ღვთიური მშვიდობის მაცნეები იკრიბებიან
„ჩვენ გვამაგრებდა თითოეული საოლქო კონგრესი, რომელსაც კი დავსწრებივართ, — ამბობს ქრისტიანი უხუცესი შეერთებული შტატებიდან. — მაგრამ ეს წელი, უბრალოდ, აღუწერელია. კონგრესის ყოველი დღის ბოლოს ერთი სული გვქონდა, გაგვეგო, როგორ გადააჭარბებდა ჩვენს მოლოდინს შემდეგი დღის პროგრამა და იმედი არ გაგვცრუებია!“
თუ დაესწარი ერთ-ერთ საოლქო კონგრესს, დევიზით „ღვთიური მშვიდობის მაცნეები“, ეჭვგარეშეა, დაეთანხმებოდი ამ აღფრთოვანებულ დელეგატს. კონგრესის თითოეული დღე ყურადღებას ამახვილებდა იმ დავალების სხვადასხვა მხარეებზე, რომელსაც იეჰოვას მოწმეები ასრულებენ, როგორც ღვთის მაცნეები. მოდი გადავხედოთ ამ სამდღიან პროგრამას.
‘რა საამურია. . . მშვიდობის გამომცხადებელი’
ეს იყო კონგრესის პირველი დღის თემა. იგი ეფუძნებოდა ესაიას 52:7-ს. ამ მძიმე დროში რთული პირობების მიუხედავად მრავალი ემსახურება იეჰოვას. მოხსენება „მშვიდობის გულმოდგინე მაცნეების მოსმენა“ შეიცავდა ინტერვიუს ასეთ ერთგულ ადამიანებთან მათი გამონათქვამების მოსმენა ნამდვილად გამამხნევებელი იყო და ამან კონგრესის დელეგატები დაარწმუნა, რომ იეჰოვას მათი გაძლიერებაც შეუძლია, იმითაც კი, რომ უზრუნველყოფს ‘აღმატებული ძლიერებით’, რათა დაეხმაროს მოთმინებაში (2 კორინთელთა 4:7).
იეჰოვას მოთხოვნები მძიმე არ არის (1 იოანე 5:3). ეს ნათელი გახდა დილის პროგრამის ბოლო მოხსენებაში, რომელმაც თავის კულმინაციას მიაღწია იმის გამოცხადებით, რომ გამოიცა 32-გვერდიანი ბროშურა, სახელწოდებით „რას მოითხოვს ღმერთი ჩვენგან?“ ლამაზად გაფორმებული ეს ახალი სასწავლო საშუალება, ეჭვგარეშეა, მნიშვნელოვან როლს ითამაშებს, რომ ბევრად უფრო მეტ ადამიანს დაეხმაროს ღვთის განზრახვების სწავლაში. კომენტარები ამ ახალი პუბლიკაციის გამოყენებასთან დაკავშირებით მოცემულია ამ ჟურნალის ბოლო სასწავლო სტატიაში და 16, 17 გვერდებზე.
მოხსენებაში — „მოითმინე კეთილი საქმის კეთების დროს“ ხაზი გაესვა, რომ იეჰოვამ კარგად იცის ჩვენი განცდები. „მოითმინო“ ნიშნავს არ დათმო შენი პოზიცია და არ დაკარგო იმედი. დასახმარებლად იეჰოვამ თავისი სიტყვა, თავისი სულიწმიდა და თავისი ორგანიზაცია მოგვცა. რომ იქადაგო, მოთმინებაა საჭირო, მაგრამ მოთმინებაში ქადაგება გვეხმარება, ვინაიდან რწმენას გვინარჩუნებს. რადგანაც ასე ახლოს ვართ ფინიშის ხაზთან, ნება არ უნდა მივცეთ პრობლემებს, მოადუნოს ჩვენი გულმოდგინება, ვინაიდან მხოლოდ ბოლომდის დამთმენი გადარჩება (მათე 24:13).
