ოჯახებო, განადიდეთ ღმერთი, როგორც მისი სამწყსოს წევრებმა
„საკრებულოებში ვადიდებ უფალს“ (ფსალმუნი 25:12).
1. სახლში შესწავლისა და ლოცვის გარდა, კიდევ რა წარმოადგენს ჭეშმარიტი თაყვანისმცემლობის მნიშვნელოვან ნაწილს?
იეჰოვას თაყვანისცემა მხოლოდ ლოცვითა და ბიბლიის სახლში შესწავლით არ ამოიწურება; მასში ღვთის კრების საქმიანობაში მონაწილეობა ანუ მისი სამწყსოს წევრობაც შედის. ძველ ისრაელებს შემდეგი მითითება უნდა შეესრულებინათ: ‘შეეკრიბათ ხალხი, კაცები, ქალები და ბავშვები’, რათა ესწავლათ ღვთის რჯული და მისი გზებით ევლოთ (მეორე რჯული 31:12; იესო ნავეს ძე 8:35). მოხუცებს, ‘ჭაბუკებსა და ქალწულებს’ მოუწოდებდნენ, განედიდებინათ იეჰოვას სახელი (ფსალმუნი 148:12, 13). მსგავსი ღონისძიებები დღეს ქრისტიანულ კრებაშიც ტარდება. მთელი დედამიწის ზურგზე კაცები, ქალები და ბავშვები თავისუფლად მონაწილეობენ შეხვედრის იმ პუნქტების განხილვაში, რომელშიც აუდიტორიამაც უნდა მიიღოს მონაწილეობა და მრავალი ამაში დიდ სიამოვნებას პოულობს (ებრაელთა 10:23–25).
2. ა) რატომ არის მომზადება ძირითადი ფაქტორი იმაში, რომ ბავშვებს უხაროდეთ კრებაზე დასწრება? ბ) ვის მაგალითს აქვს დიდი მნიშვნელობა?
2 მართალია, შვილების კრების სასარგებლო საქმეებში ჩართვა შეიძლება იოლი არ იყოს. მაგრამ რა შეიძლება იყოს იმის მიზეზი, რომ კრებაზე მშობლებთან ერთად დამსწრე ზოგ ბავშვს აშკარად უჭირს მოსმენა? რასაკვირველია, ბავშვების უმეტესობას არ შეუძლია გონების დიდხანს კონცენტრირება და კრებაზე ყოფნა მალე ბეზრდება. ამ პრობლემის გადაჭრაში კარგი დახმარება შეიძლება გაგიწიოთ მომზადებამ. მომზადების გარეშე ბავშვები ვერ შეძლებენ კრების შეხვედრაზე სათანადოდ მონაწილეობას (იგავნი 15:23). მოუმზადებლად ისინი ვერ მიაღწევენ კმაყოფილების მომგვრელ სულიერ წარმატებებს (1 ტიმოთე 4:12, 15). რის გაკეთება შეიძლება ამასთან დაკავშირებით? პირველი, რის გაკეთებაც მშობლებს შეუძლიათ, ის არის, რომ ჰკითხონ საკუთარ თავს, თვითონ თუ ემზადებიან შეხვედრებისთვის. მათ მაგალითს დიდი გავლენა აქვს (ლუკა 6:40). მეორე მნიშვნელოვანი ფაქტორია ოჯახური შესწავლის დაგეგმვა.
გულის გამაგრება
3. რატომ უნდა მოხმარდეს განსაკუთრებული ძალისხმევა ოჯახური შესწავლის დროს გულების გამაგრებას და რა არის ამისთვის საჭირო?
3 ოჯახურმა შესწავლამ არა მხოლოდ აკადემიური ცოდნა უნდა მოგვცეს, არამედ გულიც გაგვიმაგროს. ამისათვის საჭიროა ოჯახის თითოეული წევრის პრობლემების ცოდნა და ერთმანეთზე სიყვარულით აღსავსე მზრუნველობა. იეჰოვა კი ‘გულთამხილველია’ (პირველი ნეშტთა 29:17).
