დაამყარებენ მშვიდობას საერთაშორისო ორგანიზაციები?

ომები და შეიარაღებული კონფლიქტები დღევანდელი მსოფლიოს განუყოფელი ნაწილია. ამ გლობალური პრობლემის გადასაჭრელად გაერო და სხვა ორგანიზაციები აქტიურად არიან ჩართული სამშვიდობო a ოპერაციებში და რეგულარულად ინახულებენ კონფლიქტის ზონებს. ისინი იმედოვნებენ, რომ შეძლებენ დაძაბულობის განმუხტვას. „გაერთიანებული ერების ორგანიზაციის მიერ წარმოებული სამშვიდობო პროცესები გადამწყვეტ როლს თამაშობს მშვიდობიანი მსოფლიოს შექმნაში“, – განაცხადა გაეროს გენერალურმა მდივანმა, ანტონიო გუტერეშმა.

წლებია, სამშვიდობო ორგანიზაციები თავიანთი საქმიანობის ფარგლებში არაერთ დადებით შედეგს აღწევენ. მაგალითად, მათი ჩართულობით ხდება მოქალაქეების დაცვა, დევნილების სამშობლოში დაბრუნება, ჰუმანიტარული დახმარების მიწოდება თუ განადგურებული ინფრასტრუქტურის აღდგენა. თუმცა არსებობს სერიოზული დაბრკოლებები, რომელთა გამო სამშვიდობო ორგანიზაციები ბოლომდე ვერ აღწევენ თავიანთ მიზანს. დამყარდება ოდესმე ნამდვილი მშვიდობა ჩვენს პლანეტაზე? რას ამბობს ბიბლია ამ საკითხზე?

სირთულეები, რომლებიც ხელს უშლის მშვიდობის დამყარებას და გამოსავალი, რომელსაც ბიბლია გვთავაზობს

ორი მამაკაცი ერთმანეთის ზურგშექცევით დგას.

სირთულე: თანამშრომლობის პრობლემა. ყოველთვის ადვილი არაა სხვადასხვა ქვეყნის სამხედრო და სამოქალაქო ორგანიზაციებს შორის თანამშრომლობა. გაუგებრობა და განსხვავებული ინტერესები ზოგჯერ მათ შორის დაპირისპირების მიზეზი ხდება.

გამოსავალი: „ზეციერი ღმერთი დაამყარებს სამეფოს ... და ბოლოს მოუღებს ყველა ამ სამეფოს [ადამიანურ მმართველობას], თავად კი მარადიულად იდგება“ (დანიელი 2:44).

უახლოეს მომავალში ღმერთი დაასრულებს ომებს და ნამდვილ მშვიდობას დაამყარებს მთელ მსოფლიოში (ფსალმუნი 46:8, 9). ის ყველა მთავრობას ერთი მთავრობით ჩაანაცვლებს, რომელსაც „ღვთის სამეფო“ ეწოდება. ეს ხელისუფლება ზეციდან გაუწევს ხელმძღვანელობას დედამიწას, სადაც აღარ იქნება არანაირი დაპირისპირება და შესაბამისად, აღარც სამშვიდობო ორგანიზაციების არსებობა იქნება საჭირო.

სირთულე: შეზღუდული რესურსები და შესაძლებლობები. საერთაშორისო ორგანიზაციებს სამშვიდობო ოპერაციების შესასრულებლად ზოგჯერ დაბრკოლებას უქმნის ადამიანური, ფინანსური თუ სხვა სახის რესურსების ნაკლებობა. ეს ფაქტორები ზღუდავს მათი მოქმედების არეალს. გარდა ამისა, მათ ხშირად უწევთ სამშვიდობო მისიების შესრულება ისეთ გარემოში, სადაც სიტუაცია უკიდურესად დაძაბული და სიცოცხლისთვის საფრთხის შემცველია.

გამოსავალი: „ჩვენი უფლის, იესო ქრისტეს, ღმერთმა ... თავის მარჯვნივ დასვა [იესო] ზეცაში და დააყენა ყველა მთავრობაზე, ხელისუფლებაზე, ძალაუფლებაზე, მმართველობაზე და ყოველ სახელზე მაღლა“ (ეფესოელები 1:17, 20, 21).

ყოვლისშემძლე ღმერთმა იეჰოვამ b ყველაფერი უბოძა იესოს, ღვთის სამეფოს მეფეს, საიმისოდ, რომ წარმატებით იმმართველოს (დანიელი 7:13, 14). c ღმერთმა მას გაცილებით დიდი ძალა, ცოდნა, სიბრძნე და გამჭრიახობა მისცა, ვიდრე რომელიმე ხელისუფლება თუ ორგანიზაცია ფლობს (ესაია 11:2). გარდა ამისა, იესოს ძლევამოსილ ანგელოზთა ლაშქარი ჰყავს (გამოცხადება 19:14). არ არსებობს სირთულე და პრობლემა, რომელთა გადაჭრასაც ის ვერ შეძლებს.

იესო ღვთისგან ბოძებული რესურსებით და შესაძლებლობებით არა მხოლოდ კონფლიქტებს მოაგვარებს, არამედ გაცილებით მეტს გააკეთებს; ღვთის სამეფოს მმართველობის დროს დედამიწის ყველა მკვიდრი მშვიდად და უსაფრთხოდ იცხოვრებს (ესაია 32:17, 18).

სირთულე: საკანონმდებლო შეზღუდვები. სამშვიდობო ორგანიზაციებს თავიანთი მოვალეობების სათანადოდ შესრულებაში ხელს უშლის ის, რომ ზოგჯერ საკანონმდებლო ჩარჩო ბუნდოვანია ან მათი საქმიანობა კანონით შეზღუდულია. სწორედ ამიტომ ბოლომდე ვერ ასრულებენ თავიანთ მისიას.