ძირითად სიტყვაში — „ჩვენი, როგორც ღვთიური მშვიდობის მაცნეების, როლი“ — ყურადღება გამახვილდა ძვ. წ. 537 წელს ბაბილონიდან ებრაელ გადასახლებულთა გათავისუფლებასა და იერუსალიმში წმინდა თაყვანისმცემლობის აღდგენაზე. როგორც ორატორმა ახსნა, ეს შემთხვევა, უბრალოდ, წინასახეობა იყო იმისა, რასაც ღვთის სამეფო მალე მსოფლიო მასშტაბით შეასრულებს (ფსალმუნი 71:7; ესაია 9:6). ჩვენი ახლანდელი დავალებაა, ვიქადაგოთ კეთილი ცნობა ამ სამეფოს შესახებ და ვიცხოვროთ ამ ცნობის შესაბამისად. ღვთისა და მოყვასის სიყვარულმა უნდა აღგვძრას, დაუცხრომლად განვაგრძოთ ეს მსახურება (საქმეები 5:42).
პარასკევის პროგრამის მნიშვნელოვანი პუნქტი იყო მოხსენებების სერია „უფრთხილდი გართობის ფარულ ხაფანგებს“. დღევანდელი მუსიკა, კინო- და ვიდეოფილმები, სატელევიზიო გადაცემები, ვიდეო თამაშები, წიგნები, ჟურნალები და კომიქსები ხშირად დემონურ აზროვნებას ირეკლავს. ამიტომ გვესაჭიროება, ‘განვერიდოთ ბოროტს’ და ‘მივეკრათ კეთილს’ (რომაელთა 12:9). დიახ, გარყვნილი გართობა საზიზღრობად უნდა მივიჩნიოთ და გავერიდოთ მას, მაშინ როცა ვფიქრობთ იმაზე, რაც წმინდა, სათნო და ქებულია (ფილიპელთა 4:8). იეჰოვას ორგანიზაციის მიერ გამოცემული პუბლიკაციები და გამოკვლევისთვის საჭირო იარაღები აღმშენებლური აზრებისკენ აღძრავს ჩვენს გონებას და ბოროტისაგან კეთილის გარჩევას გვასწავლის (ებრაელთა 5:14). ჩვენ ისე უნდა ჩავეჭიდოთ ამ აღჭურვილობებს, როგორც ტივს აბობოქრებულ ზღვაში.
შემდეგ მოჰყვა მოხსენება „წინააღუდექი სატანას, არ შეიწყნარო არავითარი მეტოქეობა“. აღთქმულ მიწაზე შესვლამდე ცოტა ხნით ადრე ათასობით ისრაელი გაება უზნეობის ხაფანგში. ფინხასმა არ შეიწყნარა ჭეშმარიტი თაყვანისცემისადმი მეტოქეობა. მან გადამწყვეტი ზომები მიიღო დამნაშავეების წინააღმდეგ და მისი განსაკუთრებული ერთგულებით იეჰოვა ნასიამოვნები დარჩა (რიცხვნი 25:1–13). სატანის მიზანია, თითოეული ჩვენგანი ღვთის ახალ ქვეყნიერებაში შესასვლელად უღირსი გახადოს. ამიტომ, ფინხასის მსგავსად, წინააღმდეგობა უნდა გავუწიოთ ეშმაკის მცდელობებს, რომლებსაც ის იყენებს, რომ ჩირქი მოგვცხოს. დაქორწინებული ვართ თუ მარტოხელა, უნდა ‘გავექცეთ სიძვას’ (1 კორინთელთა 6:18).
