რატომ დაატყდება აღსასრული წუთისოფლის რელიგიას
„გამოერიდე მას, ჩემო ხალხო, რათა არ ეზიარო მის ცოდვებს და არ მიიღო მისი წყლულებისაგან“ (გამოცხადება 18:4).
1. ა) როგორ დაეცა დიდი ბაბილონი? ბ) როგორ იმოქმედა იეჰოვას მოწმეებზე ამ შემთხვევამ?
„დაეცა დიდი ბაბილონი“! დიახ, იეჰოვას თვალში ცრუ რელიგიის მსოფლიო იმპერია დაეცა. ეს შესრულდა 1919 წლიდან, როდესაც ქრისტეს ძმების დარჩენილი ნაწილი გათავისუფლდა ქრისტიანული სამყაროს ზეგავლენისგან, რომელიც მისტიკური ბაბილონის ძირითად ნაწილს შეადგენს. ამგვარად, ისინი გათავისუფლდნენ, რომ ემხილებინათ ცრუ რელიგია და მესიანური სამეფოს მეშვეობით ეუწყებინათ ღვთის სამართლიანი მმართველობა. ამ საუკუნის განმავლობაში იეჰოვას ურყევად ერთგულმა მოწმეებმა გამოააშკარავეს სატანის მარიონეტული რელიგიები, რომელთაც თავს ერთად უყრის და მოხერხებულად მართავს სატანა, რომ აცდუნოს ‘მთელი წუთისოფელი’ (გამოცხადება 12:9; 14:8; 18:2).
როგორ დაეცა დიდი ბაბილონი?
2. როგორია მსოფლიო რელიგიის დღევანდელი მდგომარეობა?
2 მაგრამ შესაძლოა ვინმეს დაებადოს კითხვა: „როგორ შეიძლება ითქვას, რომ ბაბილონი დაეცა, როდესაც აშკარად ჩანს, რომ მრავალ ქვეყანაში რელიგია ყვავის?“ კათოლიციზმსა და ისლამს, როგორც თავად ირწმუნებიან, თითოეულს თითო მილიარდი მორწმუნე ჰყავს. პროტესტანტიზმი კვლავაც წარმატებას აღწევს ამერიკაში, სადაც ახალი ეკლესიები და სამლოცველოები გამუდმებით შენდება. ასობით მილიონი მიჰყვება ბუდიზმისა და ინდუიზმის რიტუალებს. მაგრამ ახმარენ თუ არა დიდ ძალისხმევას ეს რელიგიები, რომ დადებითი გავლენა იქონიონ ამ მილიარდობით ადამიანის მოქმედებებზე? შეუშალეს თუ არა ხელი კათოლიკეებსა და პროტესტანტებს, რომ არ მოეკლათ ერთიმეორე ჩრდილოეთ ირლანდიაში? მოუტანეს თუ არა ნამდვილი მშვიდობა ებრაელებსა და მუსულმანებს შუა აღმოსავლეთში? მიაღწიეს თუ არა შეთანხმებას ინდუსებსა და მუსულმანებს შორის ინდოეთში? და ბოლოს, შეუშალეს თუ არა ხელი სერბ მართლმადიდებლებს, ხორვატ კათოლიკეებსა და ბოსნიელ მუსულმანებს არ მოეხდინათ „ეთნიკური წმენდა“, ძარცვა, ძალადობა და ერთმანეთი არ ამოეხოცათ? რელიგია, ხშირად არის იარლიყი და მხოლოდ იმ თხელ ნაჭუჭშია შეფარული, რომელსაც გარეგნული პეწი აქვს და რომელიც თვით მცირე წინააღმდეგობასაც ვერ უძლებს და ტყდება (გალატელთა 5:19–21; შეადარე იაკობი 2:10, 11).
3. რატომ არის რელიგია ღვთის წინაშე განსაკითხავად?
