1—3. ა) რატომ არის იესო ნავეს ძე ჩვენთვის კარგი მაგალითი? ბ) რა უნდა გვახსოვდეს გადაწყვეტილებების მიღების დროს?

„არჩევანი“ — ეს მართლაც ძლიერი სიტყვაა. არჩევანი ადამიანს საშუალებას აძლევს, წარმართოს თავისი ცხოვრება ისე, როგორც სურს. წარმოიდგინეთ, რომ კაცი მიდის გზაზე და უცებ გზის გასაყარზე აღმოჩნდება. რომელ გზას აირჩევს? თუ მან იცის, სად უნდა მისვლა, მაშინ ერთი გზა მიიყვანს იქამდე, ხოლო მეორე საერთოდ დააშორებს მას.

² ბიბლიაში მრავლად არის მოცემული მათი მაგალითები, რომლებიც მსგავს სიტუაციაში იყვნენ. მაგალითად, კაენს უნდა გადაეწყვიტა, შეეკავებინა რისხვისგან თავი, თუ გადმოენთხია ის (დაბ. 4:6, 7). იესო ნავეს ძეს არჩევანი უნდა გაეკეთებინა ღვთის მსახურებასა და ცრუ ღმერთების მსახურებას შორის (იეს. 24:15). მას უნდოდა, იეჰოვასთან ჰქონოდა ახლო ურთიერთობა და ამიტომ აირჩია ისეთი გზა, რომელიც ამაში დაეხმარებოდა. კაენს ასეთი მიზანი არ ჰქონია და ისეთი გზა აირჩია, რომელმაც ის ჩამოაშორა ღმერთს.

³ დროდადრო ჩვენც აღმოვჩნდებით ხოლმე „გზის გასაყარზე“. თუ ეს მოხდება, ყოველთვის გახსოვდეთ, „სად გინდათ მისვლა“ ანუ მიზანი — განადიდოთ იეჰოვა ყველაფრით, რასაც აკეთებთ და თავიდან აირიდოთ ნებისმიერი რამ, რაც ჩამოგაშორებდათ მას (წაიკითხეთ ებრაელების 3:12). ამ და შემდეგ სტატიაში ვისაუბრებთ 7 მხარეზე, რომლებსაც არ უნდა დავრთოთ ნება, ჩამოგვაშოროს იეჰოვას.

სამსახური და კარიერა

4. რატომ არის მნიშვნელოვანი, გვქონდეს სამუშაო?

⁴ ქრისტიანები ვალდებული არიან, რომ იზრუნონ საკუთარ თავსა და ოჯახზე. ბიბლიაში წერია, რომ ვინც ოჯახის წევრებზე არ ზრუნავს, ურწმუნოზე უარესია (2 თეს. 3:10; 1 ტიმ. 5:8). მართლაც, სამუშაო მნიშვნელოვანია, მაგრამ თუ ფრთხილად არ იქნებით, შეიძლება სამსახურმა ჩამოგაშოროთ იეჰოვას.

5. რა უნდა გავითვალისწინოთ, როცა სამუშაოს გვთავაზობენ?

⁵ წარმოიდგინეთ, რომ თქვენც ეძებთ სამუშაოს. თუ ისეთ ქვეყანაში ცხოვრობთ, სადაც სამსახურის შოვნა არც თუ ისე ადვილია, შეიძლება ცდუნდეთ და დათანხმდეთ პირველივე შემოთავაზებას. როგორ მოიქცევით, თუ სამუშაო არ შეესაბამება ბიბლიურ პრინციპებს? ან განრიგისა თუ მივლინებების გამო ხელი შეგეშლებათ ქრისტიანულ საქმიანობაში ან ოჯახისგან შორს მოგიწევთ ყოფნა? მაინც უნდა დათანხმდეთ ასეთ სამსახურზე იმ აზრით, რომ უმუშევრობას ნებისმიერი სამსახური სჯობია? გახსოვდეთ, რომ არასწორი გზის არჩევამ შეიძლება ჩამოგაშოროთ იეჰოვას (ებრ. 2:1). როგორ შეგიძლიათ გონივრული გადაწყვეტილებების მიღება, როცა სამუშაოს ეძებთ ან გსურთ მისი შეცვლა?

6, 7. ა) რა მიზნები შეიძლება ჰქონდეს ადამიანს სამუშაოსთან დაკავშირებით? ბ) რა მიზანი დაგაახლოებთ იეჰოვასთან და რატომ?

⁶ როგორც ზემოთ იყო აღნიშნული, ყოველთვის გახსოვდეთ, თუ „სად მიდიხართ“. ჰკითხეთ საკუთარ თავს: რატომ მინდა, მქონდეს სამსახური? თუ სამსახური იმიტომ გინდათ, რომ იზრუნოთ საკუთარ თავსა და ოჯახზე, რათა ემსახუროთ იეჰოვას, ის აკურთხებს თქვენს ძალისხმევას (მათ. 6:33). ღმერთმა იცის, როგორ დაგეხმაროთ, როცა კარგავთ სამუშაოს ან მოულოდნელად იცვლება ეკონომიკური მდგომარეობა (ეს. 59:1). „იცის იეჰოვამ, როგორ დაიხსნას განსაცდელისგან ღვთის ერთგულები“ (2 პეტ. 2:9).

⁷ მეორე მხრივ, შეიძლება თქვენი მიზანი გამდიდრება იყოს. შესაძლოა, მიაღწიოთ კიდეც ამ მიზანს. მაგრამ არ დაგავიწყდეთ, რომ ასეთი „წარმატება“ შეიძლება ძვირად დაგიჯდეთ (წაიკითხეთ 1 ტიმოთეს 6:9, 10). თუ გამდიდრება და კარიერა იქნება თქვენთვის ყველაზე მნიშვნელოვანი, ეს მხოლოდ ჩამოგაშორებთ იეჰოვას.

