ხომ არ შევეშვა მანქანის ტარებას?

ᲨᲔᲘᲫᲚᲔᲑᲐ უკვე წლებია მანქანას მართავთ. შეგიძლიათ იქ წახვიდეთ, სადაც გინდათ და როცა გინდათ, და ბუნებრივია, ეს დამოუკიდებლობის შეგრძნებას განიჭებთ. მაგრამ თქვენი ოჯახის წევრები თუ მეგობრები, ფიქრობენ, რომ თქვენთვის მანქანის მართვა სახიფათოა. თქვენ კი ვერ გაგიგიათ, რა ანერვიულებთ.

ხომ არ გეცნობათ ასეთი სიტუაცია? რა დაგეხმარებათ იმის განსაზღვრაში, შეწყვიტოთ თუ არა ავტომობილის მართვა?

ზოგ ქვეყანაში გარკვეულ ასაკს მიღწეულმა მძღოლმა მანქანის ტარების უფლება რომ შეინარჩუნოს, სამედიცინო შემოწმება უნდა გაიაროს. ცხადია, ასეთ ქვეყნებში მცხოვრები იეჰოვას მოწმეები ემორჩილებიან მთავრობის მიერ მიღებულ ამ კანონს (რომ. 13:1). თუმცა, თუ თქვენთან მსგავსი კანონი არ არსებობს, მაინც შესაძლებელია განსაზღვროთ, რამდენად უსაფრთხოა თქვენთვის საჭესთან ჯდომა.

ᲨᲔᲐᲤᲐᲡᲔᲗ ᲗᲥᲕᲔᲜᲘ ᲣᲜᲐᲠᲔᲑᲘ

შეერთებულ შტატებში ერთ-ერთმა სამთავრობო ორგანიზაციამ (National Institute on Aging) ხანში შესული მძღოლებისთვის სპეციალური კითხვარი შეადგინა, რომელიც თქვენც დაგეხმარებათ თვითშემოწმებაში. ქვემოთ მოცემულია ზოგიერთი კითხვა.

გარკვევით ვხედავ საგზაო ნიშნებს ან ღამით ხომ არ მიჭირს ტარება?
მიჭირს თავის მიბრუნება, რომ სარკეები და უხილავი ზონა შევამოწმო?
რეაქცია ხომ არ შემინელდა, მაგალითად, ხომ არ მიჭირს გაზის პედლიდან მუხრუჭზე ფეხის სწრაფად გადატანა?
იმდენად ნელა ხომ არ დავდივარ, რომ სხვა მანქანების მოძრაობას ვაფერხებ?
ბოლო დროს ხშირად ხომ არ აღმოვჩნდი ავარიულ სიტუაციაში ან ხომ არ მომრავლდა ჩემს მანქანაზე ნაკაწრები თუ სხვა დაზიანებები იმის გამო, რომ უძრავ ობიექტებს ვერ ვამჩნევ ხოლმე?
პოლიციას ხომ არ გავუჩერებივარ ჩემი მართვის მანერის გამო?
ხომ არ ჩამთვლემია საჭესთან?
ისეთ მედიკამენტებს ხომ არ ვიღებ, რომლებმაც შეიძლება მანქანის მართვა გამირთულოს?
ხომ არ ნერვიულობენ ოჯახის წევრები და მეგობრები, როცა საჭესთან ვარ?

თუ ზემოთ ჩამოთვლილთაგან ერთ ან ორ კითხვას მაინც უპასუხეთ დადებითად, ალბათ ღირს რაღაც ზომების მიღება. მაგალითად, შეიძლება საჭირო გახდეს, შეამციროთ მანქანის ტარების დრო, განსაკუთრებით ღამით. დროდადრო შეაფასეთ თქვენი უნარები ან ამ საკითხზე აზრი ახლობლებს ჰკითხეთ. შეიძლება თქვენს შემთხვევაში ისიც პრაქტიკული აღმოჩნდეს, თუ რამდენიმე გაკვეთილს გაივლით, როგორ მართოთ მანქანა უფრო უსაფრთხოდ. მაგრამ თუ რამდენიმე კითხვას უპასუხეთ დადებითად, ალბათ, ჯობს, საერთოდ უარი თქვათ ტარებაზე.a

ᲓᲐᲤᲘᲥᲠᲓᲘᲗ ᲑᲘᲑᲚᲘᲣᲠ ᲞᲠᲘᲜᲪᲘᲞᲔᲑᲖᲔ

შეიძლება ვერ ვაცნობიერებთ, რომ მანქანის მართვის უნარები დაგვიქვეითდა. ალბათ იმაზე ფიქრიც მტკივნეულია, რომ ერთ დღესაც ავტომობილის ტარებაზე უარის თქმა მოგვიწევს. როგორ დაგვეხმარება ბიბლიური პრინციპები, ობიექტურად შევაფასოთ ჩვენი სიტუაცია და გონივრული გადაწყვეტილება მივიღოთ? დავფიქრდეთ ორ პრინციპზე.