4. ა) რას ნიშნავს იყო ისეთი პიროვნება, ვისაც ‘გული არ აქვს’? ბ) რა შედის ‘გულის შეძენაში’?
4 რას ხედავს იეჰოვა ჩვენი შვილების გულების გამოკვლევისას? ბავშვების უმეტესობა იტყოდა, რომ უყვართ ღმერთი და ეს საქებარია, მაგრამ ბავშვებსა და მათ, ვინც ახლახანს გაიგო იეჰოვას შესახებ, მისი გზებით სიარულში გამოცდილება არა აქვთ. ამიტომ გამოუცდელობის გამო, როგორც ბიბლია აღნიშნავს, მათ შეიძლება „გული არ ჰქონდეთ“. შესაძლებელია მათი გულის ყველა მოტივი არ იყოს ცუდი, მაგრამ ადამიანის გულის ისე გამობრძმედას, რომ ის ნამდვილად ღვთისმოსაწონი იყოს, დრო სჭირდება. ამაში შედის ფიქრების, სურვილების, გრძნობების, ემოციებისა და მიზნების ღვთის ნებასთან შეთანხმება იმდენად, რამდენადაც ამას არასრულყოფილი ადამიანი შეძლებს. როდესაც ვინმე თავისი შინაგანი პიროვნების ასეთ ღვთისმოსაწონ ფორმირებას ახდენს, ის ‘გულს იძენს’ (იგავნი 9:4, აქ; 19:8, აქ).
5, 6. როგორ შეუძლიათ მშობლებს, შვილებს ‘გულის შეძენაში’ დაეხმარონ?
5 შეუძლიათ მშობლებს შვილებს ‘გულის შეძენაში’ დაეხმარონ? ფაქტია, არავის შეუძლია სხვა აქციოს კარგი გულის ადამიანად. თითოეულ ჩვენგანს მიეცა ნების თავისუფლება და ბევრი რამ იმაზეა დამოკიდებული, რაზე ვფიქრობთ. მაგრამ ხშირ შემთხვევაში გონიერ მშობლებს შეუძლიათ ჩასწვდნენ შვილების გულს და გაიგონ, რა ხდება იქ და რა დახმარებაა საჭირო. დაუსვით ისეთი კითხვები, როგორიცაა: „შენ რას ფიქრობ ამაზე?“ ან „შენ როგორ მოიქცეოდი?“ შემდეგ კი გულისყურით მოუსმინეთ. ამასთანავე, თავი შეიკავეთ მძაფრი რეაქციისგან (იგავნი 20:5). მშობლებო, თუ გსურთ გაიგოთ, რა უდევს ბავშვს გულში, საჭიროა მათ გულმოწყალებით, გაგების სულითა და სიყვარულით გამსჭვალული ატმოსფერო შეუქმნათ.
6 კარგი თვისებების განსამტკიცებლად ხშირად ისაუბრეთ სულის ნაყოფებზე — მათ თითოეულ მხარეზე — და მთელმა ოჯახმა ერთად იმუშავეთ მათ განვითარებაზე (გალატელთა 5:22, 23). გაიღრმავეთ იეჰოვასა და იესო ქრისტესადმი სიყვარული და ეს გააკეთეთ არა მხოლოდ იმის თქმით, რომ უნდა გვიყვარდეს ისინი, არამედ ისაუბრეთ იმაზე, რატომ უნდა გვიყვარდეს და როგორ შეგვიძლია გამოვხატოთ ეს სიყვარული (2 კორინთელთა 5:14, 15). ბავშვებს განუმტკიცეთ იმის კეთების სურვილი, რაც სწორია და დაანახეთ სარგებლობა, რომელიც ასეთ მოქმედებას მოჰყვება. ჩაუნერგეთ იმის სურვილი, რომ თავი აარიდონ ცუდ აზრებს, მეტყველებასა და საქციელს და ესაუბრეთ იმ უარყოფით გავლენაზე, რომელიც ყოველივე ამას მოაქვს (ამოსი 5:15; 3 იოანე 11). აჩვენეთ, როგორ შეიძლება აზრებმა, მეტყველებამ და საქციელმა, იქნება ეს კარგი თუ ცუდი, იმოქმედოს იეჰოვასთან ურთიერთობაზე.
