ღვთის სიტყვისადმი რწმენის განმტკიცება

ბიბლია სხვა წიგნებთან შედარებით უფრო მეტს წაუკითხავს. მაგრამ, რამდენი ავლენს მისი ცნობისადმი რწმენას? ბიბლია ამბობს: „ყველაფერში როდია რწმენა“ (2 თესალონიკელთა 3:2). ნათელია, რწმენით არ ვიბადებით. ის უნდა განვავითაროთ. ისინიც კი, ვისაც გარკვეული რწმენა აქვს, ზერელედ არ უნდა მოეკიდონ მას. რწმენა შეიძლება დასუსტდეს და გაქრეს. აქედან გამომდინარე „რწმენით. . . ჯანსაღნი“ რომ დავრჩეთ, ძალისხმევაა საჭირო (ტიტე 2:2, სსგ).

იეჰოვას მოწმეთა ხელმძღვანელმა საბჭომ 1997—1998 წლების საოლქო კონგრესების სერიისთვის საფუძვლიანი მიზეზით აირჩია თემა „ღვთის სიტყვის რწმენა“. იეჰოვას მილიონობით მოწმეს და სხვებს საშუალება ჰქონდათ შეკრებილიყვნენ და განემტკიცებინათ ღვთის სიტყვისადმი რწმენა.

ღვთის სიტყვა ჭეშმარიტებაა — ჩვენი რწმენის საფუძველი

ეს იყო კონგრესის პირველი დღის თემა. ის დამსწრეთა შექებით დაიწყო. კონგრესზე დასწრება ბიბლიისადმი პატივისცემის ნიშანი იყო. თუმცა, დამაფიქრებელი კითხვები იქნა დასმული ჩვენი რწმენის სიძლიერესთან დაკავშირებით: „შეგვიძლია დავიცვათ ჩვენი რწმენა ღვთის სიტყვის ავტორიტეტად გამოყენებით? ვაფასებთ სულიერ საზრდოს იმით, რომ არასდროს არ ვთვლით ბიბლიას, მასზე დაფუძნებულ პუბლიკაციებსა და კრების შეხვედრებს უმნიშვნელო რამედ? ვიზრდებით სიყვარულში, შემეცნებასა და შორსმჭვრეტელობაში?“ მომხსენებელმა დამსწრეებს მოუწოდა, ყურადღებით მოესმინათ, როცა აღნიშნა, რომ «ეს საოლქო კონგრესი — „ღვთის სიტყვის რწმენა“ — მომზადდა საკუთარი თავის გულდასმით შემოწმების, პირადი რწმენის სიდიდისა და სიმტკიცის გამოკვლევაში დასახმარებლად».

წამყვანი მოხსენების სათაური იყო: „ვიაროთ რწმენით და არა ხილვით“ (2 კორინთელთა 5:7). „იმ ადამიანების რწმენა, რომლებიც იეჰოვას მოწმეები ხდებიან, მხოლოდ ნდობაზე არ არის დაფუძნებული, — თქვა მომხსენებელმა. მართლაცდა! ნამდვილი რწმენა ბრმა არ არის! ის სინამდვილეზეა დაფუძნებული. ებრაელთა 11:1-ში ვკითხულობთ: „ხოლო რწმენა არის მტკიცე დარწმუნება იმაში, რასაც ვესავთ, დადასტურება იმისა, რასაც ვერ ვხედავთ“. „თუ ნამდვილად ვაპირებთ რწმენით სიარულს, კარგი საფუძვლის მქონე რწმენა გვესაჭიროება“, — აღნიშნა მომხსენებელმა. რადგანაც რწმენით დავდივართ და არა ხილვით, არ ვსაჭიროებთ დაწვრილებით ვიცოდეთ ის, თუ როდის და რანაირად შეასრულებს იეჰოვა თავის განზრახვას. რაც უკვე ვიცით მის შესახებ, აბსოლუტურად გვარწმუნებს, რომ ის შეძლებს დაპირებების სიყვარულითა და სამართლიანად შესრულებას.