გამოიჩინეთ მოკრძალება და რეალისტურად შეაფასეთ თქვენი შესაძლებლობები (იგავ. 11:2). წლების მატებასთან ერთად მხედველობა, სმენა და რეფლექსები ქვეითდება და კუნთებიც სუსტდება. მაგალითად, ბევრი გარკვეულ ასაკში საერთოდ უარს ამბობს სპორტის ზოგიერთ სახეობაზე, რადგან ხვდება, რომ ტრავმების რისკი იმატებს. იგივე პრინციპი მანქანის მართვაზეც ვრცელდება. ამიტომ ცხოვრების რაღაც ეტაპზე ზოგი უსაფრთხოების გამო წყვეტს ტარებას (იგავ. 22:3). ადამიანი, რომელიც რეალისტურად აფასებს თავის შესაძლებლობებს, სხვების აზრსაც ითვალისწინებს (შეადარეთ 2 სამუელის 21:15–17).

სიცოცხლის გაფრთხილება (კან. 22:8). თუ ადამიანი ავტომობილს უსაფრთხოდ ვერ მართავს, შეიძლება საკუთარი თუ სხვისი სიცოცხლეც კი იმსხვერპლოს. ასე რომ, თუ ხედავს, რომ მართვის უნარები დაუქვეითდა, მაგრამ მაინც აგრძელებს საჭესთან ჯდომას, დიდ რისკზე მიდის. შეიძლება მისი მიზეზით ფატალური შედეგიც კი დადგეს.

ნუ იფიქრებთ, რომ მანქანის მართვაზე უარის თქმა ღირსების საკითხია და შეიძლება სხვების თვალში ფასი დაკარგოთ. გახსოვდეთ, რომ იეჰოვას თვალში ძვირფასი იქნებით, თუ რეალისტურად შეაფასებთ საკუთარ თავს და სხვების უსაფრთხოებაზეც იფიქრებთ. ის გპირდებათ, რომ მუდამ თქვენ გვერდით იქნება და ყურადღებას არ მოგაკლებთ (ეს. 46:4). გჯეროდეთ, ის არასდროს მიგატოვებთ. ასე რომ, სთხოვეთ მას სიბრძნე და გამჭრიახობა, რომ სწორი გადაწყვეტილება მიიღოთ.

რისი გაკეთება შეუძლიათ სხვებს

როცა საქმე ავტომობილის მართვას ეხება, ხშირ შემთხვევაში ოჯახის წევრები უკეთ ვხედავთ სიტუაციას და ამ თემაზე საუბარიც უფრო გვიადვილდება. ან შეიძლება მეგობარზე გავიგოთ, რომ უსაფრთხოდ ვერ ატარებს მანქანას. კარგი იქნება, თუ ამ ამბავს ზერელედ არ მოვეკიდებით და თავად დავრწმუნდებით, მოსმენილი ინფორმაცია სწორია თუ არა. მაგალითად, შეიძლება მეგობარს სადმე წაყვანა ვთხოვოთ. თუ ჩავთვლით, რომ რაღაცები რიგზე არ არის, ღირს დაველაპარაკოთ. თუმცა კარგს ვიზამთ, თუ ასეთ დროს საკუთარ თავს მის ადგილას წარმოვიდგენთ და სიტყვებს ფრთხილად შევარჩევთ. აჯობებს, აქცენტი ასაკზე კი არა, იმაზე გავაკეთოთ, მანქანას როგორ მართავს. პირდაპირ იმის თქმას, რომ ავტომობილს სახიფათოდ ატარებს, ჯობია, ვუთხრათ, რომ მისი უსაფრთხოება გვადარდებს. კარგი იქნება, თუ ჩვენი სიტყვებიდან გამოჩნდება, რომ ამ სტატიაში მოცემულ ბიბლიურ პრინციპებს თავადაც ძალიან აფასებს.

შეიძლება ადამიანმა მტკივნეულად აღიქვას ის, რომ ასაკის გამო ავტომობილის მართვაზე უარის თქმა უწევს. თითქოს ამ დროს თავისუფლებას და დამოუკიდებლობას კარგავს. კარგი იქნება, თუ შევალთ მის მდგომარეობაში, გვერდში დავუდგებით და პრაქტიკულ დახმარებას შევთავაზებთ (იგავ. 17:17). შეიძლება მოერიდოს ჩვენთვის იმის თქმა, რომ მანქანით გადაადგილება სჭირდება, ამიტომ თავად შევთავაზოთ ეს. მაგალითად, შეგვიძლია ორგანიზება გავუწიოთ ერთგვარ მორიგეობას, რომ თანაქრისტიანებმა მონაცვლეობით წავიყვანოთ კრებაზე, მსახურებაში, საყიდლებზე ან ექიმთან. ყველანაირად უნდა დავარწმუნოთ, რომ ეს ჩვენთვის ტვირთი სულაც არ არის, პირიქით, გვსიამოვნებს ამის კეთება და მასთან ურთიერთობა (რომ. 1:11, 12).

a დამატებითი ინფორმაციისთვის იხილეთ 2002 წლის 8 სექტემბრის „გამოიღვიძეთ!“, გვ. 20–22.