8, 9. რა უნდა გაითვალისწინონ მშობლებმა სამუშაოსთან დაკავშირებით?

⁸ თუ მშობელი ხართ, იფიქრეთ, რა გავლენას მოახდენს თქვენი მაგალითი თქვენს შვილებზე. რას ხედავენ ისინი, რა არის თქვენთვის ყველაზე მნიშვნელოვანი — სამუშაო თუ თქვენი მეგობრობა იეჰოვასთან? თუ შვილები ხედავენ, რომ მდგომარეობას ან სიმდიდრეს უმთავრესი ადგილი უკავია თქვენს ცხოვრებაში, ხომ არ მიჰბაძავენ ისინი თქვენს არასწორ არჩევანს? ხომ არ დაკარგავენ შვილები თქვენდამი, როგორც მშობლებისადმი, პატივისცემას? ერთი მოზარდი ქრისტიანი და ჰყვება: „რამდენადაც მახსოვს, მამაჩემი სულ დაკავებული იყო სამუშაოთი. თავიდან ისე ჩანდა, რომ ის ამდენს იმიტომ შრომობდა, რათა ოჯახს ყველაფერი საუკეთესო ჰქონოდა. მას სურდა, ჩვენზე კარგად ეზრუნა. მაგრამ ბოლო წლებში რაღაც შეიცვალა. ის გამუდმებით მუშაობს და ყიდულობს ისეთ ძვირადღირებულ ნივთებს, რომლებიც არ გვჭირდება. შედეგად, ჩვენი ოჯახი ცნობილია, როგორც ფულიანი ოჯახი და არა ოჯახი, რომელიც სხვებს სულიერი მიზნებისკენ მოუწოდებს. უფრო ბედნიერი ვიქნებოდი, თუ მამა მატერიალურზე მეტად სულიერ დახმარებას აღმოგვიჩენდა“.

⁹ მშობლებო, ზედმეტად ნუ იზრუნებთ თქვენს კარიერაზე, რათა არ ჩამოშორდეთ იეჰოვას. თქვენი მაგალითით აჩვენეთ შვილებს, რომ ყველაზე დიდი სიმდიდრე არის სულიერი და არა მატერიალური (მათ. 5:3).

10. რაზე უნდა დაფიქრდეს ახალგაზრდა, როცა კარიერას ირჩევს?

¹⁰ თუ ახალგაზრდა ხართ და კარიერაზე ფიქრობთ, როგორ შეგიძლიათ სწორ გზას დაადგეთ? როგორც ზემოთ აღვნიშნეთ, უნდა იცოდეთ, საითკენ მიდის თქვენი ცხოვრება. მოგცემთ განათლება ან სამუშაო იმის საშუალებას, რომ სამეფოს ინტერესები პირველ ადგილზე დააყენოთ, თუ პირიქით, ჩამოგაშორებთ იეჰოვას? (2 ტიმ. 4:10). გინდათ, მიჰბაძოთ იმ ადამიანებს, რომელთა ბედნიერება დამოკიდებულია საბანკო ანგარიშსა თუ აქციებზე? თუ დავითის მსგავსად ღმერთს მიენდობით? დავითი წერდა: „ახალგაზრდაც ვიყავი და მოვხუცდი კიდეც, მაგრამ არ მინახავს მართალი კაცი მიტოვებული, არც მისი შთამომავლობა — პურს მონატრებული“ (ფსალმ. 37:25). არ დაგავიწყდეთ, რომ ერთი გზა ჩამოგაშორებთ იეჰოვას, მეორე კი საუკეთესო ცხოვრებისკენ წაგიძღვებათ (წაიკითხეთ იგავების 10:22; მალაქიას 3:10). რომელ გზას აირჩევთ თქვენ?a

დასვენება და გართობა

11. რას ამბობს ბიბლია დასვენებასა და გართობაზე, მაგრამ რა არ უნდა დაგვავიწყდეს?

¹¹ ბიბლია არ არის გართობის წინააღმდეგი და არ ამბობს, რომ დასვენება და გართობა დროის ფუჭი ხარჯვაა. „ფიზიკური ვარჯიში მეტ-ნაკლებად სასარგებლოა“, — სწერდა პავლე ტიმოთეს (1 ტიმ. 4:8). ბიბლია მოგვიწოდებს, რომ დასვენებას საკმარისი დრო დავუთმოთ. მასში ვკითხულობთ, რომ არის „სიცილის დრო“ და „ცეკვა-თამაშის დრო“ (ეკლ. 3:4; 4:6). მაგრამ თუ წინდახედულობას არ გამოიჩენთ, დასვენებამ და გართობამ შეიძლება ჩამოგაშოროთ იეჰოვას. ეს რომ არ მოხდეს, ყურადღება უნდა მივაქციოთ ორ რამეს — რა სახის გართობას ვირჩევთ და რამდენ დროს ვუთმობთ მას.

12. რაზე უნდა დაფიქრდეთ გართობისა და დასვენების არჩევისას?

¹² უპირველესად, უნდა დაფიქრდეთ, თუ რა სახის გართობას ირჩევთ. დარწმუნებული იყავით, რომ შეძლებთ ჯანსაღად დაისვენოთ და გაერთოთ. თუმცა უნდა აღინიშნოს, რომ ქვეყნიერებაში უმეტესად ისეთ გართობას გვთავაზობენ, რომელიც განადიდებს იმას, რაც სძულს იეჰოვას, მაგალითად: ძალადობას, სპირიტიზმსა და უკანონო სქესობრივ კავშირს. ამიტომ ყურადღება მიაქციეთ, რა სახის გართობასა და დასვენებას ირჩევთ. როგორ მოქმედებს ის თქვენზე? იწვევს ის თქვენში ძალადობის, მეტოქეობისა და ნაციონალიზმის სულს? (იგავ. 3:31). ხომ არ ზარალდებით ფინანსურად? სხვებს ხომ არ აბრკოლებთ? (რომ. 14:21). ვისთან გაქვთ ურთიერთობა დასვენებისა და გართობის დროს? (იგავ. 13:20). აღგძრავთ ის ცუდის კეთებისკენ? (იაკ. 1:14, 15).

