავი, ხოლო „ამონაყარში“ იოსები იგულისხმა. იოსები მისი საყვარელი ცოლის, რახელის, პირმშო იყო. იაკობის წინასწარმეტყველება იმაზე მიანიშნებდა, რომ სწორედ ის მიიღებდა პირმშოს ორმაგ წილს, რომელიც რეუბენმა, ლეასა და იაკობის პირმშომ, დაკარგა (დაბ. 48:5, 6; 1 მატ. 5:1, 2). ეს ასეც მოხდა. იოსების ვაჟებმა, ეფრემმა და მენაშემ, ცალ-ცალკე მიიღეს წილი ისრაელის ტომებს შორის (დაბ. 49:25; იეს. 14:4).

15. როგორ შეხვდა იოსები უსამართლობას?

¹⁵ იაკობმა იოსებზე ასეთი სიტყვებიც წარმოთქვა: „მშვილდოსნები ავიწროებდნენ და ესროდნენ, მტრობდნენ“ (დაბ. 49:23). ეს მშვილდოსნები მისი შურიანი ძმები გამოდგნენ, რომელთა გამოც იოსები მრავალ უსამართლობას შეხვდა. თუმცა ის ძმებზე არ დაბოღმილა და არც იეჰოვაზე განაწყენებულა. როგორც იაკობმა თქვა: „[იოსების] მშვილდი მომართული იყო; მას ძლიერი და მარჯვე ხელები ჰქონდა“ (დაბ. 49:24). იოსებსაც შეეძლო შური ეძია და, ასე ვთქვათ, ესროლა ისრები მათთვის, მაგრამ ასე არ მოქცეულა. განსაცდელის დროს ის იეჰოვაზე იყო მინდობილი. მან აპატია ძმებს დანაშაული. მეტიც, უანგაროდ ზრუნავდა მათზე (დაბ. 47:11, 12). იოსები განსაცდელებმა გამოაწრთო და უკეთეს ადამიანად აქცია (ფსალმ. 105:17–19). შესაბამისად, იეჰოვამ ის ბევრ კარგ საქმეში გამოიყენა.

16. როგორ მივბაძოთ იოსებს სირთულეების დროს?

¹⁶ რას ვსწავლობთ? სირთულეების დროს არ უნდა ჩამოვშორდეთ იეჰოვასა და თანაქრისტიანებს. იეჰოვამ შეიძლება რთული სიტუაციების მეშვეობით გამოგვაწრთოს, ანუ ქრისტიანული თვისებების გამომუშავებასა და დახვეწაში დაგვეხმაროს, რომ, მაგალითად, უფრო გულმოწყალეები და მიმტევებლები გავხდეთ (ებრ. 12:7, 11). იოსების მსგავსად იეჰოვა ჩვენც დაგვაჯილდოებს მოთმინებისთვის.

ᲑᲔᲜᲘᲐᲛᲘᲜᲘ

17. როგორ შესრულდა ბენიამინზე წარმოთქმული წინასწარმეტყველება? (დაბადება 49:27; იხილეთ აგრეთვე ჩარჩო).

¹⁷ წაიკითხეთ დაბადების 49:27. იაკობმა ბენიამინი მგელს შეადარა, რაც იმაზე მიანიშნებდა, რომ მისი შთამომავლები საბრძოლო უნარებით იქნებოდნენ გამორჩეული (მსაჯ. 20:15, 16; 1 მატ. 12:2). „დილით“, ანუ ისრაელის სამეფოს ჩამოყალიბების დასაწყისში, ისრაელის პირველი მეფე ბენიამინელი საული გახდა, რომელიც უშიშრად ებრძოდა ფილისტიმელებს (1 სამ. 9:15–17, 21). „საღამოს“, ანუ როცა ისრაელის სამეფო დინასტიის მზე ჩაესვენა, ბენიამინისტომელებმა – დედოფალმა ესთერმა და სამეფო კარის უმაღლესმა მოხელემ მორდოქაიმ – სპარსეთის იმპერიაში ისრაელები განადგურებას გადაარჩინეს (ესთ. 2:5–7; 8:3; 10:3).

18. რაში შეგვიძლია მივბაძოთ ბენიამინელებს?

¹⁸ რას ვსწავლობთ? ბენიამინელებს ალბათ ძალიან ეამაყებოდათ, რომ ისრაელის პირველი მეფე მათი ტომიდან იყო. როცა იეჰოვამ მეფობა იუდასტომელ დავითს გადასცა, მათ მაშინვე არა, მაგრამ მოგვიანებით მაინც დაუჭირეს მხარი დავითს (2 სამ. 3:17–19). ათწლეულების შემდეგაც, როცა სხვა ტომები განუდგნენ დავითის დინასტიას, ბენიამინელები იუდას ტომისა და იეჰოვას ცხებული მეფის გვერდით დარჩნენ (1 მეფ. 11:31, 32; 12:19, 21). ჩვენც გვინდა, მხარი დავუჭიროთ მათ, ვისაც იეჰოვამ თავისი ხალხის ხელმძღვანელობა დააკისრა (1 თეს. 5:12).

19. რა მხრივ გვეხმარება იაკობის წინასწარმეტყველება?

¹⁹ სიკვდილის წინ იაკობის მიერ წარმოთქმული წინასწარმეტყველება მრავალმხრივ დაგვეხმარება. მაგალითად, როცა ვფიქრობთ, როგორც შესრულდა მისი სიტყვები, უფრო მეტად ვრწმუნდებით, რამდენად სანდოა იეჰოვას წინასწარმეტყველური სიტყვა. გარდა ამისა, უკეთ ვხედავთ, რა უნდა გავაკეთოთ, რომ იეჰოვამ ჩვენც გვაკურთხოს.