„ერთგულად დავუჭიროთ მხარი ღვთის სიტყვის სიწმინდეს“ კონგრესის პირველი დღის დამამთავრებელი მოხსენება იყო. მრავალი მთარგმნელი ცვლის ან საერთოდ იღებს საღვთო წერილის გარკვეულ მონაკვეთებს. მაგალითად, ქალთა უფლებების დამცველთა დასაშოშმინებლად „ახალი აღთქმისა და ფსალმუნების ყოვლისმომცველი თარგმანის“ (The New Testament and Psalms: An Inclusive Version) მთარგმნელები ღმერთს უწოდებენ არა მამას, არამედ მამა-დედას, იესოს კი — „ადამიანს“ და არა „კაცის ძეს“. ამის საპირისპიროდ, „ახალი ქვეყნიერების თარგმანი“ (ინგლ.) იმდენად ერთგულად მიჰყვება ორიგინალი ენის ტექსტს, რომ გვეხმარება საღვთო წერილის მრავალ საკითხზე ნათელი გაგების მოპოვებაში. მაგალითად, მომხსენებელმა თქვა: «„ახალი ქვეყნიერების თარგმანის“ ზუსტმა თარგმანმა განაპირობა ჩვენს კრებებში რეორგანიზება, რაც ჩატარდა უხუცესთა საბჭოების დანიშვნით პირველი საუკუნის ქრისტიანთა კრების მიერ დატოვებული ნიმუშისადმი ზუსტი მიყოლით». ჩვენ ღვთის სიტყვისადმი ურყევ ერთგულებას ვავლენთ, თუ მას ყოველდღიურად ვკითხულობთ და მის რჩევას ვიყენებთ. მომხსენებელმა აგრეთვე თქვა: „ღვთის სიტყვის ერთგული დამცველები რომ ვართ, იმით ვაჩვენებთ, რომ გულმოდგინედ ვქადაგებთ მის შესახებ სხვებთან, ყურადღებით ვიყენებთ მას, რათა ვასწავლოთ სხვებს და, ამავე დროს, არასოდეს ვცდილობთ ჩვენს აზრებს მივუსადაგოთ მასში ნათქვამი სიტყვები მათი დამახინჯებით თუ გაზვიადებით“.
‘ღვთის მშვიდობა ყოველგვარ გონებას აღემატება’
ფილიპელთა 4:7-ზე დაფუძნებულმა ამ თემამ განწყობილება შექმნა კონგრესის მეორე დღისთვის. წარმოდგენილი ინფორმაციის დიდი ნაწილი ეხებოდა სწორ შეხედულებას მსახურებაზე, ოჯახზე, მიძღვნასა და ყოველდღიური ცხოვრების სხვა მხარეებზე.
დღიური მუხლის განხილვის შემდეგ წარმოდგენილი იქნა მოხსენებების სერია, სახელწოდებით „მშვიდობის შესახებ კეთილი ცნობის მაცნეები“. ჩვენი ცნობა მშვიდობას ეხება და ის მშვიდად უნდა იქნეს გადაცემული (ეფესელთა 6:15). ჩვენი მიზანია გულების მოგება და არა კამათში გამარჯვება. იეჰოვას ორგანიზაციის მეშვეობით მიღებული სწავლება და პუბლიკაციები გვეხმარება, ზუსტად ასე გავაკეთოთ. გულგრილობას ნება არ უნდა დავრთოთ, გული აგვიცრუოს. ამის ნაცვლად, ჩვენ უნდა განვაგრძოთ ‘ჩვენი მაქსიმუმის კეთება’ და გვქონდეს პირადი შესწავლის, შეხვედრებზე დასწრებისა და სამქადაგებლო საქმეში მონაწილეობის გონივრული რეჟიმი (2 ტიმოთე 2:15, აქ). მხედველობიდან არ უნდა გამოგვრჩეს სიკეთის ქმნა სხვებისთვის, განსაკუთრებით იმათთვის, ვინც რწმენით ჩვენიანია (გალატელთა 6:10). რასაკვირველია, მაქსიმუმის კეთება არ ნიშნავს გამოფიტვამდე მუშაობას. იეჰოვასთვის მისაღებია ის, რაც თითოეულს შეუძლია გააკეთოს თავისი შესაძლებლობისა და მდგომარეობის მიხედვით.