მოხსენებამ, „ქრისტიანი ახალგაზრდები — კრების მნიშვნელოვანი ნაწილი“, ახალგაზრდებს შეახსენა, თუ რამდენად ძვირფასნი არიან იეჰოვასთვის. ისინი წაახალისეს სულიერად გაზრდილიყვნენ, მიზნად დაესახათ ბიბლიის წაკითხვა და მიძღვნისა და მონათვლის მოთხოვნებს შესაბამებოდნენ. დამატებითი განათლების მიღება პირადი გადასაწყვეტი საკითხია, რომელიც მშობლებთან უნდა იქნეს განხილული, მაგრამ ის თუ უკვე წამოწყებულია, მიზანი ყოველთვის იეჰოვასადმი ეფექტური მსახურება უნდა იყოს. ქვეყნიური განათლება შეიძლება სასარგებლოდ მოგვემსახუროს რწმენასთან დაკავშირებული ‘უმჯობესის გამოცდისას’ (ფილიპელთა 1:9, 10).

შემდეგი მოხსენებათა სერია, რომელიც სამ მოხსენებას შეიცავს თემით: „ვის ნორმებს ექვემდებარები?“, ღვთის სიტყვისადმი რწმენით აღგვძრავს, მტკიცედ დავიცვათ ბიბლიური ნორმები. ქრისტიანები ემორჩილებიან იეჰოვას კანონებს და პრინციპებს. მაგალითად, საღვთო წერილი გვირჩევს, არ ვიყოთ მგმობელნი (ეფესელთა 4:31, 32). მომხსენებელმა იკითხა: „ხომ არ უყვირიხარ მეუღლეს ან ბავშვებს გაბრაზებულ თუ გაღიზიანებულ მდგომარეობაში?“ რა თქმა უნდა, ეს არაქრისტიანულია. ღმერთს აგრეთვე ჩვენს გარეგნობასთან დაკავშირებითაც აქვს პრინციპები. ქრისტიანები „წესიერი სამოსლით, მორცხვობით“ უნდა იმოსებოდნენ (1 ტიმოთე 2:9, 10). სიტყვა ‘მორცხვობა’ პირად ღირსებას, კარგ სახელს, გონიერებასა და ზომიერებას ნიშნავს. ჩვენ აგრეთვე სხვების მიმართ სიყვარული უნდა აღგვძრავდეს, ხოლო ბიბლიური პრინციპები და სათანადოდ მოქმედების გრძნობა გვხელმძღვანელობდეს.

მომდევნო ორი მოხსენება ებრაელების 3:7–15-სა და 4:1–16-ის თითოეული მუხლის განხილვას შეიცავდა. ბიბლიის ეს ნაწილები გვაფრთხილებს ‘ცოდვის საცდურით გულის გაქვავების’ საშიშროების შესახებ (ებრაელთა 3:13). როგორ შეგვიძლია ცოდვის წინააღმდეგ ბრძოლაში წარმატებას მივაღწიოთ? იეჰოვა თავისი სიტყვის მეშვეობით გვეხმარება. მართლაცდა „ღვთის სიტყვა არის ცოცხალი, მოქმედი და. . . სჯის გულის აზრებსა და ზრახვებს“ (ებრაელთა 4:12).

კონგრესის პირველი დღის პროგრამის ბოლო მოხსენება იყო „წიგნი ყველასთვის“. მან განსაკუთრებით აღნიშნა ბიბლიის უტყუარობის, სიზუსტისა და პრაქტიკულობის მნიშვნელობა. წარმოიდგინეთ, რა ამაღელვებელი იყო, როცა მომხსენებელმა გამოაცხადა ახალი 32 გვერდიანი ბროშურის გამოცემა, სათაურით: „წიგნი ყველასთვის“! ეს ახალი პუბლიკაცია განსაკუთრებულად მათთვის არის გამოცემული, ვისაც მართალია, უმაღლესი განათლება აქვს, მაგრამ მცირე რამ იცის ბიბლიის შესახებ. მოხსენება ასეთი სიტყვებით დასრულდა: „ადამიანებმა უნდა გამოიკვლიონ ბიბლია. ჩვენ დარწმუნებული ვართ: თუ ადამიანები თვითონ გამოიკვლევენ, მიხვდებიან, რომ ეს უნიკალური წიგნი, ბიბლია, მართლაც არის წიგნი ყველასთვის!“

მიბაძე ჩვენი „რწმენის. . . სრულმყოფელს“

კონგრესის მეორე დღის თემამ დამსწრეთა ყურადღება იესო ქრისტესკენ, ჩვენი ‘რწმენის სრულმყოფელისკენ’, მიმართა. ჩვენ ‘მის კვალს უნდა მივყვეთ’ (ებრაელთა 12:2; 1 პეტრე 2:21). ქრისტიანულ სამყაროში ბევრი ამბობს: „იწამე იესო ქრისტე და გადარჩები“. მაგრამ მხოლოდ რწმენა შველის საქმეს? ბიბლია აცხადებს, რომ ‘რწმენა საქმეთა გარეშე მკვდარია’ (იაკობი 2:26). ამიტომ, იესოს მიმართ რწმენის გარდა, უნდა გავაკეთოთ ის, რასაც ის აკეთებდა, ეს კი განსაკუთრებით ღვთის სამეფოს შესახებ კეთილი ცნობის ქადაგებას ეხება.