7. რის გაკეთება შეიძლება ბავშვების დასახმარებლად, რომ პრობლემების მოგვარებისა და გადაწყვეტილებების მიღების დროს იეჰოვასთან ახლო ურთიერთობა შეინარჩუნონ?
7 როდესაც ბავშვი გასაჭირში ვარდება ან რაღაც მნიშვნელოვანი გადაწყვეტილება უნდა მიიღოს, შეგვიძლია ვკითხოთ: „როგორ გგონია, რას ფიქრობს ამ საკითხზე იეჰოვა? რა იცი იეჰოვას შესახებ ისეთი, რაც ამის თქმის საფუძველს გაძლევს? ილოცე ამაზე?“ რაც შეიძლება ადრეული ასაკიდან დაეხმარეთ შვილებს მიჰყვნენ ცხოვრების ისეთ გზას, რომლის თანახმადაც ყოველთვის გულწრფელ ძალისხმევას მოახმარენ ღვთის ნების გაგებასა და შემდეგ მის შესრულებას. იეჰოვასთან ახლო, პირადი ურთიერთობის დამყარების შემდეგ ისინი სიამოვნებით ივლიან მისი ბილიკებით (ფსალმუნი 118:34, 35). ეს კი მათში ჭეშმარიტი ღვთის კრებაში ყოფნისთვის მადლიერების გრძნობას განავითარებს.
კრების შეხვედრებისთვის მომზადება
8. ა) რა შეიძლება დაგვეხმაროს ოჯახური შესწავლისას ყველა ფაქტორზე ყურადღების გამახვილებაში? ბ) რამდენად მნიშვნელოვანია ეს შესწავლა?
8 ოჯახური შესწავლის დროს მრავალ ფაქტორზე უნდა გამახვილდეს ყურადღება. როგორ შეგიძლიათ ამის მიღწევა? ყველაფრის ერთდროულად გაკეთება შეუძლებელია, მაგრამ სიის შედგენა შეიძლება დიდად დაგეხმაროთ (იგავნი 21:5). დროდადრო გადახედეთ გეგმას და ნახეთ, რა საჭიროებს განსაკუთრებულ ყურადღებას. მთელი გულით ეცადეთ, რომ ოჯახის თითოეულმა წევრმა სულიერად წინ წაიწიოს. ოჯახური შესწავლა ქრისტიანულ-საგანმანათლებლო საქმიანობის მნიშვნელოვანი ნაწილია, რომელიც თითოეულ ჩვენგანს გვამზადებს როგორც დღევანდელი ცხოვრებისთვის, ისე მარადიულობისთვის (1 ტიმოთე 4:8).
9. კრების შეხვედრებისთვის მომზადებასთან დაკავშირებით, ოჯახური შესწავლისას თანდათანობით რა მიზნების მიღწევაზე შეიძლება ვიმუშაოთ?
9 ემზადებით კრების შეხვედრებისთვის ოჯახური შესწავლის დროს? ამასთან დაკავშირებით არსებობს მრავალი მიზანი, რომლებზეც შეგიძლიათ ოჯახური შესწავლისას ყველამ ერთად თანდათანობით იმუშაოთ. ზოგი მათგანის მიღწევას შეიძლება კვირები, თვეები და წლებიც კი დასჭირდეს. დავფიქრდეთ ამ მიზნებზე: 1) ოჯახის თითოეული წევრი მზად იყოს კრების შეხვედრაზე დასმულ კითხვებზე პასუხის გასაცემად; 2) თითოეულმა იმუშაოს იმაზე, რომ პასუხი თავისი სიტყვებით გასცეს; 3) პასუხებში ჩართოს ბიბლიური მუხლები და 4) გააანალიზოს მასალა, რათა მასში იპოვოს ისეთი რამ, რასაც პირადად გამოიყენებდა. ყოველივე ეს ჭეშმარიტების გათავისებაში დაგვეხმარება (ფსალმუნი 24:4, 5).