სამეფოს ინტერესებისთვის ღვთის ხალხი არ იშურებს საკუთარ დროს, ენერგიასა და სახსრებს. მოხსენებაში — „იეჰოვას ორგანიზაციაში სიხარულით გაცემა“ — აღინიშნა, რომ, რადგანაც უფრო მეტი ცხვრისმაგვარი ადამიანი ეხმაურება სამეფოს ცნობას, საჭიროა დამატებითი ინვენტარი, ადგილები შეხვედრებისთვის და ფილიალები. ჩვენი შესაწირავები ორგანიზაციას შესაძლებლობას აძლევს, თავის განკარგულებაში ჰქონდეს ყველაფერი, რაც კი მსოფლიო სამქადაგებლო საქმის შესასრულებლადაა საჭირო. გულუხვი გაცემა აგრეთვე იეჰოვას განადიდებს და გამცემს სიხარულს ანიჭებს. ამიტომ, როგორც ქრისტიანებმა, არ უნდა უგულებელვყოთ ჩვენი თაყვანისცემის ეს მნიშვნელოვანი მხარე (2 კორინთელთა 8:1–7).
დილის პროგრამა დასრულდა ნათლობისთვის განკუთვნილი მოხსენებით — იეჰოვას მოწმეთა დიდი შეკრებების მუდამ მნიშვნელოვანი მომენტით. რა სასიხარულოა იხილო ახლად მიძღვნილი ადამიანები, რომლებიც წყალში ნათლობით იესოს ნაკვალევს მიჰყვებიან! (მათე 3:13–17). ყველა, ვინც ამ ნაბიჯს დგამს, სიბრძნის უდიდესი წყაროს — ბიბლიის — მეშვეობით განისწავლა. გარდა ამისა, მათ იპოვეს სიცოცხლის ნამდვილი აზრი და კურთხეულნი არიან მშვიდობით, რომელიც იმის ცოდნას მოაქვს, რომ აკეთებენ იმას, რაც სწორია (ეკლესიასტე 12:13).
ხაზგასმული რჩევა იქნა მიცემული მოხსენებით — „დაე დაგიცვას გამჭრიახობამ“. გამჭრიახობა ძლიერ მნიშვნელოვანია საქმიანი გარიგებების დროს. სამეფო დარბაზში უნდა მოვერიდოთ პირად სავაჭრო საქმიანობას და თანაქრისტიანები არ უნდა გამოვიყენოთ ფინანსური მოგების მიზნით (შეადარე იოანე 2:15, 16). გამჭრიახობა აგრეთვე საჭიროა საქმეში თანხის დაბანდებისა თუ სესხის აღებ-გაცემის დროს. „ქრისტიანებში სავაჭრო საქმეებში წარუმატებლობა გულგატეხილობას იწვევს და სულიერობასაც კი უკარგავს მათ, ვინც ნაჩქარევად ებმება მომგებიან სარისკო საქმეებში“, — აღნიშნა მომხსენებელმა. მიუხედავად იმისა, რომ ცუდი არაა, ქრისტიანებმა ერთმანეთში სავაჭრო საქმეები აწარმოონ, სიფრთხილე, უდავოდ, ბრძნულია. და, როცა საქმიანი მოლაპარაკება ხდება ორ მხარეს შორის, პირობები ყოველთვის წერილობით უნდა გადმოიცეს.