დილის პროგრამამ ყურადღება გაამახვილა სამქადაგებლო საქმეზე. პავლეს მსგავსად, მონდომებულნი უნდა ვიყოთ, განვაცხადოთ კეთილი ცნობა გადარჩენის შესახებ (რომაელთა 1:14–16). იესო ხალხს ყველგან უქადაგებდა. თუმცა კარდაკარ მსახურებას შედეგები მოაქვს, სულ უფრო და უფრო მეტი ადამიანი არა გვხვდება სახლში (საქმეები 20:20). ბევრი სკოლაში, სამუშაოზე საყიდლებზე ან მოგზაურობაშია. ამიტომ აგრეთვე უნდა ვიქადაგოთ საზოგადოებრივ ადგილებში და ყველგან, სადაც კი ხალხი არის.

მოხსენებამ, „ფესვი გაიდგით და განმტკიცდით ჭეშმარიტებაში“, შეგვახსენა ახალმონათლულთა უდიდესი რიცხვის შესახებ — ყოველდღიურად საშუალოდ 1 000-ზე მეტი! სასიცოცხლოდ მნიშვნელოვანია, რომ ამ ახლებმა ფესვი გაიდგან და განმტკიცდნენ ჭეშმარიტებაში (კოლასელთა 2:6, 7). მომხსენებელმა განმარტა, რომ ფესვები წყალსა და საკვებ ნივთიერებებს იწოვს და მცენარის საყრდენს წარმოადგენს. მსგავსადვე, კარგი შესწავლის ჩვეულება და ჯანსაღი ურთიერთობა, ახალ მოწაფეებს განამტკიცებს ჭეშმარიტებაში.

ეს რჩევა განსაკუთრებით დროული იყო მონათვლის კანდიდატებისთვის. დიახ, კონგრესის მეორე დღეს უამრავი ახალი მოსწავლე იესოს მაგალითს მიყვა და მოინათლა. მოხსენებამ, „ღვთის სიტყვის რწმენა აღძრავს მოსანათლად“, კანდიდატებს შეახსენა, რომ წყალში მთლიანად ჩაძირვა სათანადოდ ასიმბოლოებს წარსული ცხოვრებისთვის მათ სიკვდილს. წყლიდან ამოსვლა კი — ღვთის ნების შესრულებისთვის გაცოცხლებას.

„მედგრად იბრძოლეთ რწმენისთვის“ — ეს მოხსენება დაფუძნებული იყო ბიბლიის წიგნზე „იუდა“. წაგვახალისეს, რომ წინააღმდეგობის გაწევით დავიცვათ რწმენა მავნე ზეგავლენისგან: უზნეობის, მეამბოხეობისა და განდგომილებისგან. შემდეგ მოხსენებაში, „იზრუნე ოჯახის წევრებზე“, ყურადღება იყო გამახვილებული მშობლებზე, განსაკუთრებით კი მამებზე. სულიერ, ფიზიკურ და ემოციურ საჭიროებებზე ზრუნვა ბიბლიური მოვალეობაა (1 ტიმოთე 5:8). ეს დროს, ურთიერთობასა და სიახლოვეს მოითხოვს. რასაკვირველია, იეჰოვა ღმერთს სიამოვნებს, რომ ქრისტიანი მშობლები ყველანაირად ცდილობენ, შვილები ჭეშმარიტებაში აღზარდონ.