10. ა) როგორ შეგვიძლია, ყურადღება დავუთმოთ კრების თითოეულ შეხვედრას? ბ) რატომ ღირს ამის გაკეთება?
10 მაშინაც კი, თუ თქვენი ოჯახური შესწავლა, ჩვეულებრივ, „საგუშაგო კოშკის“ სასწავლო სტატიაზეა დაფუძნებული, ნუ უგულებელყოფთ წიგნის შესწავლისთვის, თეოკრატიული სამსახურის სკოლისა თუ სამსახურებრივი შეხვედრებისთვის პირად ან ოჯახთან ერთად მომზადების მნიშვნელოვნებას. ესეც იმ პროგრამის მნიშვნელოვანი ნაწილია, რომელიც იეჰოვას გზებით სიარულს გვასწავლის. შესაძლებელია დროდადრო გამოგენახათ დრო, რათა ამ შეხვედრებისთვის ოჯახთან ერთად მომზადებულიყავით. ერთად სწავლისას სწავლების ხელოვნებაც გაგიუმჯობესდებათ. შედეგად, შეხვედრებიც უფრო ნაყოფიერი იქნება. სხვა დანარჩენ საკითხებთან ერთად, ისაუბრეთ როგორც სარგებლობაზე, რომელიც ამ შეხვედრებისთვის რეგულარულ მომზადებას მოაქვს, ისე ამ მომზადებისთვის განსაზღვრული დროის გამოყოფის მნიშვნელოვნებაზე (ეფესელთა 5:15–17).
11, 12. რა სარგებლობას მოგვიტანს კრების შეხვედრებისთვის დაგეგმილი სიმღერების შესრულება და როგორ შეიძლება ამის კეთება?
11 კონგრესზე „ღვთისმოსაწონი ცხოვრების გზა“ ყველას მოგვიწოდეს, მოვმზადებულიყავით შეხვედრის კიდევ ერთი ნაწილისთვის — სიმღერისთვის. ემზადებით თუ არა ამისათვის? მომზადება ბიბლიური ჭეშმარიტებების გონებასა და გულში ჩანერგვას შეუწყობს ხელს; ასევე კრების შეხვედრებისგან მიღებულ სიამოვნებას გაზრდის.
12 მომზადება, რომელშიც გეგმით გათვალისწინებული სიმღერების სიტყვების წაკითხვა და მათ მნიშვნელობაზე საუბარიც შედის, სიმღერის მთელი გულით შესრულებაში დაგვეხმარება. ძველ ისრაელში თაყვანისმცემლობის დროს მუსიკალური ინსტრუმენტების გამოყენება ჩვეულებრივი მოვლენა იყო (პირველი ნეშტთა 25:1; ფსალმუნი 27:7). უკრავს ვინმე თქვენს ოჯახში მუსიკალურ ინსტრუმენტზე? რატომ არ გევარჯიშათ ოჯახთან ერთად მიმდინარე კვირისთვის გათვალისწინებული სამეფოს ერთ-ერთი სიმღერის შესრულებაში? კიდევ ერთ საშუალებას სიმღერის ჩანაწერების მოსმენა წარმოადგენს. ზოგ ქვეყანაში ჩვენი ძმები შესანიშნავად მღერიან მუსიკალური ინსტრუმენტების გარეშეც. გზაზე სიარულისას ან მინდორში მუშაობისას ისინი ხშირად მღერიან სიმღერებს, რომლებიც იმ კვირაშია დაგეგმილი კრების შეხვედრებისთვის (ეფესელთა 5:19).