13, 14. რატომ უნდა დაფიქრდეთ, თუ რამდენ დროს უთმობთ დასვენებასა და გართობას?

¹³ დაფიქრდით აგრეთვე, თუ რამდენ დროს უთმობთ დასვენებასა და გართობას. ჰკითხეთ საკუთარ თავს: ხომ არ ვუთმობ ძალიან ბევრ დროს მათ და ცოტა დრო მრჩება სულიერი საქმეებისთვის? თუ ბევრ დროს უთმობთ დასვენებასა და გართობას, დაინახავთ, რომ ის არ იქნება თქვენთვის გამომაცოცხლებელი. ფაქტობრივად, ვინც ზომიერად ერთობა, უფრო კმაყოფილი და ნასიამოვნები რჩება, რადგან მათ იციან, რომ შეასრულეს ყველაზე მნიშვნელოვანი საქმეები. ასეთ ადამიანებს დასვენებისა და გართობის დროს სინდისი არ ქენჯნით (წაიკითხეთ ფილიპელების 1:10, 11 ).

¹⁴ დასვენებისა და გართობისთვის ბევრი დროის დათმობა, შესაძლოა, სასიამოვნო ჩანდეს, მაგრამ ამან შეიძლება ჩამოგაშოროთ იეჰოვას. ერთი 20 წლის და კიმი გვიზიარებს: „არც ერთ მეგობრულ შეხვედრას არ ვუშვებდი ხელიდან. ყოველთვის რაღაც ხდებოდა პარასკევს, შაბათსა და კვირას. თუმცა ახლა მესმის, რომ არის გაცილებით მნიშვნელოვანი საქმეები, რაც უნდა ვაკეთოთ. მე პიონერი ვარ და 6 საათზე ვდგები, რათა მსახურებაში წავიდე. ამიტომ არ შემიძლია ღამის პირველ ან ორ საათამდე ვიყო მეგობრულ შეხვედრებზე. ვიცი, რომ ასეთი შეხვედრები სულაც არ არის ცუდი, მაგრამ მათ ძალიან დიდი დრო მიაქვს. ყველაფერს თავისი ადგილი უნდა ჰქონდეს“.

15. როგორ შეუძლიათ მშობლებს, დაეხმარონ შვილებს სასიამოვნო დასვენებისა და გართობის არჩევაში?

¹⁵ მშობლები პასუხისმგებლები არიან, იზრუნონ როგორც საკუთარ, ისე შვილების მატერიალურ, სულიერ და ემოციურ მოთხოვნილებებზე. მათ აგრეთვე უნდა იზრუნონ შვილების გართობასა და დასვენებაზე. თუ მშობელი ხართ, ნუ წაართმევთ ბავშვებს სილაღეს და ნუ მიიჩნევთ, რომ ყველანაირი სახის გართობა ცუდია. ამავე დროს, ფრთხილად იყავით, გართობამ არასასურველი გავლენა არ მოახდინოს ბავშვებზე (1 კორ. 5:6). თუ სათანადოდ შეარჩევთ დასვენებასა და გართობას, დარწმუნებული იყავით, რომ ის ნამდვილად გამომაცოცხლებელი იქნება თქვენი ოჯახისთვის.b ასეთი სახით თქვენ და თქვენი შვილები აირჩევთ გზას, რომელიც დაგაახლოებთ იეჰოვასთან.

ოჯახი

16, 17. რაზე წუხს ბევრი მშობელი და საიდან ვიცით, რომ იეჰოვას ესმის მათი ტკივილი?

¹⁶ მშობლებსა და შვილებს შორის მჭიდრო ურთიერთობა იეჰოვამ იმის აღსაწერად გამოიყენა, თუ რაოდენ ძლიერ უყვარს თავისი ხალხი (ეს. 49:15). ცხადია, ძალიან ვწუხვართ, როცა ოჯახის საყვარელი წევრი ტოვებს იეჰოვას. „განადგურებული ვიყავი, — თქვა ერთმა დამ, ვისი ქალიშვილიც გაირიცხა. — მოსვენებას არ მაძლევდა კითხვა, თუ რატომ მიატოვა მან იეჰოვა. თავს დამნაშავედ ვგრძნობდი“.

¹⁷ იეჰოვას ესმის თქვენი ტკივილი. მას „გული ეტკინა“, როცა მიწიერი ოჯახის პირველი წევრი და მოგვიანებით წარღვნამდე მცხოვრებ ადამიანთა უმრავლესობა ეურჩნენ (დაბ. 6:5, 6). ადამიანისთვის, რომელსაც არასდროს განუცდია მსგავსი დანაკარგი, რთულია იმის წარმოდგენა, თუ რამდენად გამანადგურებელია ეს. მიუხედავად ამისა, არაგონივრული იქნებოდა, თუ ოჯახის წევრის არასწორი საქციელი ჩამოგვაშორებდა იეჰოვას. მაშ, როგორ შეგვიძლია გავუმკლავდეთ იმ დიდ ტკივილს, როცა ოჯახის წევრი ტოვებს იეჰოვას?

18. რატომ არ უნდა დაიდანაშაულონ მშობლებმა თავი, თუ შვილი ტოვებს იეჰოვას?