3 ღვთის თვალსაზრისით, ის, რომ რელიგიებს მხარს უჭერს მასები, არ ცვლის გარდაუვალ ფაქტს — ყველა რელიგია ღვთის წინაშეა განსაკითხავად. დიდი ბაბილონი, როგორც მისი ისტორიიდან არის ნათელი, იმსახურებს მტრულ განაჩენს, რადგან „მისმა ცოდვებმა ცას უწია და გაიხსენა ღმერთმა მისი უსამართლობანი“ (გამოცხადება 18:5). ოსიამ იწინასწარმეტყველა: „რადგან ქარს თესენ და ქარიშხალს მოიმკიან“. მთელ მსოფლიოში სატანის ყველა ცრუ რელიგიის წინააღმდეგ შესრულდება სასჯელის უმაღლესი ზომა, რადგან უღალატეს ღმერთს, მის სიყვარულს, მის სახელსა და მის ძეს (ოსია 8:7; გალატელთა 6:7; 1 იოანე 2:22, 23).
შენ უნდა აირჩიო
4, 5. ა) როგორ პირობებში ვცხოვრობთ დღეს? ბ) რომელ კითხვებს უნდა ვუპასუხოთ?
4 ჩვენ ვცხოვრობთ ‘უკანასკნელი დღეების’ ბოლო მონაკვეთში და როგორც ჭეშმარიტი ქრისტიანები მთელ ძალისხმევას ვახმართ, რომ გავუძლოთ ‘საზარელ ჟამს’ (2 ტიმოთე 3:1–5). ჭეშმარიტი ქრისტიანები დროებითი მაცხოვრებლები არიან სატანის წუთისოფელში, რომელიც სავსებით ირეკლავს სატანის გახრწნილ პიროვნებას, როგორც მკვლელის, მატყუარისა და ცილისმწამებლის (იოანე 8:44; 1 პეტრე 2:11, 12; გამოცხადება 12:10). ჩვენს ირგვლივ ბატონობს ძალადობა, სიცრუე, თვალთმაქცობა, კორუფცია და უკიდურეს ზომამდე დაცემული უზნეობა. ყველანაირი პრინციპი უარყოფილია. ჰედონიზმი და უპრინციპობა ნათლად ასახავს ამ სიტუაციას. მრავალ შემთხვევაში სამღვდელოება მოწყალედ ექცევა მორალურ გახრწნილებას იმით, რომ ცვლიას ბიბლიის თვალსაზრისს, რომელიც განიკითხავს ჰომოსექსუალიზმს, მრუშობასა და მეძაობას. ასე რომ, წამოიჭრება კითხვა, მხარს უჭერ და ეგუები ცრუ თაყვანისმცემლობას, თუ აქტიურად მონაწილეობ ჭეშმარიტ თაყვანისმცემლობაში? (ლევიანნი 18:22; 20:13; რომაელთა 1:26, 27; 1 კორინთელთა 6:9–11).
5 ახლა არის მათგან გამოსვლის დრო. ცრუ რელიგიის ჭეშმარიტისგან განსხვავების მრავალი საფუძველი არსებობს. კიდევ რა საძრახისი საქმეები გააკეთეს ქრისტიანული სამყაროს რელიგიებმა? (მალაქია 3:18; იოანე 4:23, 24).
ცრუ რელიგია ბრალდებულია
6. როგორ ღალატობს ქრისტიანული სამყარო ღვთის სამეფოს?
6 მიუხედავად იმისა, რომ ქრისტიანულ სამყაროში მილიონობით ადამიანი რეგულარულად წარმოთქვამს უფლის ლოცვას და ამ ლოცვისას ითხოვს, რომ მოვიდეს ღვთის სამეფო, იგივე მილიონები გულმოდგინედ უჭერენ მხარს პოლიტიკის ნებისმიერ საქმიანობას, რითაც არაფრად აგდებენ თეოკრატიულ მმართველობას. საუკუნეების წინათ კათოლიკური ეკლესიის „მთავრები“, ისეთები, როგორებიც იყვნენ კარდინალები რიშელიე, მაზარინი და ვულზი, მოქმედებდნენ როგორც პოლიტიკური მოღვაწეები, მთავრობის წევრები.