მოხსენებათა შემდეგმა სერიამ, „წავიდეთ იეჰოვას სახლში“, ქრისტიანული კრებისადმი მადლიერების გრძნობა აღძრა. ისინი ქვეყნიერების საზრუნავისგან გვათავისუფლებს. კრებებზე ერთმანეთის გამხნევების და თანამორწმუნეების მიმართ სიყვარულის გამოვლენის საშუალება გვაქვს (ებრაელთა 10:24, 25). კრებები აგრეთვე გვეხმარება მასწავლებლობის უნარის გაუმჯობესებაში და ღვთის განზრახვის გაგების გაღრმავებაში (იგავნი 27:17). ნურასდროს ჩამოვშორდებით კრებას; გვახსოვდეს იესოს სიტყვები: „სადაც ორი ან სამია შეკრებილი ჩემი სახელით, მეც იქა ვარ მათ შორის“ (მათე 18:20).

ამ დღის პროგრამის ბოლო მოხსენება იყო: „თქვენი რწმენის სიძლიერე ახლა იცდება“. გამოუცდელი რწმენის ნამდვილი ფასი და სიღრმე შეუცნობელია. ეს საბანკო ჩეკის მსგავსია, რომელიც ჯერ განაღდებული არ არის. განა ნამდვილ ფასეულობას ის არ წარმოადგენს, რისი აღებაც მისი მეშვეობით შეიძლება? ასევე, ჩვენი რწმენა უნდა გამოიცადოს, რათა დაამტკიცოს, რომ საფუძველი და ნამდვილი ღირსება აქვს (1 პეტრე 1:6, 7). მომხსენებელმა თქვა: „ზოგჯერ სასულიერო პირები და განდგომილები ისე ატყუებენ საინფორმაციო საშუალებებსა და მთავრობას, რომ ისინი ჩვენ ცრუ იარლიყებს გვაკერებენ და ჩვენს ქრისტიანულ მრწამსსა და ცხოვრების სტილს დამახინჯებულად აშუქებენ. . . დავრთავთ თუ არა სატანისგან დაბრმავებულებს იმის ნებას, რომ დაგვაშინონ ან ენთუზიაზმი დაგვაკარგვინონ და კეთილი ცნობის ქადაგება შეგვრცხვეს? ნებას დავრთავთ თუ არა ჭეშმარიტების შესახებ სიცრუეს, შეხვედრებზე ჩვენს რეგულარულ დასწრებაზე ან სამქადაგებლო საქმიანობაზე იმოქმედოს? თუ მტკიცედ, მხნედ ვიდგებით და უფრო მეტი გადაწყვეტილებით ვიქნებით სავსენი, ვიდრე ოდესმე, რომ განვაგრძოთ იეჰოვასა და მისი სამეფოს შესახებ ჭეშმარიტების გაცხადება“.

რწმენით იცოცხლე

კონგრესის მესამე დღის თემას პავლეს შემდეგი სიტყვები ჰქონდა საფუძვლად დადებული: „ცხადია, რომ რჯულით ვერავინ გამართლდება ღვთის წინაშე, ვინაიდან მართალი რწმენით იცოცხლებს“ (გალატელთა 3:11). მოხსენებათა სერია, „იოველის წინასწარმეტყველება ჩვენი დღეების შესახებ“, დილის პროგრამის ერთ-ერთი განსაკუთრებით აღსანიშნავი მოხსენება იყო. იოველის წიგნი ჩვენს დროზე მიუთითებს და ამბობს, რომ დრო აღარ იცდის: „ვაი ჩვენს დღეს! რადგან ახლოვდება უფლის დღე და დაქცევასავით მოდის უზენაესისგან“ (იოველი 1:15). შეუბრალებელი კალიების მსგავსად, სულით ცხებული ქრისტიანები არაფერს რთავენ ნებას სამეფოს ცნობის გაცხადებაში შეუშალოს ხელი ამ ბოლო დღეებში.

იოველის წიგნი აგრეთვე იმედს გვაძლევს: „ყველა, ვინც კი ახსენებს. . . უფლის სახელს, გადარჩება“ (იოველი 3:5). ეს უფრო მეტს ნიშნავს, ვიდრე მხოლოდ იეჰოვას სახელის ხსენებას. საჭიროა გულწრფელი მონანიება და ეს ჩვენ მიერ ბოროტების მიტოვებას შეიცავს (იოველი 2:12, 13). დაყოვნების დრო არ არის, რადგანაც იეჰოვა მალე გაასამართლებს ერებს, როგორც ეს მოაბიანებს, ყამონიანებსა და სეყირის მთის მცხოვრებლებს გაუკეთა იუდას მეფე იოშაფატის დროს (მეორე ნეშტთა 20:1–30; იოველი 4:2, 12).