ოჯახის მომზადება სამქადაგებლო მსახურებისთვის
13, 14. რატომ არის მნიშვნელოვანი ოჯახური საუბრები, რომლებიც ჩვენს გულებს სამქადაგებლო საქმიანობისთვის ამზადებს?
13 სხვებთან იეჰოვას სახელისა და მისი განზრახვების შესახებ ქადაგება ჩვენი ცხოვრების მნიშვნელოვან ნაწილს წარმოადგენს (ესაია 43:10–12; მათე 24:14). ახალგაზრდები ვართ თუ ხანდაზმულები, ამ საქმიანობას მეტი სიამოვნებით ვასრულებთ და მეტ წარმატებებს ვაღწევთ მაშინ, როდესაც მომზადებული ვართ. როგორ შეგვიძლია ამის ოჯახთან ერთად გაკეთება?
14 ისევე როგორც თაყვანისცემასთან დაკავშირებულ ყველა სხვა საკითხში, ამაშიც მნიშვნელოვანია გულის მომზადება. საჭიროა ვისაუბროთ არა მხოლოდ იმაზე, რის გაკეთებას ვაპირებთ, არამედ იმაზეც, რატომ ვაპირებთ ამის გაკეთებას. მეფე იოშაფატის დღეებში ხალხს ღვთის რჯულიდან ეძლეოდა მითითებები, მაგრამ, ბიბლიის თანახმად, მათი ‘გული არ იყო მობრუნებული’. რჯულის წაკითხვამ ისინი ისე ვერ გაამაგრა, რომ გაეძლოთ ცდუნებებისთვის, რომლებიც მათ ჭეშმარიტ თაყვანისმცემლობას აცილებდა (მეორე ნეშტთა 20:33; 21:11). ჩვენი მიზანი სამქადაგებლო მსახურებაში საათების გატარებითა და ლიტერატურის გავრცელებით არ ამოიწურება. ჩვენი მსახურება იეჰოვასა და იმ ხალხისადმი სიყვარულის გამომხატველი უნდა იყოს, რომლებსაც სიცოცხლის არჩევის შესაძლებლობა უნდა მიეცეთ (ებრაელთა 13:15). ამ საქმეში ჩვენ „ღვთის თანამშრომელნი“ ვართ (1 კორინთელთა 3:9). ეს დიდი პატივია ჩვენთვის! თანაც მსახურებაში წმინდა ანგელოზებთან ვთანამშრომლობთ (გამოცხადება 14:6, 7). სად ვიპოვიდით მადლიერების გრძნობის გასაძლიერებლად იმაზე უკეთეს დროს, თუ არა ოჯახთან ერთად საუბრებისას, იქნება ეს ყოველკვირეულ შესწავლასა თუ ბროშურიდან „საღვთო წერილის ყოველდღიური განხილვა“ შესაბამისი მუხლის განხილვისას.
15. როდის შეიძლება მოემზადოს მთელი ოჯახი სამქადაგებლო მსახურებისთვის?
15 ოჯახური შესწავლებისას დროდადრო თუ უთმობთ დროს, ოჯახის წევრების ყოველკვირეული სამქადაგებლო საქმიანობისთვის მომზადებაში დახმარებას? ასე მოქმედება შეიძლება ძალზე სასარგებლო აღმოჩნდეს (2 ტიმოთე 2:15). ის ოჯახის თითოეული წევრის მსახურებას საინტერესოსა და ნაყოფიერს გახდის. ხანდახან შეიძლება მთელი შესწავლა ასეთი მომზადებისთვის დაგეთმოთ. უფრო ხშირად კი, ოჯახური შესწავლის დასრულებისას ან კვირის განმავლობაში სხვა რომელიმე დროს შეგეძლოთ მოკლედ გესაუბრათ სამქადაგებლო მსახურების სხვადასხვა მხარეებზე.
16. აღნიშნეთ, რით არის ღირებული აბზაცში მოყვანილი თითოეული ნაბიჯი.
