ნამეტი ავსებს ნაკლულობას

იეჰოვას მოწმეები 200-ზე მეტ ქვეყანაში ეწევიან რელიგიურ საქმიანობას და გასაჭირში მყოფ ადამიანებს დახმარების ხელს უწვდიან. თუმცა უნდა აღინიშნოს, რომ ადგილობრივი შესაწირავებით საჭირო ხარჯების დაფარვა მხოლოდ 35 ქვეყანას შეუძლია. რა კეთდება შედარებით გაჭირვებულ ქვეყნებში მცხოვრები და-ძმების მხარდასაჭერად?

იეჰოვას მოწმეთა ხელმძღვანელი საბჭო თვალყურს ადევნებს მსოფლიოს სხვადასხვა კუთხეში მცხოვრები თანამორწმუნეების სულიერ საჭიროებებს, რათა და-ძმებს იეჰოვას თაყვანისცემასა და სასიხარულო ცნობის გავრცელებაში ხელი არაფერმა შეუშალოს. ისინი ცდილობენ, გონივრულად განკარგონ შეწირული თანხები. როცა ფილიალის ტერიტორიაზე საჭიროზე მეტი შესაწირავი კეთდება, ეს თანხები იმ ქვეყნებს ხმარდება, სადაც და-ძმები საკმარის შესაწირავს ვერ იღებენ. ასეთი სახით იეჰოვას მოწმეები მიყვებიან პირველი საუკუნის ქრისტიანების მაგალითს, რომლებიც ერთმანეთს მატერიალურად უჭერდნენ მხარს (2 კორინთელები 8:14). იმისათვის, რომ მათ შორის „თანასწორობა“ ყოფილიყო, ისინი თავიანთი „ნამეტით“ სხვების „ნაკლულობას“ ავსებდნენ.

რას გრძნობენ ის და-ძმები, რომელთა ნაკლულობასაც სხვა ქვეყნებში მცხოვრები თანამორწმუნეების ნამეტი ავსებს? მაგალითად, ტანზანიაში, სადაც მოსახლეობის ნახევარზე მეტი დღეში ორ დოლარზე ნაკლებს გამოიმუშავებს, უცხოელი და-ძმების მიერ გაღებული შესაწირავები დარბაზის შესარემონტებლად გამოიყენეს. მაფინგას კრებისგან, რომელიც ამ დარბაზში იკრიბება, ასეთი წერილი მივიღეთ: „რემონტის შემდეგ დამსწრეთა რაოდენობამ საგრძნობლად იმატა. მადლიერები ვართ იმ გულუხვობისთვის, რომელსაც იეჰოვას ორგანიზაცია და მსოფლიო საძმო იჩენს. რომ არა ისინი, ასეთ ლამაზ გარემოში ვერ შევძლებდით იეჰოვას განდიდებას“.

შრი-ლანკაში კორონავირუსის გამო ზოგიერთი ჩვენი და-ძმა ფაქტობრივად შიმშილის ზღვარზე იყო. იმარა ფერნანდო და მისი ვაჟი, ენოში საკმაოდ რთულ სიტუაციაში იყვნენ, მაგრამ სხვა ქვეყნებიდან შეწირული თანხების წყალობით მათ დროული დახმარება მიიღეს. დედა-შვილმა ხელნაწერი ბარათი გამოგვიგზავნა, სადაც ეწერა: „მადლობა ყველას, ვინც ამ მძიმე წუთებში სიყვარულით იზრუნა ჩვენზე და დახმარების ხელი გამოგვიწოდა. ვამაყობთ, რომ ასეთი საძმო გვყავს! ვლოცულობთ, რომ იეჰოვას ხელი ამ ბოლო დღეებში თითოეულმა და-ძმამ იგრძნოს“.

არა აქვს მნიშვნელობა, სად და რა პირობებში უწევთ და-ძმებს ცხოვრება, ისინი სიხარულით იღებენ სხვებისთვის მატერიალურ სახსრებს. მაგალითად, ენოშმა პატარა ყუთი გააკეთა, რათა გაჭირვებული ოჯახებისთვის შესაწირავი შეეგროვებინა. მსგავს სულისკვეთებას ავლენს გვადალუპე ალვარესი. ის მექსიკის ისეთ რეგიონში ცხოვრობს, სადაც ძალიან ცოტას თუ აქვს მინიმალური ანაზღაურება ან რეგულარული შემოსავალი. მწირი შემოსავლის მიუხედავად, ის მთელი გულით იღებს იეჰოვასთვის შესაწირავს. აი რას წერს გვადალუპე: „მადლობა იეჰოვას, რომ ასეთი კეთილი და მოსიყვარულეა. მიხარია, რომ ჩემი შესაწირავი იმ თანხის მცირედი ნაწილი იქნება, რომელიც გაჭირვებული და-ძმების კეთილდღეობას მოხმარდება“.

ფილიალები სიხარულით ეხმარებიან სხვა ქვეყნებში მცხოვრებ და-ძმებს. ბრაზილიის ფილიალის კომიტეტის წევრი, ენტონი კარვალო ამბობს: „იყო დრო, როცა არაერთი წლის განმავლობაში ჩვენ გვჭირდებოდა ფინანსური დახმარება სხვა ფილიალებისგან. მათი მხარდაჭერის წყალობით სამქადაგებლო საქმემ წინ წაიწია და ბევრი შემოუერთდა იეჰოვას ორგანიზაციას. მას შემდეგ, რაც ჩვენს ქვეყანაში ეკონომიკური მდგომარეობა გაუმჯობესდა, გვიხარია, რომ ახლა ჩვენ შეგვიძლია სხვა ფილიალებს დახმარების ხელი გავუწოდოთ. ბრაზილიაში მცხოვრები და-ძმები თვალყურს ადევნებენ, როგორ მიმდინარეობს სამქადაგებლო საქმე მსოფლიო მასშტაბით და ცდილობენ, თავიანთი წვლილი შეიტანონ მის წინსვლაში“.

იმისათვის, რომ საუკეთესო სახით დაეხმარონ თანამორწმუნეებს, იეჰოვას მოწმეები შესაწირავის სახით პირდაპირ სხვა ქვეყნის ფილიალებს კი არ უგზავნიან თანხებს, არამედ მსოფლიო სამქადაგებლო საქმიანობისთვის იღებენ. შესაწირავების გაღება შესაძლებელია ვებგვერდზე donate.jw.org ან იეჰოვას მოწმეთა დარბაზებში, სადაც განთავსებულია ასეთი სახის შესაწირავისთვის განკუთვნილი ყუთები. და-ძმების მიერ გაღებულ შესაწირავებს ძალიან ვაფასებთ!