7. როგორ ამხილეს იეჰოვას მოწმეებმა ქრისტიანული სამყაროს სამღვდელოება 50 წელზე მეტი ხნის წინათ?
7 ბროშურაში, სახელწოდებით „რელიგია იმკის ქარიშხალს“ (ინგლ.), იეჰოვას მოწმეებმა 50 წელზე მეტი ხნის წინათ გამოააშკარავეს ქრისტიანული სამყაროს კავშირი პოლიტიკასთანa. რაც მაშინ ითქვა, იმავე ძალით მოქმედია დღესაც: «ნებისმიერი ქრისტიანული რელიგიის სამღვდელოების საქმიანობის გულწრფელი გამოკვლევა ნათელს გახდის, რომ მთელი „ქრისტიანული სამყაროს“ წინამძღოლები დიდი ინტერესით მონაწილეობენ „ახლანდელი ბოროტი წუთისოფლის“ პოლიტიკაში და ზერელე ინტერესს ავლენენ საერო საქმიანობის მიმართ». ჯერ კიდევ მაშინ, იეჰოვას მოწმეები სასტიკად აკრიტიკებდნენ პაპი პიუს XII-ის კონკორდანტებს ნაცისტ ჰიტლერთან (1933 წ.) და ფაშისტ ფრანკოსთან (1941 წ.), აგრეთვე პაპის დიპლომატიური წარმომადგენლების გაცვლა-გამოცვლას აგრესიულ იაპონიასთან 1942 წლის მარტში, ზუსტად რამდენიმე თვის მოგვიანებით რაც მოხდა საკმაოდ გახმაურებული პიორლ-ჰარბორის შეტაკება. პაპმა ვერ შეასრულა იაკობის გაფრთხილება: „მრუშნო, განა არ იცით, რომ წუთისოფლის მეგობრობა, ღვთის მტრობაა? ასეა, ვისაც წუთისოფლის მეგობრობა უნდა, იგი ღვთის მტერი ხდება“ (იაკობი 4:4).
8. როგორ არის დღეს ჩაბმული რომის კათოლიკური ეკლესია პოლიტიკაში?
8 როგორი მდგომარეობაა დღეს? პაპი კვლავ ჩაბმულია პოლიტიკაში, როგორც სამღვდელოების, აგრეთვე საერო წარმომადგენლების მეშვეობით. ბოლო დროის პაპებმა მოიწონეს გაერთიანებული ერების ორგანიზაცია, როდესაც სიტყვით მიმართავდნენ ამ, ადამიანების მიერ შექმნილ, სიყალბეს მსოფლიო მშვიდობისთვის. ვატიკანის ოფიციალური გაზეთი „ოსსერვატორე რომანო“ ერთ-ერთ უკანასკნელ ნომერში იუწყებოდა, რომ შვიდმა ახალმა დიპლომატმა, „წმინდა ტახტის მაცნეებმა“, რწმუნებულობის სიგელი წარუდგინეს „მის უწმინდესობა რომის პაპს“. შეგვიძლია წარმოვიდგინოთ, რომ იესო და პეტრე ოდესმე ჩაბმული იქნებოდნენ ასეთ დიპლომატიურ გაცვლა-გამოცვლაში? იესომ უარყო ყოფილიყო მეფე, როდესაც ებრაელები ცდილობდნენ იესოს გამეფებას, და თქვა, რომ მისი სამეფო არ იყო ამ წუთისოფლის (იოანე 6:15; 18:36).
9. რატომ შეგვიძლია ვთქვათ, რომ პროტესტანტული რელიგიები არ არიან კათოლიკეებზე უკეთესები?