16 ოჯახურ შესწავლებზე შეიძლება ყურადღება გამახვილდეს შემდეგ ნაბიჯებზე: 1) კარგად ჩამოაყალიბეთ აზრები, რომლებსაც ქადაგებისას გამოიყენებდით; ჩართეთ ბიბლიური მუხლი და, თუ მდგომარეობა ნებას გრთავთ, ბიბლიიდან ამოიკითხეთ ის. 2) შეეცადეთ (თუ შესაძლებელია), სამქადაგებლო მსახურებისთვის ოჯახის თითოეულ წევრს ჰქონდეს პირადი ჩანთა, ბიბლია, ბლოკნოტი ჩანაწერებისთვის, ავტოკალამი ან ფანქარი, ტრაქტატები და სხვა ლიტერატურა. შეამოწმეთ, არის თუ არა ყველაფერი ნორმალურ მდგომარეობაში. აუცილებელი არ არის სამქადაგებლო მსახურებისთვის განკუთვნილი ჩანთა იყოს ძვირფასი, მაგრამ აკურატულად უნდა გამოიყურებოდეს. 3) ისაუბრეთ სად და როგორ იქადაგოთ არაფორმალურად. ოჯახის წევრებთან სამქადაგებლო მსახურებისას ამ დარიგების თითოეულ ნაბიჯს მიჰყევით; მათ სასარგებლო რჩევებიც მიეცით, მაგრამ ნუ გადააჭარბებთ.
17, 18. ა) ოჯახში როგორი მომზადება გახდიდა ჩვენს სამქადაგებლო მსახურებას უფრო ნაყოფიერს? ბ) რის განხილვა შეიძლება ყოველკვირეულად სამქადაგებლო მსახურებისთვის მომზადებისას?
17 იესო ქრისტეს მიერ თავისი მიმდევრებისთვის მიცემული დავალების მნიშვნელოვან ნაწილს ხალხის მოწაფეებად ქცევა წარმოადგენს (მათე 28:19, 20). ხალხის მოწაფეებად ქცევის მცდელობა მხოლოდ ქადაგებით არ ამოიწურება. საჭიროა სწავლებაც. როგორ შეიძლება დაგეხმაროთ ოჯახური შესწავლა ამ საკითხში ეფექტურობის მიღწევაში?
18 განიხილეთ, ვისი მონახულება შეიძლებოდა განმეორებით. ზოგმა შეიძლება ლიტერატურა აიღო; ზოგიც, ალბათ, უბრალოდ ისმენდა. მათ შეიძლება კარდაკარ ან ბაზარსა თუ სკოლაში არაფორმალურად ქადაგებისას შეხვდით. მიეცით ღვთის სიტყვას საშუალება, რომ გიხელმძღვანელოთ (ფსალმუნი 24:9; ეზეკიელი 9:4). გადაწყვიტეთ, ვისთან მივა თითოეული თქვენგანი მიმდინარე კვირას. რაზე ილაპარაკებთ? ოჯახურ წრეში ამ საკითხზე მსჯელობა თითოეულ წევრს მომზადებაში დაეხმარება. აღნიშნეთ ის ბიბლიური მუხლები, ასევე სათანადო საკითხები, რომლებსაც დაინტერესებულს წაუკითხავდით ბროშურიდან „რას მოითხოვს ღმერთი ჩვენგან?“ ან წიგნიდან „მარადიულ სიცოცხლემდე მიმყვანი შემეცნება“. ნუ ეცდებით ერთ მისვლაზე ძალიან ბევრ რამეზე საუბარს. მობინადრეს დაუსვით კითხვა და ღიად დატოვეთ, რათა მომდევნო მისვლისას გასცეთ პასუხი. რატომ არ გაიხდიდით ოჯახში წესად, დაგეგეგმათ ვისთან მისულიყავით განმეორებით მონახულებაზე, აგრეთვე როდის და რის მიღწევას ეცდებოდით. ასეთი მოქმედება უფრო ნაყოფიერს გახდიდა მთელი ოჯახის სამქადაგებლო მსახურებას.