¹⁸ ნუ დაიდანაშაულებთ თავს იმის გამო, რაც მოხდა. იეჰოვამ თითოეულ ადამიანს მისცა არჩევნის საშუალება და ოჯახის თითოეულმა მიძღვნილმა და მონათლულმა წევრმა „თავისი სატარებელი“ უნდა ატაროს (გალ. 6:5). იეჰოვა შემცოდველს სთხოვს პასუხს მის მიერ არჩეული გზისთვის და არა თქვენ (ეზეკ. 18:20). აგრეთვე, არ დაადანაშაულოთ სხვები. დააფასეთ ის აღმზრდელობითი ზომები, რომლებსაც იეჰოვა მიმართავს. წინ აღუდექით სატანას და არა მწყემსებს, რომლებიც კრებას იცავენ (1 პეტ. 5:8, 9).

19, 20. ა) როგორ შეუძლიათ მშობლებს, რომელთა შვილებმა მიატოვეს იეჰოვა, მოერიონ ამ ტკივილს? ბ) რის იმედი უნდა ჰქონდეთ მათ?

¹⁹ თუ იეჰოვაზე განაწყენდებით, ეს ჩამოგაშორებთ მას. სინამდვილეში, თქვენი ოჯახის საყვარელ წევრს უნდა დაანახვოთ, რომ მტკიცედ გაქვთ გადაწყვეტილი, იეჰოვა ყველაფერზე წინ დააყენოთ, მათ შორის ოჯახზეც. ასეთ სიტუაციას რომ გაუმკლავდეთ, სულიერად უნდა იყოთ ძლიერი. ნუ განმარტოვდებით. გქონდეთ ურთიერთობა ერთგულ ქრისტიან და-ძმებთან (იგავ. 18:1). ლოცვაში გული გადმოუღვარეთ იეჰოვას (ფსალმ. 62:7, 8). ნუ ეძებთ მიზეზებს, ურთიერთობა გქონდეთ ოჯახის გარიცხულ წევრთან, თუნდაც იმეილის მეშვეობით (1 კორ. 5:11). აქტიურად მიიღეთ მონაწილეობა სულიერ საქმეებში (1 კორ. 15:58). ზემოხსენებული და ამბობს: „ვიცი, რომ უნდა დავკავდე იეჰოვას მსახურებით და შევინარჩუნო სულიერობა, რადგან როცა ჩემი ქალიშვილი დაუბრუნდება იეჰოვას, შევძლო მისი დახმარება“.

²⁰ ბიბლიაში წერია, რომ სიყვარულს „ყველაფრის იმედი აქვს“ (1 კორ. 13:4, 7). არაფერია ცუდი იმაში, თუ იმედი გექნებათ, რომ თქვენი ოჯახის საყვარელი წევრი დაუბრუნდება იეჰოვას. ყოველ წელს ბევრი შემცოდველი ინანიებს და უბრუნდება იეჰოვას ორგანიზაციას. როცა ისინი ინანიებენ, იეჰოვა არ არის მათზე განაწყენებული. პირიქით, ის მზად არის პატიებისთვის (ფსალმ. 86:5).

გააკეთეთ სწორი არჩევანი

21, 22. როგორ გამოიყენებთ ნების თავისუფლებას?

²¹ იეჰოვამ ნების თავისუფლებით შექმნა ადამიანები (წაიკითხეთ კანონის 30:19, 20). მაგრამ ამ თავისუფლებას სერიოზული პასუხისმგებლობა ახლავს თან. თითოეული ქრისტიანი უნდა დაფიქრდეს: „როგორი გზა ავირჩიე? ხომ არ ვრთავ ნებას სამუშაოს, კარიერას, დასვენებას, გართობასა და ოჯახს ჩამომაშოროს იეჰოვას?“

²² იეჰოვას ყოველთვის ეყვარება თავისი ხალხი. ერთადერთი რამაც შეიძლება ჩამოგვაშოროს მას, არის ის, თუ ავირჩევთ არასწორ გზას (რომ. 8:38, 39). რა თქმა უნდა, ეს არ უნდა დავუშვათ. მტკიცედ გქონდეთ გადაწყვეტილი, რომ არაფერმა ჩამოგაშოროთ იეჰოვას. მომდევნო სტატიაში შევეხებით ცხოვრების კიდევ 4 მხარეს, რომლებსაც არ უნდა დავრთოთ ნება, ჩამოგვაშოროს იეჰოვას.

1, 2. ა) რა არის სატანის „ზრახვები“? ბ) რა დაგვეხმარება, დავუახლოვდეთ ღმერთს?

იეჰოვა ღმერთმა ადამიანები ისე შექმნა, რომ მასთან დაახლოების მოთხოვნილება ჰქონოდათ. სატანას კი სურს, მის მსგავსად ვფიქრობდეთ, რომ არ გვჭირდება იეჰოვა. ეს არის სიცრუე, რომლითაც მან ევა აცდუნა ედემის ბაღში (დაბ. 3:4—6). ისტორიის მანძილზე ადამიანების უმეტესობას ბევრჯერ უფიქრია, რომ შეეძლოთ ღვთის გარეშე ცხოვრება.

² ჩვენ არ უნდა გავებათ სატანის მახეში, რადგან „ჩვენთვის უცნობი არ არის მისი ზრახვები“ (2 კორ. 2:11). სატანა ცდილობს, ცუდი არჩევანი გაგვაკეთებინოს და ჩამოგვაშოროს იეჰოვას. როგორც წინა სტატიაში დავინახეთ, შეგვიძლია სწორი არჩევანი გავაკეთოთ კარიერასთან, გართობასთან და ოჯახთან დაკავშირებით. ამ სტატიაში დავინახავთ, რომ თუ სწორი დამოკიდებულება გვექნება ტექნიკაზე, ჯანმრთელობაზე, ფულსა და სიამაყეზე, ეს ღმერთთან დაახლოებაში დაგვეხმარება (იაკ. 4:8).