გამოსავალი: „მთელი ძალაუფლება, ზეცაში თუ დედამიწაზე, მე [იესო] მაქვს მოცემული“ (მათე 28:18).

ღმერთმა იესოს ნათელი მითითებები მისცა და სრული ძალაუფლებით აღჭურვა, რათა დედამიწაზე ნამდვილი მშვიდობა დაამყაროს (იოანე 5:22). ის არასდროს მოიქცევა უსამართლოდ და მიკერძოებულად (ესაია 11:3–5). ამიტომაც ეწოდება მას ბიბლიაში „მშვიდობის მთავარი“, რომლის სამეფოც „სამართლიანობისა და სიმართლის წყალობით“ განმტკიცდება (ესაია 9:6, 7).

მხოლოდ ღვთის სამეფო მოიტანს ნამდვილ მშვიდობას

სამშვიდობო ორგანიზაციების ძალისხმევას გარკვეული შედეგი მოაქვს. მაგალითად, მათი მცდელობის შედეგად მართლაც შეიძლება დასრულდეს შეიარაღებული კონფლიქტი ამა თუ იმ ტერიტორიაზე. მაგრამ მათ არ შეუძლიათ ძალადობის გამომწვევი უმთავრესი მიზეზის, სიძულვილის, აღმოფხვრა ადამიანთა გულებიდან.

„ყველანი ერთი დიდი პრობლემის წინაშე ვდგავართ: ჩვენ უნდა დავიცვათ მშვიდობა, რომელიც არ არსებობს“ (დენის ჯეტი, აშშ-ს ყოფილი ელჩი).

ამის საპირისპიროდ, ღვთის სამეფოს ნამდვილად შეუძლია მშვიდობის დამყარება, რადგან ის ეხმარება ადამიანებს სიძულვილის დამარცხებაში. მაგალითად, დედამიწაზე ყოფნის დროს იესო სიტყვითა თუ საქმით ასწავლიდა თავის მიმდევრებს, როგორ ყოფილიყვნენ მშვიდობისმყოფელები და როგორ გამოევლინათ სიყვარული სხვების მიმართ.

„ბედნიერნი არიან მშვიდობისმყოფელნი“ (მათე 5:9).

„მოყვასი საკუთარი თავივით გიყვარდეს“ (მარკოზი 12:29–31).

„ჩააგე მახვილი, რადგან მახვილის ამღები მახვილითვე დაიღუპება!“ (მათე 26:52).

„როცა [იესოს] შეურაცხყოფდნენ, შეურაცხყოფით არ პასუხობდა, და, როცა იტანჯებოდა, ... არ იმუქრებოდა“ (1 პეტრე 2:23).

ღვთის სამეფოს ქვეშევრდომებზე იესომ თქვა, რომ ისინი სიყვარულით იქნებოდნენ გამორჩეული. ბიბლიიდან ვიგებთ, რომ ღვთის სამეფოს მმართველობის დროს ადამიანთა შორის სიძულვილი არ იარსებებს.

„ჩემი მოწაფეები რომ ხართ, იმით გაიგებენ, თუკი ერთმანეთი გეყვარებათ“ (იოანე 13:34, 35).

„ვისაც თავისი ძმა სძულს, მკვლელია“ (1 იოანე 3:15).

„ვისაც ღმერთი უყვარს, თავისი ძმაც უნდა უყვარდეს“ (1 იოანე 4:20, 21).

ვინაიდან ადამიანის შემოქმედი იეჰოვა ღმერთია, მან ყველაზე კარგად იცის, როგორ დაამყაროს მსოფლიო მშვიდობა. მისი სამეფო წარმატებით მოიყვანს სისრულეში იმას, რაშიც ადამიანურმა მმართველობებმა თუ სამშვიდობო ორგანიზაციებმა კრახი განიცადეს.

a გაერო და სხვა ორგანიზაციები აგრეთვე იყენებენ შემდეგ ტერმინებს: „სამშვიდობო მისია“, „სამშვიდობო პროცესები“, „მშვიდობის მხარდაჭერა“ და „სამშვიდობო ოპერაციები“.

b იეჰოვა ღვთის სახელია (ფსალმუნი 83:18). იხილეთ სტატია „ვინ არის იეჰოვა?“.

c დანიელის 7:13, 14-ში მოხსენიებულ ფრაზაში „კაცის ძე“ იგულისხმება იესო ქრისტე (მათე 25:31; 26:63, 64).

ღვთის სამეფო დღესვე უწყობს მშვიდობას ხელს და აერთიანებს ხალხს

მომავალში, ღვთის სამეფოს მმართველობის დროს, მთელ მსოფლიოში მშვიდობა და ერთიანობა დაისადგურებს, „რადგან დედამიწა იეჰოვას ცოდნით აივსება“ (ესაია 2:4; 11:9). ღვთის სამეფო უკვე მმართველობს ზეცაში და მისი წყალობით მილიონობით ადამიანს შორის უკვე არსებობს მშვიდობა და ერთიანობა.

იხილეთ ვიდეო „გაიმარჯვებს სიყვარული სიძულვილზე?“ და ნახეთ, როგორ დასძლია განსხვავებული ეროვნების ორმა მამაკაცმა წინასწარშექმნილი აზრი და სიძულვილი.

იხილეთ ვიდეო „დაუძინებელი მტრები, რომლებიც ახლო მეგობრებად იქცნენ“ და შეიტყვეთ, როგორ შეძლეს მოძალადე კრიმინალური დაჯგუფების ლიდერმა და პოლიციის ოფიცერმა, დაეძლიათ სიძულვილი და მეგობრები გამხდარიყვნენ.