მამაკაცისა და ქალისთვის ღვთის ნორმა განხილული იქნა მოხსენებაში — „მამაკაცად და დედაკაცად შექმნა ისინი“. ისტორიის განმავლობაში სქესთა ფუნქციები დამახინჯდა. «მრავალი შეცდომით უკავშირებს მამაკაცურ თვისებებს სასტიკ მბრძანებლობას, უდრეკობას ან ეგრეთ წოდებულ კაცურ სიამაყეს, — თქვა მომხსენებელმა. — გარკვეულ კულტურებში ძალიან უჩვეულო და სამარცხვინოც კი იქნებოდა ტირილი როგორც სახალხოდ, ასევე განმარტოებით. თუმცა იოანეს 11:35-ში ნათქვამია, რომ „აცრემლდა იესო“, როდესაც ლაზარეს სამარხთან შეგროვილ ხალხს შორის იდგა». რა შეიძლება ითქვას ქალებზე? ქალურ თვისებებს ხშირად ფიზიკურ მიმზიდველობას მიაწერენ. მაგრამ მომხსენებელმა იკითხა: „თუ ქალი არის ლამაზი, მაგრამ მოკამათე, სარკასტული ან ქედმაღალი და უგუნური, განა შეიძლება, რომ ის, სიტყვის ნამდვილი მნიშვნელობით, იყოს ლამაზი, ნამდვილად ქალური თვისებების მქონე?“ (შეადარე იგავნი 11:22; 31:26). საუბარში, საქციელსა და გარეგნობაში ქრისტიანი მამაკაცი და ქალი ცდილობენ, ბიბლიურ ნორმებს მიყვნენ. მომხსენებელმა თქვა: „მამაკაცი, რომელიც სულის ნაყოფებს ავლენს, ადვილია, რომ დააფასო და ქალი, რომელიც ამგვარად მოქმედებს, ადვილია, რომ გიყვარდეს“ (გალატელთა 5:22, 23).
შემდეგ მოჰყვა მოხსენებების სერია — „მშვიდობის ღმერთი ზრუნავს შენზე“. მრავალ ქრისტიანს ფინანსური საზრუნავი აქვს. მაგრამ იეჰოვა გვპირდება: „არ მიგატოვებ და არ დაგაგდებ“ (ებრაელთა 13:5). ეკონომიკური სიძნელეების მიუხედავად ზოგი ნდობას ავლენს ამ დაპირების მიმართ დამხმარე პიონერულ ან სრული დროით პიონერულ მსახურებაში ჩაბმით. სხვები, ვისაც ამჟამად პიონერად მსახურება არ შეუძლიათ, სამეფოს ინტერესებს პირველ ადგილზე აყენებენ იმით, რომ დასამოწმებლად ყველა ხელსაყრელ შესაძლებლობას იყენებენ (მათე 6:33). ყველა ასეთი მცდელობა შექების ღირსია! იეჰოვას ორგანიზაცია უზრუნველგვყოფს მრავალრიცხოვანი პუბლიკაციებით, რათა დაგვეხმაროს მსახურებასა და პრობლემების გამკლავებაში. თუ მადლიერებას ვავლენთ იეჰოვას მიერ სულიერი მომარაგებისთვის, ამ ეკონომიკურად მშფოთვარე დროში ის მშვიდობით გვაკურთხებს (ფსალმუნი 28:11).
დღის ბოლო მოხსენების — „მიჰყევი ღვთიურ მშვიდობას ოჯახურ ცხოვრებაში“ — დამთავრებისას კონგრესის დელეგატები აღაფრთოვანა ახალი წიგნის მიღებამ, სახელწოდებით „ოჯახური ბედნიერების საიდუმლო“. „გულმოდგინედ შეისწავლეთ ეს წიგნი პირადად და ოჯახთან ერთად, — მოუწოდა მომხსენებელმა. — გულწრფელად ეცადეთ, გამოიყენოთ მასში განხილული ბიბლიაზე დაფუძნებული რჩევები და, უეჭველია, თქვენს ოჯახში მომრავლდება მშვიდობა და ბედნიერება“.