9 არიან თუ არა პროტესტანტი ლიდერები ცოტათი მაინც უკეთესები თავიანთ კათოლიკე ორეულებზე? შეერთებულ შტატებში კონსერვატორიული პროტესტანტიზმის რელიგიები და მათთან ერთად მორმონებიც თავად წარმოადგენენ განსაზღვრულ პოლიტიკურ დაჯგუფებას. ქრისტიანული კოალიცია ღრმად არის შეჭრილი შეერთებული შტატების პოლიტიკაში. სხვა პროტესტანტული სამღვდელოება აშკარად არის აღიარებული, როგორც სხვადასხვა პოლიტიკური მდგომარეობის მქონე. ხშირად დავიწყებას ეძლევა, რომ შეერთებული შტატების პოლიტიკური წარმომადგენლები პეტ რობერტსონი და ჯესი ჯეკსონი ისევე არიან ან იყვნენ „წმინდები“, როგორც ბრიტანეთის პარლამენტის წევრი ჩრდილოეთ ირლანდიელი იან პეიზლი. როგორ გაამართლებენ ისინი ოდესმე თავიანთ პოზიციას? (საქმეები 10:34, 35; გალატელთა 2:6).
10. რას აცხადებდნენ ნათლად 1944 წელს?
10 როგორც ბროშურამ „რელიგია იმკის ქარიშხალს“ 1944 წელს კითხვა დაუსვა ადამიანებს, იმავე კითხვას ვსვამთ ახლა ჩვენც: „შესაძლებელია თუ არა, რომ ისეთი ორგანიზაცია, რომელიც ხელშეკრულებას დებს მსოფლიო ძალებთან და აქტიურად მოქმედებს ქვეყნის პოლიტიკურ საქმიანობაში, ცდილობს უპირატესობებს მიაღწიოს პოლიტიკაში და მფარველობას ქვეყნიერებისგან ელის. . . იყოს ღვთის ეკლესია, ანდა ქრისტე იესოს წარმომადგენელი დედამიწაზე? . . აშკარაა, იმ რელიგიების წარმომადგენლები, რომლებიც ამ სისტემის სახელმწიფოების მიზნებს იზიარებენ, შეუძლებელია ღვთის სამეფოს წარმომადგენლები იყვნენ ქრისტეს მეშვეობით“.
ცრუ რელიგია ავლენს კაენის სულისკვეთებას
11. როგორ მიჰყვება ცრუ რელიგია კაენის მაგალითს?
11 კაცობრიობის ისტორიის განმავლობაში ცრუ რელიგიამ გამოავლინა ძმისმკვლელი, საკუთარი ძმის, აბელის მკვლელი, კაენის სულისკვეთება. „ამით შეიცნობიან ღვთის შვილნი და ეშმაკის შვილნი: ყოველი, ვინც კი არ იქმს სიმართლეს, იგი არ არის ღვთისაგან, და ისიც, ვისაც თავისი ძმა არ უყვარს. რადგან ეს არის უწყება, რომელიც დასაბამიდან მოისმინეთ, რათა გვიყვარდეს ერთმანეთი. ისე კი არა, როგორც კაენს, რომელიც ბოროტისაგან იყო და მოკლა თავისი ძმა. მერედა რისთვის მოკლა? იმისათვის, რომ მისი საქმენი ბოროტი იყო, ხოლო მისი ძმისა — მართალი“. თავისი ძმის წმინდა და ღვთისმოსაწონი თაყვანისმცემლობა ვერ აიტანა კაენმა და მიმართა ძალადობას — ლოგიკურობას მოკლებულ ყველაზე უარეს საშუალებას (1 იოანე 3:10–12).
12. რა მტკიცებები არსებობს, რომ რელიგიები ომებისა და ბრძოლების თანამონაწილეები იყვნენ?