წადით და ასწავლეთ მათ იეჰოვას გზები
19. რა არის საჭირო იმისათვის, რომ ოჯახის წევრებმა იეჰოვას გზებით იარონ და რა უწყობს ამას ხელს?
19 ამ ბოროტ წუთისოფელში ოჯახის ხელმძღვანელობა ადვილი არ არის. სატანა და მისი დემონები ცდილობენ, ძირი გამოუთხარონ იეჰოვას მსახურების სულიერობას (1 პეტრე 5:8). გარდა ამისა, დღეს ბევრი რამ ართულებს მშობლებო, განსაკუთრებით კი მარტოხელებო, თქვენს ცხოვრებას. ძალიან ძნელია დროის გამოძებნა ყველაფრის გასაკეთებლად, რის გაკეთების სურვილიც გაქვთ, მაგრამ ეს ღირს ძალისხმევად მაშინაც კი, თუ გარკვეული პერიოდი მხოლოდ ერთ რჩევას გაითვალისწინებთ, შემდეგ კი თანდათანობით გააუმჯობესებთ ოჯახური შესწავლის პროგრამას. იმის დანახვა, რომ ჩვენთვის ყველაზე ახლობელი ადამიანები იეჰოვას გზებით ერთგულად დადიან, სიხარულის მომგვრელი იქნება. ოჯახმა რომ იეჰოვას გზებზე წარმატებით იაროს, საჭიროა, მისი წევრები სიამოვნებით დადიოდნენ კრების შეხვედრებზე და სამქადაგებლო მსახურებაში მონაწილეობდნენ. ამისათვის კი მომზადებაა საჭირო, მომზადება, რომელიც გულს გვიმაგრებს და თითოეულს ამაში მონაწილეობის მისაღებად კარგად აღგვჭურავს.
20. რა ეხმარება მრავალ მშობელს, განიცადოს ისეთი სიხარული, რომელიც მე-3 იოანეს მე-4 მუხლშია აღწერილი?
20 მათ შესახებ, ვისაც სულიერი დახმარება გაუწია, მოციქული იოანე წერდა: „არ არის ჩემთვის იმაზე მეტი სიხარული, ვიდრე იმის მოსმენა, რომ ჩემი შვილები ჭეშმარიტებით დადიან“ (3 იოანე 4). ოჯახურ შესწავლებს, რომლებიც კონკრეტულ მიზნებზეა დაფუძნებული, და ოჯახის თავის მიერ თითოეული წევრის ინდივიდუალური მოთხოვნილების მიმართ გულთბილ გამოხმაურებას ბევრი რამის გაკეთება შეუძლია იმისათვის, რომ ოჯახს სიხარული არ მოაკლდეს. ღვთისმოსაწონი ცხოვრებისთვის მადლიერების განვითარებით მშობლები ოჯახს ცხოვრების ამ საუკეთესო გზით სიხარულით სიარულში ეხმარებიან (ფსალმუნი 18:8–12).
როგორ განმარტავდით?
◻ რატომ არის ჩვენი შვილებისთვის კრების შეხვედრებისთვის მომზადება ასე მნიშვნელოვანი?
◻ როგორ შეუძლიათ მშობლებს შვილებს ‘გულის შეძენაში’ დაეხმარონ?
◻ როგორ შეიძლება ჩვენი ოჯახური შესწავლა კრების ყველა შეხვედრისთვის მომზადებაში დაგვეხმაროს?
◻ როგორ შეიძლება სამქადაგებლო მსახურებისთვის მთელი ოჯახის ერთად მომზადება ეფექტურობაში დაგვეხმაროს?
[სურათი 20 გვერდზე]
ოჯახური შესწავლისას კრების შეხვედრებისთვის მომზადებაც შეგიძლიათ.
[სურათი 21 გვერდზე]
კრების შეხვედრისთვის დაგეგმილ სიმღერებში გავარჯიშება სასარგებლოა.