‘შეინარჩუნეთ ერთობა მშვიდობის საკვრელით’
ეფესელთა 4:3-ზე დაფუძნებული ეს თემა კონგრესის ბოლო დღისთვის სათანადო იყო. იეჰოვას მოწმეები, რომლებიც მსოფლიოს ყველა ერიდან არიან გამოყვანილი, ღვთის მიერ განისწავლებიან. ამიტომ მათ უყვართ მშვიდობა. ისინი მისდევენ იესოს მაგალითს და ცდილობენ, ‘შეინარჩუნონ სულის ერთობა მშვიდობის საკვრელით’.
მშვიდობას, რომელიც იეჰოვას ორგანიზაციაში სუფევს, ხაზი გაესვა მოხსენებების სერიაში — „ჭეშმარიტი მაცნეების ამოცნობა“. ძველ ისრაელში არსებობდნენ ცრუ წინასწარმეტყველები. მაგრამ ღვთის ჭეშმარიტმა მაცნეებმა — ისეთმა წინასწარმეტყველებმა, როგორიცაა: ესაია, ეზეკიელი და იერემია — ზუსტად იწინასწარმეტყველეს იერუსალიმის დაცემა, გადასახლების დრო და ღვთის ხალხის საბოლოო გათავისუფლება. მსგავსი სიტუაციაა დღესაც. ცრუ მაცნეები მრავლად არიან პოლიტიკისა და ცრუ რელიგიის სფეროებში. მიუხედავად ამისა, იეჰოვამ გაიჩინა მოწმეები ამ სისტემასთან დაკავშირებული თავისი განზრახვის გამოსაცხადებლად. განსაკუთრებით 1919 წლიდან, ღვთის ცნობის გამოსაცხადებლად იეჰოვას მსახურები გამოიყენებიან. რამდენად განსხვავდებიან ისინი ქრისტიანული სამყაროს ცრუ მაცნეებისგან! დაე გულმოდგინედ შევასრულოთ ჩვენი როლი ამ საქმიანობაში, ვიდრე იეჰოვა იტყოდეს, რომ საქმე შესრულებულია.
მოხსენებაში — „მოუსმინე და დაემორჩილე ღვთის სიტყვას“, ხაზი გაესვა, რომ საღვთო წერილი ხელმძღვანელობის, ნუგეშისა და იმედის უდიდესი წყაროა (ესაია 30:20, 21; რომაელთა 15:4). დღევანდელ მსოფლიოში უფრო და უფრო ნებადართული ხდება ყველაფერი. მაშასადამე, დღეს წინანდელზე მეტად გვესაჭიროება ღვთის სიტყვიდან და ორგანიზაციიდან მომდინარე რჩევების მოსმენა. იეჰოვამ იცის ჩვენი სუსტი მხარეები და თავის სიტყვაში ნათლად მიგვითითა ჩვენთვის სარგებლობის მომტანი გზა. იმის ცოდნა, რომ იეჰოვა მხარს გვიჭერს, რწმენას გვინერგავს, წინ წავიწიოთ ყველაფერში, რასაც ის ჩვენგან მოითხოვს.
ამან განწყობილება შექმნა კოსტიუმირებული დრამისთვის, რომელიც შემდეგ მოჰყვა. მისი სათაური იყო „რატომ უნდა ვცეთ პატივი თეოკრატიულ ღონისძიებებს?“ ამ წარმოდგენამ, რომელსაც საფუძვლად ედო ბიბლიური ცნობა გედეონზე, მკვეთრად გაუსვა ხაზი ბრწყინვალე გაკვეთილს — უნდა მივყვეთ ღვთის მითითებებს და არ უნდა შევცვალოთ იგი საკუთარი აზროვნებით ან არ უნდა ვეცადოთ, გვერდი ავუაროთ თეოკრატიულ რჩევას.