ტექნიკა

3. როგორ შეიძლება ადამიანმა გამოიყენოს ტექნიკა?

³ მთელ მსოფლიოში უახლესი ტექნიკა ყველასთვის ხელმისაწვდომია. სათანადო სახით მისი გამოყენება მართლაც სასარგებლოა. მაგრამ თუ არასწორად გამოვიყენებთ მას, ამან შეიძლება ურთიერთობა გაგვიფუჭოს ჩვენს ზეციერ მამასთან. მოდი, ვისაუბროთ კომპიუტერზე. ჟურნალი, რომელსაც კითხულობთ, დაიბეჭდა და გამოიცა კომპიუტერული ტექნიკის გამოყენებით. კომპიუტერი შეიძლება კარგი საშუალება იყოს კვლევა-ძიებისთვის, საკომუნიკაციოდ და დროდადრო გასართობად. მაგრამ კომპიუტერულმა ტექნიკამ შეიძლება მასზე დამოკიდებული გაგვხადოს. მარკეტოლოგები არწმუნებენ ადამიანებს, რომ მათ უნდა შეიძინონ უახლესი ტექნიკა. ერთ ახალგაზრდა მამაკაცს იმდენად უნდოდა ტაბლეტი კომპიუტერი (უახლესი მოდელის პორტატიული კომპიუტერი), რომ მან მის შესაძენად მალულად საკუთარი თირკმელი გაყიდა. მართლაც, რა წინდაუხედავი ნაბიჯია!

4. რა გადაწყვეტილება მიიღო ერთმა ქრისტიანმა, რომელიც დიდ დროს უთმობდა კომპიუტერს?

⁴ კიდევ უფრო სამწუხაროა, თუ ტექნიკას არასწორად ვიყენებთ ან დიდ დროს ვუთმობთ მას და ამას ეწირება ჩვენი იეჰოვასთან პირადი ურთიერთობა. «ვიცი, ბიბლიაში წერია, რომ სულიერი საქმეებისთვის უნდა გამოვისყიდოთ „ხელსაყრელი დრო“, მაგრამ, როცა საქმე კომპიუტერს ეხება, ჩემი თავის ყველაზე დიდი მტერი ვარ», — ამბობს 28 წლის ჯონი.a ხშირად ის შუაღამემდე ინტერნეტში იყო. ჯონი ჰყვება: „რაც უფრო ვიღლებოდი, მით უფრო რთული იყო, შემეწყვიტა ჩეთაობა და ისეთი ვიდეორგოლების ყურება, რომლებიც ყოველთვის არ იყო მისაღები ქრისტიანებისთვის“. ეს ცუდი ჩვევა რომ მიეტოვებინა, ჯონმა ისე გააკეთა, რომ ძილის დრო რომ მოვიდოდა, კომპიუტერი თავისით ითიშებოდა (წაიკითხეთ ეფესოელების 5:15, 16 ).

5, 6. ა) რა პასუხისმგებლობები აკისრიათ მშობლებს? ბ) როგორ უნდა დარწმუნდნენ მშობლები, რომ შვილებს კარგი სამეგობრო წრე ჰყავთ?

⁵ მშობლებო, შვილებს ყველა ფეხის ნაბიჯი არ უნდა გაუკონტროლოთ, მაგრამ ყურადღება უნდა მიაქციოთ, თუ როგორ იყენებენ კომპიუტერს. ნუ მისცემთ უფლებას, დაათვალიერონ ისეთი ვებ-გვერდები, რომლებიც შეიცავს უზნეობისა და სპირიტიზმის ამსახველ კადრებს; არ დართოთ ნება, ითამაშონ ძალადობით აღსავსე თამაშებით და ურთიერთობა ჰქონდეთ ცუდ საზოგადოებასთან მხოლოდ და მხოლოდ იმიტომ, რომ რაღაცით დაკავდნენ და ხელი არ შეგიშალონ. თუ ასე მოიქცევით, ისინი იფიქრებენ: „რახან დედიკო და მამიკო ამას არ მიშლიან, ესე იგი ცუდი არაფერია ამაში“. მშობლებო, თქვენი პასუხისმგებლობაა, დაიცვათ თქვენი ბავშვები და მოზარდები ნებისმიერი რამისგან, რაც ჩამოაშორებს მათ იეჰოვას. ცხოველებიც კი იცავენ თავიანთ პატარებს საფრთხისგან. წარმოიდგინეთ, როგორ მოიქცეოდა დედა დათვი, თუ მის ბელებს საფრთხე დაემუქრებოდა (შეადარეთ ოსიას 13:8).

⁶ დაეხმარეთ თქვენს შვილებს, კარგი ურთიერთობა ჰქონდეთ სამაგალითო ქრისტიანებთან — ახალგაზრდებთან და ასაკოვნებთან. გახსოვდეთ, თქვენს შვილებს სჭირდებათ, რომ მათთან ერთად გაატაროთ დრო. დრო გამოყავით, რომ ერთად იხალისოთ, ითამაშოთ, აკეთოთ საოჯახო საქმეები და „დაუახლოვდეთ ღმერთს“.b

ჯანმრთელობა

7. რატომ გვინდა, ვიყოთ ჯანმრთელები?

⁷ როგორ გრძნობ თავს? ეს არის ჩვეული შეკითხვა, რომელიც ჩვენს მწარე რეალობას ასახავს. რადგან ჩვენმა წინაპრებმა სატანას ღვთისგან ჩამოშორების ნება მისცეს, ყველანი ავად ვხვდებით. ავადმყოფობა სატანის წისქვილზე ასხამს წყალს, ვინაიდან ასეთ დროს უფრო რთულია, ვემსახუროთ ღმერთს. და თუ მოვკვდებით, საერთოდ ვეღარ ვემსახურებით მას (ფსალმ. 115:17). ამიტომ გვინდა, რომ ყველაფერი გავაკეთოთ, რათა ჯანმრთელები ვიყოთ.c აგრეთვე უნდა გვაღელვებდეს ჩვენი და-ძმების ჯანმრთელობა და კეთილდღეობა.

8, 9. ა) ჯანმრთელობაზე ზრუნვასთან დაკავშირებით, როგორ შეგვიძლია უკიდურესობაში არ ჩავვარდეთ? ბ) რატომ არის კარგი სიხარულის შენარჩუნება?

⁸ მნიშვნელოვანია უკიდურესობაში არ ჩავვარდეთ. ზოგიერთი გარკვეულ დიეტაზე, მკურნალობასა თუ კოსმეტიკაზე უფრო გულმოდგინებით საუბრობს, ვიდრე სამეფოს შესახებ სასიხარულო ცნობაზე. მათ გულწრფელად სჯერათ, რომ ამით სხვებს ეხმარებიან. მიუხედავად ამისა, არ არის მართებული, სამეფო დარბაზებში შეხვედრების ან კონგრესების დაწყებამდე თუ დამთავრების შემდეგ რეკლამირება გავუწიოთ მკურნალობის მეთოდებსა თუ კოსმეტიკას. რატომ არ არის ეს მართებული?

⁹ ჩვენ ვიკრიბებით, რათა ვიმსჯელოთ სულიერ საკითხებზე და გვქონდეს სიხარული, რომელიც ღვთის წმინდა სულის ნაყოფია (გალ. 5:22). ასეთი შეხვედრების მიზანი არ არის, ვილაპარაკოთ რაიმე პროდუქციაზე ან მკურნალობის მეთოდებზე, მაშინაც კი თუ გვეკითხებიან, რადგან ამით სხვებს წავართმევდით სიხარულს (რომ. 14:17). თუ რას გადაწყვეტს ადამიანი მკურნალობასთან დაკავშირებით, ეს მისი პირადი საქმეა. არავის შეუძლია განკურნოს ყველა ავადმყოფობა. საუკეთესო ექიმებიც კი ბერდებიან, ავადდებიან და საბოლოოდ, კვდებიან. ჯანმრთელობაზე მეტისმეტი ზრუნვით ადამიანი სიცოცხლეს ვერ გაიხანგრძლივებს (ლუკ. 12:25). ამის საპირისპიროდ კი, „მხიარული გული მკურნალივით არის“ (იგავ. 17:22).

10. ა) რომელი თვისებებია ძვირფასი იეჰოვასთვის? ბ) როდის გვექნება საუკეთესო ჯანმრთელობა?

¹⁰ ცუდი არაფერია, თუ ვზრუნავთ საკუთარ გარეგნობაზე. მაგრამ გადამეტებულად არ უნდა ვეცადოთ ასაკისთვის დამახასიათებელი ყოველგვარი კვალის გაქრობას. ასაკისთვის დამახასიათებელი ესა თუ ის ნიშანი მოწიფულობის, ღირსებისა და შინაგანი სილამაზის მაჩვენებელია. მაგალითად, ბიბლიაში ნათქვამია: „ჭაღარა სილამაზის გვირგვინია, როცა სიმართლის გზაზე იპოვება“ (იგავ. 16:31). სწორედ ასეთი შეხედულება აქვს იეჰოვას ჩვენზე და ჩვენც ასე უნდა ვფიქრობდეთ საკუთარ თავზე (წაიკითხეთ 1 პეტრეს 3:3, 4 ). ნუთუ გონივრული იქნება, გავიკეთოთ არასაჭირო და პოტენციურად სახიფათო ქირურგიული ოპერაცია ან მივმართოთ სარისკო მკურნალობას მხოლოდ იმიტომ, რომ უფრო მომხიბლავი ვიყოთ? „იეჰოვას სიხარული“ არის ჩვენი შინაგანი სილამაზის წყარო, რომელზეც გავლენას ვერ ახდენს ასაკი და ავადმყოფობა (ნეემ. 8:10). სრულყოფილი ჯანმრთელობა და ახალგაზრდული სილამაზე მხოლოდ ახალ ქვეყნიერებაში დაგვიბრუნდება (იობ. 33:25; ეს. 33:24). მანამდე კი სიბრძნისა და რწმენის გამოვლენა დაგვეხმარება, შევინარჩუნოთ იეჰოვასთან ახლო ურთიერთობა და კმაყოფილი ვიყოთ იმით, როგორებიც ვართ (1 ტიმ. 4:8).

ფული

11. როგორ შეიძლება ფული იქცეს მახედ?

¹¹ ფული არ არის ბოროტება და არც ბიზნესით დაკავებაა არასწორი (ეკლ. 7:12; ლუკ. 19:12, 13). მაგრამ თუ ფულისადმი სიყვარულს განვივითარებთ, ეს ჩამოგვაშორებს იეჰოვას (1 ტიმ. 6:9, 10). „ქვეყნიერების საზრუნავი“ ანუ გადამეტებული ზრუნვა იმაზე, რაც გვჭირდება, სულიერად დაგვასუსტებს. „სიმდიდრის მაცდუნებელ ძალას“ შეუძლია გვაფიქრებინოს, რომ სიმდიდრეს მოაქვს მარადიული ბედნიერება და უსაფრთხოება (მათ. 13:22). იესომ გარკვევით თქვა, რომ „ვერავინ“ იქნება ღვთის მონაც და სიმდიდრისაც (მათ. 6:24).

12. რა ფინანსური „მახეებია“ გავრცელებული დღეს და როგორ შეიძლება ავირიდოთ ისინი თავიდან?