„გამოავლინე რწმენა იეჰოვას მოლოდინით“ — ყველა გაამხნევა ამ მოხსენებამ. ახლა ამ ბოლო დღეების მიწურულს ჩვენ შეგვიძლია გავიხსენოთ იეჰოვას შესრულებული უამრავი დაპირება და ძალიან გვაინტერესებს ის, რაც კიდევ უნდა შესრულდეს. იეჰოვას ხალხი კვლავ უნდა ითმენდეს და ახსოვდეს, რომ ღვთის ყველა დაპირება შესრულდება (ტიტე 2:13; 2 პეტრე 3:9, 10).

დილის პროგრამა დამთავრდა დრამით, „სუფთად დაიცავით თვალი“. ამ რეალისტურმა ინსცენირებამ წაგვახალისა, შევამოწმოთ ჩვენი დამოკიდებულება მატერიალურ საკითხებთან დაკავშირებით. არა აქვს მნიშვნელობა სად ვცხოვრობთ, თუ გვსურს, რომ ცხოვრებაში არაფერი გვაწუხებდეს, უნდა მივყვეთ იესოს რჩევას, რომ დავიცვათ ჩვენი თვალი სუფთად, ღვთის სამეფოზე მთელი ყურადღების მიპყრობით (მათე 6:22).

საჯარო მოხსენება სათაურით, „რწმენა და შენი მომავალი“, ინტერესის აღმძვრელი იყო. ამან დაამტკიცა ადამიანთა ლიდერების უუნარობა მსოფლიო პრობლემების გადასაჭრელად (იერემია 10:23). კაცობრიობის ისტორია მეორდება დიდი და უფრო საზიანო მასშტაბით. რას ფიქრობენ იეჰოვას მოწმეები მომავლის შესახებ? ჩვენ გვწამს, რომ ერთგულ ადამიანებს ბრწყინვალე მომავალი ექნებათ ღვთის სამეფოს ქვეშევრდომობაში (მათე 5:5). ღმერთი შეასრულებს თავის დანაპირებს მათთვის, ვისაც მისი სიტყვის სჯერა, რომელიც მოგვიწოდებს: „ეძებეთ უფალი, როცა შეიძლება მისი პოვნა; მოუხმეთ მას, როცა ახლოს არის იგი“ (ესაია 55:6).

ჩვენი დღეების მხედველობაში მიღებით იესომ მნიშვნელოვანი საკითხი წამოჭრა. მან იკითხა: „როდესაც კაცის ძე მოვა, ჰპოვებს ნეტა დედამიწაზე რწმენას?“ (ლუკა 18:8). ბოლო მოხსენებამ მოკლედ განიხილა კონგრესის პროგრამა და აჩვენა, თუ რა ნათლად ცხადყო კონგრესმა, რომ ღვთის სიტყვისადმი რწმენა არსებობს, მიუხედავად იმისა, რომ ურწმუნო და უღვთო ქვეყნიერებაში ვცხოვრობთ.

მიუხედავად ამისა, თითოეულ ჩვენგანს შეუძლია ჰკითხოს საკუთარ თავს: „ვარ მათ შორის, ვისაც ღვთისა და მისი სიტყვისადმი ურყევი რწმენა აქვს?“ საოლქო კონგრესი სახელწოდებით, „ღვთის სიტყვის რწმენა“, უნდა დაგვეხმაროს ამ კითხვაზე დადებითად ვუპასუხოთ. და რამდენად მადლიერნი ვართ იეჰოვასა და მის ინსპირირებულ წიგნ ბიბლიისადმი ჩვენი რწმენის გაძლიერებისთვის!

[სურათები 24 გვერდზე]

ბევრი მოხალისე სიხარულით მუშაობდა ათასებისთვის საცხოვრებლების მოსამზადებლად.

[სურათები 25 გვერდზე]

მთელ დედამიწაზე ამის მსგავსი დიდი სტადიონები იქნა გამოყენებული.

[სურათი 25 გვერდზე]

ხელმძღვანელი საბჭოს წევრი, ლ. ა. სუინგლი, აცხადებს ახალი ბროშურის გამოცემას.

[სურათი 26 გვერდზე]

წყალში მონათვლით ბევრმა დაასიმბოლოვა იეჰოვასადმი თავის მიძღვნა.

[სურათები 27 გვერდზე]

კონგრესზე დამსწრეები სიხარულით მღეროდნენ სამეფოს სიმღერებს. ჩანართი: დრამა „სუფთად დაიცავი თვალი“.