საჯარო მოხსენება იყო თემაზე — „საბოლოოდ ნამდვილი მშვიდობა! — რომელი წყაროდან?“ ღვთის მიერ დაპირებული მშვიდობა ბევრად აღემატება ყველაფერს, რის წარმოდგენაც ამ ქვეყნიერებას შეუძლია. „ნამდვილი მშვიდობა ნიშნავს მშვიდობას ყოველდღე, — თქვა მომხსენებელმა. — ღვთის მშვიდობა ნიშნავს ქვეყნიერებას, რომელშიც აღარ არსებობს ავადმყოფობა, ტკივილი, დარდი და სიკვდილი“. ბიბლია გვამცნობს, რომ იეჰოვა „შეწყვეტს ომებს დედამიწის კიდით-კიდემდე“ (ფსალმუნი 45:10). როგორ გააკეთებს ის ამას? ომისკენ წამქეზებლის, სატანა ეშმაკის, ჩამოცილებით (გამოცხადება 20:1–3). ეს თავმდაბლებს გზას გაუხსნის, რომ ‘დაიმკვიდრონ ქვეყნიერება და დაამდნენ დიდი მშვიდობით’ (ფსალმუნი 36:11).
„საგუშაგო კოშკიდან“ მიმდინარე კვირის სასწავლო სტატიის მოკლე მიმოხილვის შემდეგ წარმოითქვა კონგრესის ბოლო მოხსენება. ამ ამაღელვებელ მოხსენებაში, სახელწოდებით „წინ წავიწიოთ, როგორც ღვთიური მშვიდობის მაცნეებმა“, ხაზი გაესვა, რომ ჩვენი სამქადაგებლო საქმიანობა განსაკუთრებული და გადაუდებელია. ახლა არ არის მოდუნების, დაყოვნებისა თუ მცდარი აზრებისკენ მიბრუნების დრო. ჩვენ აღჭურვილები ვართ ყველაფრით, რაც გვჭირდება — ღვთის ცნობა, მისი სულიწმიდა და სიყვარულით აღსავსე მისი თეოკრატიული ორგანიზაციიდან მომდინარე მრავალი აღჭურვილობა. ამიტომ, როგორც იეჰოვას მსახურებმა, დაე განვაგრძოთ წინსვლა, როგორც ღვთიური მშვიდობის მაცნეებმა!
[ჩარჩო⁄სურათები 9 გვერდზე]
სიყვარულით აღსავსე ღონისძიება ოჯახებისთვის
ისინი, ვინც საოლქო კონგრესის — „ღვთიური მშვიდობის მაცნეები“ — მეორე დღეს დაესწრნენ, აღფრთოვანებულნი იყვნენ იმით, რომ მიიღეს ახალი პუბლიკაცია, სახელწოდებით „ოჯახური ბედნიერების საიდუმლო“. ბიბლიური ინფორმაციის შემცველი ეს წიგნი სარგებლობას მოუტანს ღვთის მოყვარულ ყველა ოჯახს.
ერთი უხუცესი კონექტიკუტიდან (აშშ) ამბობს: «თხუთმეტ ივნისს მივიღეთ წიგნი „ოჯახური ბედნიერების საიდუმლო“. თექვსმეტ ივნისს მისი ნახევარი უკვე წაკითხული მქონდა. ჩვიდმეტში ამ წიგნით პირველი ოჯახური შესწავლა მოვაწყეთ და ძლიერ გავმხნევდით! იმავე დღეს მე დავამთავრე წიგნის კითხვა. ეს შესანიშნავი პუბლიკაცია, უეჭველია, ძვირფასი აღმოჩნდება ყველასთვის, ვინც გამოიყენებს მას. გარდა ამისა, წიგნის გულწრფელი და თანამედროვე დროისთვის შესაფერისი ინფორმაცია ამტკიცებს, რომ „ერთგული და გონიერი მონა“ ‘დროულად იძლევა საზრდოს’ და ძალიან კარგად ესმის ჩვენი საჭიროებები ამ მძიმე დროში» (მათე 24:45–47).
[სურათი მე-7 გვერდზე]
ახალგაზრდასა და მოხუცს ერთნაირად სურთ გაიგონ, რას მოითხოვს ღმერთი.