12 მხარს უჭერს თუ არა ფაქტები ცრუ რელიგიის წინააღმდეგ ბრალდებას? წიგნში „მქადაგებლები არიგებენ იარაღს“ (Preachers Present Arms) ავტორი წერს: „ცივილიზაციის ისტორიაში. . . ორი ძალა ყოველთვის იყო ორმხრივად მჭიდრო კავშირში. ესენი არიან ომი და რელიგია. და, არც ერთი დიდი მსოფლიო რელიგია. . . ისე თავდადებულად ერთგული არ ყოფილა მის მიმართ [ომის მიმართ], როგორც [ქრისტიანული სამყარო]“. რამდენიმე წლის წინათ ვანკუვერის (კანადა) გაზეთში „მზე“ (The Sun) ნათქვამი იყო: «ეს არის, ალბათ, ყველა ორგანიზებული რელიგიის სისუსტე, რომ ეკლესია მიჰყვება დროშას. . . რომელ ომს დაასახელებდით, რომლის დროსაც ორივე მოწინააღმდეგე მხარე არ იძახდა: „ჩვენთან არს ღმერთი“?» შენ, ალბათ, გინახავს ამის მტკიცება რომელიმე ადგილობრივ ეკლესიაში. აგრეთვე ძალიან ხშირად ეროვნული დროშები ამკობს საკურთხეველს. როგორ ფიქრობ, რომელი დროშის ქვეშ დადგებოდა იესო? საუკუნეების განმავლობაში ექოსავით გაისმის მისი სიტყვები „ჩემი სამეფო არ არის ამ წუთისოფლისა“! (იოანე 18:36).
13. ა) როგორი მარცხი განიცადა ცრუ რელიგიამ აფრიკაში? ბ) ქრისტიანობის როგორი განმასხვავებელი ნიშანი მოგვცა იესომ?
13 ქრისტიანული სამყაროს რელიგიები არ ასწავლიან თავიანთ სამწყსოს ჭეშმარიტ ძმურ სიყვარულს. პირიქით, ეროვნული, ტომობრივი და ეთნიკური სხვაობები დაშვებულია, რომ დაყონ თავიანთი მრევლი. როგორც საინფორმაციო საშუალებები იუწყება, კათოლიკეები და ანგლიკანური სამღვდელოება ჩარეული იყო იმ უთანხმოებაში, რამაც გამოიწვია ტომობრივი გენოციდი რუანდაში. „ნიუ-იორკ ტაიმსი“ იუწყებოდა: „მასობრივი ჟლეტა, რასაც ადგილი ჰქონდა რუანდაში, გამოწვეული იყო რომის კათოლიკური ეკლესიის წევრებით, ხშირად რუანდაში ეკლესია იყოფოდა ჰუტუსა და ტუტსის შორის ეთნიკურ ჯგუფებად“. იმავე გაზეთს მოჰყავდა „მერინოლის“ მღვდლის სიტყვები: „ეკლესიამ საზარელი მარცხი განიცადა 1994 წელს რუანდაში. მრავალმა რუანდელმა დატოვა ეკლესია. მას აღარავითარი ძალა აღარ აქვს“. რამდენად განსხვავებულია იესოს სიტყვები: „ჩემი მოწაფეები რომ ხართ, იმით გაიგებენ ყველანი, თუ სიყვარული გექნებათ ურთიერთს შორის“ (იოანე 13:35).
14. როგორი მოქმედებით გაითქვეს სახელი არაქრისტიანულმა რელიგიებმა?
14 დიდი ბაბილონის სხვა რელიგიებმაც ვერ მოგვცა უკეთესი მაგალითი. საშინელმა ხოცვა-ჟლეტამ 1947 წელს ინდოეთის დაყოფის დროს, ცხადყო, რომ რელიგიების უმრავლესობა არ არის შემწყნარებელი. ინდოეთში რელიგიურ საზოგადოებათა შორის მუდმივი ძალადობა ადასტურებს, რომ ადამიანთა უმრავლესობა არ შეცვლილა. არ არის გასაკვირი, რომ გაზეთი „ინდოეთი დღეს“ (India Today) ასკვნიდა: „რელიგია არის ბაირაღი, რომელსაც თავს აფარებს ყველაზე საზარელ დანაშაულობათა ორგანიზება. . . ის აჩაღებს შემაძრწუნებელ მოძალადეობას და წარმოადგენს ძალიან საზიანო ძალას“.
„გამაოგნებელი პარადოქსი“
15. როგორია რელიგიის მდგომარეობა დასავლეთში?
15 როგორც მსოფლიო კომენტატორებმა აღნიშნეს, რელიგიამ ვერ შეძლო დაემტკიცებინა, რომ ადამიანებს შთააგონებს ჭეშმარიტ ფასეულობას, და ეწინააღმდეგება არარელიგიურ ადამიანებზე ძალადობას. წიგნში „კონტროლს დაუქვემდებარებელი“ (Out of Control) შეერთებული შტატების ეროვნული უშიშროების ყოფილი მრჩეველი ზბიგნევ ბჟეჟინსკი წერდა: «გამაოგნებელი პარადოქსია, რომ უდიდესი გამარჯვება მოიპოვა ვარაუდმა, რომ „ღმერთი მკვდარია“, არა მარქსისტულ სახელმწიფოებში. . . არამედ დასავლეთის ლიბერალ-დემოკრატიულ საზოგადოებებში, რომლებმაც თავიანთი კულტურით აღზარდეს მორალური გულგრილობა. ფაქტია, რომ დასავლეთის საზოგადოებებში რელიგია აღარ წარმოადგენს მნიშვნელოვან სოციალურ ძალას. — შემდეგ მან დაუმატა, — რელიგია ევროპის კულტურებში დიდად შემცირდა და დღეს ევროპა — უფრო მეტად ვიდრე ამერიკა — არსებითად არის არარელიგიური საზოგადოება».
16, 17. ა) როგორი რჩევა წარმოთქვა იესომ იმდროინდელ სამღვდელოებასთან დაკავშირებით? ბ) რა შესანიშნავი პრინციპი თქვა იესომ ნაყოფთან დაკავშირებით?
16 რა თქვა იესომ იმდროინდელი ებრაელი სამღვდელოების შესახებ? „მოსეს ტახტზე დასხდნენ მწიგნობარნი და ფარისეველნი [რომ ასწავლონ თორა, რჯული]. ამიტომ, ყველაფერი, რის დაცვასაც ისინი გეტყვიან, შეასრულეთ და დაიცავით, ოღონდ მათ საქმეებს ნუ მიბაძავთ, ვინაიდან ისინი ამბობენ, არკი ასრულებენ“. დიახ, რელიგიური გახრწნილობა ახალი არ არის (მათე 23:2, 3).
17 ცრუ რელიგიას მსჯავრს სდებს თავისივე ნაყოფი. იესოს მოცემული წესი საოცრად შესაფერისია: „ყოველი კარგი ხე ნაყოფსაც კარგს იძლევა, ხოლო ცუდი ხე ნაყოფსაც ცუდს იძლევა. არ შეუძლია კარგ ხეს ცუდი ნაყოფის გამოღება; და არც ცუდ ხეს კარგი ნაყოფის გამოღება. ყოველ ხეს, რომელსაც კარგი ნაყოფი არ მოაქვს, ჭრიან და ცეცხლში აგდებენ. ასე რომ, მათი ნაყოფით იცნობთ მათ“ (მათე 7:17–20).
18. როგორ უნდა შეენარჩუნებინა წმინდად თავისი წევრები ქრისტიანულ სამყაროს?
18 თუ ქრისტიანული სამყაროს რელიგიები შეეცდებოდნენ სინდისიერად გამოეყენებინათ ცხოვრებაში ქრისტიანული პრინციპები გარიცხვასთან დაკავშირებით ან ურთიერთობიდან მოკვეთასთან დაკავშირებით მათ მიმართ, რომლებიც უკანონო საქმეებს სჩადიან და მათ წევრებად ითვლებიან, რა მოხდებოდა? რა დაემართებოდათ მოუნანიებელ მატყუარებს, მრუშებს, მეძავებს, ჰომოსექსუალისტებს, თაღლითებს, კრიმინალებს, ნარკოტიკებით მოვაჭრეებსა და ნარკომანებს, აგრეთვე ორგანიზებული დანაშაულის ჩამდენთ? უეჭველია, ქრისტიანული სამყაროს დამპალი ნაყოფი ღვთისგან განადგურების ღირსია (1 კორინთელთა 5:9–13; 2 იოანე 10, 11).
19. რა შენიშვნა გაკეთდა რელიგიების წინამძღოლებთან დაკავშირებით?
19 შეერთებულ შტატებში გამართულ პრესვიტერანული ეკლესიის შეხვედრაზე გაკეთდა შენიშვნა: „ჩვენ საშინელი კრიზისის წინაშე ვიმყოფებით. . . მთელ ქვეყანაში სამღვდელოების 10–23 პროცენტი გატაცებულია ჰომოსექსუალიზმით ანდა სქესობრივი კავშირი აქვს საკუთარ მრევლთან, დამკვეთთან, თანამშრომლებთან და ასე შემდეგ“. შეერთებულ შტატებში ერთ-ერთმა ბიზნესმენმა აღნიშნული ძალიან კარგად შეაჯამა: „რელიგიურმა დადგენილებებმა ვერ შეძლო სხვებისთვის გადაეცა მორალური ღირსებები და მრავალ შემთხვევაში თავად გახდა პრობლემის ნაწილი“.
20, 21. ა) როგორ ამხელდნენ იესო და პავლე გახრწნილებას? ბ) რომელ კითხვებს უნდა ვუპასუხოთ?
20 რელიგიების გახრწნილებაზე იესოს მსჯავრი, როგორც იესოს დედამიწაზე ყოფნის დროს, დღესაც ჭეშმარიტია: „თვალთმაქცნო, კარგად წინასწარმეტყველებდა ესაია თქვენზე, როცა ამბობდა: ‘ეს ხალხი პატივს მცემს ბაგეებით, მათი გული კი შორს არის ჩემგან’. ამაოდ მცემენ თაყვანს, რაკი ადამიანთა განკარგულებებს მოძღვრების მსგავსად ასწავლიან“ (მათე 15:7–9). სიტყვები, რომელიც პავლემ მისწერა ტიტეს, ასახავს დღევანდელობასაც: „ისინი სიტყვით აღიარებენ ღმერთს, საქმეებით კი უარყოფენ, ვინაიდან საძაგელნი და ურჩნი არიან და უვარგისნი ყოველი კეთილი საქმისათვის“ (ტიტე 1:16).
21 იესომ თქვა, რომ თუ ბრმა ბრმას მიუძღვის, ორივე ორმოში ჩავარდება (მათე 15:14). გსურს, რომ დიდ ბაბილონთან ერთად განადგურდე? იქნებ გსურს, რომ იარო სწორ ბილიკზე ახელილი თვალებით და გაიხარო იეჰოვას კურთხევით? წამოიჭრება კითხვები: აქვს თუ არა რომელიმე რელიგიას ღვთისმოსაწონი ნაყოფი? როგორ შეგვიძლია განვსაზღვროთ ჭეშმარიტი თაყვანისმცემლობა, რომელიც მისაღებია ღვთისთვის? (ფსალმუნი 118:105).
[სქოლიოები]
a გამოქვეყნებულია საგუშაგო კოშკის, ბიბლიისა და ტრაქტატების საზოგადოების მიერ, ნიუ-იორკი, 1944 წელი; ამჟამად აღარ იბეჭდება.
შეგიძლია თუ არა გაიხსენო?
◻ რა მდგომარეობა უკავია ღვთის წინაშე ბაბილონს?
◻ რის საფუძველზე აქვს წაყენებული ბრალდება ცრუ რელიგიას?
◻ როგორ გამოავლინა ცრუ რელიგიამ კაენის სულისკვეთება?
◻ რა პრინციპი გამოთქვა იესომ ნებისმიერი რელიგიის განსაკითხავად?
[სურათები 10 გვერდზე]
ეს მღვდლები იყვნენ ძლიერი პოლიტიკური მოღვაწეები.
კარდინალი მაზარინი.
კარდინალი რიშელიე.
კარდინალი ვულზი.
[საავტორო უფლება]
კარდინალი მაზარინი და კარდინალი რიშელიე: წიგნიდან Ridpath’s History of the World (ტომი V და ტომი VI). კარდინალი ვულზი: წიგნიდან „პროტესტანტიზმის ისტორია“ The History of Protestantism (ტომი I).
[სურათი 12 გვერდზე]
კაცობრიობის ისტორიის განმავლობაში რელიგიათა წინამძღოლები პოლიტიკაში ერეოდნენ.