¹² ფულისადმი არასწორმა დამოკიდებულებამ შეიძლება ცუდი საქციელისკენ გვიბიძგოს (იგავ. 28:20). სწრაფად და ადვილად გამდიდრების დაპირებით მოხიბლულმა ზოგმა ქრისტიანმა იყიდა ლატარიის ბილეთები; სხვები ჩაერთნენ მრავალსაფეხურიან მარკეტინგულ პროგრამებში და კრების წევრებიც კი აიყოლიეს; ბევრი აცდუნა ჩადებული ინვესტიციებიდან არარეალურად დიდი მოგების დაპირებამ. ნუ გახდებით სიხარბის ან თაღლითობის მსხვერპლი. გამოავლინეთ გამჭრიახობა. როგორც წესი, შეუძლებელია, რომ სწრაფად იშოვოთ ბევრი ფული.

13. როგორი თვალსაზრისი აქვს იეჰოვას ფულზე ქვეყნიერებისგან განსხვავებით?

¹³ როდესაც პირველ ადგილზე „სამეფოს და მამის სიმართლეს“ ვაყენებთ, იეჰოვა აკურთხებს ჩვენს ძალისხმევას და აუცილებლით უზრუნველგვყოფს (მათ. 6:33; ეფეს. 4:28). მას არ უნდა, რომ შეხვედრების დროს ჩაგვეძინოს იმის გამო, რომ ძალიან ბევრს ვმუშაობთ; ან ვისხდეთ სამეფო დარბაზში და ფულზე ვფიქრობდეთ. დღეს ბევრს სჯერა, რომ თუ საკუთარ თავს ფულის შოვნას მიუძღვნიან, მომავალში ფინანსურად უზრუნველყოფილი იქნებიან და ასაკში შესვლისას ცხოვრება არ გაუჭირდებათ. ისინი თავიანთ შვილებსაც იმავე მატერიალურ მიზნებს უსახავენ. იესომ თქვა, რომ ასეთი აზროვნება არაგონივრულია (წაიკითხეთ ლუკას 12:15—21 ). ასეთი აზროვნების ადამიანები გვახსენებენ გეხაზს, რომელიც ფიქრობდა, რომ შეეძლო თავისი სიხარბეც დაეკმაყოფილებინა და იეჰოვასთან ურთიერთობაც არ დაეკარგა (2 მეფ. 5:20—27).

14, 15. რატომ არ უნდა ვიფიქროთ, რომ ფული უსაფრთხოების გარანტიაა? მოიყვანეთ მაგალითი.

¹⁴ ამბობენ, რომ თუ არწივი ბრჭყალებს არ გაუშვებს მეტისმეტად დიდ თევზს, შესაძლოა, მისი ამოთრევის მცდელობისას დაიხრჩოს. შეიძლება თუ არა მსგავსი რამ დაემართოს ქრისტიანს? „მე ძალიან ხელმომჭირნე ვარ, — ამბობს ერთი უხუცესი სახელად ალექსი. — თუ ბოთლიდან ცოტა მეტი შამპუნი გადმომესხმება, ისევ უკან ბოთლში ვასხამ“. მიუხედავად ამისა, ალექსმა საფონდო ბირჟაზე ვაჭრობას მიჰყო ხელი და ფიქრობდა, რომ ის მალე დაანებებდა თავის ძველ სამუშაოს თავს და დაიწყებდა პიონერად მსახურებას. მაგრამ ის უფრო და უფრო გაიტაცა ბიზნეს შეთავაზებებისა და ბაზრის მდგომარეობის შესწავლამ. თავისი დანაზოგი და ბროკერებისგან ნასესხები ფული დააბანდა იმ აქციებში, რომელთა ღირებულების სწრაფ ზრდას ვარაუდობდნენ. მაგრამ მოვლენები საპირისპიროდ განვითარდა — აქციების ფასი მკვეთრად დაეცა. „ვიმედოვნებდი, რომ ჩემს თანხას დავიბრუნებდი, — ამბობს ალექსი. — ვფიქრობდი, რომ თუ ცოტას მოვიცდიდი, აქციების ფასი კვლავ გაიზრდებოდა“.

¹⁵ თვეების განმავლობაში ალექსი მარტო ამაზე ფიქრობდა. უჭირდა სულიერ საქმეებზე კონცენტრირება და ძილი გაუკრთა. მაგრამ ამ აქციების ფასი აღარ გაზრდილა. მან დაკარგა თავისი დანაზოგი და მოუწია სახლის გაყიდვა. „ჩემს ოჯახს დიდი ტკივილი მივაყენე“, — ამბობს ის. მაგრამ ეს მისთვის კარგი გაკვეთილი იყო. ალექსმა თქვა: „ახლა ვიცი, რომ ვინც სატანის ქვეყნიერებაზე დაამყარებს იმედს, გულგატეხილი დარჩება“ (იგავ. 11:28). მართლაც, თუ იმედს ჩვენს დანაზოგზე, ინვესტიციებსა თუ ფულის შოვნის უნარზე ვამყარებთ, ეს იგივეა, რომ დაიმედებული ვიყოთ „ამ ქვეყნიერების ღმერთზე“, სატანაზე (2 კორ. 4:4; 1 ტიმ. 6:17). ალექსმა გაიმარტივა ცხოვრება „სასიხარულო ცნობის გულისთვის“. ამან ის და მისი ოჯახი უფრო ბედნიერი გახადა და დააახლოვა იეჰოვასთან (წაიკითხეთ მარკოზის 10:29, 30).

სიამაყე

16. რა სხვაობაა მართებულ და უმართებულო სიამაყეს შორის?

¹⁶ მართებული სიამაყე შეიძლება კარგი იყოს. მაგალითად, ჩვენ ყოველთვის უნდა გვეამაყებოდეს, რომ ვართ იეჰოვას მოწმეები (იერ. 9:24). ზომიერად საკუთარი თავის პატივისცემა დაგვეხმარება, მივიღოთ კარგი გადაწყვეტილებები და ვიცხოვროთ მაღალზნეობრივი ნორმებით. მაგრამ თუ ადამიანი მეტისმეტად აფასებს საკუთარ თავს და მდგომარეობას, ამან შეიძლება ჩამოაშოროს ის იეჰოვას (ფსალმ. 138:6; რომ. 12:3).

17, 18. ა) მოიყვანეთ ბიბლიაში მოცემული თავმდაბალი და ამაყი ადამიანების მაგალითები. ბ) როგორ არ დართო ერთმა ძმამ სიამაყეს ნება, ჩამოეშორებინა ის იეჰოვას?

¹⁷ ბიბლიაში მოცემულია როგორც ამაყი, ისე თავმდაბალი ადამიანების მაგალითები. მეფე დავითი თავმდაბლურად ეძებდა იეჰოვას ხელმძღვანელობას, რის გამოც ღმერთმა აკურთხა ის (ფსალმ. 131:1—3). მაგრამ იეჰოვამ დაამდაბლა ამაყი მეფეები — ნაბუქოდონოსორი და ბელშაცარი (დან. 4:30—37; 5:22—30). დღესაც არის ისეთი სიტუაციები, როდესაც იცდება ჩვენი თავმდაბლობა. 32 წლის მომსახურე რაიანი გადავიდა ახალ კრებაში. „ველოდი, რომ მალე უხუცესად დამნიშნავდნენ, — ჰყვება ის. — მაგრამ გავიდა წელი და არაფერი არ შეცვლილა“. გაბრაზდებოდა ის და იფიქრებდა, რომ უხუცესები მას სათანადოდ არ აფასებდნენ? შეწყვეტდა რაიანი კრებებზე დასწრებას და დართავდა სიამაყეს ნებას, ჩამოეშორებინა ის იეჰოვას და მის ხალხს? თქვენ როგორ მოიქცეოდით?

¹⁸ რაიანი იხსენებს: „ჩვენს პუბლიკაციებში წავიკითხე ყველაფერი, რის წაკითხვაც შეიძლებოდა ხანგრძლივ მოლოდინთან დაკავშირებით“ (იგავ. 13:12). „მივხვდი, რომ მჭირდებოდა მოთმინებისა და თავმდაბლობის სწავლა. იეჰოვასთვის უნდა მიმეცა საშუალება, რომ ჩემთვის ესწავლებინა“, — ამბობს ის. კრებაში და მსახურების დროს რაიანი უფრო მეტად სხვებზე ზრუნავდა, ვიდრე საკუთარ თავზე. მალე მან რამდენიმე ბიბლიის შესწავლა დაიწყო. „წელიწად-ნახევრის შემდეგ უხუცესად დავინიშნე, რაც ჩემთვის მოულოდნელი იყო, — ამბობს რაიანი. — მსახურება იმდენად დიდ სიამოვნებას მანიჭებდა, რომ ამაზე უკვე აღარ ვწუხდი“ (წაიკითხეთ ფსალმუნის 37:3, 4 ).

დარჩით იეჰოვასთან

19, 20. ა) როგორ დავრწმუნდეთ, რომ არანაირი ყოველდღიური საქმიანობა არ ჩამოგვაშორებს იეჰოვას? ბ) როგორ მივბაძოთ მათ, ვინც იეჰოვასთან ახლო ურთიერთობა შეინარჩუნეს?

¹⁹ ამ და წინა სტატიაში განხილულ საკითხებს ცხოვრებაში სათანადო ადგილი უნდა მივუჩინოთ. გვეამაყება, რომ იეჰოვას მსახურები ვართ. ბედნიერი ოჯახი და კარგი ჯანმრთელობა იეჰოვასგან მიღებული უძვირფასესი საჩუქარია. გვესმის, რომ სამუშაო და ფული გვეხმარება ჩვენი მოთხოვნილებების დაკმაყოფილებაში. ვიცით, რომ დასვენება და გართობა ძალებს აღგვიდგენს, ხოლო ტექნიკას დიდი სარგებლობის მოტანა შეუძლია. მაგრამ ნებისმიერი მათგანი ჩამოგვაშორებს იეჰოვას, თუ მათ მეტისმეტ დროს დავუთმობთ ან დავკავდებით სულიერი საქმეების ხარჯზე.

²⁰ რა თქმა უნდა, სატანასაც ეს უნდა. მაგრამ თქვენ შეგიძლიათ ამისგან დაიცვათ თქვენი ოჯახი და თქვენი თავი (იგავ. 22:3). დაუახლოვდით იეჰოვას და შეინარჩუნეთ მასთან ახლო ურთიერთობა. ჩვენ უამრავი ბიბლიურ მაგალითი გვაქვს, რომლებიც ამაში დაგვეხმარება. ნოე და ენოქი დადიოდნენ „ჭეშმარიტ ღმერთთან ერთად“ (დაბ. 5:22; 6:9). მოსე „მტკიცე იყო, თითქოს ხედავდა მას, ვინც უხილავია“ (ებრ. 11:27). იესოს ღმერთი ყოველთვის მხარს უჭერდა, რადგან ის გამუდმებით ზეციერი მამის მოსაწონად იქცეოდა (იოან. 8:29). მიჰბაძეთ მათ. „ყოველთვის ხარობდეთ; განუწყვეტლივ ილოცეთ; ყველაფრისთვის მადლობლები იყავით“ (1 თეს. 5:16—18). დაე, არაფერმა, ჩამოგაშოროთ